Yi jun jilwutz mucꞌleꞌn weꞌj yi qui na tzatzin Kataj Ryos teꞌj
7
1 I tzun bantz le cyaj tajlal yi belujiꞌn xaw (yi na biꞌaj Quisleu) tul yi cyajiꞌn yob tan yi rey Darío tan cawuꞌn, nintzun cawun tzaj Kataj tetz Zacarías yi elsanl stziꞌ iꞌ. 2 Nin te yi tiempaꞌtz, yi eꞌ aj Betel nin saj chichakol cob yaj yi na chibiꞌaj Sarezer tu Regem-melec, scyuchꞌ coboxt tan jakleꞌn chibanl tetz Kataj Ryos. 3 Nchaꞌtz tan jakleꞌn cyajtzaꞌkl scyetz yi eꞌ elsanl stziꞌ iꞌ, nin scyetz yi eꞌ wiꞌtz paleꞌ yi ateꞌ le yi templo tetz Kataj Ryos. “¿Kocpon peꞌ il tan banleꞌn taneꞌn yi bis, nin tan mucꞌleꞌn weꞌj lakak oꞌiꞌn xaw cyakil yob, chi kutaneꞌn lejeꞌnak tzaj tunintz?” cheꞌch bantz.4-5 Ej, nintzun tal Kataj Ryos, yi cyaꞌl na xcyeꞌ quen teꞌj: “Zacarías, chij iꞌ. Alaj yi xtxolbil yi swaleꞌ nin tzatz scyetz tircuꞌn yi eꞌ xonl Israel, nin scyetz yi eꞌ wiꞌtz paleꞌ: ‘Yi axwok itetz ja el oxcꞌal tu lajujix yob itaꞌn tan mucꞌleꞌn weꞌj, na cyakil nin yob yi na jepon yi oꞌiꞌn xaw tu yi na jepon yi jukiꞌn xaw na imucꞌwok weꞌj, nin na ibanwok taneꞌn yi bis. Poro yi na iban yi eꞌchk imunlaꞌtz, nkꞌeꞌtz tan takꞌleꞌn inkꞌej. 6 Nin yi na cxwanwok ẍchixoꞌl cmon yi na bajij jun tzatziꞌn, iꞌtz ntin tan nojseꞌn tuꞌ icꞌuꞌl, nin nkꞌeꞌtz tan takꞌleꞌn weri inkꞌej,’ cẍchij sban” chij Kataj. 7 Ma jaluꞌ, ¿nkꞌeꞌtz ptzun iteꞌn nin xtxolbilaꞌtz talnak Kataj scyetz yi eꞌ elsanl stziꞌ iꞌ tiemp tzaj, tan cyoqueꞌn tan makleꞌn chiwutz yi eꞌ chimam chiteꞌuꞌ te yi eꞌchk takleꞌn yi chin ploj nin yi na chiban tul yi tiemp yi at tzaj tzatzin paz ẍchixoꞌl, nin te yi tiemp yi wiꞌnin chixoneꞌn wunak banak Jerusalén? Ej nin yi iteꞌn nin quitaneꞌn yi eꞌchk mas tnum yi ateꞌ inakajil. Ej nin iteꞌn nin quitaneꞌn yi eꞌchk tnum cwent Néguev, nin yi eꞌ yi najlcheꞌ jeꞌn tziꞌn wiꞌwtz.
Yi cyeleꞌn xit yi eꞌ xonl Israel tan paj yi qui eꞌ oc cꞌulutxum jakꞌ caꞌwl Kataj Ryos
8 Sajeꞌn tzun tlol Kataj Ryos yi xtxolbileꞌj tetz Zacarías tan tlol scyetz yi eꞌ yi eꞌ opon tan jakleꞌn cyajtzaꞌkl tetz Kataj: 9 “In yi Ryos yi cyaꞌl na xcyeꞌ quen sweꞌj, ej nin je incaꞌwleꞌj, yi walnak tiemp tzaj: Puntil cuꞌn tzitulej yi icawuꞌn. Banwok bin baꞌn tetz junt. Elk ikꞌajab tzitibil itib. 10 Quil cxoꞌc tan chibuchleꞌn yi eꞌ xmaꞌlcaꞌn, nin quil cxoꞌc tan chibuchleꞌn yi eꞌ meꞌbaꞌ yi quiꞌc chitaj chitxuꞌ. Nchaꞌtz quil cxoꞌcwok tan chibuchleꞌn yi eꞌ awer nak, nin yi eꞌ meꞌbaꞌ yi quiꞌc at scyuchꞌ. Quil tzitxum yi ẍeꞌn tziban tan banleꞌn mal tzitibil itib.” 11 Poro yi eꞌ wunakaꞌtz tentz qui nin eꞌ ban taneꞌn yi yol Kataj, qui nin ocpon teꞌj chiwiꞌ. Na niꞌcuꞌntz chi ik eꞌ len cuꞌn chcan ban. Qui nin quibit yi caꞌwl Kataj Ryos. 12 Chin tzeꞌtzuj nin ban te cyalmaꞌ, chi quiwel jun diamante, tan qui tocomponeꞌn yi ẍchusuꞌn tu yi caꞌwl Kataj tetz cyalmaꞌ, yi talnak tan yi tetz espíritu scyetz yi eꞌ elsanl stziꞌ iꞌ tan chitxolil scyetz. Chaꞌstzun te ẍchꞌuyeꞌn yi ẍchiꞌchbeꞌn cꞌuꞌl Kataj scyeꞌj. Wech iꞌ Ryos yi cyaꞌl na xcyeꞌ quen teꞌj. 13 Na nin tal iꞌ: “Yi eꞌ cyetz qui nin mmocpon inyol te chiwiꞌ yi woqueꞌn tan chimoxeꞌn. Nchaꞌtz tzun intz, quiꞌt tzimbit chiyol jaluꞌ, yil choꞌc tan naꞌwseꞌn imbiꞌ. 14 Chaꞌstzun te ja cheꞌl inxitul tulak eꞌchk tnum yi qui cyajskeꞌn, chi ik jun chin salchcam mmoꞌc tan chixiteꞌn len beneꞌn tziꞌn. Ma yi cyetz chiluwar ja oc cyen tetz jun amaꞌl yi tzꞌinunin tunin taneꞌn, kale quiꞌt jalwit puntil tan najeweꞌn jun wunak tul. ¡Chin yubeꞌn nin banak chitanum tenẍchan! Ma jaluꞌ tan chipaj ja oc tetz jun amaꞌl yi tzꞌinunin tuꞌ,” chij Kataj.