3
1 Je yol Kataj Ryos, yi cyaꞌl na xcyeꞌ quen teꞌj: “Bitwok tzaj, mben inchakol yi inchakum, tan nucꞌleꞌn yi beꞌa yi itAjcawil yi na cxtzan tan ẍchꞌiweꞌn. Ej, nin qui cunin tzꞌicyꞌ tzitetz yil tzꞌocpon iꞌ tul yi tetz templo. Nin yi itAjcawilaꞌtz, iꞌ yi ángel yi inkꞌajbil yi xconak waꞌn te yi tiemp yi bixeweꞌn katrat tzituchꞌ, nin yi junaꞌtzb yaꞌstzun yi jun yi wiꞌnin na el italmaꞌ teꞌj tan tuleꞌn chan.” 2 ¿Ej nin, naꞌ scyetz jun xtxꞌajeꞌ yi jun chin kꞌejlalaꞌtz yil tzꞌultzaj iꞌ? Na cyaꞌl nin jun nink xcyeꞌ quen teꞌj iꞌ yil tzꞌul tzaj.c Na yil tzꞌul tzaj iꞌ, tzuꞌl tan telseꞌn itil. Niꞌcuꞌn sbneꞌ iꞌ chi jun jilwutz xawon yi na xcyeꞌ tan telseꞌn len cunin yi kayaꞌpl.d Ej nin chi jun chin kꞌakꞌ, yil tzꞌocpon tan katzꞌeꞌseꞌn tan telseꞌn katzꞌilil. 3 Scꞌolek iꞌ tan cawuꞌn, nin tan telseꞌn len tircuꞌn yi ilcꞌol yi at scyeꞌj yi eꞌ paleꞌ, yi eꞌ xonl kꞌajtzun Leví. Tzꞌocpon tan telseꞌn chitzꞌilil, chi na el yi stzꞌil yi sakal tu oro tan kꞌakꞌ. Yil bnix yi xtxolbilaꞌseꞌj, baꞌn tzun choꞌctz tan toyeꞌn eꞌchk oy tetz Kataj Ryos, chi yi tajweꞌn tan chibnol. 4 Stzatzink tzun yi Kataj Ryos te yi mbi cuꞌn scyoyeꞌ yi eꞌ aj Judá scyuchꞌ yi eꞌ aj Jerusalén tetz. Stzatzink teꞌj chi banak cyen tenẍchan.
5 Ej nin je na tal Kataj Ryos: “Nopontz tan takꞌleꞌn chicaws yi eꞌ yi na xcon quipisioꞌ cyaꞌn; scyuchꞌ yi eꞌ jopol wutzaj; scyuchꞌ yi eꞌ yi na xcon imbiꞌ tan poyseꞌn tuꞌ wutz junt; scyuchꞌ yi eꞌ yi na choꞌc tan chibutxleꞌn chimos, tu yi eꞌ xmaꞌlcaꞌn, scyuchꞌ yi eꞌ meꞌbaꞌ; nin scyuchꞌ yi eꞌ yi na choꞌc tan chibuchleꞌn yi eꞌ awer nak; scyuchꞌ yi eꞌ yi na el inkꞌej cyaꞌn.
Yi eꞌchk diesum tu eꞌchk oy yi qui na akꞌlij
6 ”Yi in wetz, in iTaj, iRyosil. Qui ncuꞌ inxitul yi trat yi bnixnak waꞌn tentz tu imam kꞌajtzun Jacow. Qui nin njeꞌ intxꞌixpul yi wajtzaꞌkl, iteꞌn nin inaꞌs chi sajleꞌn tunintz.e Chaꞌstzun te, axwok itetz, yi axwok xonl kꞌajtzun Jacowaꞌtz, qui nin ncxsotzwok waꞌn. 7 Poro yi axwok itetz ja cyaj cyen itilol eꞌchk incaꞌwl, chi eꞌ ban cyen yi eꞌ imam iteꞌ. Qui na saj tetz italmaꞌ tan banleꞌn taneꞌn yi eꞌchk incaꞌwlaꞌtz. Poro yi in wetz yi in iRyosil, na wal nin tzitetz: Pakxenwok tzaj sweꞌj, nchaꞌtz in chimpakxok tziteꞌj.f Poro yi axwok itetz na ital swetz: ¿Ẍeꞌn kapakxij junt tir teꞌjuꞌ, na iẍkaj ja tzunk cyaj cyen kiloluꞌ? 8 Poro yi in wetz na waj tzinjak tzitetz: ¿Baꞌn ptzun yil tzꞌoc jun yaj tan talkꞌeꞌn sweꞌj? Poro yi axwok itetz, na cxtzanwok tan talkꞌeꞌn sweꞌj. Nxac tzun na ijaktzaj swetz: ‘¿Ẍeꞌn kapakxij junt tir teꞌjuꞌ, na baꞌn atoꞌt?’ Je puntileꞌj: Iꞌtz yi eꞌchk idiesum, tu eꞌchk oy yi na italkꞌaj swetz. 9 Bintzij nin cyakil yi axwok itetz, na cxtzanwok tan alakꞌ sweꞌj. Chaꞌstzun te swakꞌeꞌ len icaws. Yi in wetz in iTaj, iRyosil, nin je na wal nin tzitetz: 10 Cyꞌajwok tzaj yi idiesum le cuꞌlbil pwok, yi at le templo,g sjalok tzun yi tajweꞌntz xe incaꞌl. Pilwok bin tan takꞌleꞌn idiesum, nin tzitileꞌ tzuntz yi tzꞌul tunin inkojol imbanl tzitibaj. 11 Kol tzitakꞌ idiesum tu eꞌchk itoy swetz, qui tzun lwakꞌ amaꞌltz tan loꞌoneꞌn eꞌchk icosech tan txuc nka tan yaꞌbil. 12 Scyaleꞌ tzun cyakil yi eꞌ awer nak: ‘Ban cyeruꞌ yi ateꞌuꞌ tul jun chin amaꞌl yi chin ric nin,’ cheꞌch sbneꞌ. Jun cuꞌn sbajok yi xtxolbilaꞌtz, na iꞌtz inyol, yi in wetz yi in yi Ryos yi cyaꞌl na xcyeꞌ quen sweꞌj.”
Na el toꞌkl cꞌuꞌl Ryos scye yi eꞌ tetz tanum
13 Je yol Katajeꞌj: “Ja italwok eꞌchk quiw yol swetz. Poro qui na cxnachon teꞌj, na iẍnin na cxtzaneꞌt tan talcheꞌn: ¿Ẍeꞌn, mbi yolil ja kal teruꞌ yi chin quiw nin? 14 Je iyoleꞌj yi italnak tan telseꞌn inkꞌej, chij Kataj: ‘Quiꞌc na takꞌ yi na kaban taneꞌn jun kamunl swutz Ryos.’ Nin na italwok: ‘¿At ptzun jamel kukan tan tuꞌ yi na kaban taneꞌn yi caꞌwl Ryos? ¿Mbi xac na kabisun tan kaxomeꞌn teꞌj, na quiꞌc na takꞌ sketz? 15 Na yi oꞌ ketz ja kil yi na chitzatzin yi eꞌ yi na cyocsaj quib nim tu cyajtzaꞌkl. Nin ja kil yi at chibanl yi eꞌ mal nak, yi eꞌ yi na choꞌc tan pileꞌn Ryos. Ej, nin na kil yi qui na chicawsij tan paj,’h cxchij wok,” chij Kataj.
16 (Itzun yi eꞌ yi na cyakꞌ kꞌej Kataj Ryos, na chijilon squibil quib tan takꞌleꞌn kꞌej iꞌ, nin na tbit Kataj yi eꞌchk takleꞌn balaj yi na cyal. Ej nin swutz Kataj Ryos, na tzan stzꞌibeꞌn tul jun liwr yi chibiꞌ yi eꞌaꞌtz yi na choꞌc tan lokꞌeꞌn wutz iꞌ, yi eꞌ yi at nin iꞌ-tz tetz cyajal.)
17 Ma je na tal Kataj Ryos, yi cyaꞌl na xcyeꞌ quen teꞌj: “Sbixek jun kꞌej waꞌn kalel chibixeweꞌt junt tir yi eꞌ xonl Israel tetz intanum. Niꞌcuꞌn tzun tzimbneꞌ wetz scyeꞌj chi na ban jun yaj yi na el toꞌkl cꞌuꞌl te yi tetz cyꞌajl.i 18 Tzitileꞌ tzun woktz, nin tzꞌelpon itxum tetz, yi mbi na takꞌ tetz jun yaj yi at balajil, nin tzitileꞌwok yi mbi na takꞌ tetz jun yaj yi ploj xtxumuꞌn. Tzitileꞌ tzun woktz yi mbi sbajok scye yi eꞌ yi na chixom te Ryos, nin mbi sbajok scye yi eꞌ yi qui na chixom teꞌj iꞌ.”