Quil kaban kamunl ntin tan jaleꞌn kakꞌej
6
1 “Quil chibanuꞌ eꞌchk takleꞌn balaj tu eꞌchk pawor ntin tan jaleꞌn chikꞌejuꞌ ẍchiwutz wunak. Ko yaꞌtz chibanuꞌ, quil chicambajuꞌ chikꞌejuꞌ swutz Kataj yi choꞌn najlij tcyaꞌj.2 “Chaꞌstzun te yil choꞌcuꞌ tan banleꞌn jun pawor tetz jun mebaꞌ, quil cheꞌluꞌ tan yolcheꞌn yi pawor yi na chibanuꞌ, na yi eꞌ yi chiwutz tuꞌ, chiplaj tuꞌ na cyocsaj, wiꞌnin na chisleꞌquin yi na chiban jun baꞌn. Na chisleꞌquin tan yolcheꞌn tcꞌaꞌyl nin lakak eꞌchk sinagoga kale na chichamwit quib tan naꞌwseꞌn Ryos. Na chiban yi eꞌchk pawor ntin tan jaleꞌn balaj yolbil cyetz. Poro jun cuꞌn yol swaleꞌ nin scyeruꞌ, quil takꞌ Kataj Ryos jun balaj oy scyetz, na ja wiꞌt cyakꞌ wunak chikꞌej. 3 Ma yi eꞌ cyeruꞌ yil chibanuꞌ jun pawor tetz jun yi at tajweꞌn tetz, quil cheꞌluꞌ tan yolcheꞌn. Baꞌn tcuꞌn yi cyaꞌl jun lbitan tetz. 4 Quiꞌc na ban yi ko cyaꞌl na el xtxum tetz yi oy yi na cyakꞌuꞌ, na ilenin na til Kataj. Ej nin iꞌ tzꞌakꞌon oy scyeruꞌ.
Yi toqueꞌn Jesús tan chichusleꞌn wunak tan nachleꞌn Kataj
(Lc 11.2-4)
5 “Nchaꞌtz, yil choꞌcuꞌ tan nachleꞌn Kataj, quil chibanuꞌ chi na chiban yi eꞌ yi chiwutz tuꞌ, chiplaj tuꞌ na cyocsaj Ryos. Na yi eꞌ cyetz ntin na chipekꞌ tan nachleꞌn Kataj lakak eꞌchk ẍchicy beꞌ, nin lakak eꞌchk sinagoga. Na yi cyetz cyajbil iꞌtz tan ẍchajleꞌn chibalajil ẍchiwutz wunak. Tan yi xtxolbileꞌj, ja wiꞌt jal cyetz chikꞌej ẍchiwutz wunak, nin quiꞌt jal chikꞌej swutz Kataj. 6 Poro yi eꞌ cyeruꞌ yil choꞌcuꞌ tan nachleꞌn Kataj, baꞌn tcuꞌn yil chibenuꞌ chichucuꞌ xe chicaꞌluꞌ. Chijopeꞌl tzajuꞌ yi chipuertuꞌ. Baꞌn chinachuꞌ Kataj chichuc cuntuwuꞌ, na at nin Kataj scyeꞌjuꞌ, nin na til iꞌ cyakil yi na icyꞌ chicꞌuꞌluꞌ, nin stkꞌeꞌ iꞌ banl squibuꞌ.
7 “I bin jaluꞌ, yil choꞌcuꞌ tan nachleꞌn Kataj, quil chibanuꞌ chi na chiban yi eꞌ mas wunak yi coboxeꞌn yol chitxꞌanoꞌn quib tan yolcheꞌn. Na le wutz cyetz cyajtzaꞌkl yi ko na chibent cyentuꞌ tan yol mas na tbit Ryos, poro quiꞌ. 8 Qui bin chiban cyeruꞌ-tz chi na chiban yi eꞌaꞌs, na na til Kataj yi mbi tajweꞌn sketz. Ilijt taꞌn yi ntaxk koꞌc tan jakleꞌn tetz. 9 Chaꞌstzun te, yil choꞌcuꞌ tan nachleꞌn Kataj, choꞌn cyulejuꞌeꞌj:
‘Kataj yi atuꞌ tcyaꞌj, wiꞌnin xanil yi biꞌuꞌ Taꞌ.
10 Sajkuꞌ tzoneꞌj wuxtxꞌotxꞌ tan cawuꞌn skibaj.
Cawunkuꞌ tzoneꞌj wuxtxꞌotxꞌ, chi na cawunuꞌ tziꞌn tcyaꞌj.
11 Takꞌ tzajuꞌ kawaꞌ tetz jaluꞌ.
12 Cuyeꞌuꞌ kapaj, chi na kacuy ketz chipaj yi eꞌ mas wunak.
13 Quil koꞌ stzakpninuꞌ le il,
ma na makeꞌuꞌ kawutz tan qui kabeneꞌn tul.
Na iluꞌ ajcaw tibaj cyakil.
Nin chin cham nin iluꞌ.
Nin at teruꞌ kꞌejuꞌ ben kꞌej ben sak. Amén.’
14 “Na kol chicuyuꞌ paj junt yaj, nchaꞌtz Kataj yi at tcyaꞌj scuyeꞌ cyeruꞌ chipajuꞌ. 15 Poro yi ko quil chicuyuꞌ paj junt, nchaꞌtz Kataj, quil scuy cyeruꞌ chipajuꞌ.
Ẍeꞌn lkaban tan mucꞌleꞌn weꞌj
16 “Je junt xtxolbileꞌj: Ko na cyajuꞌ chimucꞌuꞌ weꞌj tan takꞌleꞌn chikꞌajsbiluꞌ swutz Ryos, quil chichajuꞌ yi ko na chimucꞌuꞌ weꞌj. Na yi eꞌ yi chiwutz tuꞌ, chiplaj tuꞌ na cyocsaj, na chichaj ẍchiwutz wunak yi na chimucꞌ weꞌj. Na chiban yi xtxolbilaꞌtz tan chichajol ẍchiwutz wunak yi chumbalaj nin quitaneꞌn tan tuꞌ yi na chimucꞌ weꞌj. Jun cuꞌn yol na walnin scyeruꞌ, quil takꞌ Kataj banl squibaj yi jun jilwutz wunakaꞌtz, na ja wiꞌt cyakꞌ wunak chikꞌej. 17 Ma eꞌ cyeruꞌ, ko na cyajuꞌ chimucꞌuꞌ weꞌj tan cyakꞌoluꞌ chikꞌajsbiluꞌ swutz Ryos, chitxꞌajeꞌuꞌ chiwutzuꞌ nin chixebeꞌuꞌ chiwiꞌuꞌ 18 tan qui teleꞌn chitxum yi eꞌ wunak yi na chitzanuꞌ tan mucꞌleꞌn weꞌj. Poro yi Kataj yi at nintz scyeꞌjuꞌ, tzꞌelepon xtxum tetz yi na chitzanuꞌ tan mucꞌleꞌn weꞌj tan takꞌleꞌn chikꞌajsbiluꞌ swutz, nin stkꞌeꞌ tzun iꞌ yi banl squibuꞌ.
Quiꞌc rmeril tan kꞌukeweꞌn kacꞌuꞌl te Ryos yi ko choꞌn ajlij kacꞌuꞌl te kamebiꞌl
(Lc 12.33-34)
19 “Quil chijoyuꞌ puntil tan colcheꞌn chimebiꞌluꞌ tzoneꞌj wuxtxꞌotxꞌ, na sloꞌonk teraꞌtz tan pocꞌ nin stzajk teraꞌtz. Nin quiꞌc ltakꞌ kol jal jun cꞌoloj chimebiꞌluꞌ tzoneꞌj, na chocpon alkꞌom tan talkꞌeꞌn len. 20 Ma na baꞌn tcuꞌn yi nink chijoyuꞌ puntil tan colcheꞌn chimebiꞌluꞌ tcyaꞌj, na quiꞌc taj quen pocꞌ tetz teraꞌtz. Ej nin quil tzꞌel cꞌuꞌl teraꞌtz. Nchaꞌtz alkꞌom, quiꞌc lcyaj quen tetz. 21 Na kale atit yi mebiꞌl jun yaj, yaꞌtz nin ajleꞌt yi cꞌuꞌl.
22 “Nin je jun elsawutzileꞌj: Tan kawutz na kaxmayineꞌt. Nin yi ko baꞌn kawutz, clar cunin eꞌchk takleꞌn skawutz. 23 Poro yi ko maymuj kawutz, niꞌcuꞌn tzuntz chi taneꞌn yi atoꞌk tul tzꞌoꞌtz. Nchaꞌtz taneꞌn jun yaj. Yi ko jopij wutz tajtzaꞌkl, at tzun yajtz tul jun chin tzꞌoꞌtz wutzil.a
24 “Na quiꞌc rmeril tan kꞌukeweꞌn chicꞌuꞌluꞌ te Ryos yi ko jalt nin chimebiꞌluꞌ na chitxumuꞌ. Na je jun elsawutzileꞌj: Quiꞌc rmeril tan stzaꞌwel jun yaj cob patrón. Na ilenin spekꞌok mas teꞌj jun swutz junt. Ẍchajeꞌ yi cꞌulutxumil tetz jun, ma yi junt tzꞌelepon kꞌej taꞌn. Chaꞌstzun te quiꞌc rmeril tan kꞌukeweꞌn chicꞌuꞌluꞌ te Ryos yi ko choꞌn ajlij chicꞌuꞌluꞌ te chimebiꞌluꞌ.
Elsawutzil tetz buch tu chꞌuꞌl
(Lc 12.22-31)
25 “Chaꞌstzun te na wal nin scyeruꞌ: Quil sotz chicꞌuꞌluꞌ te yi ankꞌiꞌn tetz tzoneꞌj wuxtxꞌotxꞌ. Quil cyaluꞌ: ¿Ẍeꞌn kawan nin ẍeꞌn kucꞌaꞌ? Nin quil cyaluꞌ: ¿Ẍeꞌn kawekx? ¿Nxac na sotz chicꞌuꞌluꞌ tan yi ankꞌiꞌn tetz tzoneꞌj wuxtxꞌotxꞌ? ¿Nkꞌeꞌtz peꞌ mas tajweꞌn kutzꞌajbil swutz eꞌchk takleꞌnaꞌtz? 26 Quiꞌc na takꞌ yi sotzaj cꞌuꞌlal. Na quil cuꞌnuꞌ yi eꞌ chꞌuꞌl. Qui na cyawaj coꞌn, nin qui na jeꞌ cosech cyaꞌn. Quiꞌc cyetz chicꞌojaj, poro na chiwan tan Ryos. ¿Nkꞌeꞌtz ptzun mas tcuꞌn cyeruꞌ chikꞌejuꞌ ẍchiwutz eꞌ chꞌuꞌl? 27 Quiꞌc na takꞌ yi sotzaj cꞌuꞌlal, na quiꞌc rmeril tan beneꞌn ẍkon tiemp jun yaj tan sotzaj cꞌuꞌlal.
28 “Quil sotz chicꞌuꞌluꞌ tan beꞌch cyeruꞌ. Baꞌn tcuꞌn yi nink choꞌkuꞌ tan xtxumleꞌn yi eꞌchk buch. Qui na chakꞌuj nin qui na chichemon, poro chumbalaj nin na chiyub. 29 Mas na chiyub cyeraꞌtz swutz yi beꞌch tetz yi kꞌajtzun rey Salomón yi chin yubeꞌn nin. 30 Yi ko yaꞌtz quitaneꞌn yi eꞌchk buch tan Ryos, ¿qui ptzun tzꞌoc il iꞌ scyeꞌj cyeruꞌ? Yi buch juneꞌn tkuj na takꞌ yi yubel, ej nin jalcuꞌn na skej nin na oc wi kꞌakꞌ. Poro yi oꞌ ketz, yi oꞌ wunak, at mas ketz kakꞌej tan Ryos. ¿Nxac tzun qui na kꞌukeꞌ chicꞌuꞌluꞌ teꞌj? 31 Chaꞌstzun te quil cyaluꞌ: ‘¿Ẍeꞌn kucꞌaꞌ? ¿Ẍeꞌn kawan? Nin ¿ẍeꞌn kawekx?’ 32 Quiꞌt tzunk chiban cyeruꞌ yi xtxolbilaꞌseꞌj, na yaꞌtz na chiban cyakil yi eꞌ mas wunak tzoneꞌj wuxtxꞌotxꞌ. Ntin chiwaꞌ na chijoy. Poro yi eꞌ cyeruꞌ, at jun ilol cyeruꞌ, yi Kataj, yi at tziꞌn tcyaꞌj. Nin na til cyakil yi tajweꞌn scyeruꞌ. 33 Chaꞌstzun te, bajx choꞌkuꞌ cꞌulutxum jakꞌ caꞌwl Ryos, nin chibneꞌuꞌ taneꞌn yi tetz tajbil. Tzꞌakꞌlok tzun cyakil yi tajweꞌn scyeruꞌ.b 34 Qui bin sotz chicꞌuꞌluꞌ te yi mbi na xon tzaj ek caꞌp. Quiꞌc na takꞌ sketz kol koꞌc tan bis te yi mbi sbajok skeꞌj ek caꞌp, na at eꞌchk il yi at skawutz cyakil kꞌej, kajoyeꞌ bin puntil tan xiteꞌn cuꞌn yi eꞌchk ilaꞌtz, —stzun Jesús ban scyetz.