Yi chicaws yi eꞌ wunak yi najlcheꞌ lakak eꞌchk tnum yi ateꞌ nakaꞌjil Israel
9
1 Ej, i tzun bantz nintzun opon jun stziblal tan Kataj Ryos tan chixoꞌwseꞌn yi eꞌ wunak yi najlcheꞌ lakak amaꞌl cwent Hadrac nin le tnum Damasco: “Wetz tircuꞌn yi eꞌchk tnum cwent Siria,a chi taneꞌn chiꞌamaꞌl yi eꞌ xonl Israel, wetz tircuꞌn. 2 Nchaꞌtz wetz yi amaꞌl Hamat tu yi eꞌchk tnum yi at nakaꞌj, chi taneꞌn Tiro tu Sidón tu tircuꞌn yi eꞌ chiwunakil yi chin list nin eꞌ. 3 Ja bnix tapij solteꞌj yi tnum Tiro cyakꞌun, nin ja choꞌctz tan molcheꞌn oro tu sakal chi na oc molcheꞌn cꞌub yi mulujiꞌn cuꞌn na ban. 4 Poro quiꞌc na ban na nocpon tan majleꞌn len tircuꞌn yi eꞌchk meꞌbiꞌlaꞌtz ẍchikꞌab, nin mben cꞌoxij tircuꞌn yi tnum wi mar, nin tzꞌocpon kꞌaꞌkl yi tnum.5 ”Ej, nin yil quil yi eꞌ wunak cwent Ascalón tircuꞌn yi eꞌchk takleꞌnaꞌtz, ẍchixobok swetz. Nin yi eꞌ aj Gaza ẍchitijeꞌ qꞌuixcꞌuj, nin yi eꞌ aj Ecrón, quil jal chiwalor. ¡Quiꞌc rey sbneꞌ tan cawuꞌn le tnum Gaza, nin quiꞌc jun wunak snajank le tnum Ascalón! 6 Ma le tnum Asdod ẍchinajank jun kꞌuꞌj wunak yi nkꞌeꞌtz junit chixeꞌ, ma na eꞌ len cuꞌn awer nak, nin tan yi jun xtxolbilaꞌtz, tzꞌelpon chinimel yi eꞌ filistey waꞌn. 7 Tzꞌelpon incyꞌal yi chichib le chitziꞌ yi atit nin ẍchꞌel, nin quiꞌt lwakꞌ amaꞌl tan toqueꞌn jun jilwutz tꞌimbil le chitziꞌ yi xan. Poro ẍchixoꞌl yi eꞌ wunakaꞌtz at jujun yi ẍchicyajk cyen tetz wetz. Na chocpon tetz cyajlal yi eꞌ aj Judá. Ma yi eꞌ aj Ecrón, niꞌcuꞌn ẍchibneꞌ ẍchixoꞌl yi eꞌ aj Judá chi eꞌ banakeꞌ yi eꞌ jebuseo tentz.b 8 Nin list in tan chicolcheꞌn yi eꞌ wetz yi ateꞌ jakꞌ incaꞌwl. List in tan chicolcheꞌn ẍchikꞌab alchok chicontril yil chuꞌl tan chibiyleꞌn. Cyaꞌl jun tzꞌocpon tan chibuchleꞌn junt tir, na yi in wetz, in nocpon tan chiqꞌuicyꞌleꞌn,” chi Kataj Ryos.
Yi chireyil yi eꞌ xonl Israel yi at tulbil
9 ¡Axwok jun cꞌoloj aj Jerusalén, yi najlquix wi Sión, tzatzinwok nin bitzinwok tan yi tzatzin yi atix cuꞌnt! Na tzꞌul yi iReyil yi chin jicyuch nin teꞌj tajtzaꞌkl tan cawuꞌn, nin yi cyaꞌl jun xcyek quen teꞌj. Quil tocsaj tib nim tu tajtzaꞌkl, na choꞌn tzꞌul teꞌj jun neꞌẍ buruꞌ yi mam, tal tuꞌ jun ekum ektz tuꞌ.c
10 Copon xitul yi eꞌchk careꞌt tetz oyintziꞌ yi at ẍchikꞌab yi eꞌ xonl kꞌajtzun Efraín, nin quiꞌt chijal chej tetz oyintziꞌ Jerusalén, nin copon xitul iꞌ yi eꞌchk maꞌcl tetz oyintziꞌ. Tan iꞌ sjalok tzatzin paz beneꞌn tziꞌn wi munt. Nin scawunk squibaj eꞌchk nación nin wiꞌak eꞌchk mar. Nin scawunk te yi amaꞌl kale atit yi tzanlaꞌ Eufrates, jalen beneꞌn tziꞌn wi munt.
Yil tzꞌoc junt tir Israel tetz jun lmak tnum
11 Je yol Kataj Ryoseꞌj: “Axwok jun cꞌoloj aj Jerusalén, swutz cuꞌn yi ẍchꞌel yi katrat nocpon tan cyelseneꞌl tzaj yi eꞌ ixonl liwr, yi pres quitaneꞌn tul jun chin jul taneꞌn.d
12 ¡Ma yi axwok itetz yi pres iwutz, nin yi kꞌukleꞌt icꞌuꞌl tan iteleꞌn liwr, pakxenwok le amaꞌl tetz coloꞌn ib!e Jun cuꞌn yol waleꞌ nin tzitetz yi tzicambajeꞌ cob tir mas yi ibanl swutz yi qꞌuixcꞌuj yi na cxtzan tan mucꞌleꞌn.
13 Na yi wetz cꞌoxbil inflech tetz oyintziꞌ, iꞌtz yi eꞌ aj Judá, nin xconk jun chin flech waꞌn yi iꞌtz yi eꞌ xonl Efraín. Ma yi eꞌ yi najlcheꞌ wi juꞌwtz Sión chocpon waꞌn chi jun spar, nin nchiben waꞌn tan oyintziꞌ scyeꞌj tircuꞌn yi eꞌ awer nak, yi eꞌ aj Grecia,” chij Kataj.
14 Ẍchajeꞌ tib yi Kajcaw yi kaRyosil tcyaꞌj ẍchiwutz yi eꞌ tetz tanum,f nin mben cꞌoxol iꞌ yi tetz flech chi na ban xlitzꞌ. Nin iꞌ teꞌn nin iꞌ tzꞌocpon tan cweꞌseꞌn yi chun, nin tzꞌul iꞌ scye yi eꞌ contr tul jun chin salchcam, yi na saj licuꞌn tziꞌn.
15 Yi Kataj Ryos, iꞌ tzꞌocpon tzuntz tan chicolcheꞌn yi eꞌ tetz tanum. Nin yi eꞌ cyetz chocpon tan yakꞌpeꞌn eꞌchk cꞌub yi na chicꞌoxtzaj chicontr scyeꞌj. Nin sbajk chicontr cyaꞌn. Ẍchitzatzink yi eꞌ intanum chi ik jun cꞌoloj win nchijeꞌ cꞌajol.
16 Te yi tiempaꞌtz, tzꞌocpon Kataj Ryos tan chicolcheꞌn, nin tan chijutzꞌeꞌn tzaj yi eꞌ tetz tanum, chi na chimolxij jun cꞌoloj awun. Nin sjalok chikꞌej ẍchiwutz cyakil wunak. Choꞌn sjalok chikꞌej le cyetz chitanum. Niꞌcuꞌn sbneꞌ pakꞌpuchal chikꞌej chi na txekun yi eꞌchk cꞌub yi wiꞌnin na litzꞌun, yi at teꞌj jun coron.
17 ¡Chumbalaj nin sbneꞌ tircuꞌn chiꞌamaꞌl yi eꞌ xonl Israel, nin chin yubeꞌn nin sbneꞌ! Na spucꞌunk yi triw tu yi uva, nin ẍchichꞌuyok yi eꞌ xun scyuchꞌ yi eꞌ xicy, nin chin yubeꞌn nin ẍchibneꞌ.