13
1 ”I tzun te yi jun tiempaꞌtz, smulkꞌink jun chin aꞌ yi baꞌn xcon cyakꞌun yi eꞌ xonl kꞌajtzun rey Luwiy scyuchꞌ yi eꞌ aj Jerusalén tan xtxꞌajleꞌn len yi quil tu chiyaꞌpl. 2 Ej nin, cupon inxitul yi eꞌchk ryos yi banij cuntuꞌ taneꞌn, yi ateꞌ tul cyakil yi eꞌchk tnum cwent Israel. Quiꞌt tzun naꞌwsij chibiꞌ junt tir. Nchaꞌtz chelpon inlajul cyakil yi eꞌ elsanl chitziꞌ yi ryosaꞌtz, scyuchꞌ yi eꞌ espíritu cwent Baybaꞌn. Jun cuꞌn sbajok yi xtxolbileꞌj, na in Ryos.3 ”Alchok scyetz yil tzꞌoc tan xtxoleꞌn eꞌchk xtxolbil yi nkꞌeꞌtz in na aꞌlon, scyaleꞌ yi eꞌ taj xtxuꞌ tetz: ‘Tajweꞌn tan aquimeꞌn, na yi eꞌchk laꞌjil yi na awal, nkꞌeꞌtz yol Kataj.’ ¡Ej, nin iteꞌn nin taj xtxuꞌ, chocpon tan biyleꞌn cuꞌn tan spar, na na tocsaj tib chi ik jun mero elsanl intziꞌ!
4 ”Te yi tiempaꞌtz ẍchitxꞌixwok yi eꞌ yi na cyocsaj quib elsanl intziꞌ, tan yi eꞌchk takleꞌn yi na cyal yi nkꞌeꞌtz bintzij. Cyaꞌl jun tzꞌocpon tan jopleꞌn chiwutz wunak, tan tuꞌ yi na xcon beꞌch tetz jun mero elsanl intziꞌ taꞌn. 5 Ma na scyaleꞌ len: ‘Nkꞌeꞌtz in jun elsanl stziꞌ Ryos. Na yi in wetz, in tuꞌ jun akꞌunwil xoꞌl coꞌn. In tzaj nitxaꞌ yi inxeꞌtleꞌnix tan akꞌun wi cojbil.’ 6 Ej, nin kol tzꞌoc jun tan jakleꞌn: ‘¿Poro mbi ekaꞌn tan eꞌchk qꞌuixpnak yi at te awankil?’ Stzaꞌweꞌ tzuntz: ‘Choꞌn mbnix xe chicaꞌl eꞌ wamiw.’ ”
Yi qꞌuixcꞌuj yi ẍchitijeꞌ yi eꞌ tanum Ryos
7 Je yol Kataj Ryos: “¡Tzꞌicyꞌpon chꞌichꞌa le wankil yi pstor yi xconk waꞌn, yi jun yi txiclij tzinxlaj! ¡Squimok iꞌ, nin chelpon xit yi eꞌ tawun, nin yi in wetz quiꞌt noꞌc tan quichꞌeyeꞌn!
8-9 Ẍchiquimok mas niꞌcy te yi wunak yi najlcheꞌ le tnumeꞌj.b Ntin cobox ntziꞌ tal ẍchiclaxok cyen. Na chicyꞌpon tul kꞌakꞌ taneꞌn bantz skojaxeꞌn te cyalmaꞌ. Chicyꞌpon tul kꞌakꞌ taneꞌn chi na ban yi sakal tan telseꞌn stzꞌilil,c nin chumbalaj nin ẍchibneꞌ chi na ban yi oro yi na el stzꞌilil. Chocpon tzuntz tan naꞌwseꞌn imbiꞌ tetz cuꞌn cyalmaꞌ.d Nin tzimbneꞌ taneꞌn yi cyajbil. Swaleꞌ scyetz: ‘Axwok intanum,’ nin yi eꞌ cyetz scyaleꞌ swetz: ‘Yi iluꞌ, iluꞌ Kajcawil, iluꞌ kaRyosil.’ Jun cuꞌn sbajok yi xtxolbileꞌj, na yi in wetz, in Ryos nin na neꞌl cuꞌn te inyol.”