Yi elsawutzil tetz jun quicyuj
22
1 Toqueꞌn tzun Jesús tan xtxoleꞌn coboxt elsawutzil scyetz wunak:2 “Je junt elsawutzileꞌj, yi na ẍchaj yi naꞌ scyetz eꞌ yi baꞌn choꞌc tajlal yi cmon Ryos: Oktz kaꞌn yi at jun wiꞌtz ajcaw. Yi toqueꞌn txkel yi cyꞌajl, nin oc tan xtxumleꞌn jun balaj quicyuj. 3 Yi xtxumxeꞌn, nin ben ẍchakol cobox ẍchakum tan chichakleꞌn yi eꞌ xtxocum. Poro quinin eꞌ ul.
4 “Chibeneꞌn tzun ẍchakol junt tir yi eꞌ ẍchakum tan talcheꞌn scyetz: ‘Ja cheꞌ imbiy cobox inwacẍ, nin nchaꞌtz ja cheꞌ imbiy cobox wawun yi kꞌansaꞌncheꞌt. Ja bnix cyakil tu kawaꞌ. Na waj yil chuꞌluꞌ jalcuꞌn tan tilweꞌn quicyuj,’ ẍchijwok sban scyetz, stzun taw quicyuj. 5 Poro yi eꞌ txocum yi na tzan chichakleꞌn, quinin chicuji. Yi tbital jun yi stziblalaꞌtz, nin ben tan tilweꞌn xtxꞌotxꞌ. Ma junt choꞌn beneꞌn tan pyajiꞌn. 6 Nin yi eꞌ mas xtxocum, nin eꞌ oc tan chitzꞌamleꞌn yi eꞌ ẍchakum yi jun wiꞌtz ajcawaꞌtz. Eꞌ oc tan chijisleꞌn, nin tan chibiyleꞌn cuꞌn. 7 Yi teleꞌn xtxum yi wiꞌtz ajcaw tetz, wiꞌnin ẍchiꞌcheꞌn cꞌuꞌl scyeꞌj. Nin eꞌ ben ẍchakol yi eꞌ tetz sanlar tan chibiyleꞌn cuꞌn, nin tan toqueꞌn tꞌinij kꞌaꞌkl cyakil yi tnum kale ateꞌt. 8 Beneꞌn tzun tlol yi jun wiꞌtz ajcawaꞌtz scyetz eꞌ ẍchakum: ‘Ja wiꞌt bnix cyakil yi eꞌchk takleꞌn tan katzatzineꞌn te quicyuj, poro yi eꞌaꞌtz yi ncheꞌ katxoc kloꞌ, quiꞌct rmeril tan cyuleꞌn na quiꞌc chixac. 9 Quibeneꞌnk lakak eꞌchk ẍchicy beꞌ tan chitxocleꞌn tzaj alchok jilwutz wunak yil cxnoj quen scyeꞌj.’ 10 Chibeneꞌn tzun yi eꞌ ẍchakumtz lakak beꞌ, nin saj chimolol cyakil yi eꞌ yi eꞌ noj quen ẍchiwutz. At balaj wunak, nin at mal wunak eꞌ baj opon cyaꞌn. Noj cuꞌn caꞌlaꞌtz cyakꞌun wunak.
11 “Te yi nsken chicham quib wunak, nin ocopon yi wiꞌtz ajcawaꞌtz tan chixmayeꞌn. Nintzun ben tilol yi at jun yaj yi qui wekoꞌn tib tan beꞌchok tetz quicyujiꞌn. 12 Beneꞌn tzun tlol tetz: ‘Wamiw, ¿nxac ncẍoꞌc tzaj tzoneꞌj? na quiꞌc beꞌchatz at tzaweꞌj tetz quicyujiꞌn.’ Poro yi yaj, quiꞌc nin ben tlol. 13 Cawuneꞌn tzun yi wiꞌtz ajcaw scyetz yi eꞌ ẍchakum: ‘Ma jaluꞌ, cꞌalwok cuꞌn tkan tu kꞌab, nin joꞌlwok len tziꞌn tul tzꞌoꞌtz. Ẍchꞌink, nin skitxꞌnek xe teꞌ tan qꞌuixcꞌuj,’ stzun wiꞌtz ajcawaꞌtz scyetz. 14 Bintzinin, wiꞌnin eꞌ yi na tzan Ryos tan chimoxeꞌn tzaj, poro quiꞌc mas yi eꞌ yi ẍchiclaxok,” stzun Jesús scyetz.
Yi pwok yi na akꞌlij tetz César
(Mr 12.13-17; Lc 20.20-26)
15 Toqueꞌn tzun chitxumuꞌn yi eꞌ parisey tan joyleꞌn puntil yi ẍeꞌnk ljal til Jesús. 16 Nin eꞌ ben chichakol cobox cyuchꞌ tan yol tu Jesús, itzun cyaltz:
—Taꞌ, na kil ketz yi quiꞌc nin muꞌẍ laꞌjiluꞌ. Ej nin na kil yi xtxolbil cuꞌn na tulejuꞌ yi xtxꞌolcheꞌn xoꞌl yi tajbil Ryos. Qui na tzanuꞌ tan xtxoleꞌn ntin yi eꞌchk takleꞌn yi na chipekꞌ wunak teꞌj, na qui na xobuꞌ tan talcheꞌn paltil jun. Quiꞌc na ban mpe atk kꞌej yaj nka quiꞌc. 17 Chaꞌstzun te Taꞌ, ja kuꞌl swutzuꞌ tan jakleꞌn jun kajtzaꞌkl teruꞌ. ¿Baꞌn peꞌ lkakꞌ yi pwok yi na tzan César tan jakleꞌn sketz, nka quiꞌ?
18 Poro jalcunin nachoneꞌn Jesús te cyajtzaꞌkl, yi subleꞌn tuꞌ iꞌ cyajbil. Chaꞌstzun te beneꞌn tlol scyetz:
—Chiwutz tuwuꞌ, chiplaj tuwuꞌ yi na cyocsaj quibuꞌ balaj. ¿Nxac na chitzanuꞌ tan joyleꞌn puntil tan jaleꞌn wil? 19 Chichaj tzajuꞌ jun pwok swetz yi na cyakꞌuꞌ tetz César, —stzun Jesús scyetz.
—¿Naꞌ taw yi yubileꞌj yi at swutz, nin naꞌ taw yi biꞌaj yi banij swutz?
21 —Tetz César, yi wiꞌtz ajcaw, —cheꞌch ban tzaj.
—Yi ko tetz César, baꞌn cyakꞌuꞌ tetz. Poro nchaꞌtz tajweꞌn lcyakꞌuꞌ tetz Ryos cyakil yi tetz, —chij Jesús scyetz.
22 Yi quibital xtxolbileꞌj, nin eꞌ baj el yabtz teꞌj. Cyajeꞌn cyen tzun quilol Jesús, nin eꞌ ajtz.
At junt tir itzꞌeꞌn
(Mr 12.18-27; Lc 20.27-40)
23 Iteꞌn nin kꞌejaꞌtz yi cyoponeꞌn cobox scyeri eꞌ sadusey te Jesús. Yi eꞌ sadusey, quinin cyocsaj yi at junt tir itzꞌeꞌn ẍchixoꞌl almaꞌ. Chaꞌstzun te ja choꞌc tan joyleꞌn puntil tan pileꞌn Jesús:
24 —Taꞌ, talnak kꞌajtzun Moisés yi kol quim chmil jun xnaꞌn yi ntaxk jal chinitxaꞌ, tajweꞌn tan toqueꞌn yi titzꞌun yi almaꞌ tetz chmil yi xnaꞌn, bantz quil sotz yi xonl iꞌ. 25 I bin jaluꞌ Taꞌ, at bin juk yaj, quitzꞌun quitzicy quib. Yi bajxnak nin cyokꞌbej quib tu jun xnaꞌn, poro yi ntaxk jal chinitxaꞌ, nin quim yi yaj. Chaꞌstzun te toqueꞌn xnaꞌn tkꞌab yi titzꞌun yi kꞌajtzun chmil. 26 Iteꞌn nin banaꞌs tu caꞌp, nin tu yi toxiꞌn. Baj elepon cunin chmilil xnaꞌn yi juk yajaꞌs, yi quitzꞌun quitzicy quib. 27 Wiꞌtzbil tlen quimeꞌn xnaꞌn. 28 Ma jaluꞌ Taꞌ, yi nink chitzꞌij junt tir chixoꞌl almaꞌ, ¿naꞌ scyetz jun yi mero chmil nin xnaꞌn sbneꞌ-tz chixoꞌl yi juk yajaꞌtz?
29 Sajeꞌn tzun stzaꞌwel Jesús scyetz:
—¿Nkꞌeꞌtz peꞌ xubseꞌn nchibanuꞌ tan tuꞌ yi qui na el chitxumuꞌ tetz yi yol yi tzꞌibaꞌnt cyen, nin tan tuꞌ yi qui na pujx yi porer Ryos cyaꞌnuꞌ? 30 Na yil chitzꞌij junt tir yi eꞌ almaꞌ, quiꞌt cyokꞌbej quib, nin quiꞌt cyokꞌbej quib chinitxaꞌ. Choꞌn ẍchibneꞌ cyetz chi quitaneꞌn yi eꞌ ángel, yi ateꞌ tcyaꞌj. 31 Inti xtxolbil te itzꞌeꞌn ẍchixoꞌl almaꞌ, ¿qui ptzun na chisiꞌlejuꞌ yi yol yi alijt cyen tan Ryos tetz Moisés? 32 Na, talnak iꞌ: ‘I inaꞌtz in chiRyosil Abraham, tu Isaac nin Jacow.’ Nsken chiquim yi ox yajaꞌtz yi talol Ryos yi yoleꞌj. Na tzun ẍchaj sketz yi qui sotznakeꞌ. Na yi Kataj Ryos, iꞌ kaRyosil, yi oꞌ yi itzꞌoꞌ scyuchꞌ yi eꞌ yi quimnak chiwankil. Swutz Ryos quiꞌc nin jun wunak yi najk sotz, —stzun Jesús scyetz.
33 Yi quibital wunak yi xtxolbileꞌj, nin eꞌ el yab teꞌj, na quiꞌc muꞌẍ paltil.
Yi caꞌwl yi mas tajweꞌn tan kabnol taneꞌn
(Mr 12.28-34)
34 Yi quibital yi eꞌ parisey yi nsken chiloꞌon yi eꞌ sadusey tan Jesús, cweꞌn tzun chimolol quibtz teꞌj. 35 At tzun jun ẍchixoꞌl yi eꞌ pariseyaꞌtz yi iꞌ jun txꞌolol xoꞌl yi ley Moisés, nin octz tan jakleꞌn jun xtxolbil tetz Jesús tan pileꞌn iꞌ. Itzun taltz:
36 —I bin jaluꞌ taꞌ, txoꞌl cyakil yi eꞌchk caꞌwl, ¿naꞌ scyetz jun yi mas tajweꞌn tan kabnol taneꞌn?
37 Sajeꞌn tzun stzaꞌwel Jesús tetz:
—‘Lokꞌaj yi aRyosil tetz cuꞌn awalmaꞌ, nin tetz cuꞌn awajtzaꞌkl.’ 38 Yaꞌstzun caꞌwl yi mas tajweꞌn tan banleꞌn taneꞌn. 39 Ej nin niꞌcuꞌn muꞌẍ tal yi caꞌp yi na tal: ‘Lokꞌweꞌ yi eꞌ wunak chi na alokꞌ awib atz.’ 40 Yi cob caꞌwleꞌj na jop cyakil yi eꞌchk caꞌwl yi tzꞌibaꞌnt cyen tan Moisés, nin na jop chichusuꞌn cyakil yi eꞌ elsanl stziꞌ Ryos tentz.
Yi Cristo iꞌ Tajcaw kꞌajtzun Luwiy
(Mr 12.35-37; Lc 20.41-44)
41 Te yi ntaxk chaꞌj yi eꞌ parisey, nin oc Jesús tan jakleꞌn yi xtxolbileꞌj scyetz:
42 —¿Mbi na chitxum cyeruꞌ te yi Cristo yi jun yi bixbaꞌnt tan tuleꞌn? ¿Naꞌ scyetz kamam cyen yi xonl iꞌ le chiwutz cyeruꞌ?
—Choꞌn at tulbil Cristo ẍchixoꞌl xonl kꞌajtzun kamam Luwiy, —cheꞌch bantz tetz Jesús.
43 —Yi ko xonl tuꞌ kꞌajtzun Luwiy yi Cristo, ¿mbi tzuntz yi talnak Luwiy Wajcaw tetz? Na je yol kꞌajtzun Luwiy yi tzꞌibaꞌnt cyen:
44 ‘Nin tal Ryos tetz Wajcaw:
Cꞌolchen cuꞌn tzoneꞌj le insbal,
jalen cuꞌn lchoꞌc eꞌ acontr waꞌn jakꞌ awukan,’ stzun Luwiy tentz.a
Yi yoleꞌj yaꞌstzun alijt cyen tan kꞌajtzun kamam Luwiy tan porer yi Espíritu Sant. 45 Ma jaluꞌ, ko talnak kꞌajtzun kamam Luwiy ‘Wajcaw’ tetz yi Cristo yi bixbaꞌnt tan tuleꞌn, ¿mbi tzuntz na cyaluꞌ yi wunak tuꞌ iꞌ, yi xonl tuꞌ Luwiy iꞌ?
46 Yi quibital yi xtxolbileꞌj, quiꞌc nin jun yol ben cyalol. Cyaꞌl jun nimsaj cꞌuꞌl tan stzaꞌweꞌn nin yol iꞌ. Jetzaꞌtz tzun quiꞌt eꞌ oc tan wakꞌ ib tu Jesús.