Yi tponeꞌn Jesús Jerusalén
(Mt 21.1-11; Lc 19.28-40; Jn 12.12-19)
11
1 Itzun bantz yi cyoponeꞌn nakaꞌjil Jerusalén xlaj yi cob tal tnum yi na biꞌaj Betfagé tu Betania, yi ateꞌ wi Olivo, nin eꞌ ben ẍchakol Jesús cob ẍchusbeꞌtz tan ticyꞌleꞌn jun mantar, 2 itzun taltz:—Quibeneꞌnk le aldey tziꞌneꞌj. Yil cxopon, tzitileꞌ jun buruꞌ cꞌalij, yi txeꞌn cunin bajij mansar. Pujwok tzaj, nin cyꞌajwok tzaj. 3 Inti ko al cxmakonwok teꞌj, baꞌn tzitalwok tetz: ‘Choꞌn xconk tetz Kajcaw, ax tzꞌul kukꞌeꞌt nin,’ ẍchijwok sban, —stzun Jesús scyetz.
4 Chibeneꞌn tzuntz nin jal nin yi buruꞌ cyaꞌn. Choꞌn cꞌalij tzi beꞌ tzi jun sawan.
5 Itzun te yi na chitzan tan pujleꞌn, at tzun wunak yi cyal scyetz:
—¿Mbi na ibanwok? ¿Nxac na cxtzanwok tan pujleꞌn yi buruꞌ?
6 I nin tzun ben cyaloltz chi yi ben tlol Jesús scyetz, nintzun akꞌlij amaꞌltz scyetz tan beneꞌn quicyꞌal. 7 Tponeꞌn tzun yi buruꞌ cyaꞌn kale atit Jesús, nin je cyakꞌol chixbuꞌk teꞌj. Nintzun je nin Jesús teꞌj. 8 Wiꞌnin wunak yi baj cuꞌ chilitꞌul yi chixbuꞌk tbeꞌ. Ej nin at eꞌ yi xak tzeꞌ cuꞌn baj cuꞌ cyaꞌn tbeꞌ. 9 Cyakil yi eꞌ yi bajxcheꞌ cyuml yi eꞌ yi xomcheꞌ nin, wiꞌnin chiẍchꞌineꞌn tan yi tzatzin yi ateꞌ cuꞌnt:
—Kakꞌeꞌ kakꞌajsbil tetz Ryos, na at banl iꞌ tibaj yi juneꞌj, yi ja ul ẍchakol. 10 Kakꞌeꞌ kakꞌajsbil tetz Ryos na txant tan toqueꞌn yi juneꞌj tetz ajcaw chi yi sukiꞌnt tan Ryos tetz kꞌajtzun rey Luwiy tentz. Kakꞌeꞌ bin kakꞌajsbil tetz yi kaRyosil yi at tcyaꞌj, —cheꞌch cyakil yi eꞌ wunak.
11 Tponeꞌn tzun Jesús le tnum Jerusalén, nin octz le templo. Yi nsken baj xmayil cyakil yi eꞌchk takleꞌn yi at, nintzun eltzaj tan tponeꞌn le tal tnum Betania, na nsken cuꞌ kꞌej. Xomcheꞌ yi coblaj ẍchusbeꞌtz iꞌ teꞌj.
Yi skejeꞌn yi jun wiꞌ ibẍ tan Jesús
(Mt 21.18-19)
12 Itzun bantz le junt eklok yi chipakxeꞌn tzaj le tal tnum Betania, sajeꞌn tzun jun chin weꞌj te Jesús. 13 Beneꞌn tzun tilol jun wiꞌ ibẍ yi choꞌn at tzi beꞌ. Chin txaꞌx nin xak. Nin ben tan tilweꞌn yi ko at wutz. Poro yi tponeꞌn quiꞌc nin jun wutz at, ntin xak wiꞌnin, na nkꞌeraꞌtz tiempil tan jaleꞌn wutz. 14 Itzun tal Jesús tetz:
—Quiꞌt cẍwutzin sbneꞌ opon tunintz, —stzun iꞌ.
Yi eꞌ ẍchusbeꞌtz quibit yi jun yoleꞌj.
Yi toqueꞌn Jesús tan chilajeꞌn len yi eꞌ aj cꞌayinl le templo
(Mt 21.12-17; Lc 19.45-48; Jn 2.13-32)
15 Itzun bantz yi cyoponeꞌn Jerusalén, nintzun oc Jesús le templo nin octz tan chilajeꞌn len cyakil yi eꞌ aj cꞌayinl scyuchꞌ yi eꞌ lokꞌol yi ateꞌ-tz. Nin baj jeꞌ trimpul yi chimes yi eꞌ txꞌexul wutz pwok. Nchaꞌtz baj jeꞌ trimpul yi chichem yi eꞌ cꞌaꞌy plomẍ. 16 Nin quinin takꞌ amaꞌl tetz jun tan ticyꞌeꞌn cuꞌn le amaꞌl yi cyꞌanl te yi templo yi ko cyꞌaꞌn jun ektz taꞌn nka alchok eꞌchk takleꞌn. Nin octz tan chichusleꞌn cyakil yi eꞌ wunak. Itzun taltz scyetz:
17 —Je na tal yi yol Kataj yi tzꞌibaꞌnt cyeneꞌj: ‘Yi weri incaꞌl yaꞌstzun nachbil wetz tetz alchok jilwutz wunak.’ Poro yi eꞌ cyeruꞌ na xcon cyanuꞌ tetz jun molbil alkꞌom.
18 Yi quibital yi eꞌ wiꞌtz paleꞌ scyuchꞌ yi eꞌ txꞌolol xoꞌl yi ley Moisés yi yol Jesús, nintzun eꞌ octz tan joyleꞌn juꞌ yi ẍeꞌn chiban tan biyleꞌn cuꞌn. Poro quinin jal puntil cyaꞌn na na chixob scyetz cyakil wunak yi na chitzatzin te yi ẍchusuꞌn Jesús. 19 Poro yi toqueꞌn akaleꞌn eleꞌn nin ban Jesús tnum scyuchꞌ yi eꞌ ẍchusbeꞌtz.
Yi skejeꞌn yi jun wiꞌ ibẍ
(Mt 21.20-22)
20 Itzun bantz le junt eklok yi na chixon tbeꞌ nin ben quilol yi jun wiꞌ ibẍ. Nsken skej tircuꞌn tuml yi taꞌkl. 21 Tuleꞌn tzun txꞌak tcꞌuꞌl Luꞌ yi mbi tal Jesús te yi jun wiꞌ ibẍaꞌtz. Itzun taltz:
—Taꞌ, tilninuꞌ yi jun wiꞌ ibẍ yi takꞌuꞌ caws ewt. Ja wiꞌt skej.
22 Itzun saj tlol Jesús:
—Yi puntil iꞌtz yi tajweꞌn tan itocsal cuꞌn yi sbnixok yi eꞌchk takleꞌn yi na ijakwok tetz Ryos. 23 Na jun cuꞌn yol swaleꞌ nin tzitetz. Alchok scyetz yil tzꞌaꞌlon te wutzeꞌj: ‘Quiloꞌk xe mar,’ sbnixk, yi ko qui na cabej cꞌuꞌl. Sbnixk yi ko tetz cuꞌn talmaꞌ na tocsaj yi sbnixk. 24 Chaꞌstzun te na wal nin tzitetz, yi na cxoꞌcwok tan nachleꞌn Kataj sbnixk alchok takleꞌnil yi na ijakwok tetz. Poro ntin yi ko na itocsaj cuꞌn yi sbnixk. 25 Nchaꞌtz ko na tzan jun yaj tan orariꞌn nin ko na ul txꞌakx til junt tcꞌuꞌl, tajweꞌn tan cuyul paj. Scuyeꞌ tzun Kataj yi at tcyaꞌj yi tetz paj. 26 Poro ko qui na cuy yi til junt, qui tzun scuy Kataj yi tetz paj, —stzun Jesús bantz.
Yi chijakol tetz Jesús yi naꞌ makꞌon kꞌej iꞌ
(Mt 21.23-27; Lc 20.1-8)
27 Cyoponeꞌn tzun junt tir Jerusalén. Itzun te yi na xon Jesús le templo, nintzun eꞌ opon yi eꞌ wiꞌtz paleꞌ scyuchꞌ yi eꞌ txꞌolol xoꞌl yi ley Moisés, scyuchꞌ yi eꞌ chiwiꞌ banl wiꞌ yi eꞌ judiy, tan jakleꞌn tetz:
28 —¿At ptzun akꞌej tan banleꞌn yi eꞌchk xtxolbilaꞌseꞌj? ¿Naꞌ makꞌon akꞌej? —cheꞌch bantz tetz Jesús.
29 —I bin jaluꞌ, bajx tzinjakeꞌ jun xtxolbil scyeruꞌ. Kol cyaluꞌ yi puntil swetz, nchaꞌtz in swaleꞌ scyeruꞌ yi naꞌ makꞌon inkꞌej. 30 ¿Naꞌ akꞌon kꞌej kꞌajtzun Waꞌn Bautist, tan jeꞌseꞌn aꞌ chiwiꞌ wunak? ¿Ryos peꞌ akꞌon tetz, nka eꞌ tuꞌ wunak? Cyal tzajuꞌ swetz, —chij Jesús ban scyetz.
31 Eꞌ baj xeꞌteꞌn tzuntz tan wolneweꞌn squibil quib: “Kol kal yi Ryos akꞌon kꞌej Waꞌn, staleꞌ tzaj sketz yi mbi tzuntz quinin kaban taneꞌn yi ẍchusuꞌn. 32 Ej nin kol kal yi wunak tuꞌ akꞌon kꞌej Waꞌn, quil chitzatzin yi eꞌ wunak skeꞌj,” cheꞌch squibil quib. Cyal yi jun yolaꞌtz na wiꞌnin chixobeꞌn scyetz wunak, na cyakil eꞌ wunak aꞌlon yi Waꞌn iꞌ jun elsanl stziꞌ Ryos. 33 Jaltaꞌtz tlen tuꞌ ben cyaloltz tetz Jesús:
—Cuquen, qui na pujx kaꞌn, —cheꞌch.
—Ko yaꞌtz cyajtzaꞌkluꞌ, nchaꞌtz in wetz quil wal scyeruꞌ naꞌ akꞌon inkꞌej tan imbnol cyakil eꞌchk xtxolbilaꞌseꞌj, —chij Jesús bantz scyetz.