Yi cyeleꞌn yi eꞌ aj Jerusalén liwr
12
1 I bin jaluꞌ, cyakil yi xtxolbileꞌj yi tal Kataj Ryos iꞌtz yi mbi cuꞌn sbajok te Israel. Yi Kajcawaꞌtz yi ja bnix yi tcyaꞌj taꞌn, nin yi ja cuꞌ xeꞌ yi wuxtxꞌotxꞌ taꞌn, nin yi ja bnix yi wunak taꞌn, iꞌ aꞌlon cyen yi xtxolbileꞌj:2 “Tzꞌocpon Jerusalén waꞌn chi jun cuꞌlbil quicꞌaꞌ wunak, yi nojnak tan chicaws yi xcyek tan tocseꞌn xyaꞌyil chiwiꞌ cyakil yi eꞌchk tnum yi ateꞌ solteꞌj Israel. Na chocpon cyakil yi eꞌchk tnumaꞌtz tan oyintziꞌ te Jerusalén nin scyeꞌj eꞌchk mas tnum cwent Judá. 3 Nin te yi jun tiempaꞌtz tzꞌocpon Jerusalén waꞌn tetz jun chin cꞌub taneꞌn, yi chin al nin yi quil chixcyeꞌ yi eꞌchk nación tan xicyleꞌn. Na alchok scyetz yil buch tib tan xicylejeꞌn, sqꞌuixpok taꞌn. Tircunin tzun yi eꞌchk nación yi ateꞌ solteꞌj Jerusalén ẍchimoleꞌ quib tan oyintziꞌ teꞌj. 4 Poro nocpon tan chixoꞌwseꞌn yi chichej, nin tzꞌocpon xyaꞌyil chiwiꞌ yi eꞌ yi ateꞌeꞌn scyeꞌj yi chejaꞌtz. Chocpon chichej yi eꞌ naciónaꞌtz waꞌn tetz moyiꞌẍ, nin nocpon tan chiqꞌuicyꞌleꞌn yi eꞌ xonl Judá ẍchikꞌab. 5 Yil quil yi eꞌ wiꞌtz cyajcawil yi eꞌ aj Judá yi xtxolbilaꞌseꞌj, scyaleꞌ tzuntz squibil quib: ‘Iꞌtz Kataj Ryos yi na tzan tan takꞌleꞌn chiwalor yi eꞌ katanum, yi eꞌ aj Jerusalén,’ cheꞌch tzun sbneꞌ-tz.
6 ”Nin tul yi jun tiempaꞌtz chocpon yi eꞌ aj Judá waꞌn chi xtxakꞌakꞌ yi nternin na kꞌakꞌan txoꞌl siꞌ, nin chitaneꞌn jun chin bocꞌoj kꞌakꞌ txoꞌl tkan triw yi chin skejtnin. Na sbajk chitzꞌeꞌsal yi eꞌ tnum yi ateꞌ le chimax nin yi eꞌ tnum yi ateꞌ le chisbal, tircuꞌn yi eꞌchk naciónaꞌtz yi ateꞌ nakajil Israel. Nin yi eꞌ aj Jerusalén, ẍchinajank junt tir le cyetz chitanum.
7 ”Poro bajx ẍcheꞌ inclaxeꞌ yi eꞌ xonl kꞌajtzun Judá yi ateꞌ solteꞌj len Jerusalén, bantz quil cyocsaj quib nim tu cyajtzaꞌkl yi eꞌ xonl kꞌajtzun Luwiy yi najlcheꞌ le tnum Jerusalén. 8 Poro nchaꞌtz, nocpon tan chicolcheꞌn yi eꞌ yi ateꞌ le tnum Jerusalén, yi eꞌ yi quiꞌc chiwalor tan oyintziꞌ. Chocpon waꞌn chi banak yi kꞌajtzun rey Luwiy yi chin cham nin iꞌ banak tan oyintziꞌ. Nin yi eꞌ xonl Luwiy sjalok chiwalor chi taneꞌn walor Ryos, chi taneꞌn yi ángel yi kꞌajbil Kataj, yi bajxij ẍchiwutz. 9 Te yi tiempaꞌtz, alchok nación yil tzꞌoc tan oyintziꞌ te Jerusalén, tzꞌelpon cuꞌn waꞌn swutz.
10 ”Ej nin yil quil yi eꞌ xonl kꞌajtzun rey Luwiy, scyuchꞌ yi eꞌ aj Jerusalén, yi jun yi icyꞌnak chꞌichꞌ cyaꞌn le wankila cyakꞌun yi eꞌ imam iteꞌ, swakꞌeꞌ tzun jun chitxumuꞌntz, yi xcyek tan chibisuneꞌn te yi mbi cuꞌn nchiban cyen, nin ẍchijakeꞌ cuybil chipaj. Sjalok tzun jun chin bis oꞌkltz ẍchixoꞌl, chi yi bis oꞌkl yi na jal le jun najal yi na quim jun ẍutuj cyꞌajol. 11 Sjalok yi jun chin bis oꞌklaꞌtz le tnum Jerusalén. Chumam nin sbneꞌ yi jun bisaꞌtz yi sbajok, chi yi bis yi mbajij tentz teꞌj Hadad-rimón wi ẍkꞌajlaj cwent Meguido.b 12 Ẍchijunal cuꞌn ẍchibisunk lakak eꞌchk najal. Apart yi eꞌ yaj nin apart yi eꞌ xnaꞌn, na cyakil yi eꞌ xonl kꞌajtzun Luwiy ẍchibisunk scyuchꞌ quixkel. Na ẍchibisunk yi eꞌ xonl kꞌajtzun Natán scyuchꞌ quixkel. 13 Nin ẍchibisunk yi eꞌ xonl kꞌajtzun Leví scyuchꞌ quixkel. Nchaꞌtz ẍchibisunk yi eꞌ xonl kꞌajtzun Semei scyuchꞌ quixkel. 14 Na cyakil yi eꞌ najal cwent Israel ẍchibisunk len. Ẍchibisunk len yi eꞌ yaj apart, nin ẍchibixunk len yi eꞌ quixkel apart.