Mateo 23

Yi talol Jesús chipaltil yi eꞌ parisey scyuchꞌ yi eꞌ txꞌolol xoꞌl ley Moisés

(Mr 12.38-40; Lc 11.37-54; 20.45-47)

1 Toqueꞌn tzun Jesús tan yol scyetz yi eꞌ wunak, nin scyetz yi eꞌ ẍchusbeꞌtz:

2 “Yi eꞌ txꞌolol xoꞌl yi ley Moisés, scyuchꞌ yi eꞌ parisey, bixbaꞌnt cheꞌ tan xtxꞌolcheꞌn xoꞌl yi ley Moisés. 3 Baꞌn kol chixomuꞌ te chichusuꞌn. Chibneꞌuꞌ taneꞌn yi eꞌchk caꞌwlaꞌtz. Poro quil chixomuꞌ te yi eꞌchk takleꞌn yi na chiban cyetz. Na yi eꞌ cyetz, baꞌn na chicawun te jun takleꞌn, poro qui na chiban taneꞌn. 4 Chin al nin eꞌchk caꞌwl yi na bixeꞌ cyakꞌun, nin wiꞌnin na chicawun tan cyoqueꞌn wunak tan banleꞌn taneꞌn. Poro yi eꞌ cyetz siquier najk chiban taneꞌn muꞌẍ tal. 5 Cyakil yi eꞌchk takleꞌn yi na chiban cyetz, iꞌtz ntin tan jaleꞌn chikꞌej ẍchiwutz wunak. Quilninuꞌ yi cuꞌlbil yol Kataj yi chꞌinlij wutz chiplaj, nin yi cꞌalij te chikꞌab. Nimteꞌn cuꞌn na cyulej. Ej nin quilninuꞌ chixbuꞌk txowiꞌn cyaꞌn. Chumam nin juꞌ na cyulej. Yaꞌstzun na cyulej tan jaleꞌn cyetz chikꞌej ẍchiwutz wunak. 6 Ej nin yi na bajij jun waꞌaꞌn, ntin na cyaj choꞌc jalen tziꞌn quen tan majleꞌn yi bajx chem. Ej nin yi na chiban chimunl swutz Ryos tulak eꞌchk sinagoga, ntin na cyaj chicꞌoleꞌ tibaj bajx chem, tan jaleꞌn chikꞌej. 7 Yi eꞌ cyetz, ntin na cyaj yi chin yutꞌ cunin chikꞌajlan wunak scyetz. Ej nin wiꞌnin na chitzatzin yi na aꞌlchij wutzileꞌn taꞌ scyetz.

8 “Ma yi eꞌ cyeruꞌ, quil chixomuꞌ te jun ajtzaꞌklaꞌtz. Quil cyakꞌuꞌ amaꞌl scyetz wunak tan cyakꞌol chikꞌejuꞌ yi na chikꞌajlan scyeruꞌ. Na cyakil yi eꞌ cyeruꞌ, quitzꞌun quitzicy quibuꞌ, nin ntinaꞌtz jun chusul cyeruꞌ iꞌtz yi Cristo. 9 Ej nin quil cyaluꞌ kataj scyetz alchok jilwutz wunak tzoneꞌj wuxtxꞌotxꞌ. Na jun ntziꞌ Kataj at, iꞌtz yi Ryos yi at tziꞌn tcyaꞌj. 10 Quil cyakꞌuꞌ amaꞌl scyetz wunak tan cyalol scyeruꞌ yi eꞌuꞌ ajcaw, na jun ntziꞌ Kajcaw at, iꞌtz yi Cristo yi sukiꞌnt tan Kataj. 11 Yi eꞌ yi na cyakꞌ quib tetz chichakum yi eꞌ mas, yaꞌstzun yi eꞌ yi at mas chikꞌej swutz Ryos. 12 Tzꞌakꞌlok chikꞌej cyakil yi eꞌ yi na cyocsaj quib juy, nin tzꞌelepon chikꞌej yi eꞌ yi na cyocsaj quib nim.

13 “¡Lastum eꞌuꞌ txꞌolol xoꞌl ley Moisés, nin yi eꞌuꞌ parisey! Chiwutz tuwuꞌ, chiplaj tuwuꞌ yi na cyocsaj quibuꞌ balaj. Quibeꞌuꞌ tkꞌab Ryos, nin na chitzanuꞌ tan makleꞌn chiwutz yi eꞌ mas yi na cyaj choꞌc tkꞌab.

14 “¡Lastum eꞌuꞌ, na chiwutz tuwuꞌ, chiplaj tuwuꞌ yi na cyocsaj quibuꞌ balaj! Na na chimajlenuꞌ chicaꞌl yi eꞌ xmaꞌlcaꞌn, nin tunin na chiben tcyen tuninuꞌ tan nachleꞌn Kataj tan teweꞌn yi quiluꞌ. Tan tu yi yaꞌtz na chibanuꞌ, tzꞌakꞌlok mas chicawsuꞌ.

15 “¡Lastum eꞌuꞌ, na chiwutz tuwuꞌ, chiplaj tuwuꞌ yi na cyocsaj quibuꞌ balaj! Na na chibenuꞌ joylaj tan tocseꞌn chicꞌuꞌl wunak tan chixomeꞌn te cyeruꞌ chichusuꞌnuꞌ. Poro mas tcunin na chitzanuꞌ tan chipitleꞌn nin tul il. Na yi na chixom te chichusuꞌnuꞌ, mas na chiben tul il cyaꞌnuꞌ.

16 “¡Lastum eꞌuꞌ, na eꞌuꞌ qꞌuil chibeꞌ wunak taneꞌn, poro jopij wutz cyajtzaꞌkluꞌ! Na na cyaluꞌ yi quiꞌc til jun yaj yi qui na el cuꞌn te jilon yi ko ja xcon yi templo tetz stiwil yol iꞌ. Poro ntin sjalok til yi kol xcon yi pwok yi colij le templo tetz stiwil yol. 17 ¡Chin yab nin cyajtzaꞌkluꞌ! Jopij wutz cyajtzaꞌkluꞌ. ¿Quiꞌc peꞌ mas kꞌej yi templo swutz yi pwok yi colij tuꞌ le templo?

18 “Ej nin nchaꞌtz na cyal cyeruꞌ yi quiꞌc til jun yaj yi qui na el cuꞌn te jilon yi ko na xcon yi patbil txꞌixwatz tetz stiwil yol iꞌ. Poro at til ko quil tzꞌel cuꞌn te jilon yi ko ja xcon yi oy yi at tibaj yi patbil txꞌixwatzaꞌtz tetz stiwil yol iꞌ. 19 Eꞌuꞌ yab. Jopij wutz cyajtzaꞌkluꞌ. ¿Qui peꞌ na el chitxumuꞌ tetz yi niꞌcuꞌn xanil yi patbil chitxꞌixwatzuꞌ tu yi oy yi na jeꞌ tibaj? 20 Na ko na xcon yi altar tetz stiwil yol jun yaj, nkꞌeꞌtz ntin altar na xcon tetz stiwil, ma na cyakil tu oy yi at tibaj. 21 Nchaꞌtz yi ko at jun yaj yi na oc yi templo tetz stiwil yol iꞌ, nkꞌeꞌtz ntin yi templo na xcon tetz stiwil, ma na nchaꞌtz Ryos, na choꞌn najlij iꞌ le templo. 22 Nchaꞌtz yi ko at jun yaj yi na oc yi tcyaꞌj tetz stiwil yi yol iꞌ, niꞌcuꞌn chij najk oc Ryos tetz stiwil yi yol iꞌ, na choꞌn cꞌolchij Ryos tcyaꞌj.

23 “¡Lastum eꞌuꞌ txꞌolol xoꞌl ley Moisés, nin yi eꞌuꞌ parisey! Na chiwutz tuwuꞌ chiplaj tuwuꞌ yi na cyocsaj quibuꞌ balaj. Na cyakꞌuꞌ chidiesmuꞌ te yi tal neꞌẍ cosech aniẍ, nin te yi alwenuꞌ yi at scyuchꞌuꞌ, nin na cyakꞌuꞌ chidiesmuꞌ te muꞌẍ tal pumient yi na xcon tetz chicꞌoꞌcsbiluꞌ, poro qui na chitzanuꞌ tan banleꞌn taneꞌn yi eꞌchk caꞌwl yi mas tajweꞌn. Mas baꞌn tcuꞌn yi nink choꞌcuꞌ tetz tzꞌaknak cuꞌn. Mas baꞌn tcuꞌn yi nink tzꞌel nin chikꞌajabuꞌ te junt wunak. Ej nin mas baꞌn tcuꞌn yi nink choꞌcuꞌ tan joyleꞌn puntil tan kꞌukeweꞌn chicꞌuꞌluꞌ te Ryos. Baꞌn na chibanuꞌ yi na cyakꞌuꞌ chidiesmuꞌ te chicosechuꞌ, poro nchaꞌtz na taj banleꞌn taneꞌn yi eꞌchk caꞌwl yi mas tajweꞌn. 24 Yi eꞌ cyeruꞌ, eꞌuꞌ qꞌuil chibeꞌ wunak, poro jopij wutz cyajtzaꞌkluꞌ. Na chitxaꞌtzajuꞌ quicꞌaꞌuꞌ tan qui beneꞌn jun tal niꞌ us tcꞌuꞌl. Na ẍchiwutz cyeruꞌ xan kol baj cyaꞌnuꞌ, poro qui tzꞌicyꞌ scyeruꞌ yi na baj jun chin wutzileꞌn camey cyaꞌnuꞌ.

25 “¡Lastum eꞌuꞌ txꞌolol xoꞌl ley Moisés, nin yi eꞌuꞌ parisey! Chiwutz tuwuꞌ, chiplaj tuwuꞌ yi na cyocsaj quibuꞌ balaj. Na chixansajuꞌ chilakuꞌ tu eꞌchk chiplatuwuꞌ. Chin txꞌajij cunin na cyulejuꞌ solteꞌj, poro yi tꞌimbil yi at tcꞌuꞌl, alakꞌ tuꞌ taneꞌn, na xkantzaj nink na cyajuꞌ. 26 Eꞌuꞌ parisey, jopij wutz cyajtzaꞌkluꞌ. Ma kol quil cyenuꞌ eꞌchk ajtzaꞌklaꞌtz, chin xansaꞌn nin tzun sbneꞌ chilakuꞌ-tz swutz Ryos.

27 “¡Lastum eꞌuꞌ! Na yi eꞌ cyeruꞌ na cyocsaj quibuꞌ balaj, poro niꞌcuꞌn eꞌuꞌ tu jun nichil almaꞌ. Chin skoj nin taneꞌn yi solteꞌj, poro yi tcꞌuꞌl nojnak tan bakil almaꞌ tu eꞌchk takleꞌn cachiꞌ. 28 Chaꞌstzun quitaneꞌnuꞌ, na cyocsaj quibuꞌ balaj ẍchiwutz wunak, poro yi cyajtzaꞌkluꞌ chin cachiꞌ nin.

29 “¡Lastum eꞌuꞌ! Na na chibanuꞌ baꞌn te chinichil yi eꞌ kꞌajtzun elsanl stziꞌ Ryos. Nchaꞌtz na choꞌcuꞌ tan nucꞌleꞌn quen yubil yi eꞌchk chinichil yi eꞌ balaj wunak, yi quimnakeꞌ tentz. 30 Nin na cyaluꞌ: ‘Yi atoꞌk ketz tul yi tiempaꞌtz yi cyoqueꞌn yi eꞌ kamam kateꞌ tan chibiyleꞌn yi eꞌ elsanl stziꞌ Ryos, yi oꞌ ketz qui kloꞌ nkoꞌc tan chibiyleꞌn,’ cheꞌchuꞌ. 31 Tan chiyoluꞌ yi na chiyoluꞌ, na ẍchaj yi niꞌcuꞌn cyajtzaꞌkluꞌ scyuchꞌ eꞌ biyolnakaꞌtz yi eꞌ biyon yi eꞌ elsanl stziꞌ Ryos sajleꞌn tunintz. 32 Na iteꞌn nin ajtzaꞌklaꞌtz cyꞌaꞌn cyaꞌnuꞌ. Baꞌn nin chixom ninuꞌ-tz teꞌj tan wiꞌtzeꞌn. 33 ¡Na chin juntlen nin eꞌuꞌ! Quil cheꞌluꞌ liwr tkꞌab yi jun chin wutzileꞌn qꞌuixcꞌuj yi banijt tetz cyeruꞌ.

34 “I bin jaluꞌ, ateꞌ balaj inchakum, nin ateꞌ balaj aj chusunl tan xtxꞌolcheꞌn xoꞌl yi wetz inchusuꞌn. Yaꞌstzun eꞌaꞌs yi nchiben inchakol ẍchixoꞌluꞌ. Poro chocoponuꞌ tan chibuchleꞌn. At jujun yi ẍchiquimok cyaꞌnuꞌ. Ej nin at jujun yi jepon chipajoluꞌ swutz pasyon. Chocoponuꞌ tan chibuchleꞌn lakak sinagoga. Tunin chixomninuꞌ tan makleꞌn chiwutz lakak eꞌchk tnum. Sjalok quiluꞌ tan paj. 35 Nchaꞌtz yi eꞌchk takleꞌn cachiꞌ yi bnixnak cyakꞌun yi eꞌ chimam chiteꞌuꞌ, eꞌuꞌ lchojon tetz. Na elnak chiẍchꞌel yi eꞌ balaj wunak cyaꞌn. Eꞌuꞌ lchojon cyakil yi il yi banakeꞌ cyen jetz yi quimleꞌnix Abel yi balaj nak jalen yi quimeꞌn Zacarías, yi cyꞌajl Berequías, yi jun yi choꞌn quimeꞌn cyaꞌn xoꞌl yi templo tu yi patbil txꞌixwatz. 36 Jun cuꞌn yol, chichojeꞌuꞌ cyakil yi ilaꞌtz, yi bajij sajleꞌnix tunintz, chichojeꞌuꞌ yi eꞌuꞌ yi ateꞌuꞌ jaluꞌ.

Yi talol Jesús: “Lastum eꞌuꞌ aj Jerusalén”

(Lc 13.34-35)

37 “¡Lastum eꞌuꞌ aj Jerusalén! Na chisajleꞌnix tuninuꞌ tan chibiyleꞌn eꞌ elsanl stziꞌ Ryos. Chisajleꞌnix tuninuꞌ tan cꞌoxleꞌn cꞌub scyeꞌj yi eꞌ ẍchakum Ryos yi eꞌ ulak ẍchixoꞌluꞌ. ¡Jat loꞌ tir el walmaꞌ tan chimoxeꞌn tzajuꞌ, chi na ban jun ti qꞌuitx tan chimolcheꞌn yi eꞌ tal, tan cyoqueꞌn jakꞌ yi xicyꞌ! Poro yi eꞌ cyeruꞌ qui na chicꞌuluꞌ. 38 Quil ninuꞌ yi caꞌl Ryoseꞌj, tzꞌinunin tuꞌ taneꞌn, na quiꞌc Ryos at. Ten cyaj tilol iꞌ yi caꞌleꞌj. 39 Nchaꞌtz in, quiꞌt quiluꞌ inwutz jalen yil tzꞌul yi tiempil yil cyaluꞌ: ‘Kꞌajsbil tetz yi juneꞌj, yi tzan cweꞌn muleꞌn. Bixbaꞌnt iꞌ tan Ryos tan cawuꞌn,’ cheꞌchuꞌ sbneꞌ.”