Yi tilol Zacarías jun yaj chi tul wutzicyꞌ taneꞌn yi cyꞌaꞌn jun maꞌlbil taꞌn
2
1 I tzun bantz nin wil junt xtxolbil. Nin wil jun yaj yi cyꞌaꞌn jun maꞌlbil txꞌotxꞌ taꞌn.2 “¿Naꞌ mbeneꞌtuꞌ?” chinch banintz tetz. “Choꞌn nchimben tan maꞌleꞌn yi tnum Jerusalén, tan tilweꞌn yi nicyꞌnaꞌ wutz, nin nicyꞌnaꞌ tkanil yi amaꞌl yi majij taꞌn,” stzun yi yaj bantzajtz swetz.
3 Ej, nintzun wil yi tajeꞌn yi ángel yi nsken wiꞌt kajilon tuchꞌ. Poro nin ben wilol junt ángel yi teleꞌn tzaj tan cꞌulcheꞌn. 4 Nin tzun ben tlol tetz: “Or tzabeneꞌn te yi yaj yi cyꞌaꞌn yi maꞌlbil taꞌn, nin alaj tetz: ‘Wiꞌnin wunak ẍchinajank junt tir Jerusalén. Nin tan paj yi wiꞌnin wunak tu cyawun sbneꞌ-tz, quiꞌct tzun rmeril tan banleꞌn tapij solteꞌj yi tnum. 5 Poro yi in wetz, chij, niꞌcuꞌn tzimbneꞌ chi jun tapij yi na tincꞌun kꞌaꞌkl solteꞌj yi tnum. Nin tzinchajeꞌ yi inkꞌej, tu impakꞌpuchal tul,’ ” stzun Kataj Ryos, chij yi ángel bantz.
Tzꞌocpon Kataj Ryos tan chicolcheꞌn yi eꞌ tetz tanum
6-7 Je na tal Kataj Ryoseꞌj scyetz yi eꞌ tetz tanum: “Ja noꞌc tan ilajeꞌn len, tulak eꞌchk tnum beneꞌn tziꞌn. Poro yi jaluꞌ swaleꞌ nin tzitetz: ¡Quiteleꞌnk tzaj le eꞌchk amaꞌl yi at jeꞌn tziꞌn! Nin quiteleꞌnk tzaj Babilonia, na posariꞌn tuꞌ na iban tul eꞌchk amaꞌlaꞌtz. Na yi ax itetz choꞌn at itetz inajbil Sión. Nelpon cuꞌn teꞌj inyol, na yi in wetz, in Ryos,” chij Kataj.
8-9 Ma jaluꞌ, yi Ryos yi cyaꞌl na xcyeꞌ quen teꞌj, ja chinsaj ẍchakol tan xtxoleꞌn yi xtxolbileꞌj scyetz yi eꞌchk tnum yi eꞌ oc tan oyintziꞌ tziteꞌj, nin yi eꞌ opon tan majleꞌn len tircuꞌn yi eꞌchk itakleꞌn. Je yol iꞌeꞌj scyetz: “Alchok scyetz yil tzꞌoc tan chixuxeꞌn muꞌẍ tal yi eꞌ intanum, niꞌcuꞌntz chi yi najk tzan tan tocleꞌn yi niꞌil inwutz. Chaꞌstzun te, nocpon tan oyintziꞌ scye yi eꞌ tnumaꞌtz, nin iteꞌn nin yi cyetz chiꞌesclaw chocpon waꞌn tan majleꞌn len yi eꞌchk chimeꞌbiꞌl,” chij Kataj Ryos.
Tan yi xtxolbilaꞌtz ẍchajeꞌ Kataj Ryos yi tetz ẍchamil, nin tzꞌelpon itxum tetz yi iꞌtz yol iꞌ yi na chintzan tan xtxoleꞌn tzitetz.
10 Nchaꞌtz je junt yol iꞌeꞌj: “¡Axwok jun cꞌoloj aj Jerusalén, bitzinwok tan yi tzatzin, na yi in wetz nopon tan najeweꞌn tzixoꞌl! 11 Na yil chinnajeꞌ tzixoꞌl, chocpon wiꞌnin jilwutz tnum jakꞌ incaꞌwl, nin swaleꞌ: Nchaꞌtz yi eꞌchk tnumeꞌj, eꞌ intanum. Nin ẍchinnajank tzixoꞌlwok,” chij Kataj.
Yil bajij yi eꞌchk xtxolbilaꞌtz tzꞌelpon tzun chitxumuꞌ-tz tetz yi iꞌtz Kataj Ryos yi nchinchakon tzaj tan xtxoleꞌn yi xtxolbilaꞌseꞌj scyeruꞌ.a 12 Na tzꞌocpon junt tir Judá tetz yi amaꞌl yi wiꞌnin na pekꞌ Kataj Ryos teꞌj. Nin staleꞌ iꞌ junt tir: “Yi tnum yi txaꞌijt waꞌn tan jaleꞌn wiꞌnin kꞌej, iꞌtz Jerusalén,” chij iꞌ sbneꞌ.
13 Ma jaluꞌ: ¡Tajweꞌn yil chinumeꞌ cyakil wunak! Tajweꞌn chiyutꞌ quib tircuꞌn, na at tulbil Ryos skaxoꞌl. Scyajk cyen yi tetz amaꞌl taꞌn, yi chin xan nin, tan tuleꞌn tzoneꞌj.