Yi elsawutzil tetz ujul
(Mt 13.1-9; Lc 8.4-8)
4
1 Toqueꞌn tzun junt tir Jesús tan chichusleꞌn wunak tzi mar, nin quintech nin wunak eꞌ baj opontz teꞌj. Tan paj yi jun chin cꞌoloj wunakaꞌtz, nintzun oc Jesús tul jun barc yi at tzi aꞌ. Yi cꞌoleweꞌn cuꞌn, nin jilon nin scyetz yi eꞌ wunak yi ateꞌ cyen wi samlicyꞌ. 2 Nintzun octz tan chichusleꞌn tan wiꞌnin elsawutzil. Je jun scyeri elsawutzil yi xcon taꞌn:3 “Quibit tzajuꞌ yi elsawutzileꞌj. Itzun bantz, nin ben jun yaj tan ẍchitleꞌn ij wi cojbil. 4 Poro te yi na tzan iꞌ tan ẍchitleꞌn nin yi ij, at ij yi choꞌn tponeꞌn qꞌuixpuj tbeꞌ. Cyuleꞌn tzaj tzun chꞌuꞌl tan sicyꞌleꞌn, nin baj cyakꞌun. 5 Nin at ij yi choꞌn tponeꞌn qꞌuixpuj wi cꞌub kale quiꞌcleꞌt mas piml txꞌotxꞌ. Jalcunin jeꞌn muleꞌn. 6 Poro yi jeꞌn muleꞌn yi kꞌej, skejeꞌn nin ban, na quiꞌc amaꞌl tan teleꞌn mas yi taꞌkl. 7 Ej nin at ij noj cuꞌn xoꞌl tijal txꞌiꞌx. Poro yi txꞌiꞌx jalcunin ẍchꞌuyeꞌn, nin xcyeꞌ tan cꞌosineꞌn yi ujul. Chaꞌstzun te quinin wutzin. 8 Poro yi ij yi choꞌn cweꞌn tul balaj txꞌotxꞌ, ja jeꞌul, ja chꞌuy, nin ja wutzin. Chumbalaj nin ban cosech. Te jujun wiꞌ takꞌ junaklaj bakꞌwutz. Nin at jujun yi takꞌ oxcꞌal. Nin at jujun yi takꞌ jun cient bakꞌwutz 9 Ma jaluꞌ ko na cyajuꞌ tzꞌel chitxumuꞌ tetz yi xtxolbileꞌj, choꞌk binuꞌ il tan xtxumleꞌn,” stzun Jesús ban scyetz.
Tajweꞌn tan koqueꞌn il tan xtxumleꞌn eꞌchk elsawutzil
(Mt 13.10-17; Lc 8.9-10)
10 Itzun yi stzajeꞌn wiꞌ yi xtxolbilaꞌseꞌj nin yi cyajeꞌn cyen Jesús ẍchuc, nintzun eꞌ oc yi eꞌ ẍchusbeꞌtz scyuchꞌ coboxt yi xomcheꞌ scyeꞌj tan jakleꞌn tetz yi mbi ekaꞌn tan yi jun elsawutzilaꞌtz. 11 Beneꞌn tzun tlol scyetz: “Akꞌij itajtzaꞌkl tan Ryos tan teleꞌn itxum tetz yi eꞌchk xtxolbil te yi caꞌwl iꞌ, yi ewaꞌn cuntuꞌ taꞌn sajleꞌnix tunintz. Poro yi eꞌ mas wunak, qui na pujx cyaꞌn. 12 Na quil yi mbi na imban, nin na quibit inyol, poro qui na pujx cyaꞌn mbi na elpont. Chaꞌstzun te ntin elsawutzil na xcon waꞌn ẍchiwutz. Poro tan paj yi qui na choꞌc il tan xtxumleꞌn, qui na pujx cyaꞌn yi mbi na elpont. Chaꞌstzun te quil chitxꞌixpuj cyajtzaꞌkl, nin quil cuylij chipaj.”
Yi toqueꞌn Jesús tan xtxꞌolcheꞌn xoꞌl yi elsawutzil tetz ujul
(Mt 13.18-23; Lc 8.11-15)
13 Nchaꞌtz ben tlol scyetz: “¿Qui ptzun na el itxum tetz yi jun elsawutzilaꞌtz? Na ko qui na el itxum tetz, ¿ẍeꞌn tzun tzꞌel itxum tetz yi mas elsawutzil yi xconk waꞌn tan ichusleꞌn? 14 Poro je puntileꞌj: Yi yaj yi awal ij, niꞌcuꞌn chi iꞌ-k jun txꞌolol xoꞌl yi yol Ryos. 15 Ma yi ij yi choꞌn tponeꞌn qꞌuixpuj tbeꞌ niꞌcuꞌn chi taneꞌn yi eꞌ wunak yi na quibit yi yol Ryos poro jalcuꞌn na ul Satanás tan ticyꞌleꞌn len yi xtxolbil yi nsken quibit. 16 Ma yi ij yi noj cuꞌn kale quiꞌcleꞌt piml txꞌotxꞌ, niꞌcuꞌn scyuchꞌ yi eꞌ wunak yi tzatzin cuꞌn na quibit yol Ryos. 17 Poro qui na chiquiwix, na yi na ul pilbil cyetz, nka yi na chibuchlij tan paj yi na cyocsaj yol Ryos, na chipakxij. 18 Ma yi ij yi noj cuꞌn xoꞌl tijal txꞌiꞌx niꞌcuꞌn quitaneꞌn yi eꞌ wunak 19 yi na quibit yol Ryos, poro tan paj yi na sotz chicꞌuꞌl te yi eꞌchk bis oꞌkl yi at tzoneꞌj wi munt, nka tan paj yi na el cyalmaꞌ te eꞌchk mebiꞌl, na xcyeꞌ tan chipoꞌtzeꞌn. Nin qui na chiwutzin. 20 Poro at wunak yi niꞌcuꞌn quitaneꞌn tu yi ij yi choꞌn cweꞌn tul balaj txꞌotxꞌ. Na quibit yi yol nin na cyocsaj cuꞌn. Yaꞌstzun yi eꞌ yi na chiquiwix, nin yi na chiwutzin. At eꞌ yi niꞌcuꞌn eꞌ tu yi ij yi takꞌ junaklaj bakꞌwutz. Nin at eꞌ yi niꞌcuꞌn eꞌ tu yi ij yi takꞌ oxcꞌal bakꞌwutz. Nin at eꞌ yi niꞌcuꞌn eꞌ tu yi ij yi takꞌ jun cient bakꞌwutz,” chij Jesús ban scyetz yi eꞌ ẍchusbeꞌtz.
Yi elsawutzil tetz jun cantil
(Lc 8.16-18)
21 Nchaꞌtz tal junt elsawutzil scyetz cyakil wunak yi ateꞌ-tz tzi aꞌ: “Cyaꞌl nin jun yi choꞌnk na oc jun cantil taꞌn jakꞌ jun cajon nka jakꞌ txꞌach, ma na choꞌn na jeꞌ chꞌimbaꞌn tcyaꞌj tan txekuneꞌn. 22 Na quiꞌc jun xtxolbil yi ewaꞌn cuntuꞌ jaluꞌ yi quiꞌk skojan, nin quiꞌc jun xtxolbil yi qui na pujx cyakꞌun wunak yi quiꞌk lajluchax ẍchiwutz. 23 Ma jaluꞌ ko na itaj tzꞌel itxum tetz yi xtxolbileꞌj nqueꞌnwok bin il tan xtxumleꞌn.
24 Nchaꞌtz tal Jesús scyetz: “Nqueꞌnwok bin il tan xtxumleꞌn yi xtxolbil yi na wal tzitetz, na quib yi na ibanwok tan xtxumleꞌn, iteꞌn nin sbneꞌ Ryosaꞌtz tan takꞌleꞌn itajtzaꞌkl, nin mas tcuꞌn stkꞌeꞌ. 25 Na yi eꞌ yil choꞌc il tan jaleꞌn mas cyajtzaꞌkl, sjalok cyajtzaꞌkl. Poro yi eꞌ yi quil choꞌc il teꞌj, tzꞌelepon ticyꞌleꞌn yi muꞌẍ tal cyajtzaꞌkl yi ja wiꞌt jal cyaꞌn.”
Yi elsawutzil te yi ẍeꞌn na chꞌuy jun wiꞌ ujul
26 Nchaꞌtz tal Jesús scyetz: “Je jun xtxolbil yi na ẍchaj sketz yi ẍeꞌn na txꞌixpuj tajtzaꞌkl jun yaj tan Ryos tan toqueꞌn jakꞌ caꞌwl iꞌ. Niꞌcuꞌn chi na oc cyen ij ttxꞌotxꞌ. 27 Yi nsken oc cyen yi ij, na aj yi awal tetz xe caꞌl. Nin yi na el cobox kꞌej ẍchuc yi ujul na jeꞌul, nin ẍchuc na chꞌuy. Poro yi yaj qui na el xtxum tetz yi ẍeꞌn na ban. 28 Yi puntil iꞌtz, ẍchuc na wenkseꞌn tib yi ij ttxꞌotxꞌ. Na jeꞌul ẍchuc, nin na chꞌuy, nin na jal wutz. 29 Nin yi na skej, na ben jeꞌsanl tetz, na nsken opon tiemp tan jeꞌseꞌn yi cosech.”
Yi elsawutzil tetz bakꞌwutz muẍtans
(Mt 13.31-32; Lc 13.18-19)
30 Nchaꞌtz tal Jesús scyetz: “I bin jaluꞌ, ¿mbik xcon waꞌn tan ẍchajleꞌn tzitetz yi ẍeꞌn taneꞌn tajlal yi eꞌ yi ateꞌ tkꞌab Ryos jaluꞌ? ¿Mbik elsawutzil xcon waꞌn? 31 Je jun elsawutzileꞌj: Niꞌcuꞌn yi tajlal yi eꞌ yi ateꞌ tkꞌab Ryos chi jun bakꞌwutz muẍtans yi na cuꞌ awij ttxꞌotxꞌ. Na yi jun tal bakꞌwutz muẍtans, iꞌtz yi ij yi mas tal niꞌ cuꞌn swutz alchok jilwutz ij. 32 Poro yi na awlij, na chꞌuy, nin mas na chꞌuy swutz alchok jilwutz itzaj, na el kꞌab, nin lmak len wutz xak na ban, nin baꞌn na chimujan chꞌuꞌl txeꞌ,” stzun Jesús scyetz.
Ntin elsawutzil xcon tan Jesús tan chichusleꞌn wunak
(Mt 13.34-45)
33 Ja xcon wiꞌnin elsawutzil yi chin sensiy nin tan Jesús tan chichusleꞌn wunak. Xomquen tuꞌ te yi ẍeꞌn taneꞌn cyajtzaꞌkl. 34 Poro quinin xtxꞌol xoꞌl scyetz, ma na ntin scyetz yi eꞌ ẍchusbeꞌtz.
Yi taneweꞌn cyekꞌekꞌ tu pakꞌbil mar tan Jesús
(Mt 8.23-27; Lc 8.22-25)
35 Itzun te yi jun cweꞌn kꞌejaꞌs nin tal Jesús:
—Kicyꞌoken jalaj icyꞌen aꞌ, —stzun iꞌ scyetz yi eꞌ ẍchusbeꞌtz.
36 Chicyajeꞌn cyen tzun yi eꞌ wunak, nintzun eꞌ ben Jesús scyuchꞌ yi eꞌ ẍchusbeꞌtz tcꞌuꞌl yi tal juy barcaꞌtz kale cꞌolcheꞌt. Nchaꞌtz at wunak yi eꞌ xom nin scyeꞌj tcꞌuꞌlak cyetz chibarc.
37 Itzun te yi na chixon wi aꞌ, xeꞌteꞌn tzun jun chin wutzileꞌn cyekꞌekꞌtz. Nintzun oc yi pakꞌbil mar tcꞌuꞌl barc. Jun tzunin nojeꞌn tan aꞌ. 38 Ma Jesús, choꞌn at tan watl xtxꞌuꞌc len yi barc. Coylij iꞌ, nin at cyen jun witzꞌ. Cyoqueꞌn tzun yi eꞌ ẍchusbeꞌtz tan cꞌaseꞌn. Nintzun cyaltz tetz:
—¡Taꞌ! ¿Qui peꞌ na bisunuꞌ? Na txant tan kabeneꞌn mulkꞌ xe aꞌ.
39 Jeꞌn tzun txiclok Jesús, nin makxij yi cyekꞌekꞌ taꞌn, nin nchaꞌtz ben tlol tetz yi mar:
—¡Numlen cuꞌn!
Taneweꞌn nin ban yi cyekꞌekꞌ, nin nchaꞌtz ban yi pakꞌbil mar, quiꞌt pakꞌxin.
40 Itzun ben tlol Jesús scyetz yi eꞌ ẍchusbeꞌtz:
—¿Nxac na cxobwok? ¿Nxac qui kꞌuklij icꞌuꞌl sweꞌj?
41 Wiꞌnin tzun cyeleꞌn yabtz te yi mbi cunin bnix tan Jesús. Itzun cyaltz squibil quib:
—¿Mbi ekaꞌn tan yajeꞌj? na nicyꞌt nin cyekꞌekꞌ tu mar na quibit yi caꞌwl iꞌ, —cheꞌch bantz squibil quib.