Yi yaj yi skej kꞌab tan yabil
(Mt 12.9-14; Lc 6.6-11)
3
1 Itzun bantz nin ocopon junt tir Jesús tcꞌuꞌl sinagoga. At tzun jun yaj at-tz yi skej kꞌab tan yabil. 2 Cyoqueꞌn tzun yi eꞌ contr Jesús tan tilweꞌn yi ko tzꞌocopon iꞌ tan tulseꞌn yos tuchꞌ. 3 Beneꞌn tzun tlol Jesús tetz yi yaj yi skej kꞌab:—Txiclin cuꞌn skanicyꞌal.
4 Beneꞌn tzun tlol Jesús scyetz yi eꞌ mas wunak:
—¿At peꞌ cu tan kabnol jun baꞌn le jun kꞌej ujleꞌn le chiwutz cyeruꞌ, nka i yi eꞌchk takleꞌn cachiꞌ? ¿At peꞌ cu tan koqueꞌn il te jun yaj yi jalt tan quimeꞌn, nka quiꞌ? ¿Mbi na cyal cyeruꞌ? —stzun Jesús scyetz.
Cyaꞌl nintzun jun nimsaj cꞌuꞌl tan yol. 5 Sajnak tunin yamp wutz iꞌ yi xmayineꞌn nin scyetz, na wiꞌnin bisuneꞌn tan paj yi stzeꞌtzal cyalmaꞌ.
Beneꞌn tzun tlol tetz yi yaj yi skej kꞌab:
—Chichꞌbaj len akꞌab.
Yi teleꞌn ẍchichꞌbal, ninin ul yos tuchꞌ.
6 Itzun yi cyeleꞌn tzaj yi eꞌ parisey le sinagoga, nintzun oc chitxumuꞌn scyuchꞌ yi eꞌ yi xomij chiwiꞌ te Herodes, yi ẍeꞌnk chiban tan biyleꞌn cuꞌn Jesús.
Yi cyoponeꞌn jun cꞌoloj wunak te Jesús tzi mar
7 Cyeleꞌn tzaj tzun Jesús scyuchꞌ yi eꞌ ẍchusbeꞌtz le sinagoga. Choꞌn tzun chibeneꞌn tzi mar Galilea. Xomcheꞌ nin wiꞌnin aj Galilea scyeꞌj. 8 Na yi quibital yi eꞌ wunak yi mbi cunin eꞌchk takleꞌn balaj yi na tzan Jesús tan banleꞌn, nintzun eꞌ baj opontz teꞌj. Eꞌ baj opon yi eꞌ yi najlcheꞌ le luwar cwent Judea, scyuchꞌ yi eꞌ aj Jerusalén. Nchaꞌtz eꞌ baj opon yi eꞌ aj Idumea, scyuchꞌ yi eꞌ yi najlcheꞌ swutz len yi aꞌ Jordán. Nchaꞌtz eꞌ baj opon yi eꞌ yi najlcheꞌ le amaꞌl cwent Tiro tu Sidón. Cyakil yi eꞌaꞌtz, eꞌ baj opon tan tilweꞌn yi mbi na ban Jesús.
9 Cawuneꞌn tzun Jesús scyetz yi eꞌ ẍchusbeꞌtz tan chibnol list jun barc kalel cꞌolecuꞌnt, ko tzun chisaj nil wunak teꞌj. 10 Na nsken quil yi eꞌ wunak yi ul yos tan Jesús tu jun cꞌoloj yabiꞌẍ. Chaꞌstzun te cyakil yi eꞌ mas yabiꞌẍ eꞌ baj opon niltz teꞌj tan macleꞌn kloꞌ yi beꞌch tetz tan tulseꞌn yos scyuchꞌ.
11 Nchaꞌtz yi quilol yi eꞌ espíritu cachiꞌ wutz Jesús, nin eꞌ baj cuꞌn mejlok swutz iꞌ, nin chin chiwiꞌ nin bantz tan yol:
—Iluꞌ yi Cyꞌajl Ryos, —cheꞌch.
12 Poro nin oc Jesús tan chimakleꞌn tan qui cyalol naꞌ scyetz iꞌ.
Yi jeꞌn xtxaꞌol Jesús yi coblaj ẍchusbeꞌtz
(Mt 10.1-4; Lc 6.12-16)
13 Yi bajeꞌn yi xtxolbilaꞌseꞌj, nintzun ben Jesús wi jun juꞌwtz. Yi tponeꞌn, nintzun eꞌ saj ẍchakol yi eꞌ tetz tajbil tan cyoqueꞌn tetz apostl. 14 Cheꞌ bixbal tzun iꞌ coblaj ẍchakum nka apostl tan chixomeꞌn teꞌj, nin tan chitxolil yi tajbil Ryos. 15 Nin takꞌ iꞌ porer scyetz tan tulseꞌn yos scyuchꞌ yabiꞌẍ, nin tan chilajeꞌn len yi eꞌ espíritu cwent Baybaꞌn le chiwankil wunak. 16 Je chibiꞌ yi coblaj yi eꞌ bixeꞌ tan Jesús: Simón, yi Luꞌ na aꞌlchij tetz; 17 Jacow, tu Waꞌn yi tetz titzꞌun; eꞌ cuꞌn cyꞌajl Zebedeo. Nintzun oc junt chibiꞌ tan Jesús, iꞌtz Boanerges. Yi na elepont iꞌtz, yi chin cham nin eꞌ tan yol chi na nilcan kꞌancyok. 18 Nchaꞌtz eꞌ bixeꞌ Leẍ tu Liꞌp taꞌn, nin Bartolomé tu Teꞌy; nchaꞌtz Maẍ, tu Jacow yi cyꞌajl Alfeo. Nchaꞌtz eꞌ bixeꞌ Tadeo tu Simón, jun scyeri yi eꞌ yi na xom chiwiꞌ te yi partir yi na biꞌaj cananista. 19 Nchaꞌtz bixbaj iꞌ Judas Iscariot yi jatxon nin ẍchikꞌab yi eꞌ contr.
Yi cyalol wunak yi tetz Baybaꞌn yi porer yi na xcon tan Jesús
(Mt 12.22-32; Lc 11.14-23; 12.10)
Itzun yi wiꞌt bajeꞌn yi xtxolbileꞌj, nintzun oc Jesús xe jun caꞌl scyuchꞌ yi eꞌ ẍchusbeꞌtz. 20 Nintzun eꞌ opon junt tir jun cꞌoloj wunak scyeꞌj. Siquier eꞌ wan nink tan chipaj yi jun cꞌoloj wunakaꞌtz. 21 Itzun yi quibital yi eꞌ tajwutz Jesús yi at iꞌ xe jun caꞌlaꞌtz, nintzun eꞌ opontz tan ticyꞌleꞌn kloꞌ, na le wutz yi cyetz cyajtzaꞌkl nsken oc yab twiꞌ.
22 Nchaꞌtz cyal yi eꞌ txꞌolol xoꞌl yi ley yi tzꞌibaꞌnt cyen, yi choꞌn chisajeꞌn Jerusalén: “Yi yajeꞌj, cyꞌaꞌn porer Beelzebú yi Baybaꞌn taꞌn. Nin tan yi poreraꞌtz na xcyeꞌ tan chilajeꞌn len yi eꞌ espíritu cwent Baybaꞌnaꞌtz,” cheꞌch.
23 Chisajeꞌn tzun ẍchakol Jesús, nin octz tan talcheꞌn jun elsawutzil scyetz: “Quiꞌc xtxolbil chiyoluꞌ, na ¿ẍeꞌn slaj tib Satanás stibil tib? 24 Nchaꞌtz kol choyintzin yi eꞌ wunak tcꞌuꞌl jun tnum squibil quib, ẍchixitok. 25 Ej nin nchaꞌtz jun najal yi ko ntin oyintziꞌ cyaꞌn, ẍchixitok. 26 Niꞌcuꞌn tzun taneꞌn Satanás, yi ko contr stibil tib, iꞌ teꞌn xiteꞌ tib ẍchuc. Chaꞌstzun te quiꞌc xtxolbil chiyoluꞌ.
27 “Ej nin je junt elsawutzileꞌj: Yi ko chin cham nin jun yaj, cyaꞌl jun yi nink xcyeꞌ tan majleꞌn len yi beꞌch tetz xe caꞌl. Ntin at rmeril tan majleꞌn len yi beꞌch tetz yaj yi ko bajx cꞌalxij.
28 “Jun cuꞌn yol swaleꞌ scyeruꞌ: At cuybil chipaj yi eꞌ wunak. Nin quiꞌc na ban yi mbi jilwutz il yi na chijuch, nka mbi eꞌchk cachiꞌ yol yi na chiyol. 29 Poro ko at jun yil tzꞌoc tan jisleꞌn yi Espíritu Sant, quiꞌc cuybil paj teraꞌtz tetz ben kꞌej ben sak.”
30 Tal Jesús yi xtxolbilaꞌs scyetz, tan paj yi ja cyal yi at jun espíritu cwent Baybaꞌn twankil.
Yi eꞌ xtxuꞌ Jesús scyuchꞌ eꞌ titzꞌun
(Mt 12.46-50; Lc 8.19-21)
31 Yi nsken wiꞌt bajij yi xtxolbileꞌj, cyoponeꞌn tzun yi xtxuꞌ Jesús scyuchꞌ yi eꞌ titzꞌun tan joyleꞌn iꞌ. Poro quinin eꞌ ocopon kale atiteꞌt. Mantar tuꞌ ocopon te iꞌ. 32 Nintzun cyal yi eꞌ yi cꞌolẍcheꞌ nakaꞌjil Jesús yi na tzan joyleꞌn iꞌ. Je chiyoleꞌj yi cyal:
—Taꞌ, yi xtxuꞌuꞌ scyuchꞌ eꞌ titzꞌunuꞌ ateꞌ tziꞌn, na chitzan tan joyleꞌnuꞌ, —cheꞌch.
33 Poro itzun saj tlol scyetz:
—¿Naꞌ scyetz eꞌ intxuꞌ, nin naꞌ scyetz eꞌ witzꞌun le chiwutz cyeruꞌ?
34 Xmayineꞌn tzuntz scyetz yi eꞌ yi cꞌolẍcheꞌ-tz xlaj, itzun taltz scyetz:
35 —Cyakil yi eꞌ yi na chitzan tan banleꞌn yi tajbil Ryos, yaꞌstzun yi eꞌ witzꞌun, yaꞌstzun yi eꞌ wanub, nin yaꞌstzun intxuꞌ taneꞌn, —stzun Jesús bantz scyetz.