Yi talol Jesús yi xitok yi templo
(Mr 13.1-2; Lc 21.5-6)
24
1 Teleꞌn tzaj tzun Jesús le templo. Te yi na chixon tbeꞌ, nin oc chiẍkansal quib eꞌ ẍchusbeꞌtz xlaj tan ẍchajleꞌn nin yi balajil yi templo tu yi eꞌchk balaj caꞌl yi cwent yi templo. 2 Poro itzun tal Jesús scyetz:—¿Chumbalaj nin peꞌ yi caꞌleꞌj yi na itilwok nin? Poro quiꞌc takꞌ, na jun cuꞌn, xitok cyakil. Cyakil yi cꞌub yi wekoꞌn tib te yi caꞌleꞌj, quiꞌc nin jun yi quiꞌk cuꞌ chꞌuk.
Yi eꞌchk techl yi sbajok yi txant tan tuleꞌn yi wiꞌtzbil kꞌejlal
(Mr 13.3-23; Lc 21.7-24; 17.22-24)
3 Chijeꞌn poneꞌn tzun wi Olivo. Te yi cꞌolchij Jesús, nin eꞌ opon eꞌ ẍchusbeꞌtz teꞌj chichuc cuntuꞌ, nin eꞌ octz tan jakleꞌn tetz:
—Taꞌ, na kloꞌ kaj yi nink taluꞌ sketz tonaꞌ lbajij cyakil yi eꞌchk xtxolbilaꞌtz yi ntaluꞌ sketz. ¿Mbi techl ẍchajeꞌuꞌ yi txant tan stzajeꞌn wiꞌ yi tiempeꞌj? —cheꞌch bantz tetz Jesús.
4 —Or tzitilwok, quiꞌk cxubsijwok, 5 na ẍchijalok wiꞌnin eꞌ yi scyaleꞌ yi eꞌ len cuꞌn Cristo, nin wiꞌnin wunak ẍchixubsok cyaꞌn. 6 Tzitbiteꞌ stziblal yi na tzan eꞌchk lmak oyintziꞌ. Quil cxeꞌlwok yab teꞌj. Nin tzitbiteꞌ yi at tulbil mas lmak oyintziꞌ. Poro quil cxeꞌl yab teꞌj, na tajweꞌn cuꞌn yil bajij eꞌchk takleꞌnaꞌtz, poro nkꞌeraꞌtz yi kꞌejlal tan stzajeꞌn wiꞌ yi tiempeꞌj. 7 Chocopon eꞌchk lmak tnum tan oyintziꞌ scyuchꞌ yi eꞌ mas lmak tnum. Tzꞌocopon junt tnum tan biyleꞌn junt tnum. Sjalok weꞌj. Tzꞌul wiꞌnin yabil. Copon wiꞌnin eꞌchk coblajnob beneꞌn tziꞌn wi munt. 8 Poro yil bajij cyakil yi eꞌchk takleꞌnaꞌtz, iꞌtz xeꞌtzbil tuꞌ yi qꞌuixcꞌuj yi at tulbil.
9 “Inti yi axwok itetz, xjatxlokwok cyaꞌn ẍchikꞌab yi eꞌ mal wunak tan cyoqueꞌn tan ibuchleꞌn. Xquimokwok cyaꞌn, tan tuꞌ yi kꞌuklij icꞌuꞌl sweꞌj. Ẍchiꞌchok chicꞌuꞌl cyakil wunak tziteꞌj. 10 Yil tzꞌul yi jun tiempaꞌtz, at wiꞌnin eꞌ tzixoꞌlwok yi ẍchipakxok. Ẍchiꞌchok chicꞌuꞌl squibil quib. Nin eꞌ teꞌn ẍchijatxeꞌ quib squibil quib ẍchikꞌab chicontr. 11 Ẍchijalok wiꞌnin laꞌj tzixoꞌlwok. Scyaleꞌ yi tetz Ryos yi chusuꞌn yi cyꞌaꞌn cyaꞌn, poro quiꞌ. Chixubsok wiꞌnin wunak cyaꞌn. 12 Sjalok wiꞌnin juchul il. Chin xoꞌwbil nin sbneꞌ yi jun tiempaꞌtz. Na sjalok wiꞌnin eꞌ yi na chixom sweꞌj taneꞌn yi quiꞌt chipekꞌ squibil quib. 13 Poro cyakil yi eꞌ yil tzꞌicyꞌpon yi eꞌchk takleꞌnaꞌtz cyaꞌn, ẍchiclaxok. 14 Yi nsken baj quibital cyakil jilwutz wunak beneꞌn tziꞌn wi munt yi jun stziblal yi txant tan tuleꞌn Ryos tan cawuꞌn, kalenaꞌtz tzun tzꞌul yi wiꞌtzbil kꞌejlal.
15 “Tzꞌibaꞌnt cyen takꞌun kꞌajtzun Daniel, yi elsanl stziꞌ Ryos tentz, yi at tulbil jun yaj yi chin cachiꞌ nin, yi chin aj xitunl iꞌ. (Yi eꞌ yil choꞌc tan siꞌleꞌn yi xtxolbileꞌj lok tzꞌel chitxum tetz.) Yil jepon txiclok yi junaꞌtz le amaꞌl yi chin xan nin, 16 baꞌn tcuꞌn yil cheꞌl ojk cyakil yi eꞌ yi najlcheꞌ Judea. Baꞌn tcuꞌn chiben joylaj xoꞌl wutz tan cyewal quib. 17 Yil bitij yi tziblal yi ja wiꞌt oc yi yaj le luwaraꞌtz, qui na taj ẍchꞌiweꞌn. Ko cꞌolchij jun yaj tzicaꞌl baꞌn tcuꞌn tzꞌel ojk lajkeꞌl. Baꞌn tcuꞌn quil tzꞌoc xe caꞌl tan telseꞌn tzaj alchok takleꞌn. 18 Yi eꞌ yi ateꞌ tan akꞌun wi cojbil, baꞌn tcuꞌn quil chipakxij xeꞌak chicaꞌl tan ticyꞌleꞌn beꞌch cyetz. 19 ¡Lastum yi eꞌ prow xnaꞌn yi chꞌon wiꞌ yil bajij yi eꞌchk takleꞌnaꞌtz! ¡Lastum yi eꞌ xnaꞌn yi niꞌ cuꞌn niꞌ scyeꞌj! 20 Nachwok Kataj tan qui nojeꞌn quen yi ileꞌj te tiemp tetz cheꞌw, nka tul jun kꞌej ujleꞌn. 21 Na tzꞌul wiꞌnin qꞌuixcꞌuj. Jetz yi xeꞌtzbil tzaj, txeꞌn cunin bajij jun qꞌuixcꞌuj chi yi junaꞌtz yi sbajok, ej nin quiꞌt lbajij junt. 22 Yi na tzan yi jun qꞌuixcꞌujaꞌtz, tzꞌocopon Kataj Ryos tan makleꞌn wutz, yi ko quiꞌ, cyaꞌl nin jun nink clax. Smakxok yi jun qꞌuixcꞌujaꞌtz tan tuꞌ yi tzꞌelepon kꞌajab scyeꞌj yi eꞌ yi txaꞌijcheꞌ taꞌn.
23 “Ej nin at eꞌ scyaleꞌ: ‘Yi Cristo choꞌn at tzoneꞌj,’ nka ‘Yi Cristo choꞌn at choneꞌj.’ Quil tzitocsaj chiyol. 24 Na at cyulbil wiꞌnin wunak yi scyocseꞌ quib tetz Cristo, nka scyaleꞌ yi eꞌ cuꞌn elsanl stziꞌ Ryos. Yi jun jilwutz wunakaꞌtz chixcyek tan banleꞌn milawr tan chisubleꞌn wunak. Yi atk rmeril, chixubsok yi eꞌ yi txaꞌijcheꞌt tan Ryos, poro quiꞌc rmeril. 25 Chaꞌstzun te na chintzan tan talcheꞌn cyen yi eꞌchk xtxolbilaꞌseꞌj tzitetz tan qui ixubseꞌn. 26 Chaꞌstzun te kol cyal wunak tzitetz: ‘Choꞌn at yi Cristo wutzwutz,’ acxbenchwok tan tilweꞌn, na nkꞌeraꞌtz bintzi. Ej nin ko na cyal: ‘Choꞌn at Cristo tul yi caꞌleꞌj,’ quil tzitocsaj chiyol. 27 Na tech cuꞌn tib yil nuꞌl tzaj wetz, yi in yi in Bajx Cyꞌajol, na choꞌn cuꞌn tzimbneꞌ chi na ban yi na cuꞌ jun xlakꞌ cyaꞌj, yi na xcyeꞌ tan xtxekeꞌn beneꞌn tziꞌn. 28 Nchaꞌtz, je junt elsawutzileꞌj: Yi na kil yi na chinil quib yi eꞌ kuꞌs tcyaꞌj, tech cuꞌn tib yi at jun txuc quimnak.
Yi mbi cuꞌn sbajok yil tzꞌul tzaj yi Bajx Cyꞌajol
(Mr 13.24-37; Lc 21.25-33; 17.26-30, 34-36)
29 “Ej nin yil bajij yi eꞌchk qꞌuixcꞌujaꞌtz, tzꞌocopon tzꞌoꞌtz swutz yi kꞌej. Ej nin quil txekun yi xaw. Nin chuꞌl txꞌakx cyakil txꞌuml. Syucank cyakil yi at tcyaꞌj. 30 Kalenaꞌs tzun chinquilnin cyakil jilwutz wunak, yi in yi in Bajx Cyꞌajol. Ẍchokꞌok len yil chinquilnin yil chincuꞌ ul tul noc sbakꞌ. Nin cyꞌaꞌn imporer waꞌn tu inkꞌej yil chincuꞌul. 31 Ẍchꞌink jun chun nin chin wiꞌ nin sbneꞌ. Kalenaꞌs tzun cheꞌ inchak nin yi eꞌ weri inángel tan chimolcheꞌn tzaj cyakil yi eꞌ yi txaꞌijcheꞌ yi ateꞌ beneꞌn tziꞌn wi munt.
32 “Baꞌn cxoꞌcwok tan xtxumleꞌn yi jun elsawutzileꞌj: Yi na xeꞌtij jun wiꞌ ibẍ tan xlumineꞌn na el katxum tetz yi txant tan tucumuleꞌn yi tiemp tetz tzꞌaꞌ. 33 Niꞌcuꞌn sbajok tzantzaj, na yil tzitilwok cyakil yi eꞌchk techl yi ja wiꞌt wal tzitetz, iꞌtz jun techl yi txant tan wuleꞌn. Yil tzitil yi eꞌchk techlaꞌtz, ja tzun opon txeꞌ cyen cunin yi jun tiempaꞌtz. 34 Jun cuꞌn yol na walnin tzitetz, quil chisotz yi jun wek wunakaꞌtz jalen yil bajij yi eꞌchk takleꞌnaꞌtz yi ja wiꞌt wal. 35 Yi tcyaꞌj tu wuxtxꞌotxꞌ sotzok, poro yi weri inyol tzꞌelk cuꞌn teꞌj. Quil sotz teꞌtz.
36 “Poro cyaꞌl nin jun yi nink tzꞌel xtxum tetz yi tonaꞌ lbajij yi eꞌchk takleꞌneꞌj. Qui na el chitxum yi eꞌ ángel tetz. Mpe ik yi in, yi in Cyꞌajol, qui na el intxum tetz, ma na ntin Intaj ilol tetz.
37 “Chi banak tentz, yi at tzaj kꞌajtzun Noé, iteꞌn nin sbajokaꞌs yil nuꞌlt tzaj junt tir. 38 Na sajleꞌn, yi ntaxk saj yi abal tan chisotzajeꞌn yi eꞌ wunak, quinin cyocsaj yi at tulbil chicaws. Na na chiwan len, na chucꞌaꞌ len nin na chitzatzin len te eꞌchk balaj quicyuj. Yaꞌstzun quitaneꞌn yi eꞌ wunakaꞌtz yi toqueꞌn tetz Noé tul barc. 39 Qui na chibisun muꞌẍ tal. Jalt cuntunin chinachol yi xeꞌteꞌn yi abal tan chisotzajeꞌn. Iteꞌn nin ẍchibneꞌ wunakaꞌs yil nuꞌlt tzaj wetz junt tir, yi in yi Bajx Cyꞌajol. 40 Yil tzꞌul yi tiempaꞌtz, ko at cob yaj na chakꞌuj wi cojbil, maꞌjeꞌn jun, nin scyajk cyen jun. 41 Nchaꞌtz ko at cob xnaꞌn yi na chichen, maꞌjeꞌn jun, ma yi junt scyajk cyen.
42 “Eliꞌch len te icꞌuꞌl yi at tulbil jun kꞌejlalaꞌtz, nin qui ilij itaꞌn yi mbi oril yil nuꞌl yi in wetz, yi in itajcawil. 43 Ej nin je junt elsawutzileꞌj yi swaleꞌ tzitetz: Yi nink tzꞌel xtxum jun taw caꞌl tetz yi mbi oril tzꞌul jun alkꞌom tan talkꞌeꞌn beꞌch tetz, quil wit, nin quil takꞌ amaꞌl tan toqueꞌn alkꞌom xe caꞌl. 44 Nchaꞌtz axwok itetz, banwok cwent itib, na qui tzꞌicyꞌ tzitetz yil nuꞌlt, yi in yi in Bajx Cyꞌajol.
Yi eꞌ chakum balaj, nin yi eꞌ ploj
(Lc 12.41-48)
45 “Ma jaluꞌ katxumeꞌ naꞌ scyetz eꞌ inchakum yi at cyajtzaꞌkl, yi eꞌ yi baꞌn kꞌukeꞌ incꞌuꞌl scyeꞌj. Niꞌcuꞌn quitaneꞌn chi taneꞌn jun martomaꞌ jun patrón yi na cyaj tan chiqꞌuicyꞌleꞌn yi eꞌ mos. 46 Yil tzꞌul tzaj yi patrón, chumbalaj nin ltil iꞌ yi jun martomaꞌaꞌtz yi at cyen, yi ko na tzan tan banleꞌn taneꞌn yi eꞌchk tarey yi akꞌij cyen tetz. 47 Jun cuꞌn yol tzꞌakꞌlok kꞌej jun martomaꞌaꞌtz, na tzꞌocopon iꞌ tetz ajcaw tibaj cyakil yi akꞌun. 48 Poro ko cachiꞌ tajtzaꞌkl jun martomaꞌ, quil tzꞌoc tan xtxumleꞌn yi tulbil yi patrón. 49 Ntin tzꞌocopon tan chibuchleꞌn yi eꞌ mos, nin tan xtxumleꞌn eꞌchk balaj waꞌaꞌn tu xcꞌalaꞌiꞌn ẍchixoꞌl kbarel. 50 Yil tzꞌul tzaj yi patrón, qui cunin tzꞌicyꞌ tetz. 51 Tzꞌocopon tzun yi patrón tan biyleꞌn cuꞌn, nin tzꞌelepon lajuꞌn yi talmaꞌ tan beneꞌn le amaꞌl yi banijt scyetz yi eꞌ wunak yi chiwutz tuꞌ chiplaj tuꞌ na cyocsaj. Wiꞌnin oꞌkl sbneꞌ, nin sbajk xitxꞌul xiꞌil wiꞌ tan bis oꞌkl.