Yi ẍeꞌn na jal til jun yaj swutz Kataj
(Mr 4.7-23)
15
1 Cyoponeꞌn tzun cobox parisey, scyuchꞌ cobox txꞌolol xoꞌl ley Moisés te Jesús. Choꞌn chisajeꞌn Jerusalén. Nintzun eꞌ octz tan jakleꞌn jun xtxolbil tetz Jesús.2 —Taꞌ, —cheꞌch—, ¿mbi tzuntz qui na chixom yi eꞌ ẍchusbeꞌtzuꞌ te yi chicstumbr yi eꞌ kamam kateꞌ? Na qui na chixom te yi kaley yi na tal yi tajweꞌn tan kaxansal kakꞌab yi ntaxk kawan, —cheꞌch bantz tetz Jesús.
3 —Yi eꞌ cyeruꞌ, pyor tcuꞌn, na na chitzanuꞌ tan pajleꞌn yi mero caꞌwl Ryos, na ntin na chibuch quibuꞌ tan banleꞌn taneꞌn yi eꞌchk leyaꞌtz yi jeꞌnak tuꞌ chinakꞌbaluꞌ. 4 Na at jun caꞌwl Ryos yi qui na chibanuꞌ taneꞌn yi na tal: ‘Lokꞌwok itaj itxuꞌ.’a Nchaꞌtz alijt taꞌn: ‘Alchok scyetz yi na jis yi eꞌ taj xtxuꞌ, tajweꞌn tan biyleꞌn cuꞌn.’b 5 Poro yi eꞌ cyeruꞌ baꞌn ẍchiwutzuꞌ yi nink tal jun yaj te taj xtxuꞌ: ‘Taꞌ, quiꞌc rmeril yi nink noꞌc tan quichꞌeyeꞌnuꞌ, na cyakil yi wetz yi ja kloꞌ wakꞌ teruꞌ, ja wiꞌt insuk tetz Ryos.’ 6 Le chiwutz cyeruꞌ yi baꞌn yi jun ajtzaꞌklaꞌtz. Na le chiwutz cyeruꞌ yi nkꞌeꞌtz tajweꞌn tan tkꞌol jun yaj muꞌẍ ẍchꞌeybil tetz taj xtxuꞌ yi ko ja wiꞌt suk tetz Ryos. Taꞌn tuꞌ yi na chixomuꞌ te cyeruꞌ cyajtzaꞌkluꞌeꞌj, na chitzanuꞌ tan telseꞌn kꞌej yi mero caꞌwl Ryos. 7 Na cyocsaj quibuꞌ balaj, poro chiwutz tuwuꞌ, chiplaj tuwuꞌ. Bintzinin yi cyajnak yolol Isaías, yi elsanl stziꞌ Ryos tentz:
8 ‘Yi wunakeꞌj na cyakꞌ inkꞌej, poro chitziꞌ tuꞌ chiplaj tuꞌ. Na qui ajlij chicꞌuꞌl sweꞌj.
9 Quiꞌc na takꞌ yi eꞌchk chimunl yi na chiban tzinwutz na caꞌwl tuꞌ wunak na chitzan tan banleꞌn taneꞌn,’c stzun Jesús bantz.
10 Toqueꞌn tzun Jesús tan chichakleꞌn tzaj yi eꞌ wunak, nintzun taltz scyetz:
—Quibit tzajuꞌ inyol. Choꞌkuꞌ tan xtxumleꞌn yi yol yi swaleꞌ nin scyeruꞌ: 11 Quiꞌc til jun teꞌj yi kol baj eꞌchk takleꞌn taꞌn yi ntaxk xansaj yi kꞌab, na nkꞌeꞌtz yi na oc le katziꞌ yaꞌstzunk na jaleꞌt kil. Ma na i yi eꞌchk yol yi na el tzaj le katziꞌ, —chij Jesús scyetz.
12 Toqueꞌn tzun chiẍkansal quib yi eꞌ ẍchusbeꞌtz Jesús xlaj iꞌ, nintzun cyaltz tetz:
—Taꞌ, ¿ja peꞌ pujx taꞌnuꞌ yi ja jeꞌ ẍchiwutz yi eꞌ parisey yi yol yi ntaluꞌ? —cheꞌch.
13 —¿Yaꞌtz peꞌ? Poro je jun puntileꞌj: Yi Intaj yi at tcyaꞌj, jepon bukꞌul cyakil yi ujul yi nkꞌeꞌtz iꞌ awal tetz. 14 Quil cxbisunwok scyeꞌj yi eꞌ pariseyaꞌtz, na jopij wutz cyajtzaꞌkl. Nin je junt xtxolbileꞌj: Kol tzꞌoc jun moyiꞌẍ tan ẍchꞌineꞌn nin junt moyiꞌẍ, niꞌcuꞌn nchiben tzoyp tjul, —stzun Jesús scyetz eꞌ ẍchusbeꞌtz.
15 Toqueꞌn tzun Luꞌ tan jakleꞌn tetz Jesús:
—Taꞌ, taleꞌuꞌ sketz yi mbi ekaꞌn tan yi elsawutzil yi ntaluꞌ.
16 —¿Nchaꞌtz peꞌ axwok? ¿Qui peꞌ na el itxum tetz? 17 ¿Qui peꞌ na el itxum tetz yi cyakil yi eꞌchk cumir yi na baj tan jun yaj, choꞌn na opon teꞌtz le cꞌuꞌl, nin na elt? 18 Poro yi eꞌchk yol yi na el tzaj le stziꞌ, choꞌn na saj le xtxumuꞌn, te talmaꞌ. Yaꞌstzun na jaleꞌt til. 19 Nin yi eꞌchk yab ajtzaꞌkl yi na saj te talmaꞌ, yaꞌstzun yi na piton nin tan biyolnakiꞌn, nin tan jopol wutzajiꞌn. Yaꞌstzun na piton nin tan yajiꞌn, nka xnaꞌniꞌn. Yaꞌstzun na piton nin tan alakꞌ, nin tan talcheꞌn eꞌchk laꞌjil, nka tan ẍchaqꞌueꞌn yol. 20 Tan yi eꞌchk ajtzaꞌklaꞌtz, yaꞌstzun na jaleꞌt til jun yaj. Qui na jal til jun yaj tan tuꞌ yi qui na xansaj yi kꞌab yi ntaxk oc tan waꞌaꞌn, —chij Jesús scyetz.
Yi tocsal jun xnaꞌn awer nak
(Mr 7.24-30)
21 Teleꞌn tzaj tzun Jesús tul yi jun amaꞌlaꞌtz. Choꞌn tzun tponeꞌntz le amaꞌl cwent Tiro tu Sidón.
22 At tzun jun xnaꞌn aj Canaán yi choꞌn najlij tcꞌuꞌl jun amaꞌlaꞌtz. Nkꞌeꞌtz judiy iꞌ. Tponeꞌn tzun iꞌ-tz swutz Jesús. Cyꞌaꞌnt nin yol taꞌn yi tponeꞌn:
—Taꞌ, jun cuꞌn iluꞌ yi xonl kꞌajtzun Luwiy yi at tulbil. Elk kꞌajabuꞌ sweꞌj. Na at jun wal xun yi wiꞌnin il at cuꞌnt tan jun espíritu cwent Baybaꞌn yi at twankil, —chij iꞌ bantz tetz Jesús.
23 Poro yi Jesús, quinin oc il teꞌj. Cyoqueꞌn tzun yi eꞌ ẍchusbeꞌtz tan talcheꞌn tetz:
—Taꞌ, baꞌn tcuꞌn talninuꞌ tetz tan tajeꞌn na tunin na ẍchꞌin tuꞌ-tz wutz kacoc.
24 Beneꞌn tzun tlol Jesús tetz yi xnaꞌn:
—Yi in wetz ja chinsaj chakij ntin scyetz yi eꞌ aj Israel, yi txꞌakxnakeꞌ swutz Ryos.
25 Poro yi xnaꞌn, nin oc ẍkansal tib, nin cuꞌ mejlok swutz Jesús tan talcheꞌn:
—Taꞌ, chinẍchꞌeyajuꞌ.
26 —Qui na yub kol kamajlen chiwaꞌ nitxaꞌ tan beneꞌn kukꞌol scyetz yi eꞌ txꞌiꞌ, —chij Jesús tetz yi xnaꞌn.
27 —Bintzi Taꞌ, poro yi eꞌ txꞌiꞌ, ilen nin na chiwan te waꞌbeꞌn yi taw, —stzun xnaꞌn.
28 —Ti, jun cuꞌn yol yi choꞌn kꞌuklij acꞌuꞌl sweꞌj, sbnixk tzun yi awajbil, —stzun Jesús bantz.
Ninin cunin ul yos tu tal yi xnaꞌn.
Yi tuleꞌn yos scyuchꞌ wiꞌnin yabiꞌẍ
29 Teleꞌn tzaj tzun Jesús le jun luwaraꞌtz, choꞌn tzun tponeꞌntz tzi aꞌ Galilea. Ma yi tponeꞌn, nintzun bentz wiꞌwtz, nin cꞌoleꞌ cuꞌntz wuxtxꞌotxꞌ. 30 Wiꞌnin wunak eꞌ opontz kale atiteꞌt iꞌ. Cyꞌaꞌn len yabiꞌẍ cyaꞌn. At eꞌ yi cyꞌaꞌn coꞌx cyaꞌn. At eꞌ yi cyꞌaꞌn moyiꞌẍ cyaꞌn. At mem eꞌ opontz. Ej nin at eꞌ yi poꞌtnak chikꞌab, nin at wiꞌnin jilwutz yabiꞌẍ baj opontz cyaꞌn swutz Jesús. Baj ul len yos taꞌn scyuchꞌ.
31 Wiꞌnin tzun cyeleꞌn yab wunak yi quilol yi baꞌnt chijilon yi eꞌ mem, nin yi tuleꞌn yos scyuchꞌ yi eꞌ yi poꞌtnak chikꞌab, nka quikan. Nin wiꞌnin cyeleꞌn yab yi quilol yi baꞌnt chixon yi eꞌ coꞌx, nin yi baꞌnt chixmayin yi eꞌ moyiꞌẍ.
Cyoqueꞌn tzun cyakil yi eꞌ aj Israelaꞌtz, tan takꞌleꞌn chikꞌajsbil tetz Kataj Ryos.
Yi chiwaneꞌn cyaj mil yaj tan milawr Jesús
(Mr 8.1-10)
32 Chisajeꞌn tzun ẍchakol Jesús yi eꞌ ẍchusbeꞌtz, itzun taltz scyetz:
—Na el inkꞌajab scyeꞌj yi eꞌ wunakeꞌj, na ja el oxix kꞌej yi ateꞌ tzoneꞌj sweꞌj, nin quiꞌc chiwaꞌ. Qui na waj cheꞌ inchak nin xeꞌak chicaꞌl yi ntaxk chiwan, ko tzun chisaj num tbeꞌ tan paj weꞌj, —chij Jesús bantz.
33 —Poro taꞌ, ¿naꞌ ljaleꞌt chiwaꞌ jun cꞌoloj wunakeꞌj? Na cyaꞌl nin atit siquier jun caꞌl nakaꞌj, —cheꞌch.
34 —¿Jatnaꞌ tkan pam cyꞌaꞌn itaꞌn? —chij Jesús scyetz.
—Juk intziꞌ pam cyꞌaꞌn kaꞌn taꞌ, tu cobox tal cay, —cheꞌch bantz.
35 Cawuneꞌn tzun Jesús tan chicweꞌn cꞌolchok cyakil yi eꞌ wunakaꞌtz wuxtxꞌotxꞌ. 36 Jeꞌn tzun tcyꞌal yi caytz tu pam, nin tyoẍintz tetz Ryos. Yi wiꞌt tyoẍineꞌn nin cuꞌ piẍultz, nin ben tkꞌoltz scyetz yi eꞌ ẍchusbeꞌtz.
Cyoqueꞌn tzun ẍchusbeꞌtz tan jatxleꞌn nin scyetzak wunak. 37 Eꞌ baj wan len cyakil yi eꞌ wunakaꞌtz. Baj noj len chicꞌuꞌltz. Poro ja sowrin juk moꞌtx piẍaꞌl pam tu cay yi quinin chixcyeꞌ tan bajseꞌn. 38 Te jun tir waꞌaꞌnaꞌtz ja chiwan cyaj mil yaj, apart xnaꞌn nin apart nitxaꞌ.
39 Ma yi stzajeꞌn wiꞌ yol Jesús nin eꞌ baj aj ẍchakol yi eꞌ wunak.
Toqueꞌn tzun Jesús tul barc. Nintzun icyꞌtz wi aꞌ tan toponeꞌn le luwar yi na biꞌaj Magdala.