Yi cyoqueꞌn yi eꞌ parisey scyuchꞌ yi eꞌ sadusey tan jakleꞌn jun milawr
(Mr 8.11-13; Lc 12.54-56)
16
1 Itzun ban, nintzun eꞌ opon cobox parisey, nin cobox sadusey te Jesús. Yi cyajbil iꞌtz yi ẍeꞌnk ljal til. Cyoqueꞌn tzuntz tan jakleꞌn tetz tan ẍchajol jun milawr tan ẍchajleꞌn yi ko bintzinin choꞌn nin na saj yi porer iꞌ tcyaꞌj. 2 Poro quinin ẍchaj jun milawr scyetz. Ntin tal scyetz: “Yi eꞌ cyeruꞌ baꞌn na el chitxumuꞌ te yi mbi ekaꞌn tan yi eꞌchk techl yi na jal tcyaꞌj. Na yi ko ẍeẍ yi xe cyaꞌj yi na cuꞌ kꞌej, na cyaluꞌ: ‘Yi chumbalaj sbneꞌ yi junt kꞌej eklen.’ 3 Ej nin ko ẍeẍ yi sbakꞌ yi txant tan jeꞌn mul kꞌej, na cyaluꞌ: ‘Yi at tulbil abal.’ Bintzinin na el chitxumuꞌ tetz eꞌchk techlaꞌtz. Poro qui na el chitxumuꞌ tetz yi mbi ekaꞌn waꞌn, nin yi mbi na bajij jalcuꞌn ẍchiwutzuꞌ. Na cyocsaj quibuꞌ balaj, poro chiwutz tuwuꞌ, chiplaj tuwuꞌ. 4 Chin juntlen nin eꞌuꞌ. Ja cyaj cyen quiloluꞌ Ryos. Niꞌcuꞌn eꞌuꞌ swutz Ryos chi jun jopol wutzaj. Poro ilenin na chitzanuꞌ tan jakleꞌn jun milawr tetz. Quil chajlij jun milawr scyeruꞌ. Ntinaꞌtz jun ẍchajlok ẍchiwutzuꞌ, iꞌtz yi milawr yi bajij te Jonás,” stzun Jesús scyetz.Eꞌ cyajeꞌn cyen tzun tiloltz, nin icyꞌtz.
Juntlen chichusuꞌn yi eꞌ parisey
(Mr 8.14-21)
5 Yi quicyꞌeꞌn poneꞌn yi eꞌ ẍchusbeꞌtz jalaj cyꞌen aꞌ, quinin chinach tan lokꞌcheꞌn nin chiwaꞌ. 6 Ej nin yi na tzan nin Jesús tan yol scyetz, ja tal:
—Or tzitil yi chitxꞌamil yi eꞌ parisey, scyuchꞌ yi eꞌ sadusey.
7 Yi quibital yi eꞌ ẍchusbeꞌtz, quinin el chitxum tetz, nintzun cyaltz squibil quib.
—Yi xtxolbileꞌj yi na kubit nin, iꞌtz loꞌ yi qui nkanach tan ticyꞌleꞌn tzaj pam, —cheꞌch.
8 Poro yi teleꞌn xtxum Jesús te cyajtzaꞌkl, nintzun ben tlol scyetz.
—¿Nxac na ital yi quiꞌc ketz kapam? ¿Qui peꞌ kꞌuklij icꞌuꞌl sweꞌj? 9 ¿Qui peꞌ na pujx itaꞌn, nin qui peꞌ na ul txꞌakx ticꞌuꞌl yi oꞌ pam yi xcon waꞌn tan chicꞌaꞌcheꞌn oꞌ mil wunak? ¿Qui peꞌ na ul txꞌakx ticꞌuꞌl jatnaꞌ moꞌtx pam sowrin? 10 ¿Qui peꞌ na ul txꞌakx ticꞌuꞌl yi juk pam yi xcon waꞌn tan chicꞌaꞌcheꞌn yi cyaj mil wunak? ¿Qui peꞌ na ul txꞌakx ticꞌuꞌl yi jatnaꞌ moꞌtx pam yi sowrin? 11 ¿Mbi tzuntz yi quinin na pujx inyol itaꞌn? Yi wetz, qui na chintzan tan xtxumleꞌn chipam yi eꞌ parisey scyuchꞌ yi eꞌ sadusey, ma na i xtxꞌamil cyajtzaꞌkl.
12 Kalenaꞌs tzun teleꞌn chitxum tetz yi qui na tzan Jesús tan xtxumleꞌn yi xtxꞌamil yi pam, ma na i chichusuꞌn yi eꞌ parisey tu chichusuꞌn yi eꞌ sadusey.
Yi talol Luꞌ yi Jesús iꞌ yi jun yi bixbaꞌnt tan tuleꞌn
(Mr 8.27-30; Lc 9.18-21)
13 Itzun bantz yi ateꞌ tul yi luwar Cesarea, cwent Filipo, nintzun oc Jesús tan jakleꞌn scyetz yi eꞌ ẍchusbeꞌtz:
—Ma jaluꞌ, yi In wetz yi in Bajx Cyꞌajol, ¿naꞌ scyetz in ẍchiwutz wunak?
14 —At bin eꞌ yi na cyal yi iluꞌaꞌtz yi kꞌajtzun Waꞌn Bautist yi ja itzꞌij junt tir. Ej nin at eꞌ yi na cyal yi i iluꞌaꞌtz yi kꞌajtzun Elías. Nin at na cyal yi iluꞌaꞌtz yi kꞌajtzun Jeremías, nka alchok scyetz jun scyeri eꞌ elsanl stziꞌ Ryos yi quimnakeꞌ, —cheꞌch.
15 Beneꞌn tzun jakol junt tir scyetz:
—Ma le iwutz itetz, ¿naꞌ scyetz in?
16 Sajeꞌn tzun stzaꞌwel Simón Luꞌ:
—Taꞌ, i iluꞌaꞌtz yi Cristo yi jun yi bixbaꞌnt tan tuleꞌn. I iluꞌaꞌtz yi Cyꞌajl kaRyosil yi itzꞌ nin tetz, —stzun Luꞌ tetz.
17 —Baꞌn awetz Simón, cyꞌajl Jonás, na nkꞌeꞌtz jun wunak nchajon yi xtxolbilaꞌtz tzatz, ma na i yi Intaj yi at tcyaꞌj. 18 Ma jaluꞌ, yi in wetz swaleꞌ jun xtxolbil tzatz: I aẍaꞌtz aẍ Luꞌ. Nin jepon intxicbal weri incmon tibaj yi jun cꞌubaꞌtz, nin quil xcyeꞌ yi porer Baybaꞌn tan xiteꞌn. 19 Nchaꞌtz swakꞌeꞌ yi laweꞌil yi tcyaꞌj tzatz. Ej nin alchok eꞌchk ajtzaꞌkl yil cẍoꞌc tan makleꞌn tzoneꞌj wuxtxꞌotxꞌ, nsken bixeꞌ tan Ryos tcyaꞌj. Ej nin nchaꞌtz alchok eꞌchk takleꞌn yil cẍoꞌc tan pujleꞌn tzoneꞌj wuxtxꞌotxꞌ nsken takꞌ Ryos amaꞌl tetz, —stzun Jesús bantz.
20 Cawuneꞌn tzun Jesús scyetz cyakil yi eꞌ ẍchusbeꞌtz:
—Cyaꞌl tzitalwit yi intziblal yi i inaꞌtz yi Cristo.
Yi talol Jesús yi chocopon wunak tan biyleꞌn cuꞌn
(Mr 8.31-9.1; Lc 9.22-27)
21 Yi teleꞌn chitxum tetz yi mbi ekaꞌn taꞌn, nintzun oc Jesús tan xtxꞌolcheꞌn xoꞌl yi mbi sbajok te iꞌ. Itzun taltz:
—At imbembil Jerusalén. Yil nopon chocopon yi eꞌ wiꞌ banl wiꞌ tetz tnum scyuchꞌ yi eꞌ wiꞌtz paleꞌ, nin yi eꞌ txꞌolol xoꞌl yi ley Moisés tan imbuchleꞌn. Chinquimok cyaꞌn, poro snitzꞌok le toxiꞌn kꞌej, —chij Jesús ban scyetz yi eꞌ ẍchusbeꞌtz.
22 Teleꞌn tzun moxol Luꞌ Jesús joylaj len muꞌẍ, nin octz tan talcheꞌn tetz tan qui talol yi jun xtxolbilaꞌtz.
—Quiꞌk ltakꞌ Ryos jun xtxolbilaꞌtz teruꞌ. Quiꞌc rmeril yi nink bajij yi jun xtxolbilaꞌtz teꞌjuꞌ taꞌ, —chij Luꞌ bantz tetz Jesús.
23 Jeꞌn tzun suchꞌkꞌil tib Jesús, nintzun taltz tetz Luꞌ:
—Cawleꞌn sweꞌj Satanás, Na na cẍtzan tan inmakleꞌn. Na yi awajtzaꞌkl nkꞌeꞌtz choꞌn na saj te Ryos, ma na iꞌtz cyajtzaꞌkl tuꞌ wunak, —chij Jesús bantz tetz Luꞌ.
24 Beneꞌn tzun tlol Jesús scyetz yi eꞌ ẍchusbeꞌtz:
—Alchok scyetz yi na taj xom tzaj sweꞌj, tajweꞌn yi quil sban yi tetz tajbil; nin chin tajweꞌn cunin yi list iꞌ tan tkꞌol tib tkꞌab quimichil chi na cꞌox tib jun yaj tan quimeꞌn swutz pasyon. 25 Poro cyakil yi eꞌ yi mas na chipekꞌ te yi ankꞌiꞌn tetz tzoneꞌj wuxtxꞌotxꞌ, chitzꞌakeꞌ cyeraꞌtz yi quitzꞌajbil tetz ben kꞌej ben sak. Poro ko list atit jun yaj tan tilweꞌn cyen yi ankꞌiꞌn tetz tzoneꞌj wuxtxꞌotxꞌ, tan tuꞌ yi na chintocsaj, scambaj yi stzꞌajbil. 26 Quiꞌc ltakꞌ tetz jun yaj mpe nink cambaj cyakil yi eꞌchk takleꞌn yi at tzoneꞌj wuxtxꞌotxꞌ kol stzꞌak yi stzꞌajbil tan paj. Na quiꞌc jun takleꞌn baꞌn takꞌ jun yaj tan jaleꞌn stzꞌajbil. 27 Ej nin yi in wetz, yi in Bajx Cyꞌajol, nuꞌl junt tir. Yil nuꞌl, cyꞌaꞌn kꞌej Intaj waꞌn, ej nin xomcheꞌ yi eꞌ ángel sweꞌj. Kalenaꞌs tzun nuꞌl tan takꞌleꞌn chicaws yi eꞌ mal nak, nin tan takꞌleꞌn jun oy scyetz yi eꞌ balaj nak. Tu nin xom quen te yi mbi cuꞌn mbaj chibnol.
28 Poro je junt xtxolbileꞌj: Jun cuꞌn yol at eꞌ tzixoꞌlwok yi quiꞌ chan lchiquim, jalen cuꞌn quil yil tzꞌakꞌlij wetz inkꞌej tan cawuꞌn, yi in yi in Bajx Cyꞌajol.