Yi banl yi sukiꞌnt tan Kataj Ryos scyetz yi eꞌ xonl Israel
8
1 Ma jaluꞌ je xtxolbileꞌj yi tal Kataj Ryos: 2 “Je yi xtxolbileꞌj yi na waj lwal, yi in wetz yi in yi cyaꞌl na xcyeꞌ quen sweꞌj: Wiꞌnin na chiꞌch incꞌuꞌl tan yi eꞌchk takleꞌn yi ja bajij te Sión. 3 Poro yi in wetz, tzꞌopon jun kꞌej yil nopon junt tir Jerusalén tan innajeweꞌn. Ej nin te yi tiempaꞌtz stzꞌaꞌlchok scyetz yi eꞌ aj Jerusalén: ‘Yaꞌstzun yi eꞌ wunak yi na chiban taneꞌn yi caꞌwl Ryos.’ Nin scyaleꞌ wunak tetz yi juꞌwtz Sión: Yi juꞌwtz yi wiꞌnin xanil. 4 Nin ẍchicꞌolek junt tir yi eꞌ tal tijl cꞌuꞌlal lakak parque Jerusalén, tan ujleꞌn. Cyꞌaꞌn len chitxꞌamij cyaꞌn tan paj yi ja chitijin cuꞌn. 5 Nin ẍchijalok wiꞌnin nitxaꞌ junt tir. Ej nin snojk eꞌchk parque cyaꞌn na choꞌn ẍchisakchoktz. Nchaꞌtz ẍchisakchok lakak beꞌ. 6 Yi eꞌ intanum yi ẍchiclaxok cyen, squileꞌ yi jun tiempaꞌtz, chelpon yab te yi mbi cuꞌn squileꞌ. Poro yi in wetz quil neꞌl yab teꞌj, na in txumul tetz. Sbajok yi xtxolbilaꞌseꞌj, na in Ryos. 7 Nchaꞌtz in nocpon tan cyelseneꞌl tzaj yi eꞌ intanum liwr yi ateꞌ jakꞌ chicaꞌwl yi tnum yi at teleꞌn tziꞌn, tu toqueꞌn tziꞌn.8 ”Ej nin chuꞌl junt tir waꞌn tan chinajeweꞌn Jerusalén. Nin chocpon junt tir tetz mero intanum, nin nocpon wetz tetz chiRyosil, na tzꞌelpon inkꞌab te inyol yi walnak scyetz chimam chiteꞌa tentz. Ej nin chin tzꞌaknak cunin swulejeꞌ cawbeꞌn cyetz,” chij Kataj Ryos bantz swetz.
9 Nchaꞌtz nin tal Kataj yi xtxolbileꞌj: “Quiwit te yi akꞌun, yi axwok yi ja itbit yi chiyol yi eꞌ elsanl intziꞌ, na ja itbit eꞌchk xtxolbilaꞌtz jetz yi cweꞌn cuꞌn xeꞌ intemplojeꞌj tan jeꞌseꞌn junt tir. Na yi in wetz in Ryos. 10 Na ja jeꞌul cobox kꞌejeꞌj yi quiꞌc muꞌẍ tal chichojoꞌn yi eꞌ akꞌunwil. Nchaꞌtz qui nin nchichojlij yi eꞌchk chej yi nchixcon tan quichꞌeyeꞌn. Nin quiꞌc nin muꞌẍ tzatzin paz at-tz tzixoꞌlwok tan chipaj yi eꞌ icontr. Nin ja jal oyintziꞌ tzixoꞌl waꞌn. 11 Poro quiꞌt tzimban junt tir yi xtxolbilaꞌtz tzixoꞌlwok, yi axwok yi ja xclax cyen, quiꞌt tzimban chi ban le xeꞌtzbil tzaj. Jun cuꞌn sbajok yi xtxolbilaꞌseꞌj, na yi in wetz in Ryos. 12 Sjalok wiꞌnin tzatzin paz tzixoꞌlwok. Nin yi eꞌchk cojbil yi uva cuꞌn at swutz, wiꞌnin wutz stkꞌeꞌ. Nin sjalok wiꞌnin jilwutz cosech, nin wiꞌnin aꞌbal sbneꞌ. Nin swakꞌeꞌ tircuꞌn yi eꞌchk balaj takleꞌnaꞌtz scyetz yi eꞌ yi ja chiclax cyen. 13 Axwok aj Judá, nin axwok aj Israel, axwok jun latzꞌ mban ẍchixoꞌl yi eꞌ mas tnum, poro nocpon tan icolpeneꞌl tzaj jaluꞌ, nin cxocponwok tetz balaj ẍchiwutz cyakil. ¡Quil cxobwok! ¡Nimit icꞌuꞌl!” stzun Kataj Ryos.
14 Nchaꞌtz je na tal Kataj Ryos, yi cyaꞌl na xcyeꞌ quen teꞌj: “Ten cheꞌ incawsaj yi eꞌ imam iteꞌ, na nin jeꞌ lajpuj inwiꞌ scyeꞌj tan yi cyajtzaꞌkl cachiꞌ, nin ja imban taneꞌn yi wajbil scyeꞌj. 15 Poro yi jaluꞌ, ja bixeꞌ waꞌn tan imbnol jun baꞌn tetz Jerusalén tu Judá. Chaꞌstzun te quil cxobwok tetz jun. 16 Nin je yi xtxolbileꞌj yi tajweꞌn tziban taneꞌn sbneꞌ opon tunintz: Quil tzijal cuꞌn wi itakꞌ tzitibil itib, puntil cuꞌn xcawunwok, nin buchwok itib tan jaleꞌn tzatzin paz lakak pujbil xtisyaꞌ. 17 Quil tziban quen jun yab ajtzaꞌkl teꞌj junt, nin quil tzital: ‘Sak swutz Ryos quiꞌc mimban’, ko teweꞌn tuꞌ itil na itaj. Na yi eꞌchk ajtzaꞌklaꞌtz na takꞌ chiꞌch cꞌuꞌlal swetz. Na yi in wetz yi na chintzan tan talcheꞌn nin yi xtxolbileꞌj tzitetz, in iRyosil,” chij Kataj Ryos.
18 Ej, nintzun jilon tzaj junt tir Ryos. 19 Je yol iꞌeꞌj: “Yi mucꞌleꞌn weꞌjb yi na ibanwok taneꞌn le cyajiꞌn, tu oꞌiꞌn, tu jukiꞌn, tu lajujiꞌn xaw, na taj xtxꞌixpeꞌn tan toqueꞌn tetz eꞌchk tiemp tetz tzatziꞌn. Tajweꞌn tan banleꞌn taneꞌn balaj tzatziꞌnaꞌtz tul yi eꞌchk kꞌejlalaꞌtz. ¡Nchaꞌtz, joywok bin puntil tan talcheꞌn yi bintzij tzitibil itib, nin tan jaleꞌn tzatzin paz tzixoꞌl!” stzun Kataj bantz.
20 Nchaꞌtz nin tal Kataj Ryos: “Yi eꞌ wunak yi ateꞌ beneꞌn tziꞌn, yi najlcheꞌ lakak eꞌchk lmak tnum, chuꞌl tan xajseꞌn Jerusalén. 21 Na yi eꞌ wunakaꞌtz scyaleꞌ scyetz yi eꞌ yi najlcheꞌ tul junt tnum: ‘¡Quin, kajakeꞌ kabanl tetz Kataj Ryos!’ Nchaꞌtz scyaleꞌ coboxt: ‘Na kaj ketz, kaxomnin scyeꞌjuꞌ’ cheꞌch sbneꞌ. 22 Na wiꞌnin wunak tzꞌul chimolol quib Jerusalén. Choꞌn cuꞌn ẍchisajk tulak eꞌchk juy tnum nin tulak eꞌchk lmak tnum, tan jakleꞌn chibanl swetz.c 23 Te yi tiempaꞌtz, chocpon lajuj awer nak yi apart len chiyol tan stzꞌamleꞌn juꞌ beꞌch tetz jun judiy, nin scyaleꞌ tetz: ‘¡Na kaj kaxom nin teꞌjuꞌ, na ja kubit yi choꞌn at Ryos ẍchixoꞌluꞌ!’ cheꞌch sbneꞌ,” stzun Kataj Ryos.