Quiꞌc cu paxeꞌn
(Mt 19.1-2; Lc 16.18)
10
1 Yi wiꞌt bajeꞌn xtxolil Jesús yi xtxolbilaꞌseꞌj, teleꞌn tzaj tzun iꞌ-tz Capernaum. Choꞌn beneꞌn iꞌ le luwar cwent Judea nin tu yi luwar yi at jalaj icyꞌen aꞌ Jordán. Itzun te yi tponeꞌn, chichamol tzun quib yi eꞌ wunak te iꞌ, nin octz tan chichusleꞌn chi na ban nin iꞌ. 2 Cyoqueꞌn tzun cobox parisey tan joyleꞌn puntil yi ẍeꞌnk jal til Jesús. Itzun chijaktz tetz:—¿Mbi na tal teruꞌ Taꞌ, baꞌn peꞌ le wutz teruꞌ kol spax cyen jun yaj yi txkel? —cheꞌch.
3 —¿Mbi cyajnak stzꞌibal Moisés yi tajweꞌn tan chixomeꞌnuꞌ teꞌj? —stzun Jesús scyetz.
4 —Alijt cyen tan Moisés yi at cu tan cyajeꞌn cyen paxil jun yaj yi txkel. Ntin na taj jeꞌseꞌn jun uꞌj tetz paxeꞌn, baꞌn tzun scol cyen yaj yi txkel, —cheꞌch bantz tetz Jesús.
5 —Cyaj tlol Moisés yi xtxolbileꞌj tan paj stzeꞌtzal cyalmaꞌuꞌ. 6 Poro le xeꞌtzbil tzaj, yi bnixeꞌn cuꞌn cyakil eꞌchk takleꞌn tan Ryos, “Yaj tu xnaꞌn eꞌ tulej Ryos.”a 7 “Chaꞌstzun te tajweꞌn tan cyajeꞌn cyen tilol jun yaj yi taj xtxuꞌ tan cyokꞌbel quib tu txkel, nin chijunaj quibtz. 8 Yi cobaꞌtz yi na cyokꞌbej quib, junit na chiban swutz Ryos.”b Nkꞌeꞌtz cob chixoneꞌn ma na jun ntziꞌ na chiban. 9 Chaꞌstzun te quiꞌc rmeril yi nink xcyeꞌ jun wunak tan chijatxleꞌn yi jun lmujaꞌtz yi Ryos ncyokꞌben cuꞌn, —chij Jesús scyetz.
10 Yi nsken chopon xe jun caꞌl, nintzun eꞌ oc yi eꞌ ẍchusbeꞌtz tan jakleꞌn puntil tetz te yi mbi ekaꞌn tan yi xtxolbil yi nsken tal. 11 Itzun tal Jesús scyetz:
—Cyakil yi eꞌ yi na chipax cyen quixkel, nin cyokꞌbej quib tu junt xnaꞌn, eꞌ tzun jopol wutzaj. 12 Ej nin nchaꞌtz alchok scyetz xnaꞌn yil spax cyen yi chmil nin ltokꞌbej tib tu junt, jopol wutzaj iꞌ.
Yi tkꞌol Jesús yi banl squib eꞌ nitxaꞌ
(Mt 19.13-15; Lc 18.15-17)
13 Cyoponeꞌn tzun ticyꞌleꞌn cobox nitxaꞌ swutz Jesús tan jeꞌn tkꞌol yi kꞌab ẍchiwiꞌ. Poro nin eꞌ oc yi eꞌ ẍchusbeꞌtz tan makleꞌn chiwutz yi eꞌ cyꞌanl cyetz. 14 Poro yi tilol Jesús yi mbi na chitzan yi eꞌ ẍchusbeꞌtz tan banleꞌn, nintzun jeꞌ swutz.
—Akꞌwok amaꞌl scyetz yi eꞌ nitxaꞌ tan cyuleꞌn sweꞌj. Quil tzimakwok chiwutz, na cyakil yi eꞌ yi choꞌn taneꞌn chicꞌulutxumil chi taneꞌn chicꞌulutxumil yi eꞌ nitxaꞌeꞌj, ateꞌ nin cyeraꞌtz tkꞌab Ryos. 15 Jun cuꞌn yol na wal tzitetz, alchok scyetz yi quil tzꞌoc cꞌulutxum jakꞌ caꞌwl Ryos chi taneꞌn cꞌulutxumil jun nitxaꞌ, quil tzꞌoc teraꞌtz tkꞌab Ryos, —chij Jesús ban scyetz.
16 Beneꞌn tzuntz tan chikꞌaleꞌn yi eꞌ nitxaꞌ, nin jeꞌ yi kꞌab ẍchiwiꞌ tan tkꞌol yi banl squibaj.
Yi jiloneꞌn jun ric tetz Jesús
(Mt 19.16-30; Lc 18.18-30)
17 Itzun bantz yi tcyꞌalt Jesús yi beꞌ, lajkeꞌl nin tuleꞌn tzaj jun yaj nin cuꞌ mejloktz swutz. Itzun jaktz:
—Taꞌ chumbalaj nin iluꞌ, ¿mbik tzimban tan incambal yi itzꞌajbil yi quinin bajsbeꞌn tetz?
18 —¿Mbi tzuntz na awal tzaj yi in balaj? Ntinaꞌtz jun balaj at, iꞌtz Ryos. 19 Nchaꞌtz, ¿mbi xac na ajak tzaj swetz yi mbiꞌtz yi puntil tan acambal yi awutzꞌajbil? Na elnak atxum tetz yi lajuj caꞌwl, yi na tal: ‘Quil cẍjopon wutzaj; quil cẍbiyolnakin; quil cẍalkꞌij; qui tzajal cuꞌn jun wi awakꞌ yil cẍoꞌc tan stiwiꞌn; quil cẍoꞌc tan chisubleꞌn wunak; lokꞌweꞌ ataj atxuꞌ,’ —stzun Jesús bantz tetz.
20 —Poro Taꞌ, juyil tzaj cuꞌn in yi inxeꞌtleꞌn tan banleꞌn taneꞌn cyakil yi eꞌchk xtxolbilaꞌseꞌj yi na tal tzajuꞌ swetz.
21 Tzatzin cuꞌn tzun beneꞌn tlol Jesús tetz:
—Jaltaꞌtz jun apaltil at. Cun cꞌay cyakil amebiꞌl, nin oy nin yi jamel scyetz eꞌ mebaꞌ. Sjalok tzun amebiꞌl tcyaꞌj. Yil tzaban taneꞌn yi xtxolbileꞌj, baꞌn tzun cẍuꞌltz tan axomeꞌn nin sweꞌj. Poro tajweꞌn yi list aẍ tan mucꞌleꞌn qꞌuixcꞌuj chi na cꞌox tib jun yaj tan quimeꞌn swutz pasyon.
22 Poro yi tbital yaj yi yol Jesús, wiꞌnin bisuneꞌn. Ej nin yi tajeꞌn iꞌ xe caꞌl, wiꞌnin ticyꞌeꞌn tcꞌuꞌl, na wiꞌnin mebiꞌl.
23 Xmayineꞌn nintzun Jesús scyetz yi eꞌ ẍchusbeꞌtz. Itzun taltz scyetz:
—At qꞌuixbel tan cambal jun ric yi jun balaj tiemp yil tzꞌoc Ryos tan cawuꞌn.
24 Wiꞌnin cyeleꞌn yab yi eꞌ ẍchusbeꞌtz te yi yol Jesús. Chaꞌstzun te talol junt tir Jesús scyetz:
—Axwok jun cꞌoloj witzꞌun, wiꞌnin qꞌuixbel tan tponeꞌn jun yaj te Ryos, yi ko choꞌn kꞌuklij cꞌuꞌl te yi mebiꞌl. 25 Niꞌcuꞌn qꞌuixbel chi taneꞌn qꞌuixbel yi nink tzꞌicyꞌ jun camey tul jun julil bak tzꞌisbil, —chij Jesús scyetz.
26 Yi quibital yi eꞌ ẍchusbeꞌtz Jesús yi yol iꞌ, nintzun eꞌ el yabtz teꞌj, nintzun cyaltz squibil quib:
—Yi ko yaꞌtz, ¿ẍeꞌn tzun clax jun?
27 Cheꞌ beneꞌn tzun xmayil Jesús, nintzun taltz scyetz:
—Quil xcyeꞌ jun wunak te xtxolbileꞌj, poro quiꞌc jun takleꞌn yi quiꞌk xcyeꞌ Ryos teꞌj.
28 Toqueꞌn tzun Luꞌ tan yol tetz Jesús:
—I bin jaluꞌ Taꞌ, yi oꞌ ketz ja cyaj kilol cyakil yi kamebiꞌl tan kaxomeꞌn teꞌjuꞌ.
29 Beneꞌn tzun tlol Jesús scyetz:
—Jun cuꞌn yol swaleꞌ nin tzitetz, alchok scyetz yi list tan cyajeꞌn cyen tilol yi caꞌl tu yi xtxꞌotxꞌ tan tuꞌ yi na taj xom sweꞌj, nin tan tuꞌ yi ja el xtxum te yi inchusuꞌn yi na takꞌ itzꞌajbil, tzꞌakꞌlok jun cient caꞌl tu jun piꞌaj txꞌotxꞌ tetz. 30 Ej nin nchaꞌtz alchok scyetz yi list tan cyajeꞌn cyen tilol yi taj xtxuꞌ, nka yi stzicy, nka yi titzꞌun, nka yi txkel, nka yi eꞌ nitxajil tan xomeꞌn sweꞌj, sjalok jun chin cꞌoloj taj xtxuꞌ, tu jun cꞌoloj titzꞌun nin stzicy. Nin sjalok jun chin cꞌoloj nitxajil. Na cyakil yi eꞌ yi list tan chixomeꞌn sweꞌj, sjalok cyakil yi jeꞌj. Poro ilenin chitijeꞌ qꞌuixcꞌuj. Na yil tzꞌul tzaj yi tiemp yi at tulbil, ẍchicambok te jun itzꞌajbil yi quinin bajsbeꞌn tetz. 31 Poro at wiꞌnin eꞌ yi bajxcheꞌ jaluꞌ yi wiꞌtzbil ẍchibneꞌ. Nin at eꞌ yi wiꞌtzbil quitaneꞌn jaluꞌ yi ẍchibajxok tan chicambal quitzꞌajbil.
Yi talol Jesús yi at cyocbil wunak tan biyleꞌn
(Mt 20.17-19; Lc 18.31-34)
32 Itzun bantz yi na chixon tbeꞌ tan cyoponeꞌn Jerusalén, bajxij Jesús ẍchiwutz yi eꞌ ẍchusbeꞌtz. Poro wiꞌnin chibisuneꞌn te yi qui bi loꞌ sbajok te Jesús. Nchaꞌtz quitaneꞌn yi eꞌ mas wunak yi xomcheꞌ nin. Wiꞌnin chixobeꞌn. Chichuc tzun yi eꞌ ẍchusbeꞌtz eꞌ el moxoltz joylaj len muꞌẍ nin octz tan talcheꞌn scyetz yi mbi sbajok te iꞌ. 33 Itzun tal iꞌ-tz:
—I bin jaluꞌ, sak tziwutz yi choꞌn at kabembil Jerusalén. Yil kopon ẍchinjatxlok, yi in yi in Bajx Cyꞌajol, ẍchikꞌab yi eꞌ wiꞌtz paleꞌ, nin ẍchikꞌab yi eꞌ txꞌolol xoꞌl yi ley yi tzꞌibaꞌnt cyen. Nchaꞌtz bixek cyaꞌn tan weleꞌn cuꞌn swutz. Chinjatxlok ẍchikꞌab yi eꞌ awer nak. 34 Nocopon tetz chitzeꞌlbeꞌtz. Chinloꞌonk cyaꞌn tan xicyꞌxab. Chocopon tan stzubeꞌn tzaj tꞌaꞌal chitziꞌ tinwutz, nin chinquimok cyaꞌn. Poro le toxiꞌn kꞌej, nitzꞌok junt tir ẍchixoꞌl almaꞌ.
Yi chijakol Jacow tu Waꞌn chikꞌej
(Mt 20.20-28)
35 Toqueꞌn tzun chiẍkansal quib Jacow tu Waꞌn yi eꞌ cyꞌajl Zebedeo te Jesús. Itzun cyaltz tetz:
—Taꞌ, na kloꞌ kaj yi sbanuꞌ yi pawor yi skacꞌucheꞌ teruꞌ.
36 —¿Mbi tzun na itajwok yil tzimban?
37 —Yi kajbil iꞌtz, yil cambajuꞌ yi kꞌejuꞌ tan toqueꞌnuꞌ tan cawuꞌn, na kloꞌ kaj yil takꞌuꞌ amaꞌl sketz tan kacꞌoleweꞌn xlajuꞌ, jun le sbaluꞌ, nin junt le maxuꞌ, —cheꞌch.
38 Itzun tal Jesús scyetz:
—Yi axwok itetz, qui na el itxum tetz yi mbi na cxtzanwok tan cꞌucheꞌn. ¿Peꞌ xcyekwok tan mucꞌleꞌn yi qꞌuixcꞌuj yi tzꞌicyꞌpon wetz waꞌn?
39 —Kaxcyek Taꞌ, —cheꞌch.
—Jun cuꞌn yol tzitijeꞌ yi qꞌuixcꞌuj yi tzintijeꞌ wetz, 40 poro tan icꞌoleweꞌn tzinxlaj, nkꞌeꞌtz in chincawun teꞌj, ma na choꞌn tzꞌakꞌlok scyetz yi eꞌ yi txaꞌijcheꞌ tan Intaj.
41 Itzun yi quibital yi lajujt cyuchꞌ, nintzun jeꞌ ẍchiwutz yi mbiꞌtz na chitzan Jacow tu Waꞌn tan jakleꞌn tetz Jesús. 42 Eꞌ sajeꞌn tzun ẍchakol Jesús, itzun taltz scyetz:
—Na itilwok yi ẍeꞌn quitaneꞌn yi eꞌ wiꞌtz ajcaw lakak eꞌchk lmak tnum, wiꞌnin na chicawun. Na choꞌc wunak jakꞌ chicaꞌwl. 43 Poro qui na taj yi yaꞌstzunk tziban itetz. Ma na je puntileꞌj: Ko at jun tzixoꞌl yi na taj jal kꞌej, tajweꞌn tan toqueꞌn iꞌ tetz chichakum yi eꞌ mas. 44 Ko at jun tzixoꞌl yi na taj tzꞌoc tetz bajxom, tajweꞌn tan toqueꞌn tetz chichakum yi eꞌ mas. 45 Chi wutaneꞌn wetz, yi in yi in Bajx Cyꞌajol, nkꞌeraꞌtz inmantar yi nink choꞌc wunak tetz inchakum, ma na ja nuꞌl tan woqueꞌn tetz chichakum wunak. Ja nuꞌl tan wukꞌol wib tkꞌab quimichil tan chiclaxeꞌn wiꞌnin wunak.
Yi tuleꞌn yos tan Jesús tu Bartimeo yi moyiꞌẍ
(Mt 20.29-34; Lc 18.35-43)
46 Itzun bantz yi ticyꞌakeꞌn Jesús le tnum Jericó, xomcheꞌ yi eꞌ ẍchusbeꞌtz, scyuchꞌ jun cꞌoloj wunak. Yi cyelemuleꞌn juꞌeꞌl tzaj tnum, at tzun jun moyiꞌẍ cꞌolchij tzi beꞌ tan rmosumiꞌn. Bartimeo biꞌ, cyꞌajl Timeo. 47 Ej nin yi tbital iꞌ yi txant tan tuleꞌn Jesús nakaꞌjil iꞌ, nintzun jilontz. Chin wiꞌ nin bantz tan yol:
—Jesús iluꞌ yi xonl kꞌajtzun Luwiy yi at tulbil, elk kꞌajabuꞌ skeꞌj.
48 Poro wiꞌnin wunak eꞌ oc tan makleꞌn wutz iꞌ tan quiꞌt ẍchꞌineꞌn, poro mast cunin ẍchꞌineꞌn iꞌ:
—Jesús, iluꞌ yi xonl kꞌajtzun Luwiy yi at tulbil, elk kꞌajabuꞌ sweꞌj.
49 Taqueweꞌn cuꞌn tzun Jesús, itzun taltz:
—Cyꞌajwok tzaj tzoneꞌj.
Chibeneꞌn tzun cobox tan ticyꞌleꞌn tzaj yi moyiꞌẍ, itzun cyaltz tetz:
—Quiwit yaj, txiclijeꞌn, na na tzan Jesús tan achakleꞌn.
50 Cyajeꞌn cyen tzun jowbal yi xbuꞌk, nin cyꞌaꞌnt nin tzꞌitpuꞌn taꞌn yi jeꞌn txiclok nin opontz swutz Jesús. 51 Jakol tzun Jesús tetz:
—¿Mbi tzun na awaj yil tzimban tzaweꞌj?
—Taꞌ, yi wajbil iꞌtz yil jakxij inwutz taꞌnuꞌ.
52 —Baꞌn cẍaꞌj, na tan tuꞌ nkꞌukeꞌ acꞌuꞌl sweꞌj ja wiꞌt ul yos tzawuchꞌ.
Na nin el tzaj yi yolaꞌseꞌj le stziꞌ Jesús yi jakxeꞌn yi wutz yi moyiꞌẍ. Ej nin xomnintz te Jesús.