Habacuc 2

Yi xtxolbil yi ẍchaj Kataj tetz Habacuc te yi mbi sbajok scyeꞌj yi eꞌ mal wunak

1 Itzun wal tincꞌuꞌl cuntuꞌ: Choꞌn chincyajk tzoneꞌj tan ẍchꞌiweꞌn yi mbil tal Kataj Ryos swetz. Chincyajk tan ẍchꞌiweꞌn chi na ban jun sanlar tan qꞌuicyꞌlomiꞌn tibaj yi amaꞌl yi na xcon tan qꞌuicyꞌleꞌn yi tnum. Tzinchꞌiweꞌ mbil tal Kataj Ryos swetz te yi xochoꞌn yi mimban tetz.

2 Stzaꞌwel tzun Ryos yi inyoltz. Nin je tzun yol iꞌeꞌj: “Tzꞌib cuꞌn yi xtxolbileꞌj swutz jun xcꞌoꞌn txꞌotxꞌ yi ntaxk oc tkꞌakꞌ, bantz at rmeril tan siꞌleꞌn lajkeꞌl, nin clar cunin. 3 Poro yi xtxolbilaꞌtz yi tzatzꞌibeꞌ, quil tzꞌel chan cuꞌn teꞌj, na txeꞌn opon tiempil. Poro tajweꞌn tan teleꞌn cuꞌn teꞌj. Quiꞌc na ban yi ko nsken xon jun cꞌoloj tiemp. Ntin aꞌtok apasens na ilenin tzꞌopon yi tiempil yi stzꞌelk cuꞌn teꞌj. 4 Nin je yi xtxolbileꞌj yi tajweꞌn tan atzꞌibal: Yi eꞌ mal nak yi na cyocsaj quib nim tu cyajtzaꞌkl, chisotzok cyeraꞌtz waꞌn. Poro yi eꞌ balaj, quil chisotz cyeraꞌtz, na cyakꞌoꞌnt quib tan kꞌukeweꞌn chicꞌuꞌl sweꞌj.”

Yi mbi cuꞌn sbajok scye yi eꞌ mal nak

5 Yi eꞌ malnakaꞌtz, nkꞌeꞌtz ntin na cyocsaj quib nim, nin nkꞌeꞌtz ntin na cyaj chicawun, ma na ilenin na chijoy puntil tan chicawuneꞌn squibaj mas wunak, bantz chicambal yi eꞌchk takleꞌn yi chiwutz quen teꞌj. Poro qui na chitxum yi tan paj yi chikꞌejaꞌtz, na chiben tul il. Niꞌcuꞌn eꞌ tu yi quimichil yi ilenin wutz quen teꞌj jun, nin qui na icyꞌ paj tan chibajseꞌn yi eꞌ wunak, na ẍkan tzaj nink na cyaj. Chaꞌstzun te na cyaj chicambaj cyakil eꞌchk tnum beneꞌn tziꞌn wi munt. 6 Poro yi eꞌchk tnumaꞌtz yi ẍchicambajeꞌ, chocopon tan xcyꞌakliꞌn scyeꞌj. Nin chiẍchꞌink scyeꞌj. Ej nin je chiyol yi scyaleꞌeꞌj: “Lastum axwok caldeo, na tzꞌul icaws, na na itocsaj itib ric tan yi eꞌchk takleꞌn yi at tzituchꞌ yi nkꞌeꞌtz itetz,” cheꞌch sbneꞌ-tz scyetz.

7 Poro quinin tzꞌicyꞌ tzitetz yil chijeꞌ nil yi eꞌ icontr tziteꞌj, yi eꞌ taw yi meꞌbiꞌl yi at tikꞌab. 8 Na quib cun tunin na itulejwok eꞌ, nin yaꞌtz nin cxuꞌlijwok itetz cyaꞌn. Ja chiquim wiꞌnin wunak itaꞌn tan icambal yi eꞌchk tnum. Ja italkꞌajwok chimeꞌbiꞌl, nin iteꞌn nin cxuꞌlijwok itestz cyakꞌun yi eꞌ yi ja chicyaj cyen.

9 Lastum axwok na tzꞌul icaws, na ja jal wiꞌnin ipuꞌk, poro alakꞌ tuꞌ mitulej. Ja baj italkꞌal wiꞌnin chimeꞌbiꞌl wunak tan icolol, bantz xconeꞌn itaꞌn yil tzꞌul yi eꞌchk cꞌaꞌlaj tiemp tziwutz. 10 Nin tan yi eꞌchk alakꞌ yi miban, ja xcyeꞌwok tan teweꞌn itxꞌix, na ja cxoꞌcwok tetz ric. Poro yi ncxoꞌcwok tan chixiteꞌn yi eꞌchk mas tnum, iteꞌn nin axwok mixit itib tzitibil itib. Na tan yi xtxolbilaꞌtz axwok teꞌn nxjoyon itil. 11 Ma na nkꞌeꞌtz ntin wunak chiẍchꞌink tan takꞌleꞌn itil, ma na nchaꞌtz eꞌchk cꞌub tu tzꞌeꞌ yi nxcon itaꞌn tan banleꞌn icaꞌl.

12 ¡Lastum axwok, ja bnix balaj tnum itaꞌn, poro tan tuꞌ yi biyoꞌn tu yi alakꞌ yi mibanwok! 13 Poro quiꞌc na takꞌ cyakil eꞌchk akꞌunaꞌtz yi mbaj ibnol, na yi Kataj Ryos yi cyaꞌl na xcyeꞌ quen teꞌj, tzꞌocopon tan xiteꞌn cyakil cuꞌn, na xconk kꞌakꞌ taꞌn tan stzꞌeꞌseꞌn cuꞌn. 14 Poro tzꞌul jun kꞌej yi tzꞌelepon chitxum cyakil wunak te yi kꞌej tu yi ẍchamil Ryos, na snojk cyakil yi wuxtxꞌotxꞌ tan yi tetz kꞌej tu yi pakꞌpuchal iꞌ, chi na ban yi mar yi jopij jun cꞌoloj amaꞌl taꞌn.

15 ¡Lastum axwok, na tzꞌul icaws tan Ryos, na na ixajnin xcꞌalaꞌ scyetz iwisin tan tocseꞌn aꞌ ẍchiwiꞌ! Lastum axwok na ntin na cxtzanwok tan telseꞌn cuꞌn iwisin swutz, na na oc aꞌ itaꞌn ẍchiwiꞌ tan chixiteꞌn cuꞌn. 16 Axteꞌnwok na cxtzan tan telseꞌn itxꞌix. Nin qui na pekꞌ Ryos te yi jun itajtzaꞌklaꞌtz. Chaꞌstzun te stkꞌeꞌ iꞌ icaws, na tzꞌelepon tcyꞌal iꞌ yi beꞌch itetz taneꞌn, nin xcopon txꞌanlokꞌwok ẍchiwutz cyakil wunak. Tzꞌelepon itxꞌix, nin quiꞌc muꞌẍ ixac sbneꞌ. 17 At wiꞌnin il yi mbaj ibnol tulak eꞌchk tnum, na ja cuꞌ jun cꞌoloj tzeꞌ itaꞌn wiꞌwtz Líbano. Poro iteꞌn nin xtxolbil sbajok tziteꞌj. Nchaꞌtz ja chiquim jun cꞌoloj txuc itaꞌn. Poro tzꞌul jun kꞌej yi chocopon yi eꞌ txuc tan ixuxeꞌn, na tzꞌul icaws, nin xquimokwok tan paj yi wiꞌnin il mbaj ibnol tulak eꞌchk tnum.

18 ¿Mbi xac eꞌchk iryosil tzitetz, yi seꞌij tuꞌ taneꞌn, yi wunak tuꞌ bnol tetz? ¿Mbi xac eꞌchk ryosaꞌtz tzitetz, yi qui na chijilon muꞌẍ tal? ¿Ẍeꞌn na kꞌukeꞌ icꞌuꞌl te eꞌchk ryosaꞌtz?

19 ¡Lastum axwok caldeo yi na cxtzanwok tan chicꞌuꞌlajeꞌn yi eꞌchk ryos yi banij tuꞌ taneꞌn! Na italwok quen scyetz: “Elk watluꞌ taꞌ,” cxchij wok. Nin na cxchꞌinwok quen tetz eꞌchk cꞌub yi seꞌij cun tuꞌ taneꞌn: “Xcyekeꞌnuꞌ taꞌ,” cxtzunwok na ban cyentz scyetz. ¿Chixcyek ptzun eꞌchk ryosaꞌtz tan takꞌleꞌn jun itajtzaꞌkl? Quiꞌc rmeril, na nkꞌeꞌtz eꞌ itzꞌ. Qui na chijilon, nin qui na chinachon, na quimnakeꞌ. Mpe chin litzꞌun nink cyeꞌj tan oro nka tan sakal, quiꞌc na takꞌ. 20 Poro yi Kataj, yi ketz kaRyosil, choꞌn at iꞌ le tetz amaꞌl yi wiꞌnin xanil yi at jalen tziꞌn tcyaꞌj. Kayutꞌeꞌ bin kib, nin kanumek kacyakil cuꞌn swutz iꞌ.