Yi bnixeꞌn yi jun teblal yi oro cuꞌn takꞌun Nabucodonosor
3
1 Itzun yi teleꞌn tiemp nintzun cawun yi rey Nabucodonosor tan banleꞌn jun teblala yi oro cuꞌn. Yi bnixeꞌn yi jun teblalaꞌtz, junaklaj tzun metr ban yi wutz tkan, nin ox metr ban yi wutz. Choꞌn tzun tponeꞌn yi jun teblalaꞌtz tan yi rey wi ẍkꞌajlaj Dura, cwent Babilonia. 2 Yi bnixeꞌn tircuꞌn, nintzun el jun ort tan yi rey tan chichakleꞌn cyakil yi eꞌ wiꞌtz ajcaw tetz cyakil tnum cwent Babilonia. Nchaꞌtz eꞌ chakxij yi eꞌ alcal scyuchꞌ yi eꞌ ajcaw squibaj yi eꞌ sanlar. Nchaꞌtz eꞌ chakxij yi eꞌ akꞌol tajtzaꞌkl yi rey, nin eꞌ colol pwok, scyuchꞌ eꞌ pujul xtisyaꞌ, nin cyakil yi eꞌ aj txꞌamij. Chimolol tzun quib chicyakil yi eꞌ ajcawaꞌtz tan telseꞌn yi wutz kꞌej yi jun teblalaꞌtz yi nsken bnix tan yi rey. 3 Ej tircuꞌn tzun yi eꞌ wiꞌtz ajcaw tetz yi nación eꞌ opontz tan takꞌleꞌn kꞌej yi jun teblalaꞌtz. 4 Ma yi chimolol quib nintzun jilon yi ajcaw yi bixeꞌ tan bajxomiꞌn te yi jun chin wutzileꞌn kꞌejaꞌtz. Itzun taltz: “Eꞌuꞌ jun cꞌoloj kacmon, yi ateꞌuꞌ tzoneꞌj nin scyuchꞌ yi eꞌuꞌ yi nchisajuꞌ lakak eꞌchk tnum, quibit tzajuꞌ yi caꞌwleꞌj. 5 Yil quibituꞌ yil ẍchꞌin yi chun, nin yil tzꞌoc yi chirimiy, tu tampor tu arpa, nin cyakil eꞌchk mas maꞌcl tetz kbetz, tajweꞌn tan chimejeweꞌn cuꞌnuꞌ swutz yi jun teblaleꞌj yi oro cuꞌn yi ja bnix takꞌun kareyil. 6 Ma yi eꞌ yi quil chimejeꞌ tan takꞌleꞌn kꞌej yi jun teblaleꞌj, ninin nchiben joꞌliꞌn cyeraꞌtz tcꞌuꞌl jun kꞌakꞌ yi wiꞌnin lamcaneꞌn, yi ja bnix takꞌun kareyil,” stzun yi ajcawaꞌtz bantz.7 Ej nin yaꞌtz nin bantz. Yi quibital cyakil yi eꞌ wunak yi ateꞌ-tz yi toqueꞌn yi eꞌchk maꞌclaꞌtz, nintzun eꞌ cuꞌ jokloktz tan takꞌleꞌn kꞌej yi jun teblalaꞌtz yi oro cuꞌn.
8 Ateꞌ tzun cobox nacholb ẍchixoꞌl cyakil yi eꞌ wunakaꞌtz yi ateꞌ-tz. Nintzun eꞌ octz tan chixochleꞌn cyen yi eꞌ judiy swutz yi rey Nabucodonosor. Itzun cyaltz:
9 —Taꞌ max cꞌuꞌluꞌ skibaj. Nink ben ẍkon yi tiempuꞌ tetz ben kꞌej ben sak. Nink naꞌwsij yi biꞌuꞌ sbneꞌ opon tunintz. 10 Ma jaluꞌ taꞌ ja bin cawunuꞌ yi tajweꞌn tan kamejeweꞌn cuꞌn kacyakil swutz yi jun teblal yi ja bnix tanuꞌ yil xeꞌtij yi eꞌchk kbetz, 11 nin alchok scyetz yi quil sban taneꞌn yi jun caꞌwleꞌj tajweꞌn tan beneꞌn joꞌliꞌn teraꞌtz tkꞌakꞌ, chijuꞌ ban. 12 Poro taꞌ, yi ox ajcaw yi nchoꞌc cyen tanuꞌ, yi eꞌ judiy,c quinin na cyek ẍchiꞌuꞌ nin quinin na chiban taneꞌn yi caꞌwluꞌ. Ej nin quinin na cyakꞌ kꞌej eꞌchk ryosiluꞌ, mpe ik yi jun teblal yi ja bnix tanuꞌ yi oro cuꞌn. Yi ox yajaꞌtz je chibiꞌeꞌj, Sadrac, Mesac tu Abed-nego.
13 Yi tbital Nabucodonosor yi xtxolbileꞌj nintzun chiꞌch cꞌuꞌl scyeꞌj yi ox ajcawaꞌtz. Ej nin tan yi ẍchiꞌchbeꞌn cꞌuꞌl nintzun cawunintz tan chichakleꞌn tzaj. Lajkeꞌl nintzun eꞌ opon ticyꞌleꞌntz swutz yi rey.
14 Ma yi cyoponeꞌn nintzun jak iꞌ scyetz:
—¿Bintzi nin peꞌ yi qui na itakꞌwok chikꞌej yi eꞌ inryosil, nin yi jun teblal yi ja bnix waꞌn yi oro cuꞌn? 15 Ma jaluꞌ ko quiꞌ, ¿list peꞌ axwok tan imejeweꞌn cuꞌn swutz yil xeꞌtij junt tir yi eꞌchk maꞌcl cyakꞌun yi eꞌ aj kbetzum? Na ko quil tziban wok taneꞌn, cxbenwok joꞌliꞌn tkꞌakꞌ. Ej nin quiꞌc nin jun ryos yi nink xcyeꞌ tan icolcheꞌn tkꞌab yi jun kꞌakꞌaꞌtz, stzun yi rey scyetz.
16 —Taꞌ, qui na kaxob te yi xtxolbileꞌj yi ja bixeꞌ tanuꞌ. 17 Na yi ketz kaRyosil yi na kocsaj, xcyek iꞌd tan kacolcheꞌn tkꞌab yi jun chin kꞌakꞌaꞌtz, nka tu alchok eꞌch takleꞌn yi na tajuꞌ sbanuꞌ skeꞌj. 18 Poro taꞌ, ok le wiꞌuꞌ, mpe quiꞌk tzꞌoc yi ketz kaRyosil tan kacolcheꞌn, ja katxum yi quiꞌc cuj tan kamejeweꞌn cuꞌn ẍchiwutz yi teruꞌ ryosiluꞌ, mpe ik yi jun teblal yi ja bnix tanuꞌ. Na quiꞌc rmeril tan kakꞌol chikꞌej yi eꞌchk ryosaꞌtz, cheꞌch yi ox yajaꞌtz bantz.
Yi chiclaxeꞌn yi ox yaj tkꞌakꞌ
19 Chin cyakt nintzun ban Nabucodonosor tan ẍchiꞌchbeꞌn yi cꞌuꞌl yi tbital yi chiyol yi ox yajaꞌtz. Cawuneꞌn tzuntz tan toqueꞌn juk tir mas wolor yi kꞌakꞌ swutz yi na ban tunintz. 20 Cheꞌ beneꞌn tzun ẍchakol yi rey cobox sanlar yi chin cham nin eꞌ tan chicꞌalcheꞌn cuꞌn Sadrac, Mesac tu Abed-nego, nin tan chijoꞌleꞌn quen tkꞌakꞌ. 21 Chicweꞌn tzun cꞌalij tuml yi beꞌch cyetz. Nintzun eꞌ ben joꞌliꞌntz tkꞌakꞌ. 22 Ma yi eꞌ sanlar yi eꞌ ben tan chijoꞌleꞌn cyen tkꞌakꞌ, ninin eꞌ quimtz tan yi walor yi kꞌakꞌ. 23 Inti yi ox yajaꞌtz yi eꞌ ben joꞌliꞌn tkꞌakꞌ, cꞌalijcheꞌ nintz yi cyocomponeꞌn tkꞌakꞌ.
24 Poro yi chibeneꞌn tilol Nabucodonosor yi ẍeꞌn quitaneꞌn tkꞌakꞌ, lajkeꞌl nintzun jeꞌn txicloktz, nin ben jakoltz scyetz yi eꞌ akꞌol tajtzaꞌkl yi ateꞌ xlaj:
—¿Nkꞌeꞌtz peꞌ ox ntziꞌ yaj yi nchoꞌc kaꞌn tkꞌakꞌ? Ej nin ¿nkꞌeꞌtz peꞌ cꞌalijcheꞌ len yi nchiben joꞌliꞌn?
—Bintzi taꞌ, ox ntziꞌ chixoneꞌn, cheꞌch tzun bantz tetz rey.
25 —Poro cyaj cuꞌn chixoneꞌn na wilnin wetz. Nin qui cꞌalijcheꞌ, na na chixon nicyꞌal yi kꞌakꞌ.e Nin qui na chitzꞌeꞌ. Ej nin yi cyajiꞌn yaj apart yubil ẍchiwutz yi oxt. Choꞌn cunin wutz iꞌ chi taneꞌn jun ángel.
26 Lajkeꞌl nintzun beneꞌn Nabucodonosor nakaꞌjil yi julil yi kꞌakꞌ, nin ẍchꞌin nin iꞌ scyetz. Nin taltz:
—Sadrac, Mesac tu Abed-nego, caleꞌnwok tzaj. Na bintzi nin axwok ẍchakum Ryos, yi Ryos yi bintzi nin teꞌtz, stzun yi rey banintz.
Cyeleꞌn tzaj tzun yi ox yajaꞌtz tkꞌakꞌ. 27 Yi cyeleꞌn tzaj, cyoponeꞌn tzun cyakil yi eꞌ wiꞌtz ajcaw tetz yi nación tan quilweꞌn, nin ja quil yi quiꞌc nin muꞌẍ tal nink nchitzꞌeꞌ, nin quiꞌc nin muꞌẍ tal nink ntzꞌeꞌ yi beꞌch cyetz. Tunink yi xiꞌil chiwiꞌ quiꞌc nin muꞌẍ yi nink ntzꞌeꞌ. Ej nin quiꞌc nin muꞌẍ xewal sib scyeꞌj yi cyeleꞌn tzaj.
28 Yi tilol Nabucodonosor yi xtxolbileꞌj nintzun taltz:
—Kakꞌeꞌ kakꞌajsbil tetz chiRyosil yi ox yajeꞌj, na iꞌ yi Ryos yi wiꞌnin ẍchamil. Kakꞌeꞌ kakꞌajsbil tetz, na ja saj ẍchakol yi tetz ángelf tan chicolcheꞌn yi ox yajeꞌj tkꞌab kꞌakꞌ. Yi eꞌ cyetz qui nin nchimejeꞌ swutz yi jun teblal yi mbnix waꞌn, na ntin na chimejeꞌ swutz yi cyetz chiRyosil. Chaꞌstzun te ja cyakꞌ quib tkꞌab quimichil tan qui chimejeweꞌn cuꞌn swutz yi jun teblaleꞌj. 29 Ma jaluꞌ bitwok tzaj, ẍchiquimok alchok scyetz yi quil cyek ẍchiꞌ yi chiRyosil yi ox yajeꞌj, nin chin puchꞌij cunin ẍchibneꞌ. Ej nin nchaꞌtz chicaꞌl, copon woqꞌuiꞌn. Na quiꞌc nin junt Ryos yi nink xcyeꞌ tan kacolcheꞌn. Nin yi caꞌwleꞌj iꞌtz scyetz cyakil wunak. Quiꞌc na ban alchok nchisiteꞌt, stzun yi rey bantz.
30 Ma yi ox yaj, nintzun akꞌlij balaj cyakꞌun le gobierum cwent Babilonia. Nin jal wiꞌnin chikꞌej.