3
1 Lastum axwok, yi axwokaꞌtz yi chin biyol nak nin axwok, yi ntin laꞌjil na ital, nin yi ntin oyintziꞌ itaꞌn. Ej nin ntin alakꞌ itaꞌn scyeꞌjak yi eꞌ mas nación. Lastum qui na cyaj cyen itilol yi jun iyaꞌplaꞌtz.2 Ma jaluꞌ, wiꞌnin na kubit nin yi na xicyꞌcan charyon wutz chicoc yi eꞌ chej. Wiꞌnin cyojkeleꞌn eꞌchk careꞌt tan cyoponeꞌn tan ibiyleꞌn cuꞌn. ¡Wiꞌnin wocꞌneweꞌn quikan yi eꞌ chej yi na choꞌjkel! Elnakeꞌ nin yi eꞌ careꞌt tcyaꞌj tan cyoponeꞌn tan ibiyleꞌn cuꞌn.
3 ¡Wiꞌnin chibeneꞌn ẍchiwutz yi eꞌ sanlar yi ateꞌ teꞌj chej! ¡Wiꞌnin litzꞌuneꞌn chispar, tu chilans! ¡Miliꞌn qꞌuixpnak ateꞌ! Ej nin quintech nin almaꞌ pacꞌlcheꞌ. ¡Qui nin ajlbeꞌn cyetz! At wiꞌnin almaꞌ wuxtxꞌotxꞌ, nin at eꞌ yi na chijeꞌ tzotpuj scyeꞌj.
4 Axwok aj Nínive, tzꞌul yi xtxolbilaꞌtz tziwutz tan paj yi niꞌcuꞌn itajtzaꞌkl tu jun xnaꞌn aj bnol tetz, yi chin yubeꞌn nin. Ja xcyeꞌ tan payseꞌn chiwutz yi eꞌchk tnumaꞌtz takꞌon yubel. Chin list nin axwok tan chicambajeꞌn yi eꞌchk tnum scyuchꞌ yi eꞌ nación takꞌon eꞌchk ipisyoꞌ.
5 Ma je na tal Kataj Ryos, yi cyaꞌl na xcyeꞌ quen teꞌj: “Bitwok tzaj axwok aj Nínive, list wutaneꞌn tan oyintziꞌ tziteꞌj, nin niꞌcuꞌntz chi nink tzinkꞌolp len yi beꞌch itetz, tan teleꞌn itxꞌix ẍchiwutz cyakil jilwutz wunak.
6 Mben injoꞌlil cachiꞌ tiwutz, nin tzꞌelpon itxꞌix waꞌn ẍchiwutz wunak. Cxocpon tetz chitzeꞌlbeꞌtz cyakil wunak beneꞌn tziꞌn.
7 Cyakil yi eꞌ yi na quilnin yi mbi na bajij tziteꞌj, tzꞌelpon chiẍkansal quib, nin scyaleꞌ: ‘Ja xit yi tnum Nínive jaluꞌ.’ Ej nin cyaꞌl jun tzꞌelpon kꞌajab tziteꞌj. Cyaꞌl jun tzꞌocpon tan mayseꞌn icꞌuꞌl.
8 ¿At ptzun mas iteri chamil swutz yi tnum Tebas yi cuꞌnak ixitul, yi choꞌn at stziꞌ yi tzanlaꞌ Nilo, nin yi cyaꞌl jun ocpon kloꞌ tul tan paj yi aꞌ yi at solteꞌj? Na yi tzanlaꞌaꞌtz niꞌcuꞌn tu jun tapij solteꞌj yi tnumaꞌtz tan chicolcheꞌn kloꞌ yi eꞌ wunak, poro qui nin eꞌ clax.
9 Wech yi tnum Etiopía tu Egipto yaꞌstzun chꞌeyanl cyetz banak, scyuchꞌ yi eꞌ aj Fut scyuchꞌ yi eꞌ aj Libia. Yaꞌstzun chichꞌeyum ban, poro qui nin eꞌ clax.
10 Ma na ja nin cheꞌl cuꞌn swutz. Yi eꞌ chinitxajil oc pokꞌloꞌn chiwiꞌ lakak ẍchicy beꞌ. Nin eꞌ oc chicontr tan txꞌiluꞌn scye yi eꞌ yi at chikꞌej, yi eꞌ wiꞌtz cyajcawil. Nin eꞌ cuꞌ-tz cyaꞌn tcaren tan chibeneꞌn tetz esclaw.
11 Niꞌcuꞌn tzun sbajoktz tziteꞌj itetz axwok aj Nínive, copon subij itajtzaꞌkl, nin ncxben pres. Nchaꞌtz ax cxelpon ojkuj tan coloꞌn ib, poro cyaꞌl jun sclaxok tzitetz.
12 Tircuꞌn yi eꞌchk chin icaꞌl yi nim wutz tkan yi na xcon tzitetz tan coloꞌn ib, niꞌcuꞌn sbneꞌ chi na ban jun wiꞌ ibẍ yi jotl cyen tunin wutz yi neꞌẍeꞌt, nin yi na jeꞌ chucaꞌn na saj chit yi wutz. Niꞌcuꞌn tzun tzibneꞌ itetz yil jeꞌ chucaꞌn yi icaꞌlaꞌtz, ẍchicuꞌul txꞌakx le chitziꞌ icontr.
13 Yi eꞌ isanlar niꞌcuꞌn quitaneꞌn chi ik jun cꞌoloj xnaꞌn. Nin yi eꞌchk puertil yi tnum jakxok len ẍchiwutz yi eꞌ icontr. Na, xcyek yi kꞌakꞌ tan loꞌonseꞌn yi tzꞌamol tetz.
14 Nqueꞌnwok bin tan molcheꞌn quen aꞌ le itnumil, te ntaxk xeꞌtij yi oyintziꞌ. Nqueꞌnwok il tan banleꞌn baꞌn teꞌjak eꞌchk tapijil yi itnumil kale na icolwit itib. Nqueꞌnwok chan tan xyulkꞌeꞌn xkꞌol tan banleꞌn mas xan, tan laqꞌueꞌn yi tapij.
15 Poro quiꞌc ltakꞌ, na cxtzꞌeꞌokwok tan kꞌakꞌ, nin cxquimok len tan spar. Cxsotzok cunin chi na chisotz jun cꞌoloj sacꞌ tan kꞌakꞌ. Baꞌn pucꞌun iwutz, chi na chipucꞌun yi eꞌ sacꞌ, poro quiꞌc ltakꞌ.
16 Quiꞌc na ban yi ko at jun cꞌoloj aj lijens tzixoꞌl, quiꞌc na ban kol chipucꞌun chi tajlal yi txꞌuml tcyaꞌj, na niꞌcuꞌn sbajok scyeꞌj chi na bajij scye jun cꞌoloj sacꞌ yi na cheꞌl xicyꞌin, yi na chitxꞌakx cuntuꞌtz.
17 Nchaꞌtz yi eꞌ wiꞌtz itajcawil, niꞌcuꞌn ẍchibneꞌ chi na chiban yi eꞌ sacꞌaꞌtz. Yi eꞌ wutzileꞌn ajcaw, chocpon chi jun cꞌoloj sacꞌ tul tiemp tetz cheꞌw yi buꞌjlcheꞌ cuntuꞌ, poro yi na kꞌulkꞌax yi kꞌej, na cheꞌl xit, nin quiꞌt na kil naꞌ na chaꞌjnint.
18 ”Iluꞌ rey cwent Nínive, lastum aẍ, na ja chiquim len yi eꞌ abajxom jaluꞌ, yi eꞌ yi ateꞌ tzaj jakꞌ acaꞌwl. Ja chuꞌjeꞌ yi eꞌaꞌtz tetz ben kꞌej ben sak, yi eꞌ yi chin cham nin eꞌ taneꞌn. Ej nin ja cheꞌl xit yi eꞌ awunakil wutz wutz, nin cyaꞌl jun at tan chimolcheꞌn cuꞌn junt tir.
19 ¡Nin quiꞌc tzꞌacꞌbil at tan stzꞌaqueꞌn yi qꞌuixpnak yi at te iwankil, nin quil tzꞌicyꞌ yi eꞌchk qꞌuixpnakaꞌtz! Cyakil yi eꞌ wunak yil quibit yi stziblalaꞌtz ẍchitzatzink. Chocpon tan pokꞌleꞌn chikꞌab tan biꞌl yi tzatzin yi ateꞌ cuꞌnt, na ja chitij len qꞌuixcꞌuj jakꞌ icaꞌwl.”