Jun elsawutzil tetz lajuj xun
25
1 “Je junt elsawutzileꞌj yi na ẍchaj sketz yi mbi sbajok yil tzꞌul tzaj Ryos tan cawuꞌn. At eꞌ yi choꞌn cuꞌn ẍchibneꞌ chi banakeꞌ lajuj xun. Yi lajuj xunaꞌtz nin eꞌ ben tan ẍchꞌiweꞌn jun buꞌj aj quicyujinl. Cyꞌaꞌn len cantil cyaꞌn tetz chitxekbil. 2 At oꞌ scyeri yi eꞌ xunaꞌtz yi chin list nin eꞌ, nin at oꞌ yi quiꞌc mas cyajtzaꞌkl. 3 Yi oꞌ yi quiꞌc mas cyajtzaꞌkl, ntinaꞌtz aceit cyꞌaꞌn cyaꞌn yi at tul chicantil. Quinin ben muꞌẍt stzꞌaꞌpl cyaꞌn. 4 Poro yi oꞌ xun yi list, ben chinojsal chicantil nin apart nin muꞌẍ ben quicyꞌaltz ko ẍeꞌn lbaj yi at tul cantil.5 “Itzun bantz, kaleꞌn nin il cyuleꞌn yi aj quicyujinl tu yi xicy yi taw xun. Itzun bantz tan paj ẍchꞌiweꞌn, nintzun eꞌ baj wit len cyakil eꞌ xun. 6 Poro eꞌchk nicyꞌakꞌbal nin loꞌ, quibit yi na ẍchꞌin jun: ‘Je yi xicy, yi taw xun tzꞌul. Or, quibeneꞌnk tan cꞌulcheꞌn,’ chij junaꞌtz ban tzajtz. 7 Chicꞌaseꞌn tzun yi eꞌ xun, nin eꞌ octz tan nucꞌleꞌn chikꞌakꞌ. 8 Yi oꞌ yi ploj cyajtzaꞌkl, nin cyal scyetz yi oꞌ yi chin list nin eꞌ: ‘Tzitakꞌwok muꞌẍ ketz te yi aceit yi cyꞌaꞌn itaꞌn, na yi ketz kacantil tzan stzajeꞌn.’ 9 ‘Quiꞌ,’ cheꞌch yi oꞌaꞌtz yi chin list nin eꞌ, ‘na kol kakꞌ nin muꞌẍ itetz teꞌj, quil tzꞌak ketz, nin quil tzꞌak itetz. Baꞌn tcuꞌn quibeneꞌnk tan lokꞌcheꞌn itetz kale na cꞌayeꞌt.’ 10 Te yi ẍchaꞌkeꞌn tzaj yi oꞌ xun tan lokꞌcheꞌn cyetz chiꞌaceit, oponeꞌn nin ban tetz xicytz, yi taw xun. Inti yi oꞌ xun yi at nin cyetz chiꞌaceit, nin eꞌ xom quen cyeꞌtz te aj quicyujinl. Eꞌ oc xe caꞌl, nin jopxij yi puert. 11 Buch tlen cyoponeꞌn yi oꞌ-t xun yi eꞌ ẍchaꞌk tzaj tan lokꞌcheꞌn aceit. Nsken jopxij puert yi cyoponeꞌn. ‘Taꞌ,’ cheꞌch, ‘taꞌ, jakeꞌnuꞌ puert skawutz. Jakeꞌnuꞌ puert skawutz taꞌ.’ 12 Sajeꞌn tzun stzaꞌwel yi taw xun: ‘Quiꞌ, na qui wajskeꞌn iwutz,’ stzun iꞌ baneꞌl tzajtz.
13 “I bin jaluꞌ, eliꞌch len te icꞌuꞌl yi at wulbil, na qui ilij yi mbi kꞌejil nka mbi oril yil nuꞌlt wetz, yi in yi in Bajx Cyꞌajol,” stzun Jesús ban scyetz eꞌ ẍchusbeꞌtz.
Yi elsawutzil te yi pwok yi akꞌlij tetz chixajbil cobox yaj
14 “At eꞌ yi ateꞌ tkꞌab Kataj yi choꞌn cuꞌn ẍchibneꞌ chi banakeꞌ cobox yaj te chixajbil yi takꞌ chipatrón scyetz. Je xtxolbileꞌj: At jun yaj yi at bembil joylaj tul junt tnum. Poro yi ntaxk ben te pyaj, nin eꞌ ẍchak yi eꞌ martomaꞌ, nin cyaj jatxol yi puꞌk scyetzak tan cyoqueꞌn tan negos teꞌj. 15 Nin cyaj tkꞌol oꞌ mil tetz jun martomaꞌ, nin cyaj tkꞌol cob mil tetz junt. Ma yi junt, jun ntziꞌ mil pwok takꞌ tetz. Xom cyen tuꞌ chixajbil te cyajtzaꞌkl. Yi cyajeꞌn cyen jatxol patrón yi pwok, nintzun ben iꞌ joylaj. 16 Yi jun yaj yi cyaj akꞌij oꞌ mil pwok tetz, oc iꞌ tan lijensiꞌn, nin cambaj oꞌt mil ganans. 17 Nchaꞌtz yi jun yi cyaj akꞌij cobt mil pwok tetz, cambaj cob mil ganans. 18 Ma yi jun yi cyaj akꞌij jun mil pwok tetz xajbil, nin ben tan kopleꞌn jun jul, nin cyaj tewal yi pwok tul.
19 “Yi teleꞌn jun cꞌoloj tiemp, nin pakxijt yi chipatrón, nintzun octz tan banleꞌn cwent scyuchꞌ. 20 Yi tponeꞌn yi bajx martomaꞌ, cyꞌaꞌn yi oꞌ mil xajbil yi cyaj cyen tkꞌab tu yi oꞌ mil ganans. Nin tal tetz patrón: ‘Taꞌ, je yi oꞌ mil pwokeꞌj yi cyaj tkꞌoluꞌ swetz. Ej nin je oꞌt mil gananseꞌj,’ stzun iꞌ tetz patrón. 21 ‘Baꞌn, chumbalaj nin mmaban tu muꞌẍ yi nwakꞌ tzatz. Aẍ balaj akꞌunwil. Nin baꞌn kꞌukeꞌ incꞌuꞌl tzaweꞌj. Swakꞌeꞌ mas axajbil jaluꞌ. Nqueꞌn tzaj sweꞌj, katzatzink tzawuchꞌ,’ stzun yi patrón.
22 “Ma yi tponeꞌn yi caꞌp martomaꞌ, yi cyaj akꞌij yi cob mil xajbil, nintzun taltz: ‘Taꞌ, je yi cob mil inxajbil yi cyaj tkꞌoluꞌ swetz, nin je cobt mil gananseꞌj,’ stzun iꞌ tetz patrón. 23 ‘Baꞌn,’ chij patrón, ‘chumbalaj nin mmaban tu yi muꞌẍ yi nwakꞌ tzatz. Aẍ balaj akꞌunwil. Baꞌn kꞌukeꞌ incꞌuꞌl tzaweꞌj. Swakꞌeꞌ mas axajbil jaluꞌ. Nqueꞌn tzaj sweꞌj. Katzatzink tzawuchꞌ,’ stzun yi patrón bantz.
24 “Ma yi tponeꞌn yi martomaꞌ yi cyaj akꞌij junintziꞌ mil pwok tetz, ja tal te patrón: ‘Taꞌ, na el intxum tetz yi at macleꞌnuꞌ, nin chin tzꞌaknak cuninuꞌ tan negosiꞌn, na na cambajuꞌ cosechuꞌ kale qui na akꞌujeꞌtuꞌ. 25 Chaꞌstzun te ja chinxob teruꞌ taꞌ. Ej nin yi inxajbil yi cyaj tkꞌoluꞌ, choꞌn ncuꞌ imukul jakꞌ txꞌotxꞌ. Je puꞌkuꞌeꞌj,’ stzun yi martomaꞌ bantz. 26 ‘Yaj,’ chij patrón, ‘chin cachiꞌ nin awajtzaꞌkl. Chin cyꞌaj nin aẍ. Elnakt atxum tetz yi chin tzꞌaknak cunin in te eꞌchk negos, na baꞌn na incambaj eꞌchk cosech kale qui na nakꞌujeꞌt tan tawleꞌn. 27 Baꞌn tcuꞌn kloꞌ yi nink mmeꞌl impuꞌk awaꞌn tan cꞌmoꞌniꞌn. Ja kloꞌ incambaj muꞌẍ inganans te impuꞌk,’ stzun patrón.
28 “Beneꞌn tzun tlol yi patrón scyetz yi eꞌ mas wunak yi ateꞌ: ‘Ma jaluꞌ, majwok len yi jun mil pwok yi cyꞌaꞌn taꞌn, nin akꞌwok nin te yi jun yi ja jepon juꞌ yi tetz te lajuj mil. 29 Na alchok scyetz yi na xconsan yi muꞌẍ yi akꞌlij tetz, tzꞌakꞌlok mas tetz, yi quinin bajsbeꞌn tetz. Poro alchok scyetz yi qui na xconsaj yi muꞌẍ yi akꞌij tetz, tzꞌelepon ticyꞌleꞌn yi muꞌẍ yi at tkꞌab. 30 Inti yi juneꞌj yi quinin nmaꞌw akꞌun taꞌn, elken pitij tziꞌn tul tzꞌoꞌtz. Tzꞌokꞌok, nin sbajk xitxꞌul xiꞌil wiꞌ tan yi qꞌuixcꞌuj yi stijeꞌ.’
Yil bajij xtisyaꞌ scyeꞌj cyakil wunak
31 “Ej nin yil nuꞌl tzaj tan woqueꞌn tetz bajxom ẍchiwutz cyakil wunak, xomcheꞌ eꞌ ángel sweꞌj. Chincꞌolek tibaj jun balaj cꞌolchbil, tan cawuꞌn. 32 Nin ẍchimoleꞌ quib cyakil jilwutz wunak yi ateꞌ beneꞌn tziꞌn wi munt, tzinwutz. Nocopon tzun tan chijatxleꞌn. Choꞌn tzimbneꞌ chi na ban jun pstor tan chijatxleꞌn len yi eꞌ cneruꞌ ẍchixoꞌl eꞌ chiw. 33 Yi eꞌ cneruꞌ choꞌn chiben cyeraꞌtz le insbal. Ma yi eꞌ chiw, choꞌn chiben le inmax. 34 Kalenaꞌs tzun lwalnin scyetz yi eꞌ yi ateꞌ le insbal: ‘I bin jaluꞌ, yi axwok itetz yi at banl Intaj tzitibaj, quisajeꞌnk sweꞌj, bantz itoponeꞌn tul yi balaj luwar yi banijt tetz itetz jetz yi cweꞌnleꞌn wuxtxꞌotxꞌ. 35 Baꞌn cxoꞌc tul jun luwaraꞌtz, na yi inquimeꞌn tan weꞌj, ja itakꞌwok inwaꞌ. Ej nin yi inquimeꞌn tan saktziꞌ, ja itakꞌwok wucꞌaꞌ. In awer nak taneꞌn poro ja itakꞌwok imposar. 36 Quiꞌc beꞌch wetz, poro ja chinwekxij itaꞌn. Yi in tzaj yabiꞌẍ, ja cxaꞌkwok tan inxajseꞌn. Ej nin yi woqueꞌn xetzeꞌ, ja cxaꞌkwok tan inxajseꞌn xetzeꞌ.’ 37 Yil quibit yi eꞌ balaj wunakaꞌtz yi xtxolbileꞌj, ẍchijakeꞌ swetz: ‘Poro Taꞌ, skawutz ketz, cyaꞌl nkakꞌwit waꞌuꞌ, nin cyaꞌl nkakꞌwit tcꞌaꞌuꞌ. 38 Nchaꞌtz, skawutz ketz cyaꞌl nẍchajwit tibuꞌ skawutz chi awer nak taneꞌnuꞌ. Cyaꞌl nkakꞌwit posaruꞌ, nka beꞌch teruꞌ. 39 Skawutz ketz, cyaꞌl nin yobteꞌtuꞌ, nin cyaꞌl nin oqueꞌtuꞌ xetzeꞌ,’ cheꞌch sbneꞌ swetz. 40 Poro yi in wetz, yi in wiꞌtz Ajcaw, swaleꞌ scyetz: ‘Jun cuꞌn yol na walnin tzitetz, yi eꞌchk pawor yi ibanwok cyen tan quichꞌeyeꞌn alchok scyetz scyeri yi eꞌ tal prow witzꞌuneꞌj, chi i inaꞌtz na ibanwok pawor swetz.’
41 “Ma yi eꞌ yi ateꞌ le inmax swaleꞌ scyetz: ‘Yi axwok itetz, banijt icaws. Quiteleꞌnwok sweꞌj. Quibeneꞌnk tcꞌuꞌl yi chin wutzileꞌn kꞌakꞌ yi quinin bajsbeꞌn tetz, yi jun kꞌakꞌaꞌtz yi banijt tetz Baybaꞌn scyuchꞌ yi eꞌ tetz ángel. 42 Na yi axwok itetz quinin itakꞌwok inwaꞌ yi inquimeꞌn tan weꞌj. Qui itakꞌwok wucꞌaꞌ yi inquimeꞌn tan saktziꞌ. 43 Ja nicyꞌak tan jakleꞌn muꞌẍ tal imposar tzitetz, poro quinin itakꞌ, na in awer nak taneꞌn tziwutz. Quiꞌc beꞌch wetz, poro quinin itakꞌwok swetz. Yi in tzaj yabiꞌẍ, quinin acxaꞌkwok tzaj tan inxajseꞌn. Nchaꞌtz yi atin tzaj xetzeꞌ, cyaꞌl acxoponeꞌt tan inxajseꞌn,’ chinch sban scyetz. 44 Poro yi eꞌ cyetz scyaleꞌ: ‘Taꞌ, cyaꞌl nkilwit yi jak quimuꞌ tan weꞌj, nka tan saktziꞌ. Nin cyaꞌl nkilwit yi jak ocuꞌ tan jakleꞌn posar. Nchaꞌtz cyaꞌl nkilwit wutzuꞌ yi quiꞌc nin beꞌch teruꞌ. Nin quiꞌc nin jun tir yi nink nkil wutzuꞌ yi iluꞌ yabiꞌẍ, nka choꞌnk atuꞌ xetzeꞌ. Yi yaꞌtzk, ja kloꞌ koꞌc tan ẍchꞌeyeꞌnuꞌ,’ cheꞌch sbneꞌ.
45 “Itzun yi in wetz yi in Ajcaw, swaleꞌ scyetz: ‘Yi pawor yi qui ibanwok scyeꞌj yi eꞌ tal prow witzꞌuneꞌj, itzun paworaꞌtz yi qui ibanwok swetz,’ chinch sbneꞌ scyetz.
46 “Cyakil yi eꞌ wunakaꞌtz, choꞌn nchiben cyeraꞌtz le jun chin wutzileꞌn kꞌakꞌ yi quinin bajsbeꞌn tetz. Ma yi eꞌ wunak yi eꞌ balaj swutz Ryos, ẍchicambaj cyeraꞌtz jun itzꞌajbil yi quinin bajsbeꞌn tetz,” stzun Jesús ban cyen.