Yi elsawutzil tetz chichojoꞌn cobox akꞌunwil
20
1 “Niꞌcuꞌn sbajok tul yi balaj tiemp yi at tulbil, chi banak jun yaj taw pinc scyeꞌj eꞌ mos. Itzun bantz, jalchan cunin teleꞌn yaj tan chijoyleꞌn akꞌunwil tan akꞌun tuchꞌ. 2 Yi jaleꞌn cobox taꞌn, ja bixeꞌ chitrat tan ẍchojol jun pwok te chikꞌej, nin eꞌ ben ẍchakol tan akꞌun. 3 Yi tponeꞌn beluj chꞌichꞌ jalchan, ja noj quen iꞌ scyeꞌj coboxt akꞌunwil yi quiꞌc cyakꞌun. 4 Nin ben tloltz scyetz: ‘Akꞌujenwok swuchꞌ, nin cxinchojeꞌwok.’ Chibeneꞌn tzuntz tan akꞌun. 5 Ma tponeꞌn chajcuꞌn kꞌej, ja el tan chijoyleꞌn coboxt akꞌunwil. Nin nchaꞌtz ban iꞌ yi tponeꞌn ox chꞌichꞌ cuꞌlbeꞌn kꞌej. 6 Ej nin yi tponeꞌn oꞌ chꞌichꞌ cuꞌlbeꞌn kꞌej nin el tzaj junt tir tan xoꞌn. Ja noj cyen scyeꞌj coboxt yi quiꞌc cyakꞌun, nin taltz scyetz: ‘¿Mbi na ibanwok tzoneꞌj? ¿Quiꞌc peꞌ itakꞌun?’ 7 ‘Quiꞌc taꞌ, quiꞌc kakꞌun na jal kaꞌn,’ cheꞌch bantz. ‘Quibeneꞌnk bin tan akꞌun swuchꞌ.’8 “Itzun bantz, yi cweꞌn kꞌej, nin cawun yi patrón te yi martomaꞌ tan chichakleꞌn yi eꞌ mos tan teleꞌn chichojoꞌn. ‘Bajx cheꞌ achoj yi eꞌ yi buch tlen nchoꞌc tan akꞌun. Wiꞌtzbil tlen cheꞌ achoj yi eꞌ yi jalchan nchixeꞌtij tan akꞌun,’ stzun yi patrón tetz martomaꞌ.
9 “Cyoponeꞌn tzun yi eꞌ yi eꞌ xeꞌtij tan akꞌun oꞌ chꞌichꞌ cweꞌn kꞌej. Yi teleꞌn tzaj chichojoꞌn, ja akꞌlij jujun pwok te jujun. 10 Ma yi cyoponeꞌn yi eꞌ yi eꞌ xeꞌtij tan akꞌun bajx cuꞌn, le wutz yi cyetz cyajtzaꞌkl yi nimt cuꞌn yi cyetz chichojoꞌn tzꞌakꞌlok, poro quiꞌ. Jujun pwok akꞌlij tetz jujun. 11 Cyoqueꞌn tzuntz tan xochoꞌn tetz yi patrón: 12 ‘Taꞌ, ¿mbi tzuntz yi nicyꞌ nin tuꞌ kachojoꞌn mban scyuchꞌ yi eꞌ yi juneꞌn or nchakꞌuj? Ma ketz ja icyꞌpon cuꞌn jun kꞌej kaꞌn. Ja katij wiꞌnin kꞌej. Poro niꞌcuꞌn kachojoꞌn mban scyuchꞌ.’
13 “Sajeꞌn tzun stzaꞌwel yi patrón tetz jun scyeri yi eꞌ akꞌunwilaꞌtz: ‘I bin jaluꞌ wamiw, max acꞌuꞌl. Nkꞌeꞌtz cachiꞌ na chintzan tan bajeꞌn tziteꞌj. ¿Nkꞌeraꞌtz peꞌ katrat tzituchꞌ tan inchojol jun pwok te ikꞌej? 14 Jeꞌj, tzꞌamwok ipuꞌk, nin quitajeꞌnk, na yi in wetz na waj yi nicyꞌ nin tuꞌ ichojoꞌn sban. 15 Na yi in wetz, baꞌn tzimban wajbil te impuꞌk. ¿Nka na tzun takꞌ chiꞌch cꞌuꞌlal yi imbalajil tzitetz?’ 16 Yi xtxolbileꞌj na ẍchaj: Yi eꞌ wiꞌtzbil chocopon tetz bajx, ma yi eꞌ bajx chocopon tetz wiꞌtzbil. Na tzan Ryos tan chimoxeꞌn tzaj wiꞌnin, poro quiꞌc mas eꞌ yi ẍchiclaxok.
Yi talolt Jesús yi at cyocbil wunak tan biyleꞌn
(Mr 10.32-34; Lc 18.31-34)
17 Itzun bantz yi na chixon tbeꞌ tan cyoponeꞌn Jerusalén, nintzun eꞌ el tzaj ẍchakol yi eꞌ ẍchusbeꞌtz ẍchixoꞌl yi eꞌ mas wunak tan yol scyetz chichuc cuntuꞌ. Itzun taltz:
18 —I bin jaluꞌ, sak tziwutz yi choꞌn at kabembil Jerusalén. Yi nsken wiꞌt kopon ẍchinjatxlok ẍchikꞌab yi eꞌ wiꞌtz paleꞌ, nin ẍchikꞌab yi eꞌ txꞌolol xoꞌl yi ley Moisés. Nchaꞌtz sbixek cyaꞌn tan weleꞌn cuꞌn swutz. 19 Chinjatxlok ẍchikꞌab yi eꞌ awer nak. Nocopon tetz chitzeꞌlbeꞌtz. Chinloꞌonk cyaꞌn nin chinjepon cyaꞌn swutz pasyon. Chinquimok, poro le toxiꞌn kꞌej nitzꞌok junt tir ẍchixoꞌl almaꞌ, —stzun Jesús bantz scyetz.
Yi chijakol cob yaj chikꞌej
(Mr 10.35-45)
20 Itzun te yi na chixon tbeꞌ, nintzun opon yi xtxuꞌ Jacow tu Waꞌn tan yol tetz Jesús. Xomcheꞌ yi cob talaꞌtz teꞌj. Eꞌ cyꞌajl Zebedeo. Cweꞌn tzun mejlok yi jun xnaꞌnaꞌtz swutz Jesús tan jakleꞌn jun pawor tetz. 21 Beneꞌn tzun jakol Jesús tetz:
—¿Mbi na tajuꞌ swetz?
—Taꞌ, yil tzꞌocuꞌ tan cawuꞌn, na kloꞌ waj yil takꞌuꞌ chikꞌej yi cob waleꞌj tan chicꞌoleweꞌn xlajuꞌ. Jun le sbaluꞌ, nin junt le maxuꞌ, —chij xnaꞌn tetz Jesús.
22 Talol tzun Jesús scyetz:
—Yi axwok itetz, qui na el itxum tetz yi mbi na cxtzanwok tan cꞌucheꞌn. ¿Pe xcyekwok tan mucꞌleꞌn yi qꞌuixcꞌuj yi tzꞌicyꞌpon wetz waꞌn? —chij Jesús bantz.
—Kaxcyek taꞌ, —cheꞌch cob yajaꞌtz.
23 Beneꞌn tzun tlol Jesús scyetz:
—Jun cuꞌn yol tzitijeꞌ yi qꞌuixcꞌuj yi tzintijeꞌ wetz, poro tan icꞌoleweꞌn tzinxlaj nkꞌeꞌtz in chincawunk teꞌj, ma na choꞌn tzꞌakꞌlok scyetz yi eꞌ yi txaꞌijcheꞌt tan intaj.
24 Itzun yi quibital yi lajujt cyuchꞌ, nintzun jeꞌ ẍchiwutz yi mbiꞌtz na chitzan yi cob tan jakleꞌn tetz Jesús. 25 Toqueꞌn tzun Jesús tan chichakleꞌn tzaj, nin taltz scyetz:
—Na itilwok yi ẍeꞌn quitaneꞌn yi eꞌ wiꞌtz ajcaw lakak lmak tnum, wiꞌnin na chicawun. Na choꞌc wunak jakꞌ chicaꞌwl. 26 Poro qui na taj yi yaꞌtz tziban itetz. Ma na je puntileꞌj, ko at jun tzixoꞌl yi na taj jal kꞌej, tajweꞌn tan toqueꞌn iꞌ tetz chichakum yi eꞌ mas. 27 Ko at jun tzixoꞌl yi na taj tzꞌoc tetz bajxom, tajweꞌn tan toqueꞌn tetz chichakum yi eꞌ mas. 28 Chi wutaneꞌn wetz, yi in Bajx Cyꞌajol, nkꞌeraꞌtz inmantar yi nink choꞌc wunak tetz inchakum, ma na ja nuꞌl tan woqueꞌn tetz chichakum wunak. Ja nuꞌl tan wukꞌol wib tkꞌab quimichil tan chiclaxeꞌn wiꞌnin wunak.
Yi tuleꞌn yos tan Jesús scyuchꞌ cob moyiꞌẍ
(Mr 10.46-52; Lc 18.35-43)
29 Itzun bantz yi cyeleꞌn tzaj le tnum Jericó, wiꞌnin wunak eꞌ xom tzaj te Jesús. 30 At tzun cob moyiꞌẍ cꞌolẍcheꞌ tzi beꞌ. Yi quibital yi ticyꞌeꞌn cuꞌn Jesús, nin eꞌ ẍchꞌintz:
—Kajcaw, iluꞌ yi xonl Luwiy yi at tulbil, elk kꞌajabuꞌ skeꞌj.
31 Cyoqueꞌn tzun yi eꞌ wunak tan makleꞌn chitziꞌ tan quiꞌt chiẍchꞌineꞌn, poro mas tcunin na chiẍchꞌintz:
—Taꞌ, iluꞌ yi xonl kꞌajtzun Luwiy yi at tulbil, elk kꞌajabuꞌ skeꞌj.
32 Taqueweꞌn cuꞌn tzun Jesús, nin eꞌ saj ẍchakol yi eꞌ moyiꞌẍ teꞌj tan jakleꞌn scyetz:
—¿Mbi itajbil swetz?
33 —Taꞌ, na kloꞌ kaj yil jakxij kawutz.
34 Teleꞌn tzun kꞌajab Jesús scyeꞌj, nin oc macol te chiwutz. Ninin ul yos scyuchꞌ, nin eꞌ xom nintz teꞌj.