Malaquías 2

1 “Ma jaluꞌ axwok jun cꞌoloj paleꞌ, bitwok tzaj yi inyoleꞌj: 2 Tajweꞌn cxoꞌcwok cꞌulutxum jakꞌ incaꞌwl, nin tajweꞌn yi tetz cuꞌn italmaꞌ yil tzitakꞌwok inkꞌej, na in yi Ryos yi cyaꞌl na xcyeꞌ quen sweꞌj. Poro tan paj yi qui nin ncxoꞌcwok cꞌulutxum jakꞌ incaꞌwl, nin tan paj yi nkꞌeꞌtz tetz cuꞌn italmaꞌ na itakꞌ inkꞌej, swakꞌeꞌ icaws. Na cyakil yi eꞌchk takleꞌn balaj yi na icambaj te imunl, tzꞌocpon tetz jun chin icaws.

3 ”Tzꞌelpon inmajol yi caꞌwl tkꞌab yi eꞌ initxajil. Nin mben incꞌoxol yi lasuꞌil tuml yi stzꞌisil yi eꞌ itxꞌixwatz tiwutz. Nin cxelpon injoꞌlil tuml yi eꞌchk takleꞌnaꞌtz wi tzꞌis. 4 Tzꞌelpon tzun itxumtz tetz yi iꞌtz in yi na chintzan tan makleꞌn iwutz, bantz quil xit yi trat yi bnixnak cyen waꞌn tu imam Leví,” stzun Kataj Ryos.

5 “Na yi jun trataꞌtz yi bnixnak waꞌn scyuchꞌ Leví tuml yi eꞌ xonl, ja takꞌ itzꞌajbil tu tzatzin paz scyetz. Nin ja bnix yi jun trataꞌtz tan cyakꞌol inkꞌej, nin tan cyekal inchiꞌ. Nin ja el chikꞌab teꞌj, na ja cyek inchiꞌ, nin ja cyakꞌ inkꞌej. 6 Ocnakeꞌ tan chichusleꞌn yi eꞌ intanum te yi bintzij. Nin qui nin el jun yab yol le chitziꞌ. Nternin na keꞌl na koꞌc ban scyuchꞌ. Nin ja chixcyeꞌ tan makleꞌn chiwutz wiꞌnin ixonl tan qui chibnol eꞌchk takleꞌn ploj. 7 Na yi imunl, yi axwok paleꞌ, iꞌtz tan teleꞌn chitxum yi eꞌ wunak swetz. Nin tan chichusleꞌn cyakil yi eꞌ yi na chijak cyajtzaꞌkl tzitetz, na yi axwok itetz, axwok inchakum, yi in yi Ryos yi cyaꞌl na xcyeꞌ quen sweꞌj.

8 ”Ma yi axwok itetz jaluꞌ, ja cyaj cyen itilol yi balaj beꞌ. Nin tan ichusuꞌn, at wiꞌnin yi ja chicuꞌ bow. Tan itajtzaꞌklaꞌtz ja jeꞌ itxꞌixpul yi trat yi bnixnak cyen waꞌn tu ixonl Leví. 9 Chaꞌstzun te tan paj yi nkꞌeꞌtz axwok cꞌulutxum jakꞌ incaꞌwl, nin tan paj yi nkꞌeꞌtz nicyꞌ nin tuꞌ na cxcawun scye yi eꞌ wunak, cxocpon tzuntz waꞌn chi jun txꞌakaj paleꞌ yi quiꞌc muꞌẍ chixac ẍchiwutz wunak, nin quiꞌt jal muꞌẍ ikꞌej ẍchiwutz,” stzun Kataj Ryos.

Chin juntlen nin yi cyajtzaꞌkl yi eꞌ xonl Israel

10 Jun ntziꞌ Kataj Ryos at skibaj, nin iꞌ bnol ketz kacyakil cuꞌn. Nxac tzun na isub itibtz tzitibil itib, na tan yi jun ajtzaꞌklaꞌtz, na cxtzan tan xiteꞌn yi trat yi bnixnak cyen tan Kataj Ryos scyuchꞌ yi eꞌ kamam kateꞌ. 11 Ej nin yi axwok aj Judá, qui na cxeꞌl cuꞌn te iyol swutz Ryos, na na iban eꞌchk takleꞌn yi chin juntlen nin Jerusalén, nin beneꞌn tziꞌn Israel. Ja cxcyeꞌwok tan telseꞌn kꞌej yi intemplo tan yi eꞌchk takleꞌnaꞌtz yi na iban. Na at axwok yi ja cxuꞌmeꞌ scyuchꞌ yi eꞌ yi na chimejeꞌ quen swutzak eꞌchk ryos yi banij cun tuꞌ taneꞌn. 12 ¡Loꞌk tzꞌoc Kataj Ryos tan chisotzajeꞌn cuꞌn yi eꞌaꞌtz! Quiꞌc na ban yi naꞌ scyetz eꞌ, nin quiꞌc na ban yi ko na cyoy eꞌchk balaj oy tetz Kataj Ryos. Na kol chimejeꞌ quen swutzak eꞌchk ryosaꞌtz yi banij cun tuꞌ taneꞌn, chelepon cuꞌn swutz taꞌn.

13 Poro nkꞌeꞌtz ntinaꞌtz na iban, ma na at mas itil, na na ipaxwok cyen itxkel tan chaꞌtz tuꞌ. Wech wiꞌnin na cxchꞌinwok tan oꞌkl swutz inaltar, tan paj yi quiꞌt na incujij yi eꞌchk oy yi na opon itaꞌn tan jaleꞌn ibanl. 14 Por qui na pujx itaꞌn, na iẍnin na cxtzaneꞌt wok tan jakleꞌn swetz: ¿Taꞌ, mbitzuntz yi qui na tzatzinuꞌ skeꞌj? Iꞌtz tan paj yi in stiw banak te yi itumeweꞌn tu itxkel. Poro qui nin el cuꞌn ikꞌab te iyol yi isuk tetz yi xunaꞌtz, na ja cyaj cyen itilol tan chaꞌtz tuꞌ. Wech na yaꞌs tzun kloꞌ itrat tetz cyakil tiemp. 15 Qui peꞌ na el itxum tetz, yi wajbil iꞌtz: Yi na itokꞌbej itib tu itxkel, junit na ban iwankil tan jalen initxajil yi at len chi espíritu tan incꞌuꞌlajeꞌn. 16 Eꞌuꞌ xonl Israel, na tzan Kataj Ryos tan talcheꞌn yi xtxolbileꞌj scyeruꞌ: “Or bin tzitilwok itxumuꞌn, nin banwok taneꞌn yi incaꞌwl. Na chin xaꞌbil nin yi yaj tzinwutz yi na pajx cyen yi txkel. Na alchok scyetz yi na pajx cyen yi txkel tan yi tetz yaꞌbl, na juch jun chin til tzinwutz,” stzun Ryos.

Yi kꞌejlal yil tzꞌoc Ryos tan takꞌleꞌn chicaws wunak

17 Ja icyꞌ paj Ryos tan tbiteꞌn chitziꞌuꞌ chikuluꞌ; na iẍnin na chitzaneꞌtuꞌ tan talcheꞌn tetz: ¿Mbiꞌtz na katzan tan talcheꞌn teruꞌ, yi ja wiꞌt icyꞌ chan pajuꞌ tan tbiteꞌn? Yi puntil iꞌtz: Ja icyꞌ paj iꞌ scyeꞌjuꞌ, na na cyaluꞌ: “Na tzatzin Ryos scyeꞌj yi eꞌ yi cachiꞌ na chiban; nin wiꞌnin na tzatzin iꞌ scyeꞌj. Nchaꞌtz qui na cyocsajuꞌ yi qui na jeꞌ kꞌab iꞌ twiꞌ jun, na na cyaluꞌ: ¿Naꞌ tzun atit cyent yi Ryosaꞌtz yi chin tzꞌaknak cunin tan cawun?” cheꞌchuꞌ na ban.