Yi jakol Jonás cuybil paj tetz Kataj Ryos
2
1 I tzun te yi at Jonás le cꞌuꞌl yi cay nintzun oc iꞌ-tz tan nachleꞌn Kataj. Nin je tal iꞌeꞌj:2 “Taꞌ te yi txant tan inquimeꞌn, ja cuꞌ intziꞌ teruꞌ nin ja el kꞌajabuꞌ sweꞌj.a Sken ul yi quimichil tzinwutz, poro yi injakol ẍchꞌeybil wetz teruꞌ, ja chin ẍchꞌeyajuꞌ.b 3 Ja chimben joꞌliluꞌ jalen xe mar. Ja chimben mulkꞌuj, nin ja nopon jalen txeꞌ yi mar.c 4 Sken intxum yi nsken neꞌl te cꞌuꞌluꞌ.d Nchaꞌtz sken intxum yi quiꞌt nopon junt tir xe caꞌluꞌ yi wiꞌnin xanil. 5 Na sken chin cyaj quen jalen xe mar. Sken nopon jalen xe aꞌ. Nchaꞌtz, sken baj sucul tib yi eꞌchk xtzeꞌ yi at xe mar te inwiꞌ. 6 Sken nopon jalen txeꞌ yi mar yi chin tzꞌoꞌtz nin.e Ej nin sken wiꞌt intxum yi choꞌn ẍchinquimoktz. Poro ntyoẍ teruꞌ Wajcaw, yi iluꞌ teruꞌ yi iluꞌ inRyosil, ja xcyeꞌuꞌ tan incolpeꞌn tkꞌab quimichil.
7 ”Ej nin yi innachoneꞌn teꞌj yi txant tan inquimeꞌn, nintzun ul txꞌakx tincꞌuꞌl tan woqueꞌn tan jakleꞌn ẍchꞌeybil wetz teruꞌ. Nin ja tbituꞌ intziꞌ inkul, wech na choꞌn atuꞌ jalen xe caꞌluꞌ yi wiꞌnin xanil. 8 Cyakil yi eꞌ yi choꞌn kꞌuklij chicꞌuꞌl te eꞌchk ryos yi banij cuntuꞌ quitaneꞌn, qui na chixom te yi teruꞌ tajbiluꞌ. 9 Poro yi in wetz, iluꞌ jun cꞌoloj Wajcaw, chintyoẍink teruꞌ, tzimpateꞌ intxꞌixwatz swutzuꞌ. Nin nelpon cuꞌn te inyol yi ja wiꞌt insuk teruꞌ,f na ntin cuꞌn iluꞌ na xcyeꞌuꞌ tan kacolpeꞌn,” stzun Jonás bantz le oración, le cꞌuꞌl yi cay.
10 Nintzun oc tkꞌol Ryos tajtzaꞌkl yi cay tan sajeꞌn xaꞌpil Jonás. Choꞌn tzun beneꞌntz tan xaꞌpeꞌntzaj stzi aꞌ.