Yi tilol Zacarías jun toloj uꞌj yi at tzꞌibaꞌn le cabil xlaj chi tul wutzicyꞌ taneꞌn
5
1 Ej, i tzun bantz, nintzun wil jun toloj uꞌj chi tul wutzicyꞌ taneꞌn, yi na xon tcyaꞌj yi at tzꞌibaꞌn swutz. 2 “¿Mbiꞌtz yi juneꞌj yi na awil nin?” chij yi ángel ban swetz. “Na wilnin jun toloj uꞌj yi at tzꞌibaꞌn swutz, nin yi na xon tcyaꞌj. Yi tkanil yi jun uꞌjaꞌtz iꞌtz beluj metr, nin cyaj metr tu niꞌcy yi wutz,” chinch bantz tetz.3 “Ej nin tul yi jun uꞌjaꞌtz, choꞌn tzꞌibaꞌn tircuꞌn chicaws yi eꞌ xonl Israel yi at tulbil squibaj. Nin cabil len xlaj tzꞌibaneꞌt. Na quiꞌc na ban yi ko alkꞌom jun, nka laꞌj jun. Quiꞌc na ban. Tircuꞌn eꞌ quil cheꞌl liwr tkꞌab yi chicaws yi txꞌaklij ẍchiwutz. 4 Na je yol Katajeꞌj yi Ryosaꞌtz yi cyaꞌl na xcyeꞌ quen teꞌj: ‘In nocpon tan chicawseꞌn yi eꞌ alkꞌom, nin yi eꞌ yi na xcon imbiꞌ cyaꞌn tetz quiwel chiyol, tan ẍchajleꞌn yi ik chelpon cuꞌn teꞌj. Nin yi jun cawsaꞌtz xcyek tan woqueꞌn cuꞌn chicaꞌl. Quiꞌt jal tzaj eꞌchk ptzoꞌm tu eꞌchk xanil chicaꞌl,’ stzun Kataj,” chij yi ángel bantz swetz.
Yi tilol Zacarías jun xnaꞌn chi tul wutzicyꞌ taneꞌn tul jun maꞌlbil yi moꞌtx tuꞌ
5 Ej nintzun ul junt tir yi ángel tan yol swetz: “¡Ma jaluꞌ, xmaynin!” stzun yi ángel swetz. 6 “¿Mbi tzun i ilaꞌtz?” chinch bantz. “Iꞌtz jun chin moꞌtx yi na xcon tan maꞌleꞌn yi quil yi eꞌ wunak yi najlcheꞌ tzoneꞌj Israel,” chij yi ángel bantz swetz.
7 Yi jun maꞌlbilaꞌtz lamij stziꞌ tan jun jobsel yi plomaꞌ cuꞌn. Jeꞌn tzun jakijtz, nin tul yi jun maꞌlbilaꞌtz ben wilol yi cꞌolchij jun xnaꞌn. 8 “Yi jun xnaꞌnaꞌtz na elepont yi eꞌ yi juntlen cyajtzaꞌkl,” chij yi ángel bantz swetz. Cweꞌn tzun pitol yi ángel yi jun xnaꞌnaꞌtz tul yi maꞌlbil, nin cuꞌ jopol stziꞌ yi moꞌtx tan yi jobsel yi plomaꞌ cuꞌn.
9 Ej, nin junt kujt nin, beneꞌn wilol yi chijeꞌn jobtuj cob xnaꞌn, yi at len chixicyꞌ, yi cyekꞌekꞌ tuꞌ na chijeꞌsan tcyaꞌj. Yi chixicyꞌ niꞌcuꞌn tu chixicyꞌ cigueña.a Cyꞌaꞌn tzun yi jun maꞌlbilaꞌtz cyaꞌn yi cyeleꞌn xicyꞌin. 10 “¿Naꞌ mbeneꞌt quicyꞌal yi maꞌlbilaꞌtz?” chinch banintz tetz yi ángel yi wuchꞌ tan yol. 11 “Choꞌn mben cyaꞌn Babilonia, nin chocpon tan jeꞌseꞌn jun tyoẍil. Ma yil bnix cyaꞌn, jepon tzuntz cyaꞌn wi jun ujbil,” stzun yi ángel bantz.