Quiꞌc cu tan cyajeꞌn paxil yaj yi txkel
(Mr 10.1-12; Lc 16.18)
19
1 Itzun bantz yi bajeꞌn xtxolil yi eꞌchk xtxolbilaꞌseꞌj, teleꞌn tzaj tzuntz Galilea. Choꞌn tzun tponeꞌntz le luwar cwent Judea yi choꞌn at jalaj cyꞌen aꞌ Jordán. 2 Wiꞌnin wunak eꞌ xom nintz teꞌj, nin ul yos scyuchꞌ yi eꞌ yabiꞌẍ taꞌn. 3 Cyoqueꞌn tzun cobox parisey tan joyleꞌn puntil yi ẍeꞌnk jal til Jesús. Beneꞌn tzun chijakol tetz:—¿Mbi na tal teruꞌ taꞌ? ¿Baꞌn peꞌ slaj len jun yaj yi txkel yi kol tzꞌicyꞌ paj teꞌj? —cheꞌch tetz Jesús.
4 —¿Qui ptzun na chisiꞌlejuꞌ tul yi ley yi tzꞌibaꞌnt cyen yi na tal: ‘Yaj tu xnaꞌn eꞌ tulej Ryos’? 5 Nchaꞌtz at jun xtxolbil yi na tal: ‘Tajweꞌn cuꞌn tan cyajeꞌn cyen tilol jun yaj yi taj xtxuꞌ tan cyokꞌbel quib tu txkel. Nin chijunaj quib yi cobaꞌtz yi na cyokꞌbej quib. Junit na chiban swutz tkan Ryos.’ 6 Nkꞌeꞌtz cob chixoneꞌn, ma na jun ntziꞌ nchiban. Chaꞌstzun te quiꞌc rmeril yi nink xcyeꞌ jun wunak tan chijatxleꞌn yi jun lmujaꞌtz yi Ryos ncyokꞌben cuꞌn, —chij Jesús scyetz.
7 Cyoqueꞌn tzun yi eꞌ parisey tan jakleꞌn junt xtxolbil tetz:
—Yi ko yaꞌtz, ¿mbi tzuntz yi talnak Moisés yi ntin bnix jun uꞌj, tan cyajeꞌn cyen tilol jun yaj yi txkel? —cheꞌch bantz.
8 Stzaꞌwel tzun Jesús:
—Cyaj tlol Moisés yi xtxolbileꞌj tan paj stzeꞌtzal cyalmaꞌuꞌ, poro le xeꞌtzbil tzaj nkꞌeraꞌtz tajbil Ryos. 9 Ma yi wetz inchusuꞌn iꞌtz: Alchok scyetz yi na pax cyen yi txkel, nin na tokꞌbej tib tu junt, jopol wutzaj iꞌ. Ntin at cu tan paxeꞌn cyen yi xnaꞌn yi ko jopol wutzaj iꞌ. Nchaꞌtz, kol tokꞌbej tib jun yaj tu jun xnaꞌnaꞌtz yi cyajnak cyen paxiꞌn, jopol wutzaj iꞌ.
10 Cyoqueꞌn tzun yi eꞌ ẍchusbeꞌtz Jesús tan yol tetz, itzun cyaltz:
—Taꞌ, yi ko ntinaꞌtz xeꞌ tan cyajeꞌn cyen paxil jun yaj yi txkel, baꞌn tcuꞌn quil sjoy txkel, —cheꞌch.
11 —Bintzi loꞌ, poro nkꞌeꞌtz cyakil yaj chitxꞌajeꞌ yi xtxolbileꞌj. Ntin yi eꞌ yi akꞌij yi jun ajtzaꞌklaꞌtz scyetz tan qui toqueꞌn quixkel. 12 At xeꞌ tan qui toqueꞌn quixkel cobox. At eꞌ yi quil tzꞌoc quixkel tan paj yi poꞌtnak chiwankil yi quitzꞌleꞌnix. Ej nin at eꞌ yi poꞌtnak chiwankil cyakꞌun wunak. Nin nchaꞌtz at eꞌ yi qui na oc quixkel tan paj yi cyakꞌoꞌnt quib tan chixconeꞌn tetz Ryos. Alchok scyetz yi na nachon teꞌj yi yaꞌtz tajbil Ryos te iꞌ, baꞌn sban taneꞌn.
Yi tkꞌol Jesús yi banl squib eꞌ nitxaꞌ
(Mr 10.13-16; Lc 18.15-17)
13 Ej itzun cyoponeꞌn ticyꞌleꞌn cobox nitxaꞌ swutz Jesús tan jeꞌn tkꞌol yi kꞌab ẍchiwiꞌ, nin tan nachol Kataj squibaj. Poro nin eꞌ oc yi eꞌ ẍchusbeꞌtz tan makleꞌn chiwutz yi eꞌ cyꞌanl tetz. 14 Beneꞌn tzun tlol Jesús scyetz:
—Akꞌwok amaꞌl scyetz yi eꞌ nitxaꞌ tan cyuleꞌn sweꞌj. Quil tzimakwok chiwutz. Na cyakil yi eꞌ yi choꞌn taneꞌn chicꞌulutxumil chi taneꞌn chicꞌulutxumil yi eꞌ nitxaꞌeꞌj, yaꞌstzun yi eꞌ yi ateꞌ tkꞌab Ryos, —stzun Jesús bantz scyetz.
15 Jeꞌn tzun tkꞌol yi kꞌabtz chiwiꞌ yi eꞌ nitxaꞌ tan tkꞌol chibanl. Yi wiꞌt bnixeꞌn yi xtxolbileꞌj, beneꞌn nin ban Jesús tul junt luwar.
Yi jiloneꞌn jun ric tetz Jesús
(Mr 10.17-31; Lc 18.18-30)
16 Ej itzun bantz, nintzun opon jun acꞌaj yaj tan yol tu Jesús, nin jaktz tetz:
—Taꞌ, chumbalaj nin iluꞌ. Taleꞌuꞌ swetz, ¿mbi jun takleꞌn balaj tzimban tan incambal yi wutzꞌajbil?
17 Beneꞌn tzun tlol Jesús tetz:
—¿Mbi tzuntz yi na awal yi in balaj? ¿Qui peꞌ na el atxum tetz yi quiꞌc jun balaj at tzoneꞌj wuxtxꞌotxꞌ? Ntin Ryos balaj. Poro ko na awaj tzacambaj yi awutzꞌajbil, banaj taneꞌn yi eꞌchk caꞌwl.
18 —Poro ¿naꞌ scyetz caꞌwlil taꞌ? —stzun yaj.
—‘Quil cẍbiyolnakin; quil cẍjopon wutzaj; quil cẍalkꞌij; quil tzajal cuꞌn jun wi awakꞌ tetz alchok wunak. 19 Lokꞌweꞌ ataj atxuꞌ, nin lokꞌweꞌ yi eꞌ mas wunak chi na alokꞌ awibatz,’ —chij Jesús bantz tetz yaj.
20 —Poro taꞌ, jetz yi in tzaj nitxaꞌ wocleꞌn tan banleꞌn taneꞌn cyakil yi eꞌchk xtxolbileꞌj, ¿mbi tzun mas na tajtz?
21 —Ko na awaj jal abalajil, cun cꞌay yi amebiꞌl, nin oy nin yi jamel scyetz yi eꞌ mebaꞌ. Tzꞌakꞌlok tzun amebiꞌltz tcyaꞌj. Yil tzaban taneꞌn yi xtxolbileꞌj, baꞌn tzun cẍuꞌltz tan axomeꞌn sweꞌj, —stzun Jesús bantz tetz yaj.
22 Poro yi tbital yaj yi xtxolbileꞌj, wiꞌnin bisuneꞌn na chin ric nin iꞌ. Cyajeꞌn cyen tzun tilol yaj yi Jesús.
23 Beneꞌn tzun tlol Jesús scyetz yi eꞌ ẍchusbeꞌtz:
—Swaleꞌ nin tzitetz yi mero bintzi, at qꞌuixbel tan cambal jun ric yi balaj tiemp yil tzꞌul tzaj Kataj Ryos tan cawuꞌn. 24 ¿Ja peꞌ itbit? Niꞌcuꞌn qꞌuixbel tan tponeꞌn jun ric le balaj amaꞌl kalel cawuneꞌt Ryos, chi yi qꞌuixbel tan ticyꞌeꞌn jun camey tul jun julil bak tzꞌisbil, —chij Jesús bantz.
25 Yi quibital yi eꞌ ẍchusbeꞌtz yi xtxolbileꞌj, nintzun eꞌ el yabtz teꞌj, nintzun cyaltz squibil quib:
—Yi ko yaꞌtz, ¿ẍeꞌn tzun clax jun?
26 Cheꞌ beneꞌn tzun xmayil Jesús, nintzun ben tlol scyetz:
—Quil xcyeꞌ jun wunak te yi xtxolbileꞌj, poro quiꞌc jun takleꞌn yi quiꞌk xcyeꞌ Ryos teꞌj.
27 Toqueꞌn tzun Luꞌ tan yol tetz Jesús:
—I bin jaluꞌ Taꞌ, yi oꞌ ketz ja cyaj kilol cyakil yi kamebiꞌl tan kaxomeꞌn teꞌjuꞌ, ¿mbi tzun skacambajeꞌtz?
28 Beneꞌn tzun tlol Jesús scyetz:
—Jun cuꞌn yol swaleꞌ nin tzitetz, yil tzꞌul yi tiemp yil tzꞌoc cyakil tetz acꞌaj, nin yil chincꞌoleꞌ tan cawuꞌn le cꞌolchbil yi wiꞌnin kꞌej, nchaꞌtz axwok, xcꞌolek tzinxlaj tan chicaweꞌn yi coblaj kꞌuꞌj xonl kꞌajtzun kamam Israel. 29 Nchaꞌtz alchok scyetz yil til cyen yi tetz caꞌl, nka yi eꞌ titzꞌun, nka yi taj xtxuꞌ, nka yi txkel, nka nitxajil, nka xtxꞌotxꞌ tan xomeꞌn sweꞌj, scambaj yi junaꞌtz jun cient mas. Ej nin nchaꞌtz scambaj iꞌ yi itzꞌajbil tetz ben kꞌej ben sak. 30 Poro at wiꞌnin eꞌ yi bajxcheꞌ, yi wiꞌtzbil ẍchibneꞌ. Nin at eꞌ yi wiꞌtzbil quitaneꞌn yi ẍchibajxok tan chicambal yi quitzꞌajbil.