Yi tuleꞌn yos tu jun yaj yi ẍnukl cuntuꞌ wankil
(Mt 9.1-8; Lc 5.17-26)
2
1 Itzun yi teleꞌn cobox kꞌej pakxeꞌn tzun Jesús junt tir le tnum Capernaum. Nintzun bitij stziblal yi choꞌn at iꞌ xe caꞌl. 2 Jalcunin tzun chimolol quib wunaktz teꞌj. Quiꞌt nin na chibaj quen xe caꞌl, tenlẍcheꞌ cuntunin tzi puert. 3 Na tzun tzan Jesús tan xtxoleꞌn yi tajbil Ryos scyetz yi cyoponeꞌn cyaj yaj yi cyꞌaꞌn jun yaj cyaꞌn yi ẍnukl cuntuꞌ wankil. 4 Poro tan paj yi jun cꞌoloj wunak yi tenlẍcheꞌ tzi puert, quinin jal puntil cyaꞌn tan cyocomponeꞌn te Jesús. Choꞌn tzun chijeꞌntz wi caꞌl nin el quicyꞌal muꞌẍ te yi wiꞌ caꞌl tan cweꞌn poneꞌn yi yabiꞌẍ swutz Jesús. Xcon yi soc cyaꞌn tan cweꞌn poneꞌn. 5 Itzun yi tilol Jesús yi ẍeꞌn cuꞌn kꞌuklij chicꞌuꞌl te iꞌ, nin ben tloltz tetz yi yabiꞌẍ:—Witzꞌun, ja wiꞌt cuylij apaj.
6 Cꞌolẍcheꞌ tzun cobox txꞌolol xoꞌl yi ley Moisés. Ej nin yi quibital yi mbi ben tlol Jesús tetz yi yabiꞌẍ, wiꞌnin ticyꞌeꞌntz ẍchicꞌuꞌl. 7 “¿Nxac na talx yi yolaꞌseꞌj? na ntin Ryos na xcyeꞌ tan cuyleꞌn paj jun yaj,” cheꞌch len ẍchicꞌuꞌl cuntuꞌ. 8 Poro nin nachon Jesús te yi mbi na icyꞌ ẍchicꞌuꞌl, beneꞌn tzun tlol scyetz:
—¿Nxac na icyꞌ yi xtxolbileꞌj ẍchicꞌuꞌluꞌ? 9 Na ¿naꞌ scyetz quiꞌc mas qꞌuixbel talcheꞌn nin tetz jun ẍnukl cuntuꞌ wankil, i peꞌ: ‘Ja wiꞌt cuylij apaj,’ nka i peꞌ: ‘Txiclijeꞌn, cyꞌaj nin asoc, nin quiloꞌk xe acaꞌl?’ Cabil xtxolbil, niꞌcuꞌn qꞌuixbel. 10 Poro yi in wetz, yi in Bajx Cyꞌajol, tzinchajeꞌ scyeruꞌ yi at inkꞌej tan cuyleꞌn chipaj wunak, na je swaleꞌ tetz yi yabiꞌẍeꞌj:
11 —¡Txiclijeꞌn! Cyꞌaj nin asoc, nin quiloꞌk xe acaꞌl.
12 Lajkeꞌl nintzun jeꞌn txiclok yi yabiꞌẍ, nin ẍchiwutz cuꞌn cyakil wunak yi beneꞌn tcyꞌal yi soc. Eꞌ baj el yabtz teꞌj, nin eꞌ octz tan takꞌleꞌn chikꞌajsbil tetz Ryos:
—Cyaꞌl nin na kilwit jun xtxolbil chi taneꞌn yi mbajij tzoneꞌj, —cheꞌch.
Yi sajeꞌn moxol Jesús Leví
(Mt 9.9-13; Lc 5.27-32)
13 Yi wiꞌt bajeꞌn yi xtxolbileꞌj, nintzun ben Jesús tzi mar. Wiꞌnin wunak eꞌ opontz teꞌj, nin octz tan chichusleꞌn. 14 Poro itzun yi na xon iꞌ, nin ben tilol jun yaj yi cꞌolchij kale na eleꞌt alcawal. Leví biꞌ, cyꞌajl Alfeo. Beneꞌn tzun tlol Jesús tetz:
—¡Yaj! xomen tzaj sweꞌj.
Jeꞌn tzun txiclok Leví, nin xomnintz te Jesús.
15 Itzun bantz, te yi na chiwan Jesús scyuchꞌ yi eꞌ ẍchusbeꞌtz xe caꞌl Leví, nchaꞌtz ateꞌ wiꞌnin elsanl alcawal scyuchꞌ coboxt juchul il tan waꞌaꞌn scyuchꞌ. Lmal chixoneꞌn yi eꞌaꞌtz yi ateꞌ-tz. 16 Itzun yi quilol yi eꞌ txꞌolol xoꞌl yi ley scyuchꞌ eꞌ parisey yi choꞌn na wan Jesús ẍchixoꞌl yi eꞌ elsanl alcawalaꞌtz scyuchꞌ yi eꞌ mas juchul il, nintzun cyaltz scyetz yi eꞌ ẍchusbeꞌtz:
—¿Nxac na wan yi chusul cyeruꞌ scyuchꞌ yi eꞌ elsanl alcawal, nin scyuchꞌ yi eꞌ mas juchul il? —cheꞌch bantz.
17 Yi tbital Jesús chiyol, nintzun ben tlol scyetz:
—Yi eꞌ yi quiꞌc chiyab, qui tajweꞌn jun ajtzꞌac scyetz. Poro yi eꞌ yabiꞌẍ, tajweꞌn scyetz. Chaꞌstzun wutaneꞌn wetz, na quinin nnuꞌl tan chimoxeꞌn yi eꞌ balaj, ma na i eꞌ juchul il bantz jeꞌn chitxꞌixpul yi cyajtzaꞌkl.
Yi ẍchusuꞌn Jesús te yi mucꞌleꞌn weꞌj
(Mt 9.14-17; Lc 5.33-39)
18 At jun tir yi na chitzan yi eꞌ ẍchusbeꞌtz Waꞌn scyuchꞌ chichusbeꞌtz yi eꞌ parisey tan mucꞌleꞌn weꞌj, nintzun eꞌ opon cobox wunak te Jesús tan jakleꞌn tetz:
—Ma jaluꞌ Taꞌ, yi eꞌ ẍchusbeꞌtz Waꞌn scyuchꞌ yi eꞌ parisey, na chimucꞌ jujun kꞌej weꞌj. ¿Mbi tzuntz qui na chixom yi eꞌ teruꞌ ẍchusbeꞌtzuꞌ te yi jun leyaꞌtz?
19 Itzun ben tlol Jesús scyetz:
—Qui na yub yi ko na chibisun, nin ko na chimucꞌ weꞌj yi eꞌ xtxocum jun aj quicyujinl yi at yi yaj ẍchixoꞌl yi tzꞌocopon txkel. 20 Poro yil tzꞌul yi tiemp yil tzꞌel ticyꞌleꞌn yi taw xun, baꞌn tzun chimucꞌ weꞌj tan yi bis yi sjalok scyetz.
21 “Ej nin je junt elsawutzileꞌj yi na ẍchaj yi na lab tib wetz inchusuꞌn tu yi antiw chusuꞌn. Cyaꞌl nin jun yi nink xcon jun piẍ chaꞌbil yi txeꞌn cunin muꞌxij tan lapeꞌn jun beꞌch tetz buꞌyt. Mas tcuꞌn mben loꞌon yi katzaꞌl. 22 Nchaꞌtz qui na xcon jun buꞌyt tzꞌuꞌm tan colcheꞌn tꞌaꞌal uva yi watok cunin bnix, na yi ko yaꞌtz, skatzok yi buꞌyt tzꞌuꞌm tan tuꞌ yi pucꞌun wutz yi tꞌaꞌal loꞌbaj. Tzꞌelepon kojx yi aꞌ yi at tul, nin yi tzꞌuꞌm skatzok. Elnak chitxumuꞌ tetz yi ko watok cunin bnix tꞌaꞌal loꞌbaj, tajweꞌn tan cweꞌn tul acꞌaj tzꞌuꞌm. Nchaꞌtz weri inchusuꞌn, xitok kol yuj tib tu yi antiw chusuꞌn.
Yi cyoqueꞌn yi eꞌ ẍchusbeꞌtz Jesús tan stzutleꞌn tzaj wutz triw le jun kꞌej ujleꞌn
(Mt 12.1-8; Lc 6.1-5)
23 Itzun bantz tcꞌuꞌl yi jun kꞌej ujleꞌn, choꞌn quicyꞌeꞌn cuꞌn Jesús scyuchꞌ eꞌ ẍchusbeꞌtz xoꞌl triw. Itzun yi na chixon yi eꞌ ẍchusbeꞌtz Jesús, cyꞌaꞌnt nin stzutleꞌn tzaj wutz triw cyaꞌn. 24 Itzun ben cyalol cobox parisey tetz Jesús:
—Taꞌ, tilninuꞌ yi mbi na chiban yi eꞌ ẍchusbeꞌtzuꞌ. ¿Mbi xac na chiban yi eꞌchk takleꞌn yi quiꞌc cu tan kabnol le jun kꞌej ujleꞌn? —cheꞌch eꞌ parisey bantz.
25 —¿Qui peꞌ na chisiꞌlejuꞌ yi mbi cuꞌn banak kꞌajtzun Luwiy yi sajeꞌn weꞌj teꞌj scyuchꞌ yi eꞌ yi xomcheꞌ teꞌj? 26 ¿Qui peꞌ na chisiꞌlejuꞌ yi mbi banak iꞌ yi at tzaj Abiatar tetz wiꞌtz paleꞌ? Baj yi pam tan kꞌajtzun Luwiy yi oyiꞌnt tetz Ryos, yi pam yi quiꞌc kloꞌ cu tan bajeꞌn tan alchok jilwutz wunak, ma na ntin eꞌ paleꞌ. Poro baj taꞌn nin ben tkꞌol scyetz yi eꞌ yi xomcheꞌ teꞌj.
27 Nchaꞌtz tal Jesús scyetz: