Yi talol Jesús yi xitok yi templo
(Mt 24.1-2; Lc 21.5-6)
13
1 Itzun bantz yi teleꞌn tzaj Jesús le templo nin ben tlol jun ẍchusbeꞌtz tetz:—Taꞌ, tilninuꞌ eꞌchk cꞌubeꞌj, tilninuꞌ eꞌchk caꞌleꞌj yi cwent yi templo, chumbalaj nin, —stzun yi jun ẍchusbeꞌtzaꞌtz.
2 —Bintzi, chumbalaj nin yi caꞌleꞌj yi na awil nin. Poro tzꞌul jun tiemp yi quiꞌc nin jun cꞌub yi nink cyaj cyen tib junt. Cyakil cuꞌn copon chꞌukiꞌn, —chij Jesús ban tetz.
Yi eꞌchk techl yi sbajok yi txant tan tuleꞌn yi wiꞌtzbil kꞌejlal
(Mt 24.3-28; Lc 21.7-24; 17.22-24)
3 Itzun bantz yi chijeꞌn poneꞌn Jesús wi Olivo nin eꞌ cꞌoleꞌ cuꞌntz. Lajluch cuꞌn na quil tzaj yi templo. Chichuc tzun Luꞌ, tu Jacow tu Waꞌn tu Leẍ yi cyoqueꞌn tan jakleꞌn jun xtxolbil tetz Jesús. 4 Itzun chijaktz:
—I bin jaluꞌ Taꞌ, taleꞌuꞌ sketz tonaꞌ lbajij yi eꞌchk xtxolbilaꞌtz yi ntaluꞌ sketz. Nin taleꞌuꞌ sketz mbi techlil sbajok yil tzꞌul tzaj yi jun tiempaꞌtz.
5 —Or tzitilwok, quiꞌk cxubsijwok, 6 na ẍchijalok wiꞌnin eꞌ yi scyaleꞌ yi eꞌ len cuꞌn Cristo. Chixcyek tan chisubleꞌn wiꞌnin wunak. 7 Nin nchaꞌtz acxbisunch yil tzitbit yi na tzan eꞌchk lmak oyintziꞌ, nin yil tzitbit yi at tulbil mas lmak oyintziꞌ, na tetz nintz. Poro nkꞌeraꞌtz yi wiꞌtzbil kꞌejlal. 8 Na yi ntaxk ul yi wiꞌtzbil kꞌejlalaꞌtz chocopon eꞌchk lmak tnum tan oyintziꞌ scyuchꞌ eꞌ mas lmak tnum. Tzꞌocopon jun tnum tan biyleꞌn junt. Copon wiꞌnin eꞌchk coblajnob beneꞌn tziꞌn wi munt. Sjalok weꞌj, poro cyakil yi xtxolbileꞌj, xeꞌtzbil tuꞌ yi qꞌuixcꞌuj.
9 “Ma axwok itetz or tzitil, na cxjatxlokwok ẍchikꞌab yi eꞌ yi at caꞌwl ẍchikꞌab. Cxloꞌonkwok cyakꞌun lakak sinagoga. Ej nin tan tuꞌ yi na cxomwok sweꞌj, ncxbenwok ticyꞌleꞌn ẍchiwutz yi eꞌ gobernador nin ẍchiwutz yi eꞌ rey tan tbiteꞌn icaws. Poro baꞌn atit, na sjalok amaꞌl tan xtxoleꞌn scyetz yi mbi ekaꞌn waꞌn. 10 Ej nin nchaꞌtz, yi ntaxk ul yi wiꞌtzbil kꞌejlal, tajweꞌn yil txolij yi balaj stziblal scyetz cyakil jilwutz wunak. 11 Ej nin yil cxben ticyꞌleꞌn ẍchiwutz yi eꞌ ajcaw, quil cxbisunwok te yi mbi tzital. Ntin alwok yi yol yi stkꞌeꞌ Ryos le iwiꞌ, na nkꞌeꞌtz axwok cxjilonk, ma na i yi Espíritu Sant. 12 Nchaꞌtz at eꞌ yi chocopon tan xochleꞌn yi quitzꞌun nka quitzicy tan chicweꞌn biyij. Nchaꞌtz at eꞌ yi yaꞌtz ẍchibneꞌ te chicyꞌajl. Nchaꞌtz at eꞌ yi chocopon tan xochleꞌn chitaj chitxuꞌ tan cyeleꞌn cuꞌn swutz. 13 Ej nin tan paj yi na cxomwok sweꞌj, cyakil wunak chiꞌchok chicꞌuꞌl tziteꞌj. Poro cyakil yi eꞌ yil tzꞌicyꞌpon yi qꞌuixcꞌujaꞌtz cyaꞌn jalen yil chiquim, yaꞌstzun yi eꞌ yi ẍchiclaxok tkꞌab yi qꞌuixcꞌujaꞌtz yi banij.
14 “Ej nin je junt xtxolbileꞌj yi tzꞌibaꞌnt cyen takꞌun kꞌajtzun Daniel, yi elsanl stziꞌ Ryos tentz: ‘Sjalok jun yaj yi chin cachiꞌ nin, yi chin aj xitunl nin.’ (Yi eꞌ yil choꞌc tan siꞌleꞌn yi xtxolbileꞌj loꞌk tzꞌel chitxum tetz.) Yil tzꞌocopon yi junaꞌtz le amaꞌl kale quiꞌcleꞌt cu tan tocomponeꞌn, baꞌn tcuꞌn yil cheꞌl ojk cyakil yi eꞌ yi najlcheꞌ Judea tan cyewal quib xoꞌl wutz. 15 Nin ko cꞌolchij jun yaj wutz caꞌl yil tbit stziblal, tajweꞌn tan teleꞌn ojk lajkeꞌl. Baꞌn tcuꞌn quiꞌt tzꞌoc xe caꞌl tan telseꞌn tzaj alchok takleꞌn. 16 Ej nin yi eꞌ yi ateꞌ tan akꞌun wi cojbil, baꞌn tcuꞌn quil chipakxij xeꞌak chicaꞌl tan ticyꞌleꞌn beꞌch cyetz. 17 ¡Lastum eꞌ prow xnaꞌn yi eꞌ chꞌon wiꞌ yil bajij yi eꞌchk takleꞌnaꞌtz! ¡Lastum yi prow xnaꞌn yi niꞌ cuꞌn niꞌ scyeꞌj! 18 Nachwok Kataj tan qui nojeꞌn quen yi jun ilaꞌtz te yi tiemp tetz cheꞌw. 19 Na tzꞌul wiꞌnin qꞌuixcꞌuj. Jetz yi xeꞌtzbil tzaj, txeꞌn cunin bajij jun qꞌuixcꞌuj chi yi junaꞌtz yi sbajok. Ej nin quiꞌt bajij junt. 20 Yi na tzan yi jun qꞌuixcꞌujaꞌtz tzꞌocopon Kataj Ryos tan makleꞌn wutz, na yi ko quiꞌ, cyaꞌl nin jun yi nink clax. Smakxok yi jun qꞌuixcꞌujaꞌtz taꞌn tan tuꞌ yi tzꞌelepon kꞌajab scyeꞌj yi eꞌ yi txaꞌijcheꞌt.
21 “At eꞌ yi scyaleꞌ: ‘Choꞌn at yi Cristo tzoneꞌj,’ nin at eꞌ yi scyaleꞌ: ‘Choꞌn at Cristo choneꞌj.’ Itocsajch. 22 Na ẍchijalok eꞌ yi scyocseꞌ len quib tetz Cristo. Ej nin ẍchijalok eꞌ yi scyaleꞌ yi eꞌ len cuꞌn elsanl stziꞌ Ryos. Yi eꞌaꞌtz, chixcyek tan banleꞌn wiꞌnin milawr tan chisubleꞌn wunak. Ej nin yi atk rmeril, chixcyek kloꞌ tan chisubleꞌn yi eꞌ yi txaꞌijcheꞌt, poro quiꞌ. 23 Ma axwok itetz, list cuntunin axwok, na ja wiꞌt wal cyakil yi puntil tzitetz.
Yi mbi cuꞌn sbajok yil tzꞌul tzaj yi Bajx Cyꞌajol
(Mt 24.29-35, 42-44; Lc 21.25-36)
24 “Yil tzaj wiꞌ yi qꞌuixcꞌuj tcꞌuꞌl jun tiempaꞌtz tzꞌocopon tzꞌoꞌtz swutz yi kꞌej. Ej nin quil txekun yi xaw. 25 Nin cyakil yi at tcyaꞌj syucank. 26 Kalenaꞌs tzun chinquilnin cyakil jilwutz wunak yi in yi in Bajx Cyꞌajol. Na chincuꞌul tul jun chin sbakꞌ, nin cyꞌaꞌn imporer waꞌn tu inkꞌej. 27 Kalenaꞌs tzun cheꞌ inchaknin yi eꞌ inángel tan chimolcheꞌn tzaj yi eꞌ yi txaꞌijcheꞌt yi ateꞌ beneꞌn tziꞌn wi munt, tu yi eꞌ yi ateꞌ tcyaꞌj.
28 “Baꞌn cxoꞌcwok tan xtxumleꞌn yi jun elsawutzileꞌj tetz jun wiꞌ ibẍ: Na yi na xeꞌtij jun wiꞌ ibẍ tan xlumineꞌn na el katxum tetz yi txant tan tucumuleꞌn yi tiemp tetz tzꞌaꞌ. 29 Niꞌcuꞌn sbajok tzantzaj, na yil tzitilwok cyakil yi eꞌchk techl yi ja wiꞌt wal tzitetz, iꞌtz jun senil yi txant tan wuleꞌn. Yil tzitil yi eꞌchk techlaꞌtz ja tzun opon txeꞌ quen cunin yi jun tiempaꞌtz. 30 Jun cuꞌn yol na walnin tzitetz, quil chisotz yi jun jilwutz wunakeꞌj jalen yil bajij yi eꞌchk takleꞌnaꞌtz yi ja wiꞌt wal. 31 Na yi tcyaꞌj tu yi wuxtxꞌotxꞌ sotzok teraꞌtz poro yi weri inyol tzꞌelk cuꞌn teꞌj. Quil sotz teraꞌtz.
32 “Poro cyaꞌl nin jun yi nink tzꞌel xtxum tetz tonaꞌ lbajij yi eꞌchk takleꞌneꞌj. Qui na el chitxum yi eꞌ ángel tetz. Mpe ik in, yi in Cyꞌajol, qui na el intxum tetz, ma na ntin Kataj Ryos ilol tetz.
33 “Chaꞌstzun te or tzitilwok. Acxwitiꞌch. Nachwok Ryos, na qui na itil mbi tiempil yil bajij yi xtxolbilaꞌseꞌj. 34 Niꞌcuꞌn sbajok chi ban jun yaj yi ben joylaj tan xoꞌn. Cyaj tilol yi caꞌl, nin cyaj cawul yi eꞌ mos. Cyaj tkꞌol yi cyakꞌun, nin cyaj tloltz tetz yi qꞌuicyꞌlom puert: ‘Sajch awatl.’ 35 Nchaꞌtz bin itetz, sajch iwatl, na qui na itil yi mbi tiempil tzꞌul tzaj yi taw caꞌl. Mi tzꞌul peꞌ yil cuꞌ kꞌej, nka yil tzꞌokꞌ qꞌuitx, nka skilt cuntuꞌ, quinin elsbil txum. 36 Ban ko na cxwitwok yil tzꞌul tzaj. 37 Ej nin yi xtxolbileꞌj yi na walnin tzitetz, nkꞌeꞌtz ntin tetz itetz, ma na tetz cyakil: Or bin tzitilwok.