Daniel 1

DANIEL

Daniel tu yi eꞌ tetz tamiw

1 Itzun bantz tul yi toxiꞌn yob yi na cawun tzaj yi rey Joacim le amaꞌl Judá, nintzun opon Nabucodonosor, yi rey tetz Babilonia tan oyintziꞌ teꞌj. Ma yi tponeꞌn iꞌ scyuchꞌ yi eꞌ tetz sanlar, nintzun eꞌ baj chitxolil quib solteꞌj yi tnum Jerusalén. 2 Tkꞌol tzun Kajcaw amaꞌl tetz Nabucodonosor tan chixcyeweꞌn scyeꞌj yi eꞌ aj Jerusalénaꞌtz, nin tan stzꞌamleꞌn yi rey Joacim. Ej nin nchaꞌtz eꞌ ben quicyꞌal cobox pres jalen yi cyetz chitanum. Nchaꞌtz ben quicyꞌal wiꞌnin lak tu yi eꞌchk maꞌcl yi nxcon le caꞌl Kataj Ryos. Choꞌn tzun toponeꞌn yi eꞌchk lakaꞌtz cyaꞌn le cyetz chiluwar yi na biꞌaj Babilonia.

Yi cyoponeꞌn Babilonia, nintzun cawunin Nabucodonosor tan tocseꞌn yi eꞌchk lakaꞌtz le caꞌl kale atit yi meꞌbiꞌl yi tetz ryosil. 3 Nchaꞌtz cawunin iꞌ tetz Aspenaz, yi chibajxom yi eꞌ eunuco tan jeꞌn xtxaꞌol cobox balaj xicy ẍchixoꞌl yi eꞌ presaꞌtz yi eꞌ opon cyaꞌn.

Ej nin taltz, yi tajweꞌn tan chijeꞌn xtxaꞌol ẍchixoꞌl yi eꞌ xicy yi at chikꞌej nka ajcawbeꞌn chitaj. 4 Nchaꞌtz tajweꞌn tan chitxaꞌleꞌn yi eꞌ balaj xicy yi na chiyub, nin yi quiꞌc chiyanaꞌsil. Tajweꞌn tan chijeꞌn xtxaꞌol yi eꞌ xicyaꞌtz ẍchixoꞌl yi eꞌ yi at chichusuꞌn, nin yi tzꞌaknak cuꞌn cyajtzaꞌkl.

Ej nin yi chixac yi eꞌ xicyaꞌtz iꞌtz tan chixconeꞌn tetz ẍchakum rey. Nchaꞌtz cawunin yi rey tetz Aspenaz tan toqueꞌn tan chichusleꞌn yi eꞌ xicyaꞌtz tan taꞌweꞌn chiyol tu chicstumbr yi eꞌ aj Babiloniajaꞌtz. 5 Nchaꞌtz cawunin yi rey Nabucodonosor tan chicꞌaꞌcheꞌn te yi balaj cumir tu yi balaj win chi na baj tan iꞌ tetz. Nchaꞌtz tal iꞌ yi tajweꞌn tan chichusleꞌn tetz ox yob bantz cyoqueꞌn tetz balaj ẍchakum iꞌ.

Daniel scyuchꞌ yi ox tuchꞌ

6 Ẍchixoꞌl yi eꞌ xicyaꞌtz yi eꞌ je txaꞌij tan toqueꞌn chichusleꞌn, ateꞌ cobox aj Judá yi na chibiꞌaj Daniel, Ananías, Misael tu Azarías.

7 Ma yi chibajxom yi eꞌ eunuco nintzun xtxꞌixpuj yi chibiꞌ. Nin oc tkꞌol yi biꞌ Daniel tetz Beltsasar. Ma Ananías nin octz tetz Sadrac. Nin yi Misael, Mesac bantz. Ma tetz Azarías, Abed-nego tulejtz. 8 Inti Daniel nin bixeꞌ xtxumuꞌn tan qui poꞌtzal tib tan yi cumir tu win yi na baj xe caꞌl rey. Chaꞌstzun te cuꞌ wutz tetz chibajxom yi eꞌ eunucaꞌtz. Nin jak iꞌ amaꞌl tetz tan qui bajeꞌn yi jun jilwutz cumiraꞌtz taꞌn, na xan ẍchiwutz yi eꞌ judiy. 9 Nsken jal balajil Daniel swutz yi jun ajcawaꞌtz tan tuꞌ porer Ryos. 10 Poro cabej muꞌẍ cꞌuꞌl yi jun ajcawaꞌtz tan banleꞌn yi tajbil Daniel. Beneꞌn tzun tlol tetz:

—Baꞌn kloꞌ yaj, poro na chinxob tetz yi wajcaw, yi kareyil, na ja cawun iꞌ te yi mbi tajweꞌn tan bajeꞌn itaꞌn. Na ko quil baj yi balaj cumir itaꞌn tzꞌocopon iyab ẍchiwutz yi eꞌ mas xicy. Ej nin kol til yi kareyil yi quiꞌct nin axwok ẍchiwutz yi eꞌ mas xicy, ẍchinquimok taꞌn, tan ipaj, stzun yi ajcaw bantz.

11 Beneꞌn tzun Daniel tan yol tetz junt ajcaw, yi jun yi cyajquen takꞌun yi bajxom tan chiqꞌuicyꞌleꞌn Daniel, Ananías, Misael tu Azarías. Itzun taltz:

12 —Taꞌ, na kloꞌ waj yil sbanuꞌ jun pawor sketz. Nink spiluꞌ xtxꞌixpeꞌn kawaꞌ tetz lajuj kꞌej. Cawunkuꞌ tan bajeꞌn ntin itzaj tu aꞌ tu eꞌch tꞌimbil yi ajnaktzaj kaꞌn. 13 Nin yil tzꞌicyꞌ yi lajuj kꞌejaꞌtz, baꞌn tzꞌocuꞌ tan kilweꞌn nin tan kamaꞌleꞌn ko ja oc kayab ẍchiwutz yi eꞌ mas xicy yi na baj yi balaj cumir cyaꞌn chi tuchꞌ tetz rey. Nin yil tiluꞌ yi ẍeꞌn kutaneꞌn baꞌn tzun sbixbajuꞌ skeꞌj ko baꞌn kaban taneꞌn tan bajseꞌn yi cumir yi ajnak tzaj nka quiꞌ, stzun Daniel bantz tetz yi ajcawaꞌtz yi na tzan tan chiqꞌuicyꞌleꞌn. 14 Nintzun cujij yi martomaꞌ quib yi tal Daniel tetz. Nin pil iꞌ yi jun xtxolbilaꞌtz tetz lajuj kꞌej.

15 Itzun yi ticyꞌeꞌn yi lajuj kꞌejaꞌtz, mas tcuꞌn tzun balaj chiyubil yi eꞌ xicyaꞌtz ban ẍchiwutz yi eꞌ mas. Nin chin tzantzuj nin eꞌ bantz. At cuꞌn mas cyetz chiwalor ẍchiwutz yi eꞌ mas xicy yi ja baj yi balaj cumir cyaꞌn. 16 Quiꞌt tzun takꞌ martomaꞌ win tu yi balaj cumir scyetz. Ma na itzaj tuꞌ takꞌ scyetz.

17 Ma yi cyaj xicyaꞌtz, Ryos tzun akꞌon cyajtzaꞌkl tu chitxumuꞌn, na nin el chitxum tetz eꞌchk xtxolbil yi at tul cyakil jilwutz liwr tu alchok jilwutz chusuꞌn yi nmoꞌc chichusleꞌn teꞌj. Nchaꞌtz el xtxum Daniel tetz yi eꞌchk wutzicyꞌ nin nchaꞌtz xcyeꞌ iꞌ tan xtxꞌolcheꞌn xoꞌl, na Ryos makꞌon tajtzaꞌkl.

18 Itzun yi jeꞌn poneꞌn yi tiemp yi tal yi rey tan chichajol quib cyakil yi eꞌ xicy swutz iꞌ, nintzun eꞌ ben ticyꞌleꞌntz takꞌun yi martomaꞌ tan chichajleꞌn tetz iꞌ. 19 Yi cyoponeꞌn, nintzun oc yi rey tan maꞌleꞌn cyajtzaꞌkl chicyakil yi eꞌ xicyaꞌtz. Poro cyaꞌl nin jaleꞌt jun yi niꞌcuꞌnk tajtzaꞌkl tu Daniel, Ananías, Misael tu Azarías. Chaꞌstzun te eꞌ cyajeꞌn cyen tetz xconsbeꞌtz yi rey. 20 Eꞌ cyaj cyen tzun tan akꞌun tu yi rey na yi toqueꞌn yi rey tan maꞌleꞌn cyajtzaꞌkl ja lajluchax yi lajuj tir mas list eꞌ, nin lajuj tir mas tzꞌaknak cuꞌn eꞌ ẍchiwutz cyakil yi eꞌ nachol scyuchꞌ yi eꞌ aj wutz mes yi ateꞌ Babilonia. 21 Cyajeꞌn cyen tzun tetz Daniel tetz jun akꞌol cyajtzaꞌkl cyakil yi eꞌ rey tetz Babilonia yi eꞌ oc tan cawuꞌn jalen te yi bajx yob yi toqueꞌn cyen yi rey Ciro.