Jonás 1

JONÁS

Yi pajol Jonás yi caꞌwl Ryos

1 I tzun bantz nin jilon Kajcaw tetz Jonás, yi cyꞌajl Amitai. 2 Je yol Kajcaweꞌj ban tetz Jonás: “Jonás or tzabeneꞌn le yi jun chumam tnum Nínive, nin alaj scyetz cyakil wunak yi copon inxitul chitnumil, na ja wit stziblal yi eꞌ len cuꞌn juchul il.”

3 Poro yi Jonás, quinin ben iꞌ chi yi tal Kajcaw tetz, ma na nin el ojkuj iꞌ swutz Ryos. Choꞌn tzun beneꞌn iꞌ-tz le amaꞌl Jope, yi at tzi mar. Nin nojpon iꞌ-tz te jun barc yi eleꞌn tlen tuꞌ atit, tan tponeꞌn jalen Tarsis. Ẍchojol tzun iꞌ yi pasajtz nin ocnintz tul tan toponeꞌn jalen Tarsisaꞌtz. 4 Poro yi Kajcaw, nintzun saj jun chin wutzileꞌn cyekꞌekꞌ taꞌn wi mar. Nintzun jeꞌ ẍchekꞌul tib yi mar. Nin txant nin qui na ben mulkꞌuj yi barc xe mar.

5 Ma yi eꞌ akꞌunsom tul yi barc, wiꞌnin tzun chixobeꞌntz, nin ẍchijunal len eꞌ octz tan nachleꞌn chiryosil. Ej nintzun baj len chijoꞌlil tektz yi barc wi mar, tan sasaneꞌn.

Ma Jonás nintzun cuꞌ iꞌ-tz tcꞌuꞌl cuꞌn yi barc kale na oqueꞌt eꞌchk ektz, nin tzun wit cuꞌntz. 6 Ma yi tilol yi ajcaw tetz yi barc yi quiꞌct Jonás at ẍchixoꞌl, cweꞌn tzun iꞌ-tz tan joyleꞌn. Ma yi jaleꞌn taꞌn, nintzun taltz tetz:

—¡Jonás! ¿Mbi tzuntz chin watum nin aẍ? Elk awatl. Nachaj aRyosil. Loꞌk tzꞌel kꞌajab iꞌ skeꞌj. Nink kaclax taꞌn, chij yi ajcaw bantz tetz Jonás.

7 I tzun yi eꞌ akꞌunsom cwent yi barc, nin cyal squibil quib:

—Katxꞌilunk teꞌj, tan kilol naꞌ nin tzun jun skaxoꞌl yi aj paj te eꞌchk il yi mmuꞌl skawutz, cheꞌch bantz.

Cyoqueꞌn tzuntz tan txꞌiluꞌn. Choꞌn tzun nojeꞌn quen te Jonás. 8 Cyalol tzuntz tetz Jonás:

—Altzaj sketz mbi tzuntz yi mmuꞌl yi ileꞌj skawutz. ¿Mbi awakꞌunil at? ¿Naꞌ ncẍsajeꞌt? ¿Naꞌ scyetz atanum? ¿Mbi jilwutz wunakil aẍ? cheꞌch na ban quentz tetz.

9 —Yi in wetz in hebrey, nin na wek ẍchiꞌ yi Ryos yi at tziꞌn tcyaꞌj, yi bnol tetz yi mar tu yi wuxtxꞌotxꞌ. 10-11 Poro yi in wetz ja impaj caꞌwl iꞌ nin ja neꞌl ojk swutz, stzun Jonás bantz scyetz yi eꞌ akꞌunsomaꞌtz tetz yi barcaꞌtz.

Yi quibital yi yol Jonás, nin yi beneꞌn quilol yi nim tcunin jeꞌn ẍchekꞌul tib yi mar, mast cunin tzun chixobeꞌntz.

Beneꞌn tzun chijakoltz tetz Jonás:

—¿Nxac tzun mmapaj caꞌwl yi aRyosil? ¿Ma jaluꞌ mbil kaban tzaweꞌj, bantz taneweꞌn yi cyekꞌekꞌ, tu yi pakꞌbil mar? cheꞌch bantz.

12 —Chin chijoꞌlninuꞌ wi mar, tan taneweꞌn yi pakꞌbil mar. Na na el intxum tetz yi iꞌtz tan impaj yi ja ul yi jun ilaꞌtz skawutz, stzun Jonás bantz scyetz.

13 Ma yi eꞌ akꞌunsomaꞌtz, qui nin cyocsaj yi yol Jonás nin eꞌ oc iltz tan toleꞌn chibarc tan telemponeꞌn kloꞌ tzi mar. Poro quiꞌ nin, na nim tcunin na ẍchekꞌeꞌn tib yi mar. 14 Cweꞌn tzun chiwutz tetz Kataj, i tzun cyaltz: “Taꞌ quiꞌk kaquim tanuꞌ tan paj tuꞌ yi jun yajeꞌj. Ej nin ko quiꞌc tetz til, quiꞌc ketz kapaj teꞌj kol quim kaꞌn. Na yi iluꞌ teruꞌ, iluꞌ yi wiꞌtz Ajcaw, nin ban sbanuꞌ yi tajbiluꞌ skeꞌj,” cheꞌch bantz tetz Kataj.

15 Beneꞌn tzun chijoꞌlil Jonástz wi mar. Taneweꞌn nin ban yi ẍchamil yi pakꞌbil mar. 16 Yi quilol yi eꞌ akꞌunsom tetz barc yi taneweꞌn yi pakꞌbil mar, wiꞌnin tzun cyekal ẍchiꞌ Kataj Ryos. Nintzun cyoytz jun chitxꞌixwatz swutz Ryos, nin eꞌ suk eꞌchk takleꞌn tetz Ryos.

17 Poro list tzun taneꞌn jun chin wutzileꞌn cay tan Kataj Ryos xe aꞌ tan bekꞌleꞌn nin Jonás. Ox tzun kꞌej tu ox akꞌbal aꞌtij Jonás le cꞌuꞌl te yi cayaꞌstz.