Yi tilol Zacarías yi xtxꞌixpeꞌn yi beꞌch tetz Josué chi tul wutzicyꞌ taneꞌn
3
1 I tzun bantz, nintzun ẍchaj Kataj yi Josué swetz, yi wiꞌtz paleꞌ, chi tul wutzicyꞌ taneꞌn. Choꞌn txiclij iꞌ swutz yi ángel yi kꞌajbil Kataj Ryos. Ej nin ben wilol junt yi choꞌn txiclij le sbal, nin iꞌtz yi ángel yi aj xochonl,a yi list taneꞌn tan takꞌleꞌn til Josuéjaꞌtz. 2 Poro yi ángel yi kꞌajbil Kataj nin taltz tetz yi ángel aj xochonl: “¡Nink tzꞌoc chan Kataj Ryos tan makleꞌn awutz! ¡Nink tzꞌoc yi Ryos yi wiꞌnin na pekꞌ te Jerusalén, tan amakleꞌn! Na yi jun yajeꞌj niꞌcuꞌn iꞌ tu jun piẍ tzeꞌ yi na tzan kꞌaꞌkl, yi ja el tzaj colpuj tkꞌakꞌ.” 3 Ma yi Josué, txicl cuntuꞌ iꞌ-tz swutz yi ángel yi kꞌajbil Kataj, nin chin tzꞌil nin yi beꞌch tetz yi at cyen teꞌj.4 Cawuneꞌn tzun yi ángeltz scyetz yi eꞌ ẍchakum yi ateꞌ-tz tan teleꞌn chitxꞌixpul yi beꞌch tetz Josué yi chin tzꞌil nin. “Yi xtxolbileꞌj, na elepont yi ja el ticyꞌleꞌn awil, nin tzꞌocpon balaj beꞌchok tzaweꞌj,” stzun yi ángel bantz tetz Josué. 5 Lajkeꞌl nintzun cawuneꞌn nintz scyetz yi eꞌ ẍchakum tan jeꞌn toliꞌn jun xbuꞌkb yi chin skoj nin yi nim tkan teꞌj wiꞌ Josué. Nchaꞌtz nin oc balaj beꞌch tetz cyaꞌn. Ma yi ángel yi kꞌajbil Kataj qui nin eltz, ma na cyaj tuꞌ txicloktz.
6 Beneꞌn tzun tlol yi ángelaꞌtz tetz Josué: 7 “Je na tal Ryoseꞌj: ‘Kol cxom sweꞌj, nin kol tzaban taneꞌn incaꞌwl, cẍocpon tzuntz waꞌn tetz wiꞌtz paleꞌ tul intemplo. Ẍcawunk txeꞌ, nin wutz tkanil yi intemplo-aꞌtz. Swakꞌeꞌ tzun akꞌejtz, nin cẍocpon waꞌn cyajlal yi eꞌ ángel yi na chixcon swetz. 8 Ma jaluꞌ Josué bit tzaj, yi aẍatz yi aẍ wiꞌtz paleꞌ. Nchaꞌtz quibiteꞌ tzaj cyakil yi eꞌ awuchꞌ, yi eꞌ yi na chixcon tetz paleꞌ tzinwutz. Tircuꞌn yi axwok itetz, axwok jun balaj elsawutzil te yi mbi sbajok tzantzaj. Na tzꞌul junt tir yi weri nchakum waꞌn, yi jun yi na aꞌlchij Xlumc tetz. 9 Ej, nin ja cuꞌ jun balaj cꞌubd waꞌn tzawutz yi juk cuꞌn bak wutz xlajak,e nin nocpon tan stzꞌibeꞌn quen eꞌchk yol teꞌjak eꞌch xlajaꞌtz. Ej, nin tul jun ntziꞌ keꞌj stzajk tircuꞌn quil yi eꞌ intanum waꞌn,f na in yi Ryos yi cyaꞌl na xcyeꞌ quen sweꞌj. 10 Nin yil tzꞌopon yi jun kꞌejaꞌtz, baꞌn tzun cxtzatzin woktz icyakil cuꞌn. Nin baꞌn tzixajsaj itibtz tzitibil itib, na ntin tzatzin paz sjaloktz tzixoꞌl. Baꞌn tzun cxujeꞌ len tmujil yi eꞌchk wiꞌ uva tu eꞌchk wiꞌ ibẍg yi sjalok len tzituchꞌ. Jun cuꞌn sbajok yi xtxolbileꞌj, na yi in wetz, in yi Ryos yi cyaꞌl na xcyeꞌ quen sweꞌj.’ ”