Yi toqueꞌn Habacuc tan nachleꞌn Kataj junt tir
3
1 Yi xtxolbileꞌj yi xomtzaj, yaꞌstzun yi yol Habacuc, yi elsanl stziꞌ Ryos yi toqueꞌnt tan nachleꞌn Kataj.2 Wajcaw, na wek ẍchiꞌuꞌ, na ja wit yi ẍeꞌn cunin taneꞌnuꞌ sajleꞌn tunintz. Nin ja wit cyakil yi eꞌchk takleꞌn balaj yi bnixnak tanuꞌ sajleꞌn. Taꞌ, bneꞌuꞌ junt tir yi eꞌchk takleꞌnaꞌtz skaxoꞌl, chi yi bnixnak tanuꞌ sajleꞌn, bantz kilol ketz. Ẍchajeꞌuꞌ yi banl talmaꞌuꞌ sketz. Mpe sajnak colp wiꞌuꞌ skeꞌj, poro ẍchajeꞌuꞌ yi poreruꞌ sketz.
3 Tzꞌul Kataj Ryos junt tir, yi kaRyosil, yi wiꞌnin xanil. Choꞌn lsaj iꞌ le amaꞌl Temán, nin le wiꞌwtz Parán. Yi pakꞌpuchal yi tetz kꞌej sbajk xtxekul cyakil eꞌchk amaꞌlaꞌtz, yil tzꞌult. Nin yil bajij yi eꞌchk xtxolbilaꞌseꞌj, cyakil wunak scyakꞌeꞌ chikꞌajsbil tetz. 4 Na choꞌn tzꞌul iꞌ tul jun pakꞌpuchal yi i cunin xlitzꞌ taneꞌn.a Nin tzꞌelepon wiꞌnin eꞌchk kꞌakꞌ le kꞌab yil tzꞌul tan ẍchajleꞌn scyetz wunak yi at porer iꞌ. 5 Sbajxok wiꞌnin yaꞌbil swutz, yi chin xoꞌwbil nin. Nin tzꞌul xomok yi quimichil wutz coc. 6 Syucank yi wuxtxꞌotxꞌ yil xcyeꞌ cuꞌn iꞌ tibaj. Nin cyakil wunak yi ateꞌ beneꞌn tziꞌn lakak nación, ẍchixobok yil quil nin wutz iꞌ. Cyakil eꞌchk wutz yi at sajleꞌn tunintz copon nil. Nin cyakil yi eꞌchk juꞌwtz xitok. Na yi iꞌ tetz at nin iꞌ-tz le xeꞌtzbil tzaj.
7 Ja wil jun xtxolbil chi tul wutzicyꞌ taneꞌn. Iꞌtz yi eꞌ aj Cusán yi chin qꞌuixcꞌuj nin ateꞌ cuꞌnt. Nin nchaꞌtz quitaneꞌn yi eꞌ aj Madián, ja oc yab ẍchiwiꞌ na quiꞌt na pujx cyaꞌn yi mbil chiban tan biꞌl yi xoꞌw yi ateꞌ cuꞌnt. 8 ¡Wajcaw! ¿Tzꞌul peꞌuꞌ ntin tan oyintziꞌ scyeꞌj yi eꞌ malnakaꞌtz, yi wiꞌnin na chijuchun, chi na ban tzanlaꞌ yi na el pokꞌ? Quiꞌ loꞌ. ¿Tzꞌul peꞌuꞌ ntin tan paj yi na chiꞌch cꞌuꞌluꞌ scyeꞌj eꞌ wunak yi niꞌcuꞌn eꞌ tu yi mar yi tunin na ojkel tuꞌ? Quiꞌ. Yil tzꞌuluꞌ tib ẍchejuꞌ tan oyintziꞌ, ¿iꞌtz peꞌ tan oyintziꞌ tuꞌ scyeꞌj yi eꞌ wunakaꞌtz? Quiꞌ. Ej nin yil sajuꞌ tul yi careꞌtuꞌ tetz oyintziꞌ, ¿iꞌtz peꞌ tan oyintziꞌ tuꞌ scyeꞌj eꞌ mal nak? Quiꞌ. Yi mero tajbiluꞌ yil tzꞌuluꞌ teꞌj iꞌtz tan chicolcheꞌn yi eꞌ tanumuꞌ.
9 Ej nin yil tzꞌuluꞌ, list atit yi eꞌchk maꞌcluꞌ tan oyintziꞌ, chi taneꞌn yi arco yi na xcon tan cꞌoxleꞌn eꞌchk flech. Ej nin tan yi poreruꞌ jepon cꞌapx wiꞌnin amaꞌl wuxtxꞌotxꞌ. 10 Nin cyakil eꞌchk juꞌwtz ẍchilucnek yil quil nin wutzuꞌ. Nin tzꞌul jun chin wutzileꞌn aꞌbal. Nin ẍchꞌink yi pakꞌbil mar yil ẍchekꞌeꞌn tib. 11 Quiꞌt txekun yi kꞌej tu yi xaw tan paj yi pakꞌpuchal yi flechuꞌ, nin yi litzꞌunil yi lansuꞌ. 12 Nin yil saj colp wiꞌuꞌ, mbenuꞌ beneꞌn tziꞌn wi munt tan chiyakꞌpeꞌn cyakil eꞌchk nación. 13 Poro Wajcaw, yaꞌstzun sbneꞌ-tz tanuꞌ tan kacolpeꞌn yi oꞌ tanumuꞌ. Na tzꞌocoponuꞌ tan ẍchꞌeyeꞌn yi ketz kareyil yi jeꞌnak xtxaꞌoluꞌ tetz ajcaw skeꞌj. Na ẍchiloꞌonk len yi eꞌ kacontr tanuꞌ. Sbajk woqꞌuiluꞌ chicaꞌl. Copon woqꞌuiluꞌ tircuꞌn jalen te yi xeꞌ. 14 Squimok yi cyajcawil yi kacontraꞌtz. Iteꞌn nin yi tetz flech sbiyonk cuꞌn. Chuꞌl yi eꞌ kacontraꞌtz tib chichej tan kabiyleꞌn, yi oꞌ tanumuꞌ. Nin chuꞌl lajkeꞌl chi na ban jun chin wutzileꞌn cyekꞌekꞌ aꞌbal. Chuꞌl lajkeꞌl tan kabiyleꞌn cuꞌn yi oꞌ tal prow tanumuꞌ yi quiꞌc rmeril tan kacolol kib. Ẍchitzeꞌenk ẍchicꞌuꞌl cuntuꞌ yil chuꞌl tan kabajseꞌn kloꞌ.
15 Poro yi iluꞌ teruꞌ Taꞌ, chin cham nin iluꞌ, na baꞌn na xonuꞌ wi mar te yi ẍchejuꞌ. Nin baꞌn na xonuꞌ tib yi pakꞌbil mar yi wiꞌnin spumil at. 16 I tzun yi beneꞌn wilol yi eꞌchk xtxolbilaꞌtz, nin yi beneꞌn wital yi mbi tal Ryos swetz, nintzun inxobtz. Quiꞌt aꞌw yol waꞌn tan yi xoꞌw yi atin cuꞌnt. Quiꞌt quiwix wukan tan paj, nin quiꞌc muꞌẍ inwalor bantz. Poro quiꞌc na ban yi mbil bajij tzantzaj, na ilenin tzinchꞌiweꞌ yi tonaꞌ tzꞌoc Kataj Ryos tan takꞌleꞌn chicaws cyakil yi eꞌ kacontraꞌtz.
17-18 Nin yil bajij yi eꞌchk xtxolbilaꞌtz ẍchintzatzink nin swakꞌeꞌ inkꞌajsbil tetz Kataj Ryos, yi colol wetz. Swakꞌeꞌ inkꞌajsbil tetz, mpe quiꞌk xuꞌmin eꞌchk wiꞌ ibẍ, mpe quiꞌk ltakꞌ wutz eꞌchk wiꞌ uva, mpe quiꞌk lwutzin eꞌchk wiꞌ oliw, mpe quiꞌk ltakꞌ yi cojbil eꞌchk ujul. Mpe nink chisotz cyakil yi awun yi ateꞌ beneꞌn tziꞌn wi munt, nin mpe nink chisotz cyakil eꞌ cneꞌr tu wacẍ tan paj yi quiꞌct chiwaꞌ, quil chimbisun tan paj yi eꞌchk xtxolbilaꞌseꞌj, ma na ilen nin ẍchintzatzink nin swakꞌeꞌ inkꞌajsbil tetz Kataj Ryos, na iꞌ colol wetz.b 19 Na iꞌ na akꞌon inwalor, tan inxoneꞌn lajkeꞌl chi na ban jun masat yi qui na jeꞌ trimpuj. Nin choꞌn nchimben tcyꞌal wiꞌwtz bantz incolol wib ẍchikꞌab yi eꞌ incontr.