Yi tilol Zacarías jun chin wutzileꞌn cantil tu cob wiꞌ oliw chi tul wutzicyꞌ taneꞌn
4
1 Ej i tzun bantz, nintzun ul junt tir yi ángel yi jilon swetz bajx cuꞌn, nin oc tan incꞌaseꞌn, chi na jeꞌ cꞌasuꞌn jun yi chin tzaꞌj nin tan watl. 2 “¿Mbi na awilnin?” chij iꞌ bantz swetz. “Na wilnin jun chin cantil yi oro cuꞌn, yi choꞌn at cuꞌlbil yi aceitil tzwiꞌeꞌn. Nin at juk kꞌab yi jun cantilaꞌtz kale na cuꞌlneweꞌt kꞌakꞌ. Nin yi aceit choꞌn na cutzaj tul juk tal neꞌẍ tuw jalen te yi jujun cuꞌlbil aceitaꞌtz. 3 Nin xlajak yi jun cantilaꞌtz at cob wiꞌ oliw. At jun le sbal, nin junt le max,” chinch bantz tetz yi ángel.4 Nintzun injaktz tetz yi ángel: “Iluꞌ teruꞌ taꞌ, ¿mbi na elepont?” 5 “¿Qui peꞌ na el atxum tetz?” chij iꞌ swetz. “Quiꞌ” chinch bantz.
6 “Yi tajbil Kataj iꞌtz tan tponeꞌn yi xtxolbileꞌj twiꞌ Zorobabel, nin je yoleꞌj: ‘Quil kꞌukeꞌ icꞌuꞌl scye jun cꞌoloj sanlar, nin quil kꞌukeꞌ icꞌuꞌl te ichamil cuntuꞌ. Ma na kꞌukek icꞌuꞌl te weri inespíritu, stzun Kataj Ryos, yi Ryosaꞌtz yi cyaꞌl na xcyeꞌ quen teꞌj. 7 Quil xcyeꞌ yi jun chin wutza tan makleꞌn beꞌ Zorobabel, na copon nil swutz iꞌ. Tzꞌocpon tzun Zorobabeltz tan jeꞌseꞌn tircuꞌn yi templo jalen te yi wiꞌtzbil cꞌub. Nin yi eꞌ wunak scyaleꞌ: ¡Chin yubeꞌn nin yi templo! ¡Chumbalaj nin! cheꞌch sbneꞌ,’ ” chij yi ángel bantz swetz.
8-9 Ej nintzun tal Kataj yi xtxolbileꞌj swetz: “Zorobabel lcuꞌsan xeꞌ yi templo nin iꞌ teꞌn nin iꞌ ljeꞌsempon tircuꞌn.” Tan yi xtxolbilaꞌtz tzꞌelpon chitxumuꞌ tetz yi iꞌtz Kataj Ryos, yi Ryosaꞌtz yi cyaꞌl na xcyeꞌ quen teꞌj, yi nchinchakon tzaj tan xtxoleꞌn yi xtxolbileꞌj scyeruꞌ. 10 “Yi xeꞌteꞌn cuꞌn yi akꞌun, sjalok wiꞌnin eꞌ yi chitxumeꞌ yi quil jepon tamp yi akꞌon, nin yi nink bnix quiꞌc wutzil sbneꞌ. Poro tzantzaj yi eꞌaꞌtz ẍchitzatzink te Zorobabel, na squileꞌ yi txant cuntuꞌ tan xcyeweꞌn iꞌ tan jeꞌseꞌmpon yi jun chin akꞌunaꞌtz yi qui tuꞌ ilwutz ban le xeꞌtzbil tzaj,” stzun Kataj.
Nchaꞌtz tal yi ángel: “Yi juk tal txekbilaꞌtz, na elepont yi wutz Kataj Ryos yi na tzan tan tilweꞌn yi mbi cuꞌn na bajij beneꞌn tziꞌn wi munt,” stzun yi ángel bantz swetz.
11 “Ej, nin ¿mbi na elepont yi cob wiꞌ oliw yi ateꞌ xlajak yi cantil? 12 ¿Nin mbi na elepont yi cob kꞌab yi oliwaꞌtz yi choꞌn na saj yi aceitil tul tal neꞌẍ tuw yi oro cuꞌn yi na opon tul eꞌchk cantil?” chinch bantz tetz. 13 “¿Qui peꞌ na el atxum tetz yi mbi na elepont?” chij iꞌ swetz. “Quiꞌ taꞌ, qui na el intxum tetz,” chinch tetz. 14 “Yi cob oliwaꞌtz, na elepont yi cob yi jeꞌnakeꞌ txaꞌij, nin jeꞌnakt aceit ẍchiwiꞌ tan chixconeꞌn tetz Kataj Ryos, yi taw cyakil yi munt” chij yi ángel bantz swetz.