Sukiꞌnt yi chelpon yi tanum Kataj liwr
10
1 Jakwok tetz Kataj tan sajeꞌn aꞌbal te yi tiemp tetz kꞌalaj, na iꞌ taꞌw eꞌchk kꞌancyok, nin tzꞌul tunin kojol yi aꞌbal wi icojbil. Quiꞌc nin caril sbneꞌ, nin xtxaꞌxank cyakil.2 Yi chiyol yi eꞌ aj wutz mes tuml yi eꞌchk chiryos yi banij cuntuꞌ, iꞌtz laꞌjil tuꞌ. Ej nin tircuꞌn yi na ẍchaj tib ẍchiwutz yi eꞌ nachol, nkꞌeꞌtz bintzij. Yi eꞌchk takleꞌn yi na cyal yi sbajok, nkꞌeꞌtz bintzij na quiꞌc xeꞌ. Nin yi chiyol yi na xcon cyaꞌn tan mayseꞌn junt, quiꞌc ekaꞌn taꞌn. Chaꞌstzun te yi eꞌ intanum naꞌ cuntunin na chaꞌj nint tu cyajtzaꞌkl, na niꞌcuꞌn eꞌ tu jun txob tal awun yi quiꞌc jun pstor cyetz.
3 Chaꞌstzun te je na tal Katajeꞌj: “Ẍchiꞌchok incꞌuꞌl scye yi eꞌ pstoraꞌtz, nin ẍcheꞌ incawseꞌ yi eꞌ bajxomaꞌtz.” Tzꞌocopon Kataj Ryos tan chicolcheꞌn yi eꞌ tetz tawun, yi eꞌ xonl kꞌajtzun Judá. Ej nin stakꞌeꞌ chiwalor chi yi walor jun chej yi qui na xob tan oyintziꞌ.
4 Nin choꞌn tzꞌeluꞌl Jun ẍchixoꞌl yi eꞌ aj Judá-aꞌtz yi niꞌcuꞌn tu jun balaj cꞌuba yi xicyol tetz jun tapij yil xcon tan chicolcheꞌn. Nchaꞌtz tzꞌocpon iꞌ chi jun estaque tetz chiquiwel.b Nin tzꞌocpon iꞌ chi jun Arco yi wiꞌnin na cꞌoxon flech.c Ej nin ẍchixoꞌl yi eꞌ aj Judá-aꞌtz choꞌn ẍchijalok wiꞌtz bajxom tetz oyintziꞌ.
5 Niꞌcuꞌn ẍchibneꞌ yi eꞌ aj Judájaꞌtz, chi jun cꞌoloj sanlar, yi na baj chitzekꞌsal yi txꞌotxꞌ tbeꞌ tan yi quikanbeꞌn. Chocpon tan oyintziꞌ, na xomok Kataj Ryos scyeꞌj, nin ẍchixcyek scye chicontr yi ateꞌeꞌn teꞌj chej, nin tzꞌelpon chikꞌej cyaꞌn.
6 Je na tal Katajeꞌj: “Swakꞌeꞌ chiwalor yi eꞌ xonl Judá, nin ẍchiclaxok yi eꞌ xonl kꞌajtzun Ẍep waꞌn. Nin ẍchimbajxok ẍchiwutz yil chipakxtzaj junt tir le cyetz chitanum, na wiꞌnin na el inkꞌajab scyeꞌj. Niꞌcuꞌntz chi quiꞌk jun tir nnoꞌc tan chilajeꞌn len, na yi in wetz in chiRyosil yi na wit chiyol yi na choꞌc tan innachleꞌn.
7 Yi eꞌ xonl Efraín chin cham nin ẍchibneꞌ chi jun cꞌoloj sanlar. Nin ẍchitzatzink chi ik win lbaj cyaꞌn. Nin yi eꞌ chinitxaꞌ, yil quilnin yi ja jal chiwalor, ẍchitzatzink tzuntz scyeꞌj. ¡Wiꞌnin tzun ẍchitzatzinktz sweꞌj!” stzun Kataj Ryos.
8 “Nocpon tan chichakleꞌn tzaj junt tir, nin chicopon inmolol tircuꞌn, nin ẍchiclaxok waꞌn. Spucꞌunk junt tir chiwutz chi eꞌ banakeꞌ tentz.
9 In noꞌcnak tan chixiteꞌn len beneꞌn tziꞌn tulak eꞌchk tnum. Poro nuꞌl txꞌakx junt tir ẍchicꞌuꞌl tzantzaj, nin tzꞌopon jun kꞌej yi ẍchipakxok junt tir scyuchꞌ chinitxajil tzoneꞌj le chitanum.
10 Cheluꞌl waꞌn Egipto, nin nocpon tan cyelseneꞌl tzaj Asiria, nin nchiben incyꞌal Galaad nin Líbano, nin spucꞌunk chiwutz, nin quil tzꞌak yi amaꞌlaꞌtz tetz cyetz.
11 Chicyꞌuꞌl wi yi mar tetz Egipto, na quil wakꞌ amaꞌl tan chibekꞌxeꞌn tan yi pakꞌbil mar. Stzajk yi tzanlaꞌ Nilo waꞌn. Chin skꞌej nin tunin sbneꞌ yi ticyꞌbeꞌn yi jun tzanlaꞌaꞌtz. Nin tzꞌelpon chikꞌej yi eꞌ aj Asiria waꞌn. Nchaꞌtz yi eꞌ aj Egipto, tzꞌelpon chichamil waꞌn.
12 Swakꞌeꞌ chiwalor yi eꞌ aj Judá, nin skꞌukek chicꞌuꞌl sweꞌj yil chiben ẍchiwutz tan oyintziꞌ. Jun cuꞌn yol, nelpon cuꞌn te tircuꞌn yi nwal, na in Ryos,” chij Kataj.