Chin yubeꞌn cunin sbneꞌ yi templo tzantzaj
2
1 I tzun bantz le junak cyajiꞌn kꞌej tajlal yi jukiꞌn xaw, nintzun jilon tzaj junt tir Kataj tetz yi elsanl stziꞌ iꞌ yi Hageo, 2 nin tal iꞌ tetz tan tlol cobox xtxolbil scyetz Zorobabel tu Josué, yi wiꞌtz paleꞌ, nin scyetz cyakil yi eꞌ wunak yi najlcheꞌ-tz.a Je nin yol iꞌeꞌj: 3 “Yi eꞌ yi quilnak yi ẍeꞌn cuꞌn taneꞌn yi bajx templo yi cuꞌnak chꞌuk, na loꞌ cyal jaluꞌ:b Mas baꞌnt cuꞌn yi antiw yi cuꞌnak chꞌuk swutz yi junteꞌj. 4-5 Poro aẍ jun cꞌoloj Zorobabel ¡quiwit te yi akꞌun! Ej nin aẍ jun cꞌoloj Josué, yi aẍ yi wiꞌtz paleꞌ, ¡quiwit! Nin cyakil yi eꞌ nim juy, ¡quiwit! na yi in wetz atin tzixoꞌl tan ichꞌeyeꞌn te yi akꞌun. Na iteꞌn nin yolaꞌtz insuknak scyetz yi eꞌ imam iteꞌ yi cyeleꞌn tzaj Egipto.c Na je walnak scyetzeꞌj: Stzꞌaꞌtok yi wetz inespíritu tzixoꞌl, chinch bantz scyetz. Qui tzun lcabej icꞌuꞌltz jaluꞌ te yi akꞌun. Na yi in wetz yi na walnin yi yoleꞌj, in yi Ryos yi cyaꞌl jun na xcyeꞌ quen sweꞌj. 6 ”Nin tzꞌopon chan yi tiemp yil chucan cyakil yi tcyaꞌj tu wuxtxꞌotxꞌ waꞌn,d tu yi mar tu eꞌchk amaꞌl, na in yi Ryos. 7 Ẍchucank cyakil eꞌchk tnum waꞌn, nin chuꞌl len yi eꞌ wunakaꞌtz tan toyeꞌn chimeꞌbiꞌl tzoneꞌj le intemplo.e Nin sjalok wiꞌnin kꞌej yi incaꞌlaꞌtz. 8 Tzꞌul cyakil chimeꞌbiꞌl, na wetz cyakil yi sakal tu yi oro, yi at beneꞌn tziꞌn wi munt. 9 Nin yi junt templojaꞌtz yi sbnixok chin yubeꞌnt cunin sbneꞌ swutz yi bajx yi xitnak. Sjalok tzun tzatzin paztz waꞌn, tul yi tnumeꞌj. Jun cuꞌn yi xtxolbileꞌj yi na wal nin tzitetz, na yi in wetz in Ryos,” chij Kataj.
Yi toqueꞌn Ryos tan chiyajleꞌn yi eꞌ yi qui eꞌ oc cꞌulutxum jakꞌ caꞌwl iꞌ
10 I tzun bantz le junak cyajiꞌn kꞌej tajlal yi belujiꞌn xaw, te iteꞌn nin yobaꞌtz, yi na cawun tzaj yi rey Darío, nintzun ben tlol Kataj Ryos, yi xtxolbileꞌj tetz Hageo yi elsanl stziꞌ iꞌ. 11 Nintzun cawunintz Ryos tetz Hageo tan jakleꞌn scyetz yi eꞌ paleꞌ yi cyajskeꞌn yi ley Moisésf yi mbiꞌtz yi cyetz chitxumuꞌn te yi xtxolbileꞌj: 12 “Ok tuꞌtz kaꞌn, yi at jun yi cyꞌaꞌn chiꞌbaj taꞌn yi xansaꞌnt, yi choꞌn tꞌoliꞌn taꞌn tul yi beꞌch tetz. Ej nin yil noj quen yi juꞌ yi beꞌch tetzaꞌtz teꞌj jun piẍ pam, nka jun lak chiꞌbaj yi txiquijt, nka teꞌj jun was win, nka teꞌj jun cuꞌlbil aceit, nka teꞌj alchok jilwutz cumir, ¿tzꞌocpon quen peꞌ yi eꞌchk cumiraꞌtz tetz xan?” “Quiꞌ, quil tzꞌoc yi eꞌchk cumiraꞌtz tetz xan” cheꞌch yi eꞌ paleꞌ bantz.
13 Jakol tzun Hageo junt xtxolbil scyetz: “Ma jaluꞌ, ok tuꞌtz kaꞌn, yi at jun yi ja oc lacꞌp il cꞌol teꞌj, tan tuꞌ yi njeꞌ macol wankil jun almaꞌ.g Nin kol ben tan macleꞌn alchok cumir te yi ja wiꞌt kal, ¿qui peloꞌ tzꞌoc lacꞌp yi il cꞌolaꞌtz teꞌj eꞌchk cumiraꞌtz?” “Tzꞌocpon lacꞌp teꞌj,” cheꞌch tzun yi eꞌ paleꞌ bantz.
14 Ej, beneꞌn tzun tlol Hageo scyetz: “Bintzij yi chiyoluꞌ, na je na tal Kataj Ryoseꞌj: ‘I cunin tzun iꞌaꞌtz quitaneꞌn yi eꞌ wunak yi najlcheꞌ tzoneꞌj, cyꞌaꞌn len il cꞌol cyaꞌn. Chaꞌstzun te tircuꞌn yi eꞌchk takleꞌn yi na bnix cyaꞌn, nin yi eꞌchk takleꞌn yi ja chisuk swetz at len il cꞌol teꞌj.
Yi jaleꞌn chibanl yi eꞌ xonl Israel yi cyoqueꞌn cꞌulutxum jakꞌ caꞌwl Kataj Ryos
15 ’Ma jaluꞌ, txumwok yi xtxolbileꞌj te yi ntaxk tzaj cxeꞌtijwok tan jeꞌseꞌn yi intemplo, 16 ¿mbi mbajij? Ko na aꞌlchij yi at junak liwr ixiꞌn colij, ma yi na oc maꞌleꞌn, lajujteꞌn liwr na jal. Nchaꞌtz niꞌcuꞌn na ban yi win. Na yi na el tzaj ticyꞌleꞌn nicyꞌ cient ẍchokꞌ win yi colij, junak teꞌn ẍchokꞌ na ban yi na cuꞌ molij. 17 Na in nnoꞌc tan poꞌtzeꞌn cyakil yi wutz yi itujul, tan cꞌub aꞌbal, nin tan eꞌchk yaꞌbil. Poro qui nin mmitxꞌixpuj itajtzaꞌkl tan itoqueꞌn cꞌulutxum jakꞌ incaꞌwl. Juncuꞌn yi xtxolbileꞌj, na yi in wetz yi in iRyosil yi na chin tzan tan talcheꞌn yi eꞌchk xtxolbilaꞌtz. 18 Poro yi jaluꞌ iꞌtz junaklaj tajlal yi belujiꞌn xaw, nin yi ja wiꞌt cuꞌ xeꞌ yi intemplo itaꞌn, apart sbneꞌ tircuꞌn. 19 Na sbneꞌ opon tunintz sjalok yi ixiꞌn triw yi tajweꞌn tzitetz. Ma sajleꞌn, quiꞌc mas loꞌbaj uva njal, nka loꞌbaj ibẍ, nka loꞌbaj granada, nka wutz oliw, qui nin njal wutz tan paj yi chin pajol incaꞌwl nin axwok. Poro yi jaluꞌ apart sbneꞌ, tan paj yi ja cxoꞌc cꞌulutxum jakꞌ incaꞌwl, swakꞌeꞌ tzun imbanl tzitibaj sbneꞌ opon tunintz,’ stzun Kataj Ryos bantz.”
Yi tlol Kataj yi mbi cuꞌn sbneꞌ iꞌ tzantzaj scyeꞌj eꞌchk nación nin yi mbi cuꞌn sbneꞌ iꞌ tan jaleꞌn kꞌej yi tetz ẍchakum
20 Ej i tzun bantz le iteꞌn nin kꞌejaꞌtz, nintzun jilon junt tir Kataj Ryos tetz Hageo, i tzun taltz: 21 “Jilon tetz Zorobabel nin alaj yi xtxolbileꞌj tetz: ‘Ẍchucank yi tcyaꞌj waꞌn tu yi wuxtxꞌotxꞌ, 22 nin nocpon tan xiteꞌn cyakil yi eꞌchk gobierum yi ateꞌ beneꞌn tziꞌn wi munt.h Ẍcheꞌlk cuꞌn yi eꞌchk chisanlar waꞌn swutz. Ẍchiloꞌonk yi eꞌchk chicareꞌt waꞌn tetz oyintziꞌ, nin ẍchiquimok yi eꞌ yi ateꞌ tul. Ẍchiquimok chichej scyuchꞌ yi eꞌ yi ateꞌeꞌn scyeꞌjak, na eꞌ teꞌn copon chibiyol quib squibil quib. 23 Ej nin tul yi jun tiempaꞌtz, aẍ Zorobabel,i yi aẍ inchakum, nocpon tan aqꞌuicyꞌleꞌn chi na noꞌc tan qꞌuicyꞌleꞌn yi inxmalkꞌab yi na xcon waꞌn tan tocseꞌn sey.j Na txaꞌijt quiẍ waꞌn. Jun cuꞌn sbajok yi xtxolbileꞌj yi na wal nin tzatz, na yi in wetz in yi Ryos yi cyaꞌl jun na xcyeꞌ quen sweꞌj.’ ”