Yi ẍeꞌn na jal til jun yaj swutz Kataj
(Mt 15.1-20)
7
1 Itzun bantz, nin eꞌ opon cobox parisey te Jesús scyuchꞌ cobox txꞌolol xoꞌl yi ley yi tzꞌibaꞌnt cyen. Choꞌn chibaj sajeꞌn Jerusalén, nin eꞌ baj opontz te Jesús. 2 Ej itzun yi quilol yi at cobox ẍchusbeꞌtz iꞌ yi eꞌ wan yi ntaxk chixansaj chikꞌab, nintzun eꞌ octz tan yolcheꞌn Jesús. 3 (Na yi eꞌ parisey scyuchꞌ yi eꞌ mas judiy, choꞌn xomcheꞌ te chichusuꞌn chimam chiteꞌ yi quiꞌc rmeril tan chiwaneꞌn yi ko qui na chitxꞌaj alaꞌ tir chikꞌab. 4 Nin nchaꞌtz yi na chipakx tzaj tcꞌaꞌyl, yi ko quil chixansaj chikꞌab quil chiwan. Nin at mas chichusuꞌn yi niꞌcuꞌn, chi taneꞌn xansajeꞌn eꞌchk lak ucꞌaꞌbil, tu eꞌchk xaruꞌ txꞌotxꞌ, tu eꞌchk xaruꞌ chꞌichꞌ. Nin nchaꞌtz na chixansaj chiwitbil.) 5 Cyoqueꞌn tzun yi eꞌ pariseyaꞌtz scyuchꞌ yi eꞌ txꞌolol xoꞌl yi ley Moisés tan jakleꞌn tetz Jesús:—Taꞌ, ¿mbi tzun yi qui na chixom yi eꞌ ẍchusbeꞌtzuꞌ te chichusuꞌn kamam kateꞌ? na na chiwan yi ntaxk chixansaj chikꞌab, —cheꞌch ban nin tetz Jesús.
6 —Bintzinin yi na tal yi xtxolbil yi cyajnak cyen stzꞌibal Isaías tentz, yi chiwutz tuwuꞌ chiplaj tuwuꞌ yi na cyocsaj quibuꞌ balaj, na je yol iꞌeꞌj:
‘Yi wunakeꞌj na cyakꞌ inkꞌej, poro chitziꞌ tuꞌ.
Qui ajlij chicꞌuꞌl sweꞌj.
7 Quiꞌc na takꞌ yi eꞌchk chimunl yi na chiban tzinwutz,
na caꞌwl tuꞌ wunak na chitzan tan banleꞌn taneꞌn.’
8 Niꞌcuꞌn eꞌuꞌ scyuchꞌ yi eꞌ wunakaꞌtz tentz na ja cyaj cyen quilol eꞌchk caꞌwl Ryos tan chixomeꞌnuꞌ te chichusuꞌn wunak. Na na choꞌcuꞌ tan xansajeꞌn eꞌchk xaruꞌ tu eꞌchk lak ucꞌaꞌbil. Nin na chixomuꞌ te wiꞌnin eꞌchk ajtzaꞌkl yi quiꞌc muꞌẍ xtxolbil.
9 Nchaꞌtz tal scyetz:
—Tan tuꞌ yi na chixomuꞌ te eꞌchk chusuꞌnaꞌtz, ja cyaj cyen chixajsaluꞌ yi tajbil Ryos. 10 Na je tzꞌibaꞌn cyen tan Moiséseꞌj: ‘Lokꞌwok itaj itxuꞌ,’a ej nin: ‘Alchok scyetz yi na oc tan telseꞌn kꞌej yi taj xtxuꞌ, tajweꞌn cuꞌn tan biyleꞌn cuꞌn iꞌ.’b 11 Ma yi eꞌ cyeruꞌ na cyaluꞌ yi baꞌn kol tal jun yaj tetz taj xtxuꞌ: ‘Quiꞌc rmeril tan cheꞌ incꞌaꞌchaluꞌ, na cyakil yi inmebiꞌl ja oc tetz Corbán.’ (Yi na elepont yi yol Corbán iꞌtz: Yi ja wiꞌt insuk inmebiꞌl tetz Ryos.) 12 Kol xcon yi jun yolaꞌtz tan jun yaj, na cyaluꞌ yi nkꞌeꞌtz tajweꞌn tan toqueꞌn iꞌ tan chicꞌaꞌcheꞌn, nka tan quichꞌeyeꞌn yi taj xtxuꞌ. 13 Tan yi jun ajtzaꞌklaꞌtz yi na chixomuꞌ teꞌj na chitzanuꞌ tan telseꞌn kꞌej yi eꞌchk caꞌwl Ryos. Ej nin at mas eꞌchk xtxolbil yi na chibanuꞌ yi niꞌcuꞌn tu yi ajtzaꞌkleꞌj, —stzun Jesús scyetz.
14 Ej nin at junt tir yi eꞌ saj ẍchakol Jesús yi eꞌ wunak, itzun taltz scyetz:
—Quibit tzajuꞌ inyol, nin choꞌkuꞌ il tan xtxumleꞌn. 15 Quiꞌc nin jun takleꞌn yi na baj tan jun yaj yi nink xcyeꞌ tan jalseꞌn til swutz Ryos. Ma na i yi eꞌchk ajtzaꞌkl yi choꞌn na saj te talmaꞌ yaj, yaꞌstzun na xcyeꞌ tan jalseꞌn til swutz Ryos. 16 I bin jaluꞌ ko ja quibituꞌ inyol baꞌn choꞌcuꞌ il tan xtxumleꞌn.
17 Itzun yi wiꞌt stzajeꞌn wiꞌ yi yol Jesús scyetz yi eꞌ wunakaꞌtz, choꞌn tzun toqueꞌn iꞌ xe jun caꞌl. Nin eꞌ oc yi eꞌ ẍchusbeꞌtz tan jakleꞌn tetz yi mbi na elepont yi jun elsawutzilaꞌtz yi sken tal. 18 Itzun taltz scyetz:
—¿Nchaꞌtz ptzun axwok itetz, qui peꞌ na el itxum tetz? Na yi eꞌchk takleꞌn yi na baj tan jun yaj quil xcyeꞌ tan jalseꞌn til. 19 Na nkꞌeꞌtz choꞌn na opon te talmaꞌ, ma na choꞌn na opon le cꞌuꞌl, nin na elt.
Tal Jesús yi yoleꞌj tan ẍchajleꞌn yi nkꞌeꞌtz xan kol baj alchok takleꞌn tan jun yaj. 20 Nchaꞌtz tal scyetz:
—Yi xtxolbil yi na jalsan kil swutz Ryos iꞌtz yi eꞌchk ajtzaꞌkl cachiꞌ yi choꞌn na itzꞌij te kalmaꞌ. 21 Na yi eꞌchk ajtzaꞌkl cachiꞌ, chi taneꞌn yi jopol wutzajiꞌn nka yi xnaꞌniꞌn tu yajiꞌn, nka biyolnakiꞌn, choꞌn na itzꞌij tetz talmaꞌ jun wunak. 22 Nin nchaꞌtz ko alkꞌom jun yaj, nka na el talmaꞌ te eꞌchk takleꞌn yi nkꞌeꞌtz tetz, choꞌn na itzꞌij yi jun ajtzaꞌklaꞌtz te talmaꞌ. Nin nchaꞌtz na jal til jun tan subulnakiꞌn, nin tan chiꞌch cꞌuꞌlal, nin tan telseꞌn kꞌej junt, nin tan tuꞌ yi na tocsaj tib nim tu tajtzaꞌkl. Nin nchaꞌtz na jal til jun ko tu na tzan tuꞌ tan banleꞌn eꞌchk takleꞌn cachiꞌ. 23 Cyakil yi eꞌchk ajtzaꞌkl cachiꞌaꞌtz yi na saj tetz talmaꞌ jun, yaꞌstzun yi na xcyeꞌ tan jalseꞌn til. Nkꞌeꞌtz yi eꞌchk takleꞌn yi na baj taꞌn.
Yi tocsal jun xnaꞌn yi nkꞌeꞌtz judiy
(Mt 15.21-28)
24 Ticyꞌeꞌnt tzun Jesús nin choꞌn tponeꞌn le amaꞌl cwent tetz Tiro tu Sidón. Yi tponeꞌn, nintzun jal jun caꞌl kale oqueꞌt tan posariꞌn, na yi tajbil iꞌ iꞌtz yi cyaꞌl jun lbitan stziblal. Poro quiꞌc rmeril tan tewal tib ẍchiwutz wunak, 25 na jalcunin tbital jun xnaꞌn yi stziblal. Yi jun xnaꞌnaꞌtz, at jun tal yi xun, yi at jun espíritu cwent Baybaꞌn twankil. Chaꞌstzun te tponeꞌn swutz Jesús nin cuꞌ mejloktz. 26 Nkꞌeꞌtz judiy iꞌ, ma na iꞌ jun aj sirofenicia. Yi cweꞌn mejlok, nin cuꞌ wutz tetz Jesús tan toqueꞌn tan lajeꞌn len yi espíritu cwent Baybaꞌn twankil yi tal. 27 Poro itzun tal Jesús tetz:
—Ẍchꞌiweꞌ binuꞌ, na tajweꞌn yi bajx chiwan yi eꞌ nitxaꞌ, na qui na yub kol kamajlen chiwaꞌ tan beneꞌn kukꞌol scyetz eꞌ txꞌiꞌ, —chij Jesús tetz yi xnaꞌn.
28 Poro itzun saj tlol yi xnaꞌn:
—Bintzi Taꞌ, poro nchaꞌtz eꞌ tal txꞌiꞌ, na noj chicꞌuꞌl te chiwabeꞌn yi eꞌ nitxaꞌ.
29 Itzun ben tlol Jesús:
—Baꞌn atit yoluꞌ naꞌ. Baꞌn bin tzꞌajuꞌ, na ja wiꞌt el yi espíritu cachiꞌ twankil yi taluꞌ.
30 Yi tponeꞌn yi xnaꞌn xe caꞌl, coylij yi tal wi xtxꞌach. Na nsken el yi espíritu cwent Baybaꞌn twankil.
Yi tuleꞌn yos tu jun chcan, nin kekeb
31 Teleꞌn tzaj tzun Jesús le luwar cwent Tiro, nin icyꞌ cuꞌntz Sidón, nin tulak yi eꞌchk tnum cwent Decápolis tan tponeꞌn tzi aꞌ Galilea. 32 Tponeꞌn tzun ticyꞌleꞌn jun chcan, nin kekeb swutz iꞌ. Nin eꞌ oc yi eꞌ qꞌuil tetz tan cuꞌswutzil swutz Jesús tan jeꞌn tkꞌol yi kꞌab twiꞌ. 33 Teleꞌn tzun tcyꞌal Jesús yi chcan wiꞌ ẍchixoꞌl yi jun cꞌoloj wunak yi ateꞌ-tz. Yi teleꞌn chixajsal quib, nintzun oc tkꞌol Jesús jun wi kꞌab tul yi julil ẍchin yaj. Nin oc stzubil yi tꞌaꞌal stziꞌ te wi kꞌab, nin oc tkꞌol te takꞌ yi jun yajaꞌtz yi kekeb. 34 Xmayineꞌn nin tzun tcyaꞌj, nin saj jun bis te cꞌuꞌl. “¡Efata!” chij Jesús bantz. Yi na elepont yi jun yolaꞌtz iꞌtz: “¡Jakeꞌn awib!”
35 Jalcunin jakxeꞌn ẍchin yaj, nin jalcunin yucaneꞌn takꞌ tan yol. Chin clar cunin jiloneꞌn yaj. Quiꞌc muꞌẍ tal paltil. 36 Cawuneꞌn tzun Jesús scyetz yi eꞌ wunak yi iꞌlon yi mbi cuꞌn ban iꞌ, tan cyaꞌl cyal nint stziblal. Poro pyor cunin eꞌ bantz tan yolcheꞌn. 37 Wiꞌnin cyeleꞌn yab te yi mbi cunin ban Jesús, itzun cyaltz: “Chumbalaj nin cyakil yi na bnix taꞌn, na na xcyeꞌ tan tulseꞌn yos scyuchꞌ yi eꞌ chcan, nin scyuchꞌ yi eꞌ mem.”