HAGEO
Yi toqueꞌn Ryos tan cꞌaseꞌn chitxumuꞌn yi eꞌ wiꞌtz ajcaw tan jeꞌseꞌn junt tir yi templo
1
1 Ej, i tzun bantz le bajx tajlal yi kakiꞌn xaw, tul yi caꞌpiꞌn yob yi na cawun tzaj yi rey Darío, nintzun tal Kataj jun xtxolbil tetz yi elsanl stziꞌ iꞌ, yi Hageo, tan tlol tetz Zorobabel yi wiꞌtz gobernador cwent Judá, yi cyꞌajl Salatiel. Nchaꞌtz tan tlol tetz Josué yi wiꞌtz paleꞌ cyꞌajl Josadac.a 2-3 Nin je ntal Ryoseꞌj, yi jun yi cyaꞌl na xcyeꞌ quen teꞌj: “Nxac na cyal yi eꞌ wunak yi txeꞌn opon yi tiemp tan jeꞌseꞌn junt tir yi intemplo. 4 Ma yi eꞌ cyetz ntin na chitzan tan banleꞌn eꞌchk lmak caꞌl tan chinajeweꞌn tul, ma yi wetz intemplo chꞌukiꞌn cuꞌn taneꞌn. Cyaꞌl na pekꞌ tan jeꞌseꞌn junt tir. 5 Txumunwok bin te yi mbi na bajij te eꞌchk ujul yi na oc itaꞌn. 6 Wiꞌnin ujul na oc itaꞌn ttxꞌotxꞌ, poro quiꞌ queꞌn icosech na jeꞌ. Wiꞌnin na cxwanwok, poro qui na noj icꞌuꞌl. Na cxucꞌaꞌ, poro iẍnin atit sak tziꞌ tziteꞌj. Na oc balaj itxoꞌ te tiemp cheꞌw, poro qui nin na cxkꞌulkꞌaxwok tul. Nin yi eꞌ yi na chitzꞌam chichojoꞌn, niꞌcuꞌntz chi choꞌnk na cuꞌ cyaꞌn tul jun txꞌuꞌy yi kopxnak xeꞌ. 7 ¿Qui nin peꞌ na el itxum tetz yi mbi tzuntz na bajij yi xtxolbilaꞌs tziteꞌj? Iꞌtz tan paj yi qui na cxoꞌcwok il tan jeꞌseꞌn junt tir intemplo yi in yi jun yi cyaꞌl na xcyeꞌ quen sweꞌj. 8 Quibeneꞌnk bin wiꞌwtz, tan tekeꞌn tzaj tzeꞌ, nin baꞌn xcon itaꞌn tan jeꞌseꞌn junt tir weri intemplo. Yil bnix itaꞌn, snaꞌtok tzuntz txeꞌ nin ẍchintzatzink tziteꞌj, nin slajluchaxk yi inkꞌej tu impakꞌpuchal tul. 9 Yi ax itetz, na itaj jal wiꞌnin takleꞌn itaꞌn, poro yi mero bintzij quiꞌ queꞌn na jal. Nin yi takleꞌn yi na icol xe icaꞌl, xupiꞌn tuꞌ na wulejnin tan teleꞌn cꞌuꞌl. ¿Mbi tzuntz na ital itetz? Iꞌtz tan paj yi cyaꞌl jun na oc il tan jeꞌseꞌn junt tir yi incaꞌl. Poro yi axwok itetz, ntin na cxtzan tan xtxumleꞌn yi ẍeꞌn ljeꞌ junt icaꞌl. 10 Chaꞌstzun te, qui na cuꞌ aꞌbal wi icojbil, nin quiꞌc wutzil itujul na ban.b Jun cuꞌn na bajij yi xtxolbileꞌj na yi in wetz in itajcawil, nin na neꞌl cuꞌn te yi mbi na wal. 11 Quiꞌt tzun ncuꞌ aꞌbal waꞌn wiꞌak eꞌchk wutz, nin wiꞌak tircuꞌn eꞌchk cojbil kale na awleꞌt triw, nin kale awijeꞌt uva, nin kale awijeꞌt eꞌchk cosech oliw; tibaj tircuꞌn eꞌchk cojbilaꞌtz qui ncuꞌ aꞌbal, quiꞌc quicꞌaꞌ wunak mban nin quiꞌc quicꞌaꞌ awun mban, na quiꞌc muꞌẍ aꞌbal ncuꞌ,” stzun Kataj bantz.
12 Sajeꞌn tzun jun chin xoꞌw scyeꞌj Zorobabel tu Josué, yi wiꞌtz paleꞌ scyuchꞌ yi eꞌ mas wunak yi ateꞌ nintz nakaꞌj, yi quibital yi mbi cuꞌn tal Kataj scyetz. Na yaꞌstzun yi mero tajbil Kataj tan lajluchaxeꞌn ẍchiwutz. 13 Ej, nintzun jilon junt tir Hageo scyetz, yi ẍchakum Kataj: “Je yol Katajeꞌj: ‘Juncuꞌn snaꞌtok tziteꞌj, nin tzꞌelpon cuꞌn inkꞌab te yi mbi na wal, na yi in wetz, in Jehová Ryos, yi itajcawil,’ ” chij Hageo.
14-15 Tan yi xtxolbilaꞌtz nin oc Kataj tan quiwseꞌn cꞌuꞌl Zorobabel, yi gobernador tetz Judá, nin tan quiwseꞌn cꞌuꞌl Josué yi wiꞌtz paleꞌ, scyuchꞌ cyakil yi eꞌ mas wunak. Ej, ninin tzun eꞌ xeꞌteꞌntz tan akꞌun le junak cyajiꞌn kꞌej tajlal yi kakiꞌn xaw, tul yi caꞌpiꞌn yob yi na cawun tzaj yi rey Darío, tan jeꞌseꞌn junt tir yi templo Kataj Ryos.c