Yi tuleꞌn yos tu jun ẍnukl cuntuꞌ wankil
(Mr 2.1-12; Lc 5.17-26)
9
1 Toqueꞌn tzun Jesús tcꞌuꞌl jun barc, nin icyꞌtz jalaj icyꞌen aꞌ tan tponeꞌn le tetz tanum. 2 Itzun bantz yi at iꞌ le tetz tanum, nin opon ticyꞌleꞌn jun yaj swutz. Yi jun yajaꞌtz, ẍnukl cuntuꞌ wankil tan yabil. Chaꞌstzun te palij tponeꞌn swutz Jesús. Yi tilol Jesús yi kꞌuklij chicꞌuꞌl yi eꞌ yi palol tetz, nintzun taltz tetz yi yabiꞌẍ:—Witzꞌun, quiꞌt cẍbisun, na ja wiꞌt cuylij apaj, —stzun Jesús tetz.
3 Ateꞌ tzun cobox txꞌolol xoꞌl ley Moisés, nin ben quibital yol Jesús, nin eꞌ baj octz tan xtxumleꞌn chicꞌuꞌl cuntuꞌ: “Yi yajeꞌj na tzan tan telseꞌn kꞌej Ryos,” cheꞌch. 4 Poro yi Jesús, nin el xtxum te cyajtzaꞌkl, nin ben tlol scyetz:
—¿Nxac na chitzanuꞌ tan xtxumleꞌn yi jun ajtzaꞌklaꞌtz? Cachiꞌ na chibanuꞌ. 5 Na yi nink walnin tetz jun yabiꞌẍ: ‘Ja cuylij apaj,’ nka nink walnin: ‘Txiclijeꞌn, xon,’ niꞌcuꞌn qꞌuixbel cabil xtxolbil, na cyaꞌl nin jun nink xcyeꞌ tan banleꞌn, ntin Ryos. 6 I bin jaluꞌ, tan ẍchajleꞌn scyeruꞌ yi at caꞌwl tinkꞌab tan cuyleꞌn chipaj wunak, swaleꞌ nin tetz yabiꞌẍeꞌj:
—Yaj txiclijeꞌn, ja ul yos tzawuchꞌ, quiloꞌk xe acaꞌl, —stzun Jesús tetz.
7 Jeꞌn tzun txiclok yi yabiꞌẍ, nin ajtz xe caꞌl. 8 Yi quilol yi eꞌ wunak yi xtxolbileꞌj, ja cheꞌl yab teꞌj, nin ja cyakꞌ chikꞌajsbil tetz Ryos.
—Chumbalaj nin yi makꞌlij yi jun jilwutz poreraꞌtz tetz yi yajeꞌj, —cheꞌch tzun bantz.
Yi jeꞌn xtxaꞌol Jesús yi Teꞌy
(Mr 2.13-17; Lc 5.27-32)
9 Yi nsken el tzaj Jesús le tanum, nin noj quen te jun yaj yi na biꞌaj Teꞌy. Choꞌn cꞌolchij iꞌ kale na eleꞌt alcawal.
—Quin, xomen tzaj sweꞌj, —stzun Jesús tetz.
Beneꞌn nin ban xomok Teꞌy te Jesús.
10 Ej itzun yi na tzan Jesús tan waꞌaꞌn scyuchꞌ eꞌ ẍchusbeꞌtz xe jun caꞌl, nintzun eꞌ opont coboxt elsanl alcawal, scyuchꞌ coboxt juchul il tan waꞌaꞌn scyuchꞌ Jesús. 11 Ej nin yi quilol yi eꞌ parisey yi na wan Jesús ẍchixoꞌl yi eꞌ juchul ilaꞌtz, nintzun eꞌ octz tan jakleꞌn scyetz yi eꞌ ẍchusbeꞌtz Jesús:
—¿Nxac na wan chibajxomuꞌ ẍchixoꞌl yi eꞌ taꞌk elsanl alcawal scyuchꞌ yi eꞌ mas juchul ileꞌj? —cheꞌch bantz.
12 Poro yi tbital Jesús chiyol, nintzun tal scyetz:
—Yi eꞌ yi quiꞌc chiyab, qui tajweꞌn jun ajtzꞌac scyetz, ma yi eꞌ yabiꞌẍ, tajweꞌn ajtzꞌac scyetz. 13 Baꞌn tcuꞌn yi nink choꞌcuꞌ tan xtxumleꞌn yi mbi na elepont yi yoleꞌj yi tzꞌibaꞌnt cyen yi na tal: ‘Nkꞌeꞌtz txꞌixwatz na waj, ma na yi wetz wajbil iꞌtz yi nink tzꞌel ikꞌajab teꞌj junt.’ Na yi wetz, quinin nnuꞌl tan chijoyleꞌn yi eꞌ balaj, ma na ja nuꞌl tan chijoyleꞌn yi eꞌ juchul il bantz jeꞌn chitxꞌixpul cyajtzaꞌkl.
Jun xtxolbil tetz mucꞌleꞌn weꞌj
(Mr 2.18-22; Lc 5.33-39)
14 Nchaꞌtz eꞌ opon cobox ẍchusbeꞌtz Waꞌn Bautist tan jakleꞌn jun xtxolbil tetz Jesús:
—Yi oꞌ ketz, scyuchꞌ yi eꞌ parisey, at na ban cuꞌnt yi qui na kawan yi na kaban yi kamunl swutz Ryos, poro yi eꞌ teruꞌ ẍchusbeꞌtzuꞌ, qui na chimucꞌ weꞌj yi na chiban cyetz chimunl swutz Ryos. ¿Mbitzun loꞌ-tz? —cheꞌch bantz tetz Jesús.
15 —Qui na yub yi ko na chibisun nin ko na chimucꞌ weꞌj yi eꞌ inchusbeꞌtz te yi atineꞌt ẍchixoꞌl. Na je jun elsawutzileꞌj: Qui na yub yi ko na chibisun eꞌ aj quicyujinl te yi at yi trat yi xun ẍchixoꞌl. Poro ẍchibisunk, nin chimuqꞌueꞌ weꞌj yil tzꞌel ticyꞌleꞌn ẍchixoꞌl. Nchaꞌtz sbajok yil neꞌl ticyꞌleꞌn wetz ẍchixoꞌl yi eꞌ inchusbeꞌtz.
16 “Nin je junt elsawutzileꞌj, yi na ẍchaj yi na lab tib wetz inchusuꞌn tu yi antiw chusuꞌn. Na cyaꞌl nin jun yi nink xcon jun piẍ chaꞌbil yi txeꞌn cunin muꞌxij tan lapeꞌn jun beꞌch tetz buꞌyt. Na yi chaꞌbil yi txeꞌn cunin muꞌxij, iteꞌn nin iꞌaꞌtz tzꞌocopon tan katzleꞌn yi buꞌyt. Mas tcuꞌn mben loꞌon yi katzaꞌl. 17 Nchaꞌtz qui na xcon jun buꞌyt tzꞌuꞌm tan colcheꞌn tꞌaꞌal uva yi watok cunin bnix. Na yi ko yaꞌtz, skatzok yi buꞌyt tzꞌuꞌm yil pucꞌun wutz yi tꞌaꞌal loꞌbaj. Nin skojxok yi aꞌ yi at tul. Elnak chitxumuꞌ tetz yi ko watok cunin bnix tꞌaꞌal loꞌbaj, tajweꞌn tan cweꞌn tul jun acꞌaj tzꞌuꞌm. Qui tzun lkatz yi tzꞌuꞌm nin quil kojx yi tꞌaꞌal loꞌbaj. Nchaꞌtz weri inchusuꞌn, xitok kol yuj tib tu yi antiw chusuꞌn.a
Yi xtxolbil tetz yi meꞌl Jairo
(Mr 5.21-43; Lc 8.40-56)
18 I cunin na tzan Jesús tan talcheꞌn eꞌchk takleꞌnaꞌseꞌj yi tponeꞌn jun ajcaw scyeri eꞌ judiy te Jesús. Cweꞌn tzun mejloktz tan cꞌucheꞌn jun pawor tetz:
—Taꞌ, anaꞌ chan cunin nquim inmeꞌl, poro yi nink benuꞌ sweꞌj nin yi nink takꞌeꞌnuꞌ kꞌabuꞌ twiꞌ, tzꞌitzꞌok junt tir.
19 Jeꞌn tzun txiclok Jesús nin bentz teꞌj. Nchaꞌtz yi eꞌ ẍchusbeꞌtz, eꞌ xomnintz. 20 Te yi na chixon tbeꞌ, nin oc ẍkansal tib jun xnaꞌn wutz coc Jesús. Yi jun xnaꞌnaꞌtz, nsken el coblajix yob yi quinin na taneꞌ yi xtxꞌajoꞌn. Yi tocomponeꞌn nakaꞌjil Jesús, nin oc macol yi beꞌch tetz. 21 Na yi xtxumuꞌn yi xnaꞌn iꞌtz: “Yi nink tzinmac quen yi beꞌch tetz, tzꞌul yos swuchꞌ,” stzun iꞌ tcꞌuꞌl cuntuꞌ. 22 Inti Jesús, yi nachoneꞌn teꞌj yi toqueꞌn macol xnaꞌn yi juꞌ yi beꞌch tetz, nin jeꞌ suchꞌkꞌil tib tan tilweꞌn yi naꞌ macon iꞌ. Yi beneꞌn tilol iꞌ yi xnaꞌn, itzun taltz tetz:
—Quil cẍbisun na ja wiꞌt ul yos tzawuchꞌ, tan tuꞌ yi mawocsaj yi chinxcyek tan tulseꞌn yos tzawuchꞌ, —stzun Jesús bantz tetz.
Ninin ul yos tu yi xnaꞌn.
23 Ma yi tponeꞌn Jesús xe caꞌl yi ajcaw, na chitzan eꞌ aj kbetzum tan tocseꞌn son almaꞌ, nin wiꞌnin cyokꞌeꞌn wunak. 24 Beneꞌn tzun tlol:
—Cheꞌlkuꞌ tziꞌn, na yi xun nkꞌeꞌtz quimich mban teꞌtz. Watl tuꞌ na ban. Poro yi eꞌ wunak tzeꞌeꞌn tuꞌ eꞌ ban te yol Jesús. 25 Ma yi cyeleꞌn tzaj wunak xe caꞌl, nintzun oc quen Jesús. Ma tocomponeꞌn kale atit yi xun, nintzun jeꞌ tzaj ẍchꞌinul yi kꞌab. Uleꞌn nin ban yos tuchꞌ, nin jeꞌ txiclok. 26 Beneꞌn nin tzun ban loꞌon stziblal yi mbi cuꞌn ban Jesús. Quibital tzun cyakil wunak yi najlcheꞌ-tz le eꞌchk amaꞌlaꞌtz.
Yi tuleꞌn yos scyuchꞌ cob moyiꞌẍ
27 Itzun bantz, yi teleꞌn tzaj Jesús xe jun caꞌlaꞌtz, nin yi xoneꞌn tbeꞌ, nintzun eꞌ ẍchꞌin tzaj cob moyiꞌẍ wutz coc iꞌ. Je yol yi cyaleꞌj:
—Taꞌ, elk kꞌajabuꞌ skeꞌj, na iluꞌ yi xonl kꞌajtzun Rey Luwiy yi at tulbil, —cheꞌch bantz.
28 Itzun yi tocomponeꞌn Jesús xe junt caꞌl, nchaꞌtz yi eꞌ moyiꞌẍ, nin eꞌ ocopon xlaj.
—¿Na peꞌ itocsaj yi chinxcyek tan tulseꞌn yos tzituchꞌ? —stzun Jesús scyetz.
—Na, na kocsaj taꞌ, —cheꞌch.
29 Beneꞌn tzun Jesús tan macleꞌn quen chiwutz, nin ben tloltz scyetz:
—Tzꞌul yos tzituchꞌ kol tzitocsaj cuꞌn yi chin xcyek teꞌj.
30 Ninin jakxij chiwutz. Beneꞌn tzun tlol Jesús scyetz:
—Cyaꞌl tzitalwok nint yi xtxolbileꞌj.
31 Poro watok cunin cheꞌl tzajtz le jun caꞌlaꞌtz yi cyoqueꞌn tan xtxoleꞌn yi mbi cuꞌn ban Jesús scyeꞌj. Beneꞌn nin ban loꞌon yi stziblaltz le yi amaꞌlaꞌtz.
Yi taꞌweꞌn yol tan jun mem
32 I cunin na cheꞌl tzaj yi cob moyiꞌẍaꞌtz yi cyoqueꞌnt coboxt wunak swutz Jesús. Cyꞌaꞌn jun yaj cyaꞌn yi mem, yi at espíritu cwent Baybaꞌn twankil. 33 Yi teleꞌn lajul Jesús yi espíritu cwent Baybaꞌn yi at twankil yi memaꞌtz, ninin jilon. Cyakil nin eꞌ wunak eꞌ el yabtz teꞌj, nintzun cyaltz squibil quib:
—Cyaꞌl cunin na kilwit jun xtxolbil tzoneꞌj tkatanum chi yi milawreꞌj, —cheꞌch tzun bantz.
34 Inti yi eꞌ parisey, nin cyaltz:
—Bintzi yi jun yajeꞌj na xcyeꞌ tan chilajeꞌn len yi eꞌ espíritu cwent Baybaꞌn. Poro iꞌtz tan tuꞌ yi akꞌij yi porer iꞌ takꞌun yi wiꞌtz Baybaꞌn.
Yi teleꞌn kꞌajab Jesús scyeꞌj wunak
35 Itzun bantz, nintzun ben Jesústz tan txoliꞌn lakak eꞌchk tnum, nin lakak eꞌchk aldey. Ilenin nxcon eꞌchk sinagoga taꞌn tan chichusleꞌn wunak. Nin xtxol iꞌ yi balaj stziblal yi at tulbil Ryos tan cawuꞌn. Nin ul yos taꞌn scyuchꞌ eꞌ wunak yi eꞌ len yabiꞌẍ tan wiꞌnin jilwutz yabil.
36 Yi tilol Jesús yi ẍeꞌn cuꞌn quitaneꞌn wunak, ja el kꞌajab scyeꞌj, na choꞌn quitaneꞌn wunak chi quitaneꞌn jun buꞌj cneruꞌ yi quiꞌc pstor cyetz. Na na chibisun, nin elnakeꞌ tu xit, na quiꞌc cyetz chipstor.
37 Yi tilol Jesús yi ẍeꞌn quitaneꞌn yi eꞌ prow wunak, nintzun taltz scyetz eꞌ ẍchusbeꞌtz: