Yi kꞌejlal yil tzꞌul Kataj Ryos tan takꞌleꞌn chicaws wunak
4
1 Je yol yi Kataj Ryoseꞌj yi cyaꞌl na xcyeꞌ quen teꞌj: “Atoꞌ txeꞌ quen yi kꞌejlal yi wiꞌnin slamcank, chi na lamcan jun ẍchujil pam. Te jun kꞌejlalaꞌtz cyakil yi eꞌ yi na cyocsaj quib nim, scyuchꞌ yi eꞌ yi juntlen cyajtzaꞌkl, ẍchitzꞌeꞌok, chi na tzꞌeꞌ jun bocꞌoj chꞌim wi jun chin kꞌakꞌ. Tul yi jun kꞌejaꞌtz yi at tulbil, ẍchitzꞌeꞌok tircuꞌn, quiꞌc chisenil sbneꞌ cyen. 2 Poro apart sbneꞌ itetz, yi axwok itetz yi na itakꞌ inkꞌej, na slajluchaxk yi imbalajil tziwutz itetz. Nin swakꞌeꞌ ibanl. Nin nternin cxtzꞌitpunkwok tan yi tzatzin yi sjalok tetz italmaꞌ. 3 Tul yi jun kꞌejaꞌtz yi at tulbil waꞌn, cxocponwok tan chiyakꞌpeꞌn yi eꞌ mal nak, nin niꞌcuꞌn ẍchibneꞌ tzakꞌ itkan chi taneꞌn yi puklaj tbeꞌ,” stzun Kataj Ryos.4 “Tajweꞌn yil tzꞌul txꞌakx yi eꞌchk ley ticꞌuꞌl yi walnak tetz inchakum Moisés wi yi wutz Horeb,a na tircuꞌn yi axwok yi ax xonl Israel, tajweꞌn yil tzibanwok taneꞌnb eꞌchk leyaꞌtz, tu eꞌchk caꞌwlaꞌtz.
5 ”Bitwok tzaj, te yi ntaxk opon yi jun kꞌejlalaꞌtz, yi chin xoꞌwbil nin sbneꞌ, nin yil wicyꞌsaj incꞌuꞌl scye tircuꞌn yi eꞌ wunak, mben tzun inchakol yi elsanl intziꞌ Elíastzc tzixoꞌl. 6 Nin tan iꞌ sjalok tzatzin paz junt tir ẍchixoꞌl yi eꞌ yaj scyuchꞌ chinitxajil.d Na ko quil chinicyꞌsaj cyajtzaꞌkl squibil quib, nopon tzuntz nin swakꞌeꞌ chicaws cyakil yi eꞌ itanum, nin tzꞌelpon cuꞌn tircuꞌn waꞌn swutz.”