Yi eꞌchk balaj ajtzaꞌkl yi talnak Agur
30
1 Yi eꞌchk yoleꞌj, iꞌtz balaj ajtzaꞌkl yi talnak Agur yi cyꞌajl Jaqué yi aj Masa. Iꞌtz cobox xtxolbil yi alijt cyen taꞌn tetz Itiel nin tetz Ucal tan teleꞌn chitxum tetz yi quiꞌc balajil yi cyetz cyajtzaꞌkl.a Je yol iꞌeꞌj: 2 Yi in wetz, chin ploj nin wajtzaꞌkl ẍchiwutz cyakil yi eꞌ mas yaj, na quiꞌc balaj wajtzaꞌkl, chi yi tajtzaꞌkl jun yi chin tzꞌaknak cunin.
3 Txeꞌn jal wajtzaꞌkl, nin qui na el intxum tetz yi jun yi Chin Xan Nin.
4 ¿At ptzun jun wunak yi ja xaꞌk tzaj tcyaꞌj, nin yi ja cuꞌult wuxtxꞌotxꞌ? ¿At ptzun jun yi na xcyeꞌ tan xtxobleꞌn cuꞌn yi cyekꞌekꞌ le kꞌab? ¿At ptzun jun yi na xcyeꞌ tan cuꞌseꞌn yi mar tul jun xbuꞌk? ¿At ptzun jun yi mbixban yi munt? Quiꞌc rmeril yi nink tzawal yi na el atxum tetz yi biꞌ yi junaꞌtz, mpe ik yi biꞌ yi tetz cyꞌajl, stzun Agur bantz.
5 Yi puntil iꞌtz yi Kajcaw na oc tan chicolcheꞌn yi eꞌ yi choꞌn kꞌuklij chicꞌuꞌl teꞌj.b Baꞌn tzun kꞌukeꞌ kacꞌuꞌl te cyakil yi eꞌchk takleꞌn yi sukiꞌnt taꞌn.
6 Or tzitil quil tzꞌoc stzꞌaꞌpl yi eꞌchk takleꞌn yi na tal iꞌ, na qui cunin batz stzꞌakꞌlok icaws tan makleꞌn iwutz. Na ko yaꞌtz tziban, aẍ wok tzun laꞌj sbneꞌ swutz iꞌ.
7 Iluꞌ inRyosil cob ntziꞌ takleꞌn na chintzan tan jakleꞌn teruꞌ, je yi cob xtxolbileꞌj yi na waj yil takꞌuꞌ swetz te yi ntaxk chinquim:
8 Na waj yil tcyꞌaj lenuꞌ yi eꞌchk laꞌjil tu yi subul nakiꞌn sweꞌj. Qui na waj yil noꞌc tetz ric, nin qui na waj yil noꞌc tetz meꞌbaꞌ, ntin na waj yil takꞌuꞌ yi tajweꞌn swetz.c
9 Na yi kol takꞌuꞌ wiꞌnin inriquil, qui cunin batz tzꞌelponuꞌ te incꞌuꞌl, nin swaleꞌ yi quiꞌc jun Ryos at. Ej nin yi kol takꞌuꞌ meꞌbaꞌil swetz, qui cunin batz nchimben tan alakꞌ, nin tan yi jun xtxolbilaꞌtz tzꞌelpon kꞌejuꞌ waꞌn.
10 Quil cxoꞌc wok tan xochleꞌn quen jun mos swutz yi patrón, na qui cunin batz ẍchiꞌchok cꞌuꞌl yi ajcaw tziteꞌj, nin stkꞌeꞌ icaws.
11 At eꞌ yi na choꞌc tan jisleꞌn chitaj, nin at eꞌ yi qui na cyakꞌ kꞌej chitxuꞌ.
12 At eꞌ yi na cyocsaj quib yi quiꞌc muꞌẍ chipaltil taneꞌn, poro qui na cyaj cyen banleꞌn eꞌchk takleꞌn cachiꞌ cyaꞌn.
13 At eꞌ yi le wutz cyetz cyajtzaꞌkl at wiꞌnin chikꞌej, nin ilenin na chitzan tan telseꞌn chikꞌej yi eꞌ mas.
14 At eꞌ yi chin txuc nin eꞌ tan chibuchleꞌn yi eꞌ meꞌbaꞌ. Yi eꞌaꞌtz, niꞌcuꞌn yi cyeꞌ chi spar, nin yi chicꞌaꞌ, niꞌcuꞌnk chi cchiluꞌ taneꞌn, tan chipoꞌtzeꞌn cuꞌn yi eꞌ meꞌbaꞌ.
15 Ok tuꞌtz kaꞌn yi at cob tal jun sip yi ntin jakleꞌn eꞌchk takleꞌn cyaꞌn: “Na waj mas, na waj mas,” cheꞌch na ban, poro quinin nojsbeꞌn tetz chicꞌuꞌl.
At ox, nka cyaj takleꞌn yi qui nin nojsbeꞌn tetz chicꞌuꞌl, iꞌtz:
16 yi amaꞌl kale na choponeꞌt yi eꞌ almaꞌ, yi xnaꞌn yi qui na jal tal, yi jalaj txꞌotxꞌ yi qui na opon aꞌ teꞌj, tu yi kꞌakꞌ yi qui na icyꞌ paj tan stzꞌeꞌseꞌn alchok eꞌchk takleꞌn.
17 Alchok scyetz yi na el kꞌej yi taj taꞌn, nin yi na xbajtziꞌin te xtxuꞌ yi ja biꞌẍin, baꞌn tcuꞌn yi nink tzꞌel wutz yi junaꞌtz cyakꞌun joj, nin yil baj yi wankil cyaꞌn kuꞌs.
18 At ox nka cyaj takleꞌn yi na neꞌl yab teꞌj, nin qui na pujx waꞌn yi ẍeꞌn na chiban:
19 yi ẍeꞌn na xon jun qꞌuilqꞌuitx tcyaꞌj, yi ẍeꞌn na icyꞌ jun luꞌbaj wi jun cꞌub, yi ẍeꞌn na icyꞌ jun barc wi mar, nin yi ẍeꞌn na xcyeꞌ jun xicy tan moxeꞌn jun xun.
20 Yi tajtzaꞌkl jun xnaꞌn yi wiꞌtz bnol tetz, iꞌtz: yi na witbej tib tu jun yaj, niꞌcuꞌn swutz iꞌ chi yi waꞌaꞌn tuꞌk na ban taneꞌn, na tu na mas tuꞌ stziꞌ, nin na tal: “Quiꞌc na imban, quiꞌc wil teꞌj.”
21 At ox takleꞌn yi chin xoꞌwbil nin, yi na xcyeꞌ tan yuqueꞌn yi txꞌotxꞌ taneꞌn, poro yi cyajiꞌn xtxolbil junawes na xit yi txꞌotxꞌ taꞌn, nin iꞌtz:
22 yi mos yi na oc tetz rey, nin jun yaj yi quiꞌc tajtzaꞌkl yi at wiꞌnin meꞌbiꞌl, poro qui na oc il teꞌj.
23 Nchaꞌtz yi xnaꞌn yi cyaꞌl jun na pekꞌ teꞌj, chin xoꞌwbil nin iꞌ yi na oc chmil, na na tocsaj tib nim. Ej nin jun mos yi na umeꞌ tu yi patrón yi na quim yi txkel, chin xoꞌwbil nin sbneꞌ tan chicaweꞌn yi eꞌ mas mos.
24 At cyaj jilwutz tal neꞌẍ txuc yi mas list eꞌ ẍchiwutz yi eꞌ yaj yi chin tzꞌaknak cuꞌn cyajtzaꞌkl, iꞌtz:
25 yi eꞌ tal snicy, wiꞌnin chixoneꞌn chi jun cꞌoloj sanlar taneꞌn. Quiꞌc chiwalor, poro at cyajtzaꞌkl tan molcheꞌn chiwaꞌ tetz yi tiemp yi quiꞌt jal.
26 Yi eꞌ tal sakꞌaben, yi quiꞌc mas chixoneꞌn tan chicolol quib, poro at cyajtzaꞌkl, na na bnix chisoc xoꞌlak cꞌub, nka xoꞌl txꞌiꞌx, bantz cyaꞌl jun tzꞌopon scyeꞌj tan chibiyleꞌn.
27 Yi eꞌ tal sacꞌ, quiꞌc cyetz cyajcawil, poro at cyajtzaꞌkl yi na cheꞌl tan xoꞌn, na nicyꞌ nin tuꞌ na chixon, chi ik jun cꞌoloj sanlar taneꞌn.
28 Yi eꞌ xim at wiꞌnin cyajtzaꞌkl, na na chixcyeꞌ tan banleꞌn jun paꞌtx tan jaleꞌn chiwaꞌ, nin at chikꞌej taneꞌn, na at eꞌ yi choꞌn najlcheꞌ xe caꞌl jun rey.
29 At ox nka cyaj jilwutz txuc yi qui na chixob, nin tech cuꞌn tib na chinachon teꞌj yi at chikꞌej, nin iꞌtz:
30 yi eꞌ león, yi chin xoꞌwbil nin eꞌ, qui na cheꞌl ojk swutz jun eꞌchk takleꞌn, nka swutz jun wunak;
31 yi eꞌ mam tzoꞌ yi na cyocsaj quib nim, scyuchꞌ yi eꞌ mam chiw yi qui na cyek ẍchiꞌ alchok, scyuchꞌ yi eꞌ rey yi bajxcheꞌ ẍchiwutz yi cyetz chisanlar.
32 Ma jaluꞌ, ko na itocsaj itib nim tu itajtzaꞌkl, nin ko na cxoꞌc wok tan xtxumleꞌn tan banleꞌn jun eꞌchk takleꞌn cachiꞌ, txum wok yi xtxolbileꞌj:
33 kol koꞌc tan ẍchekꞌeꞌn yi lech, tzꞌocpon tetz mantequiy. Nchaꞌtz kol kocsaj kib cham, nin lkoꞌc tan xuxeꞌn junt, tzꞌelpon chichꞌ tkajuꞌ. Na kol koꞌc tan chixuxeꞌn wunak, skaloꞌonk cyaꞌn.