11
1 ¡Líbano,a akꞌaj amaꞌl tan tocomponeꞌn yi kꞌakꞌ tan stzꞌeꞌseꞌn tircuꞌn yi lmak tzeꞌb yi at-tz! 2 Chokꞌoken yi eꞌchk wiꞌ tzaj, na ja wiꞌt cheꞌl cuꞌn yi eꞌchk lmak tzeꞌ swutz. Na ja wiꞌt chitzaj yi eꞌchk chin tzeꞌ yi chin yubeꞌn nin banak. ¡Ej nin axwok jun cꞌoloj bakch, yi choꞌn atix le amaꞌl Basán, bisunwok, na ja wiꞌt el cuꞌn cyakil yi tzeꞌ swutz yi chin txaꞌx nin xoꞌl banak!
3 Wiꞌnin chiẍchꞌineꞌn yi eꞌ pstor awun tan oꞌkl, na ja tzꞌeꞌ tircuꞌn yi chꞌim yi chin txaꞌx nin wutz. Nin yi eꞌ león chin chiwiꞌ nin tan oꞌkl, na quiꞌct jun tal ẍutuj tzeꞌ mban cyen stziꞌ yi aꞌ Jordán.c
Yi cob jilwutz pstor
4 “Qꞌuicyꞌlweꞌ yi eꞌ cneruꞌ yi quimeꞌn tlen tuꞌ ateꞌt le biybil awun taneꞌn. 5 Na yi eꞌ yocol na choꞌc tan chibiyleꞌn cuꞌn nin quiꞌc nin muꞌẍ tal najk chibisun taꞌn. Nin yi eꞌ aj cꞌayinl na cyal: ‘¡Ntyoẍ tetz Kataj ja kariquin jaluꞌ!’ Qui na el muꞌẍ chikꞌajab yi eꞌ pstoraꞌtz scyeꞌj yi eꞌ tal cyawun. 6 Nin iteꞌn nin xtxolbilaꞌtz tzimbneꞌ wetz scye yi eꞌ wunakaꞌtz yi najlcheꞌ le amaꞌleꞌj. Quil tzꞌel muꞌẍ inkꞌajab scyeꞌj. Ma na ẍcheꞌ wakꞌeꞌ ẍchikꞌab chiwisin scyuchꞌ chireyil yi juntlen cyajtzaꞌkl tan chixiteꞌn cuꞌn. Nin quil noꞌc tan colcheꞌn jun scyetz. Jun cuꞌn sbajok yi xtxolbileꞌj na in yi Ryos yi na neꞌl cuꞌn te inyol,” chi Kataj Ryos.
7 Ej, nintzun in noꞌctz chi jun balaj pstor taneꞌn tan chiqꞌuicyꞌleꞌn yi eꞌ cneruꞌ yi cweꞌn tlen tuꞌ biyij ateꞌt, yi pen tuꞌ na chixon. Ja kloꞌ noꞌc tan chiqꞌuicyꞌleꞌn ẍchikꞌab yi eꞌ biyol awun. Nintzun bnix cob txꞌamijtz waꞌn, nin oc inkꞌol biꞌ juntz tetz “Banl” nin yi junt txꞌamij “Junit” ban biꞌ waꞌn. 8 Ej nin le bajx xaw, nin eꞌ el inlajul ox pstor te cyakꞌun, yi nsken wiꞌt baj impasens scyeꞌj, nin yi wiꞌnin na chiꞌch chicꞌuꞌl sweꞌj. 9 Nintzun wal yi xtxolbileꞌj scyetz yi eꞌ cneruꞌ: “¡Quil noꞌc junt tir tan ipstoreꞌn! ¡Yi ko at jun ituchꞌ lquim, ja nin bin quimaꞌs! ¡Nin ko at jun yil cuꞌ biyij, ja nin bin cuꞌ biyijaꞌs! ¡Nin yi eꞌ yil chitzꞌij cyen, ja nin jeꞌ chibajsal quibaꞌs squibil quib!” chinch bantz scyetz.
10 Sajeꞌn tzun incyꞌal yi jun intxꞌamij yi na biꞌaj “Banl” nintzun cuꞌ inwakꞌultz, tan ẍchajleꞌn yi ja xit yi trat yi bnixnak waꞌn scyuchꞌ cyakil yi eꞌchk nación. 11 Nintzun xit yi trataꞌtz. Nin yi eꞌ yocol awun yi na chitzan tan inxmayeꞌn tzaj, nintzun el chitxumtz tetz yi iꞌtz Kataj Ryos yi na jilon scyetz tan yi eꞌchk takleꞌn yi na imban. 12 Nintzun waltz scyetz: “Yi ko baꞌn ẍchiwutzuꞌ, baꞌn chichojuꞌ in, nin ko qui na cyajuꞌ chichojuꞌ in, baꞌn lcyaj tuꞌs chineꞌj,” chinch bantz scyetz. Sajeꞌn tzun chikꞌol junaklaj piẍaꞌl sakal swetz tetz inchojoꞌn.
13 “Cyꞌajtzaj yi pwokaꞌtz, yi jun chin injamelaꞌtzd yi ja cyakꞌ, nin baꞌn tzꞌopon awaꞌn kale na colxeꞌt yi pwok tetz yi templo,” chi Kataj bantz swetz. Nintzun imbentz tan ticyꞌleꞌn tzaj, nin opontz waꞌn le templo.
14 Ej, nintzun cuꞌ inwakꞌul yi caꞌpiꞌn txꞌamij yi na biꞌaj “Junit” nin tan yi xtxolbilaꞌtz nin xit yi lokꞌ ib yi at ẍchixoꞌl yi eꞌ aj Judá scyuchꞌ yi eꞌ aj Israel.
15 “Ma jaluꞌ, nqueꞌn chi jun pstor yi cyꞌaj, yi quil tzꞌoc il tan chiqꞌuicyꞌleꞌn tawun,e chij Kataj swetz. 16 Nin swakꞌeꞌ amaꞌl tetz yi junaꞌtz yi quiꞌc xac tan chipstoreꞌn yi eꞌ intanum. Quil tzꞌoc il tan chijoyleꞌn yi eꞌ cneruꞌ yi na cheꞌl teꞌj peꞌm, nin quil tzꞌoc il tan chijoyleꞌn yi eꞌ yi na chitxꞌakxij. Nin quil tzꞌoc il tan chitzꞌaqueꞌn yi eꞌ qꞌuixpnakeꞌ. Ej, nin quil tzꞌoc il tan takꞌleꞌn chiwaꞌ yi eꞌ yi jalt nin tan chiquimeꞌn tan weꞌj, ma na tzꞌocpon tan bajseꞌn chichiꞌbel yi eꞌ kꞌant, nin sbajk cunin jujun taꞌn cyakil tu pacꞌ.
17 ”¡Lastum yi pstoraꞌtz yi chin juntlen nin tajtzaꞌkl, yi tu na col cyen tuꞌ yi tawun! ¡Lok noj cuꞌn jun spar wi kꞌab, nin lok loꞌon yi wutz tan yi sparaꞌtz! ¡Lok skej yi kꞌab, nin lok stzaj yi wutz!” stzun Kataj Ryos bantz swetz.