ZACARÍAS
Yi toqueꞌn Kataj Ryos tan chimoxeꞌn yi eꞌ tetz tanum
1
1 I tzun bantz, te yi nsken wiꞌt el jun yob tu wajxakix xaw tan yi rey Daríoa tan cawuꞌn, nintzun saj tlol Kataj Ryos yi xtxolbileꞌj tetz yi elsanl stziꞌ iꞌ yi Zacarías,b yi cyꞌajl Berequías, yi mamaj Iddo.c 2-3 Je yol Kataj Jehová, yi Ryos yi cyaꞌl na xcyeꞌ quen teꞌj: “Nim cunin njeꞌ lajpuj inwiꞌ scye yi eꞌ imam iteꞌ tentz. Chaꞌstzun te alaj yi xtxolbileꞌj scyetz yi eꞌ atanum jaluꞌ: Pakxenwok junt tir sweꞌj,d nin nchaꞌtz tzun intz snaꞌtok junt tir tziteꞌj. Jun cuꞌn tzꞌelpon inkꞌab te inyol, na in yi Ryos yi cyaꞌl na xcyeꞌ quen sweꞌj. 4 Quil tzibanwok chi eꞌ banakeꞌ yi eꞌ imam iteꞌ tentz. Na ja xcon inyol cyakꞌun yi eꞌ elsanl intziꞌ,e tan makleꞌn kloꞌ chiwutz te yi eꞌchk ajtzaꞌkl yi chin juntlen nin yi eꞌ xomnak teꞌj. Poro qui nin eꞌ oc tan banleꞌn taneꞌn, na qui nin ocpon te chiwiꞌ.
5 ”Ten chiquim yi eꞌ imam iteꞌaꞌtz. Nchaꞌtz yi eꞌ elsanl intziꞌ, ten chiquim. Na quil chaꞌtij tetz cyakil tiemp tan makleꞌn iwutz, tan qui ibeneꞌn tul il. 6 Poro yi weri inyol tu eꞌchk incaꞌwl yi walnak scyetz yi eꞌ elsanl intziꞌ tan chitxolil scyetz, ja xcyeꞌ tan cꞌaseꞌn cyajtzaꞌkl. Na yi tuleꞌn chicaws waꞌn, ja chipakxij sweꞌj, na ja chinachon teꞌj yi iꞌtz chipaj nin cyeraꞌtz.”
Yi tilol Zacarías cobox yaj yi choꞌn ateꞌeꞌn teꞌj chej, chi tul wutzicyꞌ taneꞌn
7 Ma jaluꞌ, yi in wetz in Zacarías, in elsanl stziꞌ Ryos. Yi intaj na biꞌaj Berequías, ma incyꞌeꞌx Iddo biꞌ. Ej nin je yi xtxolbileꞌj yi tal Kataj Ryos swetz tul yi caꞌpiꞌn yob tan yi rey Darío tan cawuꞌn. Nin ja wil yi jun xtxolbilaꞌtz le junaklajiꞌn kꞌej tajlal yi junlajiꞌn xaw yi na biꞌaj Sebat. 8 Yi toqueꞌn lakꞌbal nin wil yi xtxolbileꞌj chi tul wutzicyꞌ taneꞌn: Nin ben wilol jun yi ateꞌn teꞌj jun chejf cyak teꞌj. Nchaꞌtz nin ben wilol jun cꞌolojt chej wutz coc yi junaꞌtz. At yi cyak cyeꞌj, at yi way cyeꞌj, nin at yi sak cyeꞌj. 9 “¿Wajcaw, naꞌ tzun scyetz eꞌ il yi eꞌ yi ateꞌeꞌn teꞌj chej tziꞌneꞌj?” chinch banintz tetz yi ángel. “Tzinchajeꞌ tzatz yi mbiꞌtz chimunl,” stzun iꞌ ban tzajtz swetz.
10 Ej at tzun jun yi choꞌn at xoꞌl tzeꞌ, nintzun jilon tzajtz: “Yi eꞌaꞌtz, yaꞌstzun yi eꞌ yi ja chiben ẍchakol Kataj Ryos tan chibeneꞌn tan xmayeꞌn yi mbi na bajij lakak nación beneꞌn tziꞌn wi munt,” chij bantzajtz.
11 Nin tzun eꞌ jilon nin yi eꞌaꞌtz yi ateꞌeꞌn teꞌj chej tetz yi ángel yi kꞌajbil Kataj, yi at ẍchiwutz, xoꞌl tzeꞌ. I tzun saj cyaloltz: “Ja xkaꞌk tan tilweꞌn yi mbi na bajij beneꞌn tziꞌn wi munt. Poro quiꞌc jun takleꞌn na bajij, ma na ntin tzatzin paz at ẍchixoꞌl wunak,” cheꞌch bantz tetz.
12 Ma yi ángel yi kꞌajbil Kataj, nin jilon nintz tetz Kataj Ryos, i tzun taltz: “Yi iluꞌ teruꞌ Taꞌ, yi iluꞌ yi jun yi cyaꞌl na xcyeꞌ quen teꞌj, ja wiꞌt el 70 yob tan yi ẍchiꞌchbeꞌn cꞌuꞌluꞌ te yi tnum Jerusalén nin scye yi eꞌchk mas wunak yi najlcheꞌ tulak eꞌchk tnum cwent Judá. ¿Tonaꞌl cutzaj xtxumuꞌnuꞌ scyeꞌj? ¿Tonaꞌl nin tzꞌel kꞌajabuꞌ junt tir scyeꞌj?” stzun yi ángel bantz tetz.
13 Yi tbital Kataj Ryos yi xtxolbilaꞌtz, nintzun tal iꞌ cobox yol tan mayseꞌn cꞌuꞌl yi ángelaꞌtz yi jilon swetz tul inwutzicyꞌ. 14 Ej cawuneꞌn tzaj tzun yi ángel swetz tan jeꞌn inwiꞌ tan xtxoleꞌn yi xtxolbileꞌj: “Je yol Katajeꞌj: ‘Yi wetz wiꞌnin na wokꞌlej wutz yi tnum Jerusalén yi at wi Sión.g 15 Chaꞌstzun te ja chꞌuy yi ẍchiꞌchbeꞌn incꞌuꞌl scye yi eꞌ nación yi quiꞌc na chibislej. Na yi chixconeꞌn waꞌn tan takꞌleꞌn muꞌẍ chicaws yi eꞌ aj Jerusalén, yi eꞌ cyetz ja cyakꞌ mas chicaws swutz yi txumijt waꞌn. 16 Chaꞌstzun te na wal yi xtxolbileꞌj: Nopon Jerusalén, nin tzꞌelpon inkꞌajab scye yi eꞌ yi najlcheꞌ-tz. Nin mben inmantar tan jeꞌseꞌn junt tir yi templo tu yi tnum,’ chij Kataj Ryos,” chij yi ángel bantz swetz tan intxolil.
17 Nchaꞌtz nin saj tlol yi ángel junt xtxolbil swetz: “Nchaꞌtz baꞌn tzatxol yi junt xtxolbileꞌj: ‘Yi Ryos na tzan tan talcheꞌn yi xtxolbileꞌj: Swakꞌeꞌ amaꞌl scyetz yi eꞌ wetz intnum tan jaleꞌn wiꞌnin chibanl junt tir. Jepon bin intxicbal junt tir Sión.h Nin swaleꞌ junt tir: Yi Jerusalén yaꞌstzun yi tnum yi txaꞌijt waꞌn tan impeꞌkeꞌn teꞌj,’ ” stzun Kataj Ryos bantz.
Yi tilol Zacarías cobox tucꞌ tu cobox txakꞌol chꞌichꞌ chi tul wutzicyꞌ taneꞌn
18 I tzun bantz, nin wil junt wutzicyꞌ kale eꞌ jeꞌt jobtuj cyaj tucꞌ. 19 Beneꞌn tzun injakoltz tetz yi ángel yi na jilon tzaj swetz: “¿Mbi na elepont yi cobox tucꞌeꞌj?” chinch banintz tetz yi ángel. “Yi cyaj tucꞌaꞌtz, na elepont yi chichamil yi eꞌ yi ja chixcyeꞌ tan chilajeꞌn len yi eꞌ aj Judá, scyuchꞌ yi eꞌ aj Israel nin yi eꞌ aj Jerusalén beneꞌn tziꞌn wi munt,” chij yi ángel bantz swetz.
20 Ej, te yi nsken wiꞌt wil yi xtxolbilaꞌtz, nintzun ẍchaj Kataj junt xtxolbil swetz, nin tzun wil cyaj txakꞌol chꞌichꞌ. 21 Beneꞌn tzun injakol tetz yi ángel: “¿Mbiꞌtz chimantar yi eꞌ txakꞌol chꞌichꞌ?” chinch bantz tetz. “Ma jaluꞌ, yi cyaj tucꞌ yi mmawil na elepont yi chichamil yi eꞌ nación yi ja chixcyeꞌ tan chixiteꞌn cuꞌn yi eꞌ aj Judá scyuchꞌ yi eꞌ aj Israel nin yi eꞌ aj Jerusalén, bantz cyaꞌl jun nimsaj cꞌuꞌl, tuꞌk tan stzaꞌweꞌn nin tuꞌ yol jun chicontr. Ma yi cyaj txakꞌol chꞌichꞌaꞌtz ja chuꞌl tan chixoꞌwseꞌn, nin tan cꞌupleꞌn len chitucꞌ yi eꞌ naciónaꞌtz yi ja choꞌc tan chilajeꞌn len yi eꞌ aj Judá scyuchꞌ yi eꞌ aj Israel,” chij yi ángel bantz swetz.