Yi tilol Zacarías cyaj careꞌt tetz oyintziꞌ chi tul wutzicyꞌ taneꞌn
6
1 Ej, i tzun bantz, nintzun wil junt xtxolbil. Nin wil yi chijeꞌn jobtuj cyaj careꞌt tetz oyintziꞌ, yi kinij quitaneꞌn tan chej. Choꞌn tzun ateꞌ-tz txoꞌl cob chin wutz yi brons cuꞌn. 2 Yi bajx careꞌt kinij cyaꞌn chej yi cyak cyeꞌj. Ma yi caꞌp careꞌt kinij cyaꞌn chej yi kꞌek cyeꞌj. 3 Yi toxiꞌn careꞌt kinij cyaꞌn chej yi sak cyeꞌj. Ma yi cyajiꞌn careꞌt kinij cyaꞌn chej yi way cyeꞌj.4 “Iluꞌ jun cꞌoloj Wajcaw, ¿mbi na elepont yi cyaj careꞌteꞌj?” chinch bantz tetz yi ángel. 5 “Yi cyaj careꞌtaꞌtz, na elepont cyaj tojkbil cyekꞌekꞌa yi na eltzaj swutz Kataj Ryos, yi Ryos yi taw cyakil yi munt. 6 Yi careꞌt yi kinij cyaꞌn chej yi kꞌek cyeꞌj, choꞌn mben le jun tnum jeꞌn tziꞌn. Nin yi jun yi kinij cyaꞌn chej sak cyeꞌj, choꞌn mben le yi tnum yi at toqueꞌn tziꞌn. Ma yi careꞌt yi kinij cyaꞌn chej yi way cyeꞌj, choꞌn mben le tnum yi at cweꞌn tziꞌn,” chij yi ángel bantz swetz.
7 Ej, nintzun eꞌ eltzaj yi eꞌ chej yi way cyeꞌj, na nternin na el cyalmaꞌ tan chibeneꞌn tan xoꞌn beneꞌn tziꞌn. “Quibeneꞌnk tan xoꞌn beneꞌn tziꞌn wuxtxꞌotxꞌ,” stzun yi ángel ban scyetz. Ej nin yaꞌtz nin tzun cyulejtz.
8 Yi wiꞌt wilol yi xtxolbilaꞌseꞌj, nintzun ẍchꞌin tzaj yi ángel swetz: “¡Xmayweꞌ nin yi eꞌ, yi ja chiben le yi tnum jeꞌn tziꞌn!b Choꞌn nchiben tan takꞌleꞌn chicaws yi eꞌ wunakaꞌtz. Nin yi jun cawsaꞌtz ja xcyeꞌ tan mayseꞌn cꞌuꞌl Ryos”, stzun yi ángel bantz swetz.
Yi jeꞌn yi coron twiꞌ Josué, yi wiꞌtz paleꞌ
9 I tzun bantz, nintzun cawun tzaj Kataj Ryos swetz: 10 “Quiloꞌk tan stzꞌamleꞌn yi oy yi ja ul cyakꞌun Heldai, Tobías tu Jedaías, yi pres banakeꞌ Babilonia, na ja chipakxij tan najeweꞌn junt tir le katanum. Yil molxij yi eꞌchk oyaꞌtz baꞌn cẍben xe caꞌl Josías yi cyꞌajl Sofonías. 11 Te yi oyaꞌtz yi oro cuꞌn tu sakal baꞌn cẍoꞌc tan banleꞌn jun chumbalaj coron,c nin baꞌn tzawakꞌeꞌn yi coronaꞌtz twiꞌ Josué yi wiꞌtz paleꞌ, yi cyꞌajl Josadac. 12 Nin alaj tetz: ‘Yi Ryos yi cyaꞌl na xcyeꞌ quen teꞌj, na tzan tan talcheꞌn: Yi jun yaj yi na aꞌlchij Xlum tetz, xlumink chan te yi tetz xeꞌ, nin tzꞌocpon iꞌ tan jeꞌseꞌn junt tir yi wetz intemplo. 13 Tzꞌocpon iꞌ tan jeꞌseꞌn yi templo junt tir, nin stzꞌakꞌlok kꞌej iꞌ chi na akꞌlij kꞌej jun wiꞌtz rey. Nin scꞌolek wi jun balaj cꞌolchbil tan cawuꞌn. Nin scꞌolek quen yi wiꞌtz paleꞌ xlaj iꞌ, nin sjalok jun chin tzatzin paz ẍchixoꞌl. 14 Ma yi jun chin coronaꞌtz, choꞌn tzꞌopon tul yi templo tan cyuleꞌn txꞌakx Tobías tu Heldai tu Jedaías nin tu Josías yi cyꞌajl Sofonías tkacꞌuꞌl,’ ” stzun Kataj Ryos bantz swetz.
15 Nchaꞌtz chuꞌl wunak joylaj tan chꞌeyaꞌn tan jeꞌseꞌn yi templo. Nin tan yi xtxolbilaꞌtz tzꞌelepon chitxumuꞌ tetz yi jun cuꞌn, Kataj Ryos, yi cyaꞌl na xcyeꞌ quen teꞌj, nchinchakon tzaj tan xtxoleꞌn yi tajbil iꞌ scyeruꞌ. Nin yi xtxolbilaꞌtz sbajok yil cyakꞌuꞌ amaꞌl tan quibitaluꞌ yi yol Kataj Ryos, nin yil choꞌcuꞌ cꞌulutxum tan banleꞌn taneꞌn yi tetz caꞌwl.