Yi elsawutzil tetz yi eꞌ akꞌunwil yi quiꞌc chixac
(Mt 21.33-46; Lc 20.9-19)
12
1 Toqueꞌn tzun Jesús tan xtxoleꞌn junt elsawutzil scyetz yi eꞌ ajcawaꞌtz. Je yol iꞌeꞌj: “At jun yaj nin oc tan tawleꞌn jalaj uva le tetz luwar, nin oc peꞌm taꞌn teꞌj. Nin bnix jun pilaꞌ taꞌn kale na eleꞌt tꞌaꞌal uva. Ej nin bnix jun xcyakꞌteꞌ taꞌn. Yi nsken wiꞌt bnix taꞌn, nin eꞌ cyaj cꞌamol swutz. Ma yi taw, nintzun ben joylaj te jun pyaj. 2 Ma yi kꞌabteꞌn cosech, nin ben ẍchakol jun ẍchakum tan ticyꞌleꞌn muꞌẍ tetz te yi cosech. 3 Poro yi eꞌ cꞌamol nin eꞌ oc tan stzꞌamleꞌn, nin tan biyleꞌn. Nin aj chitxakꞌlultz. Quiꞌc nin muꞌẍ tal ben cyakꞌoltz tetz.4 “Beneꞌn tzun ẍchakol taw luwar junt ẍchakum. Poro yi tponeꞌn yaj nin eꞌ oc tan cꞌoxleꞌn tan cꞌub. Nin loꞌon cyaꞌn, nin baj chijisol. 5 Poro yi taw luwar nin ben ẍchakol junt. Yi tponeꞌn yi juntaꞌtz el cuꞌn cyaꞌn swutz.
“Yi teleꞌn tiemp eꞌ ben ẍchakol wiꞌnin ẍchakum. At eꞌ yi qꞌuixpeꞌn tuꞌ eꞌ bantz. Nin at eꞌ yi eꞌ quimtz cyaꞌn. 6 Poro at jun cyꞌajl yi taw luwar, yi wiꞌnin okꞌleꞌn wutz taꞌn. Wiꞌtzbil tlen tzun beneꞌn ẍchakol, na i xtxum yi taw luwar: ‘Cyakꞌeꞌ loꞌ kꞌej, na incyꞌajl bin.’ 7 Poro itzun cyal yi eꞌ akꞌunwil squibil quib: ‘Je nocx tzꞌuleꞌj, yaꞌstzun scꞌoꞌek cyen tibaj luwar. Baꞌn tcuꞌn kabiyeꞌ cuꞌnx tan kacambal ketz yi luwar.’ 8 Nintzun cuꞌ chitzꞌamol nin el cuꞌn cyaꞌn swutz. Nin el tuꞌ chijoꞌlil yi wankil prow,” stzun Jesús scyetz.
9 Toqueꞌn tzun Jesús tan jakleꞌn scyetz yi eꞌ wiꞌ banl wiꞌ:
“Ma jaluꞌ, ¿mbil sbneꞌ yi taw luwar le chiwutz cyeruꞌ? Je puntileꞌj: Tzꞌul tan chisotzajeꞌn cyakil akꞌunwil, ma yi amaꞌl stzꞌakꞌlok scyetz junt txꞌakajt wunak,” chij Jesús scyetz.
10 “Nchaꞌtz qui peꞌ na chisiꞌlejuꞌ yi xtxolbil yi tzꞌibaꞌnt cyen yi na tal:
‘Yi cꞌub yi quiꞌc xac ẍchiwutz yi eꞌ bnol caꞌl,
yaꞌstzun yi cꞌub yi mas tajweꞌn tan xconeꞌn.
11 Yi Kajcaw, yaꞌstzun txumul tetz yi xtxolbileꞌj.
Ej nin chumbalaj nin skawutz ketz,’ ” chij Jesús ban scyetz.
12 Beneꞌn tzun kloꞌ Jesús cyaꞌn xetzeꞌ, na nin el chitxum tetz yi ja xcon yi xtxolbilaꞌtz tan Jesús tetz cyetz. Poro tan paj yi na chixob scyetz yi eꞌ wunak, cyaj cyen tuꞌ quilol nin eꞌ ajtz.
Yi cutxuj yi na akꞌlij tetz César
(Mt 22.15-22; Lc 20.20-26)
13 Beneꞌn tzun chichakol yi eꞌ wiꞌ banl wiꞌ cobox parisey tan yol tu Jesús. Nchaꞌtz xomcheꞌ cobox scyeri yi eꞌ partir Herodes scyeꞌj. Yi chimantar iꞌtz tan joyleꞌn til Jesús. 14 Itzun yi cyoponeꞌntz teꞌj, itzun cyaltz:
—Taꞌ, na kil ketz yi yaꞌstzun yi mero bintzi yi na tzanuꞌ tan xtxoleꞌn. Ej nin na el katxum tetz yi qui na tajlajuꞌ yi chitziꞌ wunak, na qui na xobuꞌ tetz jun. Quiꞌc na ban yi ko at kꞌej nka quiꞌc. Ntin na tzanuꞌ tan xtxoleꞌn sketz yi ẍeꞌn kaban tan koponeꞌn te Ryos. I bin jaluꞌ Taꞌ, ¿baꞌn peꞌ lkakꞌ yi pwok yi na tzan César yi wiꞌtz ajcaw tan jakleꞌn sketz, nka quiꞌ? ¿Baꞌn peꞌ lkakꞌ nka quiꞌ?
15 Poro jalcunin nachoneꞌn Jesús te cyajtzaꞌkl yi subleꞌn tuꞌ iꞌ cyajbil. Chaꞌstzun te beneꞌn tlol scyetz:
—¿Nxac na chitzanuꞌ tan joyleꞌn puntil tan jaleꞌn wil? Chichajeꞌuꞌ yi pwok swetz. Na waj lwil.
16 Nintzun chichaj jun pwok yi cyꞌaꞌn cyaꞌn, nin oc Jesús tan xmayeꞌn. Nin yi cweꞌn tilol nintzun jaktz scyetz:
—¿Naꞌ taw yi yubileꞌj yi at swutz yi pwokeꞌj? ¿Nin naꞌ taw yi biꞌaj yi banij swutz?
—Tetz César, yi wiꞌtz kajcaw, —cheꞌch.
17 Beneꞌn tzun tlol Jesús scyetz:
—Yi eꞌchk takleꞌn yi tetz César, baꞌn kakꞌ tetz. Poro nchaꞌtz baꞌn kakꞌ tetz Ryos cyakil yi eꞌchk takleꞌn yi tetz iꞌ, —chij Jesús bantz scyetz.
Wiꞌnin tzun cyeleꞌn yab te yol.
At junt tir itzꞌeꞌn
(Mt 22.23-33; Lc 20.27-40)
18 Itzun bantz, cyoponeꞌn tzun cobox sadusey te Jesús. Le chiwutz cyetz quiꞌc itzꞌeꞌn junt tir ẍchixoꞌl almaꞌ. Itzun ben cyaloltz tetz Jesús.
19 —Taꞌ, tzꞌibaꞌnt cyen taꞌn Moisés: “Ko at jun yaj yil quim, ej nin ko quiꞌc nitxajil njal cyen te txkel, chin tajweꞌn cunin tan cyokꞌbel quib tu balc, tan jaleꞌn xonl yi kꞌajtzun almaꞌ.”a 20 Ma jaluꞌ Taꞌ, at juk yaj banak. Quitzꞌun quitzicy quib. Toqueꞌn tzun txkel yi bajx, poro nin quim iꞌ, nin quiꞌc nin jun chinitxaꞌ ban cyen. 21 Toqueꞌn tzun yi caꞌp nak te txkelbeꞌn yi kꞌajtzun stzicy. Nchaꞌtz iꞌ, nin quim, nin quiꞌc nin jun chinitxaꞌ jal. Ej nin iteꞌn nin ban yi toxiꞌn. Quiꞌc nin jun chinitxaꞌ jaltz. 22 Eꞌ icyꞌak chijuklil, poro quinin jal cyen jun chinitxaꞌ te yi xnaꞌn. Wiꞌtzbil tlen quimeꞌn yi xnaꞌn. 23 Ma jaluꞌ, yi nink chitzꞌij junt tir, ¿naꞌ scyetz jun ẍchixoꞌl yi juk yajaꞌtz tzꞌocopon tetz chmil yi xnaꞌn? Na eꞌ len cuꞌn chmil banakeꞌ, —cheꞌch tzun bantz tetz Jesús.
24 Sajeꞌn tzun stzaꞌwel Jesús:
—I bin jaluꞌ yi eꞌ cyeruꞌ ja chixubsijuꞌ na qui na el chitxumuꞌ te yi mbi na tal yi yol Kataj. Ej nin qui na el chitxumuꞌ te yi porer iꞌ. 25 Na yil chitzꞌij junt tir yi eꞌ almaꞌ, quiꞌt cyokꞌbej quib cyeraꞌtz, nin quiꞌt chumeꞌ. Choꞌn ẍchibneꞌ chi quitaneꞌn yi eꞌ ángel yi ateꞌ tcyaꞌj. 26 Poro tan teleꞌn chitxumuꞌ tetz yi at itzꞌeꞌn junt tir ẍchixoꞌl almaꞌ, ulk txꞌakx ẍchicꞌuꞌluꞌ yi yol yi tzꞌibaꞌnt cyen tan Moisés, yi ẍeꞌn cuꞌn jiloneꞌn tzaj Ryos tetz, xoꞌl jun tal pucuj tzeꞌ yi na tzan kꞌaꞌkl. Nin je yol Ryoseꞌj: ‘In chiRyosil Abraham tu Isaac tu Jacow,’ stzun Ryos ban cyen tetz Moisés. 27 Poro nsken chiquim yi oxaꞌtz yi talol Ryos yi jun xtxolbilaꞌtz. Na tzun ẍchaj sketz yi itzꞌeꞌ. Na yi Kataj iꞌ kaRyosil yi oꞌ yi itzꞌoꞌ, scyuchꞌ yi eꞌ yi quimnak chiwankil. Na swutz Ryos quiꞌc nin jun wunak yi najk sotz. Chaꞌstzun te xubsnakeꞌuꞌ yi na cyaluꞌ yi quiꞌc itzꞌeꞌn junt tir ẍchixoꞌl almaꞌ.
Yi caꞌwl yi mas tajweꞌn tan kabnol taneꞌn
(Mt 22.34-40)
28 Tponeꞌn tzun jun scyeri yi eꞌ txꞌolol xoꞌl yi ley Moisés te Jesús. Na nin tbit yi toqueꞌn Jesús tan wakꞌ ib scyuchꞌ yi eꞌ sadusey nin xcyeꞌ iꞌ tan xiteꞌn cyajtzaꞌkl. Nintzun jaktz tetz:
—I bin jaluꞌ Taꞌ, ¿naꞌ scyetz caꞌwl yi mas tajweꞌn tan kabnol taneꞌn?
29 Sajeꞌn tzun stzaꞌwel Jesús:
—Yi caꞌwl yi mas tajweꞌn iꞌtz: ‘Axwok aj Israel bitwok tzaj, yi ketz Kajcaw, yi kaRyosil, jun ntziꞌ iꞌ. 30 Lokꞌaj bin yi awajcaw, yi aRyosil tetz cuꞌn awalmaꞌ nin tetz cuꞌn awajtzaꞌkl, nin akꞌaj cyakil achamil tan xconeꞌn tetz.’ Yaꞌstzun yi caꞌwl yi mas tajweꞌn tan banleꞌn taneꞌn. 31 Ej nin niꞌcuꞌn muꞌẍ tal yi caꞌp yi na tal: ‘Lokꞌweꞌ yi eꞌ wunak chi na alokꞌ awib atz.’ Quiꞌc nin jun caꞌwl yi at mas kꞌej swutz yi cobaꞌtz, —chij Jesús ban tetz.
32 Beneꞌn tzun tlol yi txꞌolol xoꞌl yi ley Moisés tetz Jesús:
—Chumbalaj nin yi yoluꞌ Taꞌ. Bintzi na taluꞌ yi jun ntziꞌ Ryos at, na cyaꞌl atit junt. 33 Ej nin mas baꞌn tcuꞌn lokꞌeꞌn wutz Ryos tetz cuꞌn kalmaꞌ, nin tetz cuꞌn kajtzaꞌkl swutz cyakil yi eꞌchk katxꞌixwatz nka eꞌchk oy yi na kakꞌ tetz Ryos. Nchaꞌtz mas baꞌn tcuꞌn yi nink kakꞌ cyakil kachamil tan xconeꞌn tetz Ryos. Nin nchaꞌtz mas baꞌn tcuꞌn yi lokꞌeꞌn chiwutz wunak swutz cyakil eꞌchk katxꞌixwatz nka eꞌchk oy yi na kakꞌ tetz Ryos.
34 Yi tilol Jesús yi baꞌn na el xtxum yaj tetz, itzun taltz tetz:
—Txant tan awoqueꞌn tkꞌab Ryos.
Cyaꞌl nin junt nimsaj cꞌuꞌl tan wakꞌ ib tu Jesús.
Yi Cristo iꞌ Ajcaw te kꞌajtzun Luwiy
(Mt 22.41-46; Lc 20.41-44)
35 Itzun tal Jesús scyetz yi eꞌ wunak te yi na tzan tan chichusleꞌn le templo:
—I bin jaluꞌ ¿nxac na cyal yi eꞌ txꞌolol xoꞌl yi ley Moisés yi xonl tuꞌ kꞌajtzun Luwiy yi Cristo yi jun bixbaꞌnt tan tuleꞌn? 36 Na ko xonl tuꞌ kꞌajtzun Luwiy yi Cristo, ¿mbi tzuntz yi talnak Luwiy tan porer yi Espíritu Sant yi xtxolbileꞌj?:
‘Itzun tal Kataj Ryos tetz Wajcaw:
Cꞌolchin cuꞌn tzoneꞌj le insbal,
jalen cuꞌn lchoꞌc eꞌ acontr waꞌn jakꞌ awukan,
stzun Ryos banak cyen tetz Wajcaw.’b
37 Ko yaꞌtz yi yol yi alijt cyen tan kꞌajtzun kamam Luwiy tan porer yi Espíritu Sant, ¿nxac na cyal yi eꞌ txꞌolol xoꞌl yi ley Moisés yi wunak tuꞌ Cristo, yi xonl tuꞌ Luwiy yi jun yi bixbaꞌnt tan tuleꞌn?
Wiꞌnin tzun wunak ateꞌtz tan tbiteꞌn yi yol Jesús, nin wiꞌnin chitzatzineꞌn yi quibital yi xtxolbilaꞌtz.
Yi talolt Jesús chipaltil yi eꞌ txꞌolol xoꞌl yi ley Moisés
(Mt 23.1-36; Lc 11.37-54; 20.45-47)
38 Nchaꞌtz tal Jesús scyetz yi eꞌ wunak yi toqueꞌnt tan chichusleꞌn: “Or quiluꞌ, chixomiꞌchuꞌ te cyajtzaꞌkl yi eꞌ txꞌolol xoꞌl yi ley Moisés. Na yi eꞌ cyetz na xcon jun jilwutz beꞌch cyetz cyaꞌn yi chukpiꞌn nintuꞌ, tan ẍchajleꞌn ẍchiwutz wunak yi quiꞌc quil taneꞌn. Nin wiꞌnin na chitzatzin yi na akꞌlij chikꞌej yi na bajij kꞌajlaꞌn scyetz. 39 Ej nin yi na chiban chimunl swutz Ryos tulak eꞌchk sinagoga, ntin na cyaj chicꞌoleꞌ tibaj yi bajx chem tan jaleꞌn chikꞌej. Ej nin yi na bajij jun waꞌaꞌn, ntin na cyaj choꞌc jalen tziꞌn quen tan majleꞌn yi bajx chem. 40 Or quiluꞌ yi eꞌ txꞌolol xoꞌl yi ley Moisés na na chimajlen chicaꞌl yi eꞌ xmaꞌlcaꞌn, nin tan teweꞌn yi quil, tunin na chiben quen tunin tan orariꞌn. Tan tuꞌ yi yaꞌtz na chiban, tzꞌakꞌlok mas chicaws.”
Yi oy yi opon tan jun tal xnaꞌn mebaꞌ nin xmaꞌlcaꞌn
(Lc 21.1-4)
41 At jun tir yi choꞌn cꞌolchij Jesús le templo, nakaꞌjil kale atit yi eꞌchk cuꞌlbil oy. Nintzun tilnintz yi wiꞌnin cyoponeꞌn wunak tan takꞌleꞌn cyoy. Nin til yi wiꞌnin cyoqueꞌn ric tan cuꞌseꞌn wiꞌnin pwok tul eꞌchk cuꞌlbilaꞌtz. 42 Toponeꞌn tzun jun tal prow xnaꞌn xmaꞌlcaꞌn, nin cuꞌ tkꞌol cob tal centaw. 43 Yi beneꞌn tilol Jesús nintzun eꞌ saj ẍchakol yi eꞌ ẍchusbeꞌtz, itzun taltz scyetz: