Yi jeꞌn xtxꞌixpul tib yubil Jesús
(Mr 9.2-13; Lc 9.28-36)
17
1 Yi teleꞌn kak kꞌej nintzun eꞌ ben tcyꞌal Jesús yi Luꞌ tu Jacow, tu Waꞌn yi titzꞌun Jacow. Choꞌn tzun chijeꞌn poneꞌntz chichuc cuntuꞌ wiꞌwtz. 2 Te yi ateꞌ wiꞌwtz, jeꞌ xtxꞌixpul tib yubil Jesús ẍchiwutz. Wiꞌnin xtxekuneꞌn wutz, chi taneꞌn kꞌej. Ej nin yi beꞌch tetz, chin skoj nin ban. 3 Chijeꞌn tzun jobtuj kꞌajtzun Moisés tu kꞌajtzun Elías ẍchiwutz, nin eꞌ jilon tu Jesús. 4 Beneꞌn tzun tlol Luꞌ tetz Jesús:—Taꞌ, chumbalaj nin yi atoꞌ tzoneꞌj. Ko na tajuꞌ baꞌn kaban ox scabteꞌ, jun teruꞌ nin jun tetz Moisés nin jun tetz Elías, —stzun Luꞌ bantz.
5 I cunin na tzan Luꞌ tan yolcheꞌn yi yoleꞌj, yi cweꞌn muleꞌn noc sbakꞌ scyeꞌj. Chin litzꞌun nin yi sbakꞌaꞌtz, nin ben quibital jun yoltz: “Yi juneꞌj, yaꞌstzun inCyꞌajl, wiꞌnin okꞌleꞌn wutz waꞌn. Bitwok yi caꞌwl iꞌ,” stzun yi junaꞌtz ban tzajtz.
6 Yi quibital yi eꞌ ẍchusbeꞌtz yi jun xtxolbilaꞌtz, ninin eꞌ opon jokpuj wuxtxꞌotxꞌ tan paj xoꞌwl. 7 Toqueꞌn tzun ẍkansal tib Jesús scyeꞌj, nin bentz tan chiyuqueꞌn.
—Txiclijeꞌnwok, quil cxobwok.
8 Ma yi beneꞌn quilol, cyaꞌlt at, ntin Jesús.
9 Yi chipakxeꞌn tzaj le cuꞌnak tzaj, nintzun oc Jesús tan talcheꞌn scyetz:
—I bin jaluꞌ, qui na waj yi nink tzitalwok yi xtxolbileꞌj tetz jun wunak, ma na jalen cuꞌn yil nitzꞌij ẍchixoꞌl almaꞌ, yi in yi in Bajx Cyꞌajol.
10 Cyoqueꞌn tzun yi eꞌ ẍchusbeꞌtz tan jakleꞌn tetz:
—¿Mbi tzuntz yi na cyal yi eꞌ txꞌolol xoꞌl ley Moisés yi bajx cunin at tulbil Elías?
11 —Bintzi na tal yi ley Moisés yi at tulbil Elías bajx, tan nucꞌleꞌn cyakil yi eꞌchk takleꞌn. 12 Nin swaleꞌ nin tzitetz: Ja wiꞌt ulak, poro quinin mmeꞌl chitxum tetz. Ntin ja choꞌc tan buchleꞌn. Ej nin nchaꞌtz in, yi in Bajx Cyꞌajol, chocopon tan imbuchleꞌn, —stzun Jesús bantz scyetz.
13 Kalenaꞌs tzun teleꞌn chitxum yi eꞌ ẍchusbeꞌtz yi na tzan iꞌ tan yolcheꞌn Waꞌn Bautist.
Yi xicy yi na saj colpuj wiꞌ tan xyaꞌywiꞌil
(Mr 9.14-29; Lc 9.37-43)
14 Yi chicweꞌn poneꞌn kale ateꞌt yi eꞌ wunak, nin opon jun yaj te Jesús, nin cuꞌ mejloktz tan cꞌucheꞌn jun pawor tetz:
15 —Taꞌ, elk kꞌajabuꞌ te incyꞌajl. Tu na saj tu colp yi wiꞌ tan xyaꞌywiꞌil. Chin il nin na ban taꞌn. At na ban cuꞌnt yi na ben tkꞌakꞌ nka xe aꞌ tan paj. 16 Ja wal scyetz yi eꞌ ẍchusbeꞌtzuꞌ, poro quinin nchixcyeꞌ tan tulseꞌn yos tuchꞌ.
17 Beneꞌn tzun tlol Jesús scyetz yi eꞌ wunak:
—Lastum eꞌuꞌ. Qui na cyocsajuꞌ. Apart cyajtzaꞌkluꞌ. ¿Jat nin loꞌ tiemp tajweꞌn tan waꞌteꞌn ẍchixoꞌluꞌ? ¿Nicyꞌnaꞌt nin mucꞌbeꞌn cyeruꞌ? Quicyꞌaj tzajuꞌ yi xicy tzinwutz, —chij Jesús scyetz.
18 Toqueꞌn tzun Jesús tan lajeꞌn len yi espíritu cwent Baybaꞌn yi at twankil yi xicy. Yi teleꞌn ninin cunin ul yos tuchꞌ.
19 Itzun yi chicyajeꞌn cyen Jesús chichuc nintzun eꞌ oc yi eꞌ ẍchusbeꞌtz tan jakleꞌn tetz:
—Taꞌ, ¿mbitzuntz quinin nkaxcyeꞌ ketz tan lajeꞌn len yi espíritujaꞌtz?
20 Beneꞌn tzun tlol Jesús scyetz:
—Iꞌtz tan paj yi quiꞌc mas kꞌuklij icꞌuꞌl te Ryos. Jun cuꞌn yol swaleꞌ nin tzitetz, yi nink kꞌukeꞌ muꞌẍ tal niꞌ icꞌuꞌl te Ryos, baꞌn tzun kloꞌ tzitalnin te wutzeꞌj: ‘Cawleꞌn tcꞌuꞌl yi amaꞌleꞌj, nin quiloꞌk tul junt luwar,’ nin yaꞌtz nin sbneꞌ-tz. Na ko bintzinin kꞌuklij icꞌuꞌl sweꞌj, quiꞌc jun takleꞌn yi quiꞌk xcyeꞌwok tan banleꞌn. 21 Poro yi jun jilwutz espíritu cwent Baybaꞌneꞌj quiꞌc rmeril tan lajeꞌn len, ntin kol cxoꞌcwok tan nachleꞌn Kataj nin tan mucꞌleꞌn weꞌj.
Yi toqueꞌn Jesús tan talcheꞌn yi sbiylok
(Mr 9.30-32; Lc 9.43-45)
22 Itzun bantz te yi na chixon lakak amaꞌl cwent Galilea, nintzun oc Jesús tan talcheꞌn scyetz:
—Yi in wetz yi in Bajx Cyꞌajol ẍchinjatxlok ẍchikꞌab yi eꞌ wunak. 23 Ẍchinquimok cyaꞌn. Poro snitzꞌok junt tir le toxiꞌn kꞌej.
Yi quibital yi eꞌ ẍchusbeꞌtz yi xtxolbilaꞌseꞌj, takꞌ bis scyetz.
Yi cutxuj tetz caꞌl Ryos
24 Itzun bantz yi cyoponeꞌn Jesús scyuchꞌ yi eꞌ ẍchusbeꞌtz le tnum Capernaum, at tzun jun aj peyunl tetz yi cutxuj tetz yi caꞌl Ryos nin opon te Luꞌ, tan jakleꞌn yi xtxolbileꞌj tetz:
—¿Na peꞌ takꞌ yi cyeruꞌ chibajxomuꞌ yi tetz cutxuj tetz caꞌl Ryos?
25 —Na, —stzun Luꞌ bantz.
Poro yi tponeꞌn Luꞌ xe yi caꞌl kale atit Jesús, bajx jiloneꞌn tzaj Jesús tetz:
—Simón, ¿mbi na awal atz taꞌn? ¿Naꞌ scyetz eꞌ yi tajweꞌn tan chichojol yi eꞌchk alcawal tu yi eꞌchk cutxuj? ¿Na peꞌ cyakꞌ yi eꞌ wiꞌtz ajcaw yi cyetz chicutxuj? Nin yi eꞌ cyuchꞌ, ¿na peꞌ cyakꞌ cyetz chicutxuj? ¿Nka ntin yi eꞌ yi quiꞌc cyetz chikꞌej?
26 —Quiꞌ taꞌ, ntin na cyakꞌ yi eꞌ yi quiꞌc cyetz chikꞌej, —stzun Luꞌ.