Yi eꞌchk balaj ajtzaꞌkl yi talnak yi rey Lemuel
31
1 Yi eꞌchk balaj ajtzaꞌkl yi talnak Lemuel yi rey tetz Masa. Iꞌtz cobox xtxolbil yi alijt cyen tan yi xtxuꞌ tetz.2 “Aẍ jun cꞌoloj wal, yi choꞌn ncẍitzꞌij sweꞌj. Ja tbit Ryos yi intziꞌ inkul, chaꞌstzun te ja cẍtakꞌ iꞌ swetz. Quiꞌc junt ajtzaꞌkl yi mas balaj swutz yi eꞌchk xtxolbileꞌj yi swaleꞌ tzatz.
3 Or tzawil, qui tzapoꞌtzaj walor awankil scyeꞌjak xnaꞌn, na nicyꞌt nin yi eꞌ rey na chipoꞌtij tan yi jun ajtzaꞌklaꞌtz.
4 Lemuel, bit tzaj yi xtxolbileꞌj: Qui na yub kol tzꞌoc jun rey, nka jun ajcaw tan bajseꞌn win, nka tan xcꞌalaꞌiꞌn.
5 Na kol tzꞌoc aꞌ twiꞌ jun rey, qui cunin batz tzꞌelpon yi ley te cꞌuꞌl, nin tzꞌocpon tan chibuchleꞌn yi eꞌ tal prow meꞌbaꞌ.
6 Na yi xcꞌalaꞌ, na baj cyakꞌun yi eꞌ yi tu na sotz tuꞌ chicꞌuꞌl tan bis.
7 Na yi na baj cyaꞌn, cyakil yi bis yi at tetz cyalmaꞌ, na el te chicꞌuꞌl. Chaꞌstzun te qui na yub kol baj xcꞌalaꞌ tan jun bajxom.
8 Nqueꞌn il tan axconeꞌn tetz chiyolol yi eꞌ tal prow wunak yi cyaꞌl jun na bitan chiyol, nin colweꞌ yi eꞌ tal prow yi cyaꞌl jun na oc il tan chicolcheꞌn.
9 Nqueꞌn bin il tan axconeꞌn tetz chiyolol yi eꞌ meꞌbaꞌ. Cawsweꞌ yi eꞌ yi na chitzan tan chixileꞌn yi eꞌ tal prowaꞌtz,” stzun intxuꞌ banak cyen swetz.
Cobox yol yi na takꞌ chikꞌej yi eꞌ xnaꞌn yi chum balaj nin cyajtzaꞌkl
10 At qꞌuixbel tan jaleꞌn jun xnaꞌn kaꞌn yi jicyuch teꞌj tajtzaꞌkl. Na mas tcuꞌn balaj iꞌ swutz yi eꞌchk balaj uwaj yi wiꞌnin jamel.
11 Yi chmil, nter nin kꞌuklij cꞌuꞌl teꞌj, nin ilenin na jal chimeꞌbiꞌl.
12 Na tan yi jun xnaꞌnaꞌtz, ilenin na jal eꞌchk takleꞌn balaj xe chinajbil.
13 Na jal balaj xiꞌil cneꞌr tu balaj lino taꞌn, nin tzatzin cuꞌn na oc tan banleꞌn beꞌch cyetz.
14 Niꞌcuꞌn iꞌ tu jun aj lijens yi na ben joylaj tan joyleꞌn eꞌchk balaj takleꞌn, nin na ul taꞌn.
15 Jalchan cunin na cꞌas tan chicꞌaꞌcheꞌn yi eꞌ tal, tu cyakil najal.
16 Yi na til jun balaj amaꞌl tetz ujul, na lokꞌ, nin yi na jal muꞌẍ ganans taꞌn, na tawaj mas uva.
17 Chin cꞌascꞌuj nin iꞌ, nin tetz cuꞌn talmaꞌ na oc tan akꞌun.
18 Na oc il iꞌ te yi tetz lijens, nin chin akꞌbalt nin na ujeꞌ tan akꞌun.
19 Iꞌ teꞌn na oc tan banleꞌn yi nokꞌ, yi na xcon taꞌn tan chem.
20 Ilenin na tzan tan quichꞌeyeꞌn yi eꞌ meꞌbaꞌ, scyuchꞌ yi eꞌ yi at tajweꞌn scyetz.
21 Te yi tiemp tetz cheꞌw, qui na bisun iꞌ te yi najal, na cyakil eꞌ at len beꞌch cyetz yi chin pim nin.
22 Iꞌ teꞌn na bnon eꞌchk balaj chitxoꞌ, nin chin wekoꞌn nin tib tan eꞌchk balaj xbuꞌk yi lino cuꞌn.
23 Yi chmil yi jun xnaꞌnaꞌtz at kꞌej, nin iꞌ jun scyeri yi eꞌ bajxom tetz tnum.
24 Ej nin yi txkel yi jun yajaꞌtz, na bnix eꞌchk balaj xbuꞌk taꞌn tan cꞌayeꞌn. Nin na bnix cꞌalbil taꞌn, tu lanaꞌ, tan beneꞌn cꞌaꞌy scyetz yi eꞌ aj lijens.
25 Chin cham nin iꞌ, nin tech cuꞌn tib yi at kꞌej. Nin qui na bisun te yi mbi sbajok ek caꞌp.
26 Puntil cuꞌn na jilon, nin chin putzpuj nin iꞌ tan takꞌleꞌn jun ajtzaꞌkl.
27 Chin list nin iꞌ, na at swutz yi mbi na chiban cyakil yi eꞌ mos yi ateꞌ tuchꞌ. Nin qui na oc tan jopleꞌn wutz junt tan cambal waꞌ.
28 Yi chmil, scyuchꞌ yi eꞌ nitxajil, na cyal yi chum balaj nin iꞌ. Nin je na cyaleꞌj:
29 “At wiꞌnin balaj xnaꞌn, poro ntin cuꞌn aẍ yi mas balaj ẍchixoꞌl cyakil yi eꞌ mas,” cheꞌch tetz.
30 Yi eꞌchk takleꞌn chi taneꞌn uwaj, nin chi taneꞌn tul ẍchimbaj, qui na xcyeꞌ tan lajluchaxeꞌn yi ko baꞌn tajtzaꞌkl jun xun, nka jun xnaꞌn. Nin ko chin yubeꞌn nin wutz jun xun, nka jun xnaꞌn, qui na ẍchaj yi mero tajtzaꞌkl yi ko baꞌn, nka quiꞌ. Poro yi eꞌ xnaꞌn yi baꞌn kakꞌ chikꞌej, iꞌtz yi eꞌ yi na cyek ẍchiꞌ Ryos.
31 Akꞌ wok bin chikꞌej yi eꞌ balaj xnaꞌnaꞌtz ẍchiwutz cyakil yi eꞌ nim juy. Nin baꞌn lkakꞌ chikꞌej te cyakil yi eꞌchk takleꞌn balaj yi na bnix cyaꞌn.