2
1 Axwok aj Nínive, chopon chan jun cꞌoloj sanlar yi chixcyek tan ixiteꞌn cuꞌn. Chaꞌstzun te, ¡nqueꞌn wok il tan wartiꞌn wiꞌak tapijil itnumil! ¡List iwutz tan xmayeꞌn nin yi nim beꞌ! ¡Cꞌalwok quen bin yi ispar xe icꞌuꞌl! ¡Quiwit tan oyintziꞌ!a 2 Yil xit itanum, tzꞌocpon tzun Kataj Ryos tan chitxicbajeꞌn yi eꞌ xonl Jacow junt tir. Ej nin sjalok junt tir chikꞌej yi eꞌ aj Israel. Sjalok junt tir chikꞌej chi sajleꞌn te ntaxk el alkꞌaꞌn tircuꞌn chimeꞌbiꞌl, na niꞌcuꞌn eꞌ ban cyen chi jun wiꞌ uva yi tamij cuꞌn ban cyakil yi wutz.
3 Chin xoꞌwbil nin stzꞌakl yi makbil flech yi cyꞌaꞌn cyaꞌn yi jun cꞌoloj sanlaraꞌtz, na chin cyak nin, nin nchaꞌtz taneꞌn yi beꞌch cyetz, cyak len cuꞌn. List quitaneꞌn tan oyintziꞌ tziteꞌj axwok aj Nínive. Yi chicareꞌt tetz oyintziꞌ niꞌcuꞌn chi najk tincꞌun kꞌakꞌ teꞌj, nin yi chichej, nternin na chitzꞌitpun tan juteꞌn eꞌchk careꞌt tan cyoqueꞌn tan oyintziꞌ tziteꞌj.
4 Chin lajkeꞌl nin na chixon eꞌchk careꞌt cyakꞌun. Jalcunin na chopon, nin jalcunin na chipakxij junt tir. Niꞌcuꞌn eꞌ tu jun bocꞌoj kꞌakꞌ, nin na choꞌjkel chi taneꞌn yi tojkbil jun xlitzꞌ.
5 Yi na cawun chireyil yi eꞌ icontr tan chibeneꞌn tan oyintziꞌ, chin lajkeꞌl nin na chiben tan cyoponeꞌn te yi tapij yi at solteꞌj yi itnumil.
6 Sjakxok yi makbil tzanlaꞌ, nin tzꞌeluꞌl yi tzanlaꞌ tibaj yi caꞌl yi ireyil nin xcyek tan kꞌucheꞌn cuꞌn.
7 Nin tzꞌelpon ojkuj yi reina. Choꞌn tzꞌopon tul jun amaꞌl yi tzꞌinunin tuꞌ, nin ẍchixomok nin yi eꞌ tetz ẍchakum teꞌj. Ẍchokꞌok, nin eꞌ teꞌn chocpon tan loꞌonseꞌn chiwankil tan yi bis yi ateꞌ cuꞌnt.
8 Ej, nin chelpon ojkuj tircuꞌn yi eꞌ wunak le tnum, chi na el jakxuj tzanlaꞌ tul tkambil aꞌ, yi na jeꞌ kop. ¡Chꞌiwwok! ¡Quil cxeꞌl ojkuj! cheꞌch sbneꞌ, poro cyaꞌl jun stocsajeꞌ yi caꞌwl.
9 Chocpon tzun yi eꞌ icontr tan talkꞌeꞌn len cyakil yi sakal tu oro yi at tzituchꞌ, na qui nin bajsbeꞌn tetz imeꞌbiꞌl yi at.
10 Xitok tircuꞌn yi tnum, nin chin tzꞌinunin tunin sbneꞌ tircuꞌn yi tnum Nínive. Skejk chitziꞌ yi eꞌ wunak tan xoꞌw, tircuꞌn ẍchilucnek len, tzꞌul num chiwankil, nin chin slakꞌlujt nin sbneꞌ chiwutz tan yi xoꞌw yi ateꞌ cuꞌnt.
11 ¿Naꞌl chicolwit quib yi eꞌ aj Nínive yi niꞌcuꞌn eꞌ tu león sajleꞌn yi chin xoꞌwbil nin chiwutz? ¡Cyaꞌl! ¿Naꞌ atit cyent yi chijulil kale molij cheꞌt yi eꞌ niꞌ león? Quiꞌc, quiꞌct chitziblal. Wech na cyaꞌl nin jun na ocpontz ẍchinakaꞌjil sajleꞌn, cyaꞌl nin jun najk nimsaj cꞌuꞌl tan tocomponeꞌn tan chixuxeꞌn.
12 Yi eꞌ aj Nínivejaꞌtz, niꞌcuꞌn banakeꞌ tan cambeꞌn chimeꞌbiꞌl, chi na ban jun león tan biyleꞌn jun txuc. Nin na opon tan jatxleꞌn ẍchiwutz yi tij tu tal. Nin na noj chijulil tan chiwaꞌbeꞌn. Niꞌcuꞌn tzun banakeꞌ yi eꞌ aj Nínive, na nin noj chitnumil cyaꞌn tan yi eꞌchk takleꞌn yi ncyalkꞌaj.
Tzꞌocpon Kataj Ryos tan xiteꞌn cuꞌn yi tnum Nínive
13 Je na tal Kataj Ryos yi cyaꞌl na xcyeꞌ quen teꞌj:
“Bitwok tzaj axwok aj Nínive, nocpon tan oyintziꞌ tziteꞌj. Nin tzꞌocpon intꞌinol kꞌaꞌkl tircuꞌn yi eꞌchk icareꞌt tetz oyintziꞌ, nin jalt stzaꞌjil scyajk cyen. Nocpon tan chibiyleꞌn cuꞌn yi eꞌ isanlar yi niꞌcuꞌn chitxamil tu jun neꞌẍ león. Ẍchiquimok tan spar. Nin quiꞌt cxoꞌcwok tan talkꞌeꞌn chimeꞌbiꞌl yi eꞌ mas nación. Nin quiꞌt chiꞌlwij junt tir yi eꞌ ichakum yi eꞌ aj peyunl tetz alcawal.”