Yi tuleꞌn yos tu jun yaj yi at lepra tetz
(Mr 1.40-45; Lc 5.12-16)
8
1 Itzun bantz yi pakxeꞌn tzaj Jesús wi juꞌwtz, nin eꞌ xomnin wiꞌnin wunak teꞌj.2 Tponeꞌn tzun jun yaj teꞌj iꞌ yi at jun yabil teꞌj yi chin xoꞌwbil nin yi na biꞌaj lepra. Cweꞌn tzun mejloktz swutz Jesús, nin taltz tetz:
—Taꞌ, ¿cu peꞌ tanuꞌ yil tzꞌul yos tanuꞌ swuchꞌ?
3 Beneꞌn tzun Jesús tan macleꞌn cyen wankil yaj, nintzun taltz:
—Na, na waj tzꞌul yos tzawuchꞌ.
I cunin sajeꞌn tlol Jesús yi yoleꞌj, yi tuleꞌn yos tu yabiꞌẍ.
4 —I bin jaluꞌ yaj, cyaꞌl tzawalnint yi mbi mbajij tzaweꞌj. Ntinaꞌtz tuꞌ-tz, cun chaj awib tetz paleꞌ nin cyꞌajnin yi oy yi alijt cyen tan Moisés, bantz lajluchaxeꞌn ẍchiwutz wunak yi ja ul yos tzawuchꞌ, —stzun Jesús bantz.
Yi tuleꞌn yos tu yi mos capitán
(Lc 7.1-10)
5 Itzun bantz: At tzun jun capitán, aj Roma. List tzun iꞌ-tz tan cꞌulcheꞌn Jesús yi tocomponeꞌn le tnum Capernaum. Nintzun taltz tetz Jesús:
6 —Taꞌ, baneꞌuꞌ jun pawor swetz. At jun inmos xe incaꞌl. Wiꞌnin il at cuꞌnt, na ẍnukl cuntuꞌ wankil tan yabil.
7 —Cu, baꞌn bin chimben tan tulseꞌn yos tuchꞌ, —stzun Jesús tetz.
8 —Baꞌn tcuꞌn quil benuꞌ Taꞌ, na quiꞌc noc wetz inkꞌej yi nink ben tzajuꞌ xe incaꞌl. Ntin cawunk nin tuwuꞌ, tzꞌul tzun yos tu inmos. Na na wocsaj yi at caꞌwl tkꞌabuꞌ. 9 Na nchaꞌtz in, atin jakꞌ caꞌwl junt. Nin nchaꞌtz in, at caꞌwl tinkꞌab, na ateꞌ sanlar jakꞌ incaꞌwl. Kol walnin: “Quiloꞌkwok tzoneꞌj,” jalcuꞌn na chiben. Ej nin ko na walnin tetz junt: “Catzam tzoneꞌj,” jalcuꞌn na ul. Nchaꞌtz yi na walnin jun mantar tetz inmos, na bnix taꞌn. Chaꞌstzun te, cawunk nin tuwuꞌ, tzꞌul tzun yos tu inmos, —stzun yaj ban nintz tetz Jesús.
10 Yi tbital Jesús yi xtxolbileꞌj, wiꞌnin teleꞌn yab teꞌj, nin ben tloltz scyetz yi eꞌ yi xomcheꞌ teꞌj:
—Jun cuꞌn yol na walnin scyeruꞌ, quiꞌc nin jun ketz katanum aj Israel yi kꞌuklij cꞌuꞌl sweꞌj chi taneꞌn yi yajeꞌj. 11 Ma jaluꞌ, chinach cuꞌnuꞌ yi xtxolbileꞌj yi swaleꞌ cyen scyeruꞌ. At wiꞌnin awer nak teleꞌn tziꞌn nin toqueꞌn tziꞌn yi ẍchincyocsajeꞌ. Nin yil tzꞌoc Ryos tan cawuꞌn tzantzaj, ẍchiwank yi eꞌaꞌs tu kꞌajtzun Abraham, tu kꞌajtzun Isaac nin kꞌajtzun Jacow, scyuchꞌ eꞌ mas meꞌl cyꞌajl Ryos. 12 Poro yi eꞌ yi ja kloꞌ choꞌc tetz tajlal, chelepon lajuꞌn jalen tziꞌn tul tzꞌoꞌtz. Ẍchokꞌok nin skitxꞌnek xecyeꞌ tan chiꞌch cꞌuꞌlal tu yi bis yi ateꞌ cuꞌnt, —stzun Jesús bantz scyetz wunak.
13 Yi bajeꞌn yolol yi yoleꞌj, nin ben tloltz tetz capitán:
—Ajkuꞌ xe caꞌluꞌ. Nin yi xtxolbil yi ja kꞌukeꞌ cꞌuꞌluꞌ teꞌj tan bnixeꞌn, sbnixok, —stzun Jesús bantz tetz capitán.
Iteꞌn nin tkujaꞌs ul yos tu yi mos yi capitán.
Yi tuleꞌn yos tu xnaꞌn, yi jiꞌ Luꞌ
(Mr 1.29-31; Lc 4.38-39)
14 Itzun bantz, choꞌn tzun tponeꞌn Jesús xe caꞌl Luꞌ. Yi tponeꞌn, ja til jun xnaꞌn yi yabiꞌẍ tan kꞌaꞌkl. Iꞌtz yi jiꞌ Luꞌ. 15 Ntin tuꞌ mac Jesús yi kꞌab yabiꞌẍ, ninin ul yos tuchꞌ. Jeꞌn tzun txiclok, nin octz tan cꞌaꞌcheꞌn Jesús scyuchꞌ yi eꞌ yi xomcheꞌ teꞌj.
Yi tuleꞌn yos scyuchꞌ jun cꞌoloj wunak
(Mr 1.32-34; Lc 4.40-41)
16 Ma yi toqueꞌn tal yupcan, nin eꞌ opon wiꞌnin wunak te Jesús. Cyꞌaꞌn len yabiꞌẍ cyaꞌn. At eꞌ yi at espíritu cwent Baybaꞌn chiwankil. Poro tan jun tal yol yi ben tlol Jesús te jujun, xcyeꞌ tan chilajeꞌn len yi eꞌ espíritu cwent Baybaꞌnaꞌtz. Nchaꞌtz, ul yos taꞌn scyuchꞌ cyakil yi eꞌ mas yabiꞌẍ. 17 Tan tuꞌ yi ban iꞌ yi eꞌchk milawraꞌtz, ja el cuꞌn teꞌj yi tzꞌibaꞌn cyen takꞌun Isaías, yi elsanl stziꞌ Ryos tentz. Na je yol iꞌeꞌj: “Iꞌ ntijon kaqꞌuixbel, nin iꞌ micyꞌan len kayoblil.”
Cobox yi at cyajbil tan chixomeꞌn te Jesús
(Lc 9.57-62)
18 Yi tilol Jesús yi wiꞌnin wunak ateꞌ teꞌj, nintzun cawun nintz scyetz eꞌ ẍchusbeꞌtz:
—Or itetz, quin. Kicyꞌoken jalaj icyꞌen aꞌ, —stzun Jesús bantz scyetz.
19 Yi quicyꞌeꞌn poneꞌn jalaj icyꞌen, nin opon ẍkansal tib jun scyeri eꞌ txꞌolol xoꞌl ley Moisés xlaj Jesús tan yol tetz:
—Taꞌ, naꞌ nin lbeneꞌtuꞌ, tunin chinxomnintz, —chij.
20 Sajeꞌn tzun stzaꞌwel Jesús:
—Baꞌn, poro yi in wetz yi in Bajx Cyꞌajol,a siquier nink muꞌẍ tal amaꞌl at tan wujeweꞌn. Pyor wutaneꞌn ẍchiwutz yi eꞌ txuc, na at len chijulil kale na chiwiteꞌt. Nchaꞌtz yi eꞌ chꞌuꞌl, at len chisoc. Poro yi in wetz, quiꞌc.
21 Toqueꞌn tzun ẍkansal tib jun scyeri eꞌ ẍchusbeꞌtz Jesús teꞌj tan yol tetz, nintzun taltz:
—Taꞌ, na waj chinxom teꞌjuꞌ, poro jalen cuꞌn tzinmuk cyen intaj.
22 —Yaj, baꞌn tzawakꞌ amaꞌl scyetz yi eꞌ yi quimnak quitaneꞌn tkꞌab yi quil tan mukleꞌn ataj. Ma yi aẍ awetz, xomen tzaj sweꞌj jalcuꞌn.
Yi taneweꞌn yi cyekꞌekꞌ tu pakꞌbil mar tan Jesús
(Mr 4.35-41; Lc 8.22-25)
23 Itzun bantz, choꞌn tzun toqueꞌn Jesús scyuchꞌ yi eꞌ ẍchusbeꞌtz tul jun barc. 24 Nin te yi na chixon wi aꞌ, ja xeꞌtij jun chin wutzileꞌn cyekꞌekꞌ. Nin yi pakꞌbil mar ja oc tcꞌuꞌl yi barc. Ma Jesús na wit. 25 Cyoqueꞌn tzun yi eꞌ ẍchusbeꞌtz tan cꞌaseꞌn.
—¡Taꞌ, koꞌ coleꞌuꞌ! ¡Txant tan kabeneꞌn xe aꞌ! —cheꞌch.
26 —¿Nxac na cxobwok? Quiꞌc mas kꞌuklij icꞌuꞌl te Ryos, —stzun Jesús bantz scyetz.
Jeꞌn tzun txiclok Jesús, nin octz tan makleꞌn yi cyekꞌekꞌ tu tojkbil mar. Taneweꞌn nin ban tetz cyekꞌekꞌtz tu yi tojkbil mar. 27 Wiꞌnin tzun cyeleꞌn yabtz te yi mbi cuꞌn bajij.
—¿Mbi ekaꞌn tan yajeꞌj? Na nicyꞌt nin cyekꞌekꞌ tu mar na quibit yi caꞌwl iꞌ, —cheꞌch tzun bantz squibil quib.
Yi eꞌ aj Gadara yi at espíritu cwent Baybaꞌn chiwankil
(Mr 5.1-20; Lc 8.26-39)
28 Yi ticyꞌeꞌn poneꞌn Jesús jalaj icyꞌen aꞌ, kale najlcheꞌt yi eꞌ aj Gadara nintzun eꞌ ul cob yaj tan cꞌulcheꞌn. Choꞌn chisajeꞌn jakꞌ eꞌchk picy kale na chimukxeꞌt eꞌ almaꞌ. Yi cob yajaꞌtz, at len espíritu cwent Baybaꞌn chiwankil. Chin xoꞌwbil nin eꞌ. Chaꞌstzun te wiꞌnin chixobeꞌn yi eꞌ wunak scyetz, nin qui na chinimsaj chicꞌuꞌl tan quicyꞌeꞌn le amaꞌlaꞌtz, kale najlcheꞌt yi cob yajaꞌtz. 29 Ma yi cyuleꞌn swutz Jesús wiꞌnin chiẍchꞌineꞌn, nin je cyaleꞌj:
—Jesús, iluꞌ Cyꞌajl Ryos, ¿mbi na tajuꞌ sketz? ¿Ja peꞌ uluꞌ tzoneꞌj tan kaxuxeꞌn len yi ntaxk opon kꞌejlal?
30 Ateꞌ tzun jun cꞌoloj boch tan waꞌaꞌn joylaj len muꞌẍ. 31 Cyoqueꞌn tzun yi eꞌ espíritu cwent Baybaꞌn tan cuꞌswutzil tetz Jesús:
—Taꞌ, kol koꞌ lajlenuꞌ tzoneꞌj, nink takꞌuꞌ amaꞌl sketz tan koqueꞌn chiwankil yi eꞌ boch yi ateꞌ tzoneꞌj.
32 —Quibeneꞌnk bin, —stzun Jesús scyetz.
Cyeleꞌn tzaj tzuntz ẍchiwankil yi eꞌ yaj, nin eꞌ octz ẍchiwankil yi eꞌ boch. Ma yi cyocomponeꞌn le chiwankil nin eꞌ el ojkuj. Choꞌn tzun teleꞌn chitrimpul quibtz wutz kotxꞌ. Cyoponeꞌn tzun txukꞌpujtz xe aꞌ. Sotzel chiwutz bantz.
33 Ma yi eꞌ pstor cyetz boch, eleꞌn nin ojk eꞌ ban cyeraꞌtz. Choꞌn cyoponeꞌn tnum, nin eꞌ octz tan xtxoleꞌn scyetz cyakil wunak yi mbi cunin bajij scyeꞌj cob yaj yi at espíritu cwent Baybaꞌn chiwankil.
34 Yi quibital yi eꞌ wunak yi stziblal, wiꞌnin tzun eꞌ eꞌ sajtz tan tilweꞌn Jesús.
Ma yi chicꞌulul quib, cyoqueꞌn tzun yi eꞌ wunakaꞌtz tan lajeꞌn len Jesús tan teleꞌn le cyetz chitanum.