MALAQUÍAS
Wiꞌnin na pekꞌ Ryos scye yi eꞌ xonl Israel
1
1 Yi xtxolbileꞌj na jilon te chicaws yi eꞌ xonl Israel yi at tulbil squibaj, yi alijt cyen tan Kataj Ryos tetz Malaquíasa tan xtxolil scyetz. 2 “Axwok xonl Israel, ilenin na wal yi wiꞌnin na chimpekꞌ tziteꞌj, chij Kataj. Poro yi axwok na ital swetz: ‘¿Mbi puntilil mbanuꞌ tan ẍchajleꞌn yi na pekꞌuꞌ skeꞌj?’ Ma jaluꞌ je puntileꞌj: ¿Nkꞌeꞌtz ptzun quitzꞌun quitzicy quib yi eꞌ imam kꞌajtzun Jacow tu Esaú? Bintzi nin, quitzꞌun quitzicy quib, poro ja chimpekꞌ mas te Jacow. 3 Ma te Esaú,b ilenin qui nchimpekꞌ mas teꞌj. Ej nin ja noꞌc tan poꞌtzeꞌn cyakil yi eꞌchk juꞌwtz kale najlcheꞌt yi eꞌ xonl iꞌ. Nin ja oc cyen waꞌn tetz jun amaꞌl tzꞌinunin tuꞌ. Ntin eꞌchk smaron txuc najlcheꞌ-tz tul. 4 ”Mpe nink cyal yi eꞌ aj Edom:c ‘Ja wiꞌt kaloꞌon, poro kocpon tan xtxicbajeꞌn junt tir tircuꞌn yi loꞌonakt,’ swaleꞌ scyetz: ‘Baꞌn cxoꞌcwok tan xtxicbajeꞌn junt tir, poro quil wakꞌ amaꞌl tzitetz, na nocpon tan xiteꞌn cuꞌn cyakil yi na ibanwok.’ Ej nin stzꞌaꞌlchok te iluwar: ‘Yaꞌstzun chiꞌamaꞌl yi eꞌ malnak. Ej nin yaꞌstzun yi amaꞌl yi na chiꞌch cꞌuꞌl Ryos teꞌj, tetz bin kꞌej ben sak.’
5 ”Yi axwok itetz xonl Israel, tzꞌelepon itxum tetz yi xtxolbilaꞌseꞌj,d nin tzitaleꞌwok: ‘Chumam nin porer yi Kataj Ryos, na nchaꞌtz na lajluchax yi tetz porer joylaj len yi mojomil yi katanum Israel.’ ”
Yi toqueꞌn Kataj Ryos tan ẍchajleꞌn scyetz yi eꞌ paleꞌ yi eꞌ len pajol caꞌwl
6 Je yol Kataj Ryoseꞌj scyetz yi eꞌ paleꞌ: “Yi eꞌ cyꞌajol na cyakꞌ chikꞌej chitaj, nin yi eꞌ mos na cyakꞌ chikꞌej chipatrón. Poro yi axwok itetz, qui na itakꞌ muꞌẍ tal inkꞌej, wech in iTaj, nin in Cawl itetz. ¿Nxac tzun qui na itakꞌwok inkꞌej? Poro chin pajpuj nin axwok, na na ital: ¿Mbi na kaban tan telseꞌn kꞌejuꞌ? 7 Je ipaltileꞌj: Na itoywok pam swetz yi cyꞌaꞌn il cꞌole taꞌn, yi nkꞌeꞌtz tzꞌaknak cuꞌn, nin na nin cxtzaneꞌt tan jakleꞌn swetz: ¿Mbi puntilil nkaban tan telseꞌn kꞌejuꞌ? Na itakꞌwok chꞌon tetz walmaꞌ, tan paj yi qui na itakꞌwok kꞌej yi wetz inaltar, kale na ipatwit eꞌch itxꞌixwatz tzinwutz. 8 I taneꞌn tziwutz itetz, yi nkꞌeꞌtz xan yi na itoy eꞌchk awun swetz yi moyiꞌẍ, nka yi coꞌx quikan, nka yabiꞌẍ.f Pilwok bin tan toyeꞌn eꞌchk awunaꞌtz scyetz itajcawil. ¿Ẍchitzatzink ptzun tziteꞌj? Nxac tzun na itoy eꞌchk oyaꞌtz swetz, wech in yi Ryos yi cyaꞌl na xcyeꞌ quen sweꞌj. 9 Na cxoꞌcwok tan jakleꞌn ibanl, poro ko na xcon yi eꞌchk jilwutz oyaꞌtz itaꞌn, quil cxoꞌcwok tan xtxumleꞌn yi ẍchintzatzink tziteꞌj. Je inyoleꞌj: 10 Baꞌnt cuꞌn yi nink tzꞌoc jun tzitetz tan jopleꞌn cuꞌn yi puertil yi templo, bantz quil tzꞌoc jun tan tocseꞌn kꞌakꞌ wi inaltar tan chaꞌtz tuꞌ, na yi in wetz qui na chintzatzin tziteꞌj, nin quil tzincujij mas yi eꞌchk oyaꞌtz yi na itoy swetz,g na in yi Ryos. 11 Beneꞌn tziꞌn wi munt ẍchixoꞌl cyakil jilwutz wunak, at eꞌ yi na cyakꞌ chikꞌajsbil swetz, nin yi na chipat insens tan takꞌleꞌn inkꞌej, nin na cyoy chumbalaj oy swetz. 12 Ma yi axwok itetz ntin na el inkꞌej itaꞌn, na le wutz itetz itajtzaꞌkl iꞌtz, yi baꞌn tzꞌel kꞌej yi wetz inaltar itaꞌn, poro yi altaraꞌtz at kꞌej, na yaꞌstzun inmes kale na chinwaneꞌt taneꞌn. 13 Yi axwok itetz na ital: ‘Ja icyꞌ kapaj tan banleꞌn taneꞌn yi eꞌchk munleꞌj.’ Nin tan yi xtxolbilaꞌtz yi na ital, na cxtzanwok tan telseꞌn inkꞌej. Ej nin nchaꞌtz na itxum yi na chintzatzin te jun oy yi na ul itaꞌn tzinwutz yi alkꞌaꞌn tuꞌ na itulej, nka le iwutz itetz itajtzaꞌkl na chintzatzin te jun wacẍ yi coꞌx, nka yi yabiꞌẍ. 14 Poro tzꞌul icaws tircuꞌn axwok yi juntlen itajtzaꞌkl, yi at itawun yi balaj, poro na itoy jun yi ploj swetz. Na yi in wetz in yi wiꞌtz Rey, nin at eꞌ ẍchixoꞌl cyakil nación beneꞌn tziꞌn wi munt yi mas tcuꞌn na cyek ẍchiꞌ imbiꞌ tziwutz itetz,” stzun Ryos.