29
1 Alchok scyetz yi chin chꞌinchꞌuj nin tunin iꞌ tan juchleꞌn til, nin qui na tocsaj yi na oc makleꞌn wutz, jun cuꞌn, tzꞌul chan sotzeꞌn swutz. Quiꞌc rmeril yi nink tzꞌel liwr.2 Yi na chicawun yi eꞌ yi jicyuch teꞌj cyajtzaꞌkl, na takꞌ tzatzin scyetz yi eꞌ mas wunak. Poro yi na chicawun yi eꞌ mal nak, cyakil yi eꞌ mas na chitij wiꞌnin qꞌuixcꞌuj.
3 Jun cyꞌajol yi at balaj tajtzaꞌkl, na takꞌ tzatzin scyetz yi eꞌ taj xtxuꞌ. Poro yi eꞌ yi ntin na chitzan tan chijoyleꞌn yi eꞌ xnaꞌn, yi eꞌ wiꞌtz bnol tetz, ẍchitzꞌakeꞌ cyakil yi chimeꞌbiꞌl.
4 Jun wiꞌtz ajcaw yi puntil cuꞌn na cawun, na quiwix yi tnum taꞌn. Poro jun ajcaw yi ntin na tzan tan jeꞌseꞌn mas alcawal, ntin na tzan tan poꞌtzeꞌn yi tnum.
5 Alchok scyetz yi ntin na tzan tan talcheꞌn tetz yi tamiw yi chum balaj nin iꞌ, ntin na tzan tan pitleꞌn nin tul il.
6 Iteꞌn nin yi eꞌchk il yi na ban jun yi chin juntlen nin tajtzaꞌkl, xcyek tan benseꞌn iꞌ tul il. Poro yi eꞌ yi jicyuch teꞌj cyajtzaꞌkl ẍchitzatzink cyeraꞌtz.
7 Na el chitxum yi eꞌ balaj wunak tetz yi eꞌchk takleꞌn yi na sotz chicꞌuꞌl yi eꞌ meꞌbaꞌ teꞌj. Poro yi eꞌ yi chin juntlen nin cyajtzaꞌkl, na cyal yi quiꞌc cyetz tuchꞌ.
8 Yi eꞌ yi ntin na chitzan tan pitleꞌn quen eꞌchk ajtzaꞌkl cachiꞌ le chiwiꞌ wunak, na chitzan tan tocseꞌn kꞌaꞌkl eꞌchk oyintziꞌ. Ma yi eꞌ yi tzꞌaknak cuꞌn cyajtzaꞌkl, na chixcyeꞌ tan chimayseꞌn yi eꞌ wunak.
9 Yi kol tzꞌoc jun yi tzꞌaknak cuꞌn tajtzaꞌkl tan wakꞌ ib tu jun yi chin tzeꞌtzuj nin te xtxumuꞌn, ntin stkꞌeꞌ chiꞌch cꞌuꞌlal tetz. Ej nin chocpon wunak tan xcyꞌakliꞌn teꞌj, nin quil bnix jun eꞌchk takleꞌn balaj tan yi jun wakꞌ ibaꞌtz.
10 Jun biyol nak tu jun yi chin txuc nin, wiꞌnin na chiꞌch chicꞌuꞌl te jun yi jicyuch teꞌj tajtzaꞌkl, nin yi cyajbil iꞌtz yi quimsaꞌn cuꞌnk ẍchiwutz.
11 Yi eꞌ yi juntlen cyajtzaꞌkl, qui na chimak quib tan banleꞌn yi eꞌchk takleꞌn cachiꞌ, ma yi eꞌ yi at balaj cyajtzaꞌkl, na chimak quib teꞌj.
12 Jun ajcaw yi na tocsaj yi eꞌchk laꞌjil yi na aꞌlchij tetz, ntin na tzan tan chipoꞌtzeꞌn yi eꞌ akꞌol tajtzaꞌkl iꞌ.
13 Yi eꞌ yi buchij cheꞌ scyuchꞌ yi eꞌ yi na choꞌc tan chi buchleꞌn, at jun takleꞌn yi na ẍchaj yi niꞌcuꞌn eꞌ, iꞌtz yi Ryos bnol cyetz, nin tan iꞌ na chixmayineꞌt chicabil.a
14 Jun ajcaw yi na cawun penin skꞌil scyeꞌj yi eꞌ meꞌbaꞌ, scawunk teraꞌtz tetz ben kꞌej ben sak.
15 Tan makleꞌn wutz jun nitxaꞌ, tajweꞌn xcon xicyꞌxab. Ej nin tajweꞌn yil kal eꞌchk balaj ajtzaꞌkl tetz. Poro kol kakꞌ amaꞌl tetz tan banleꞌn yi tetz tajbil, tzantzaj tlen tzꞌelpon chitxꞌixl yi taj xtxuꞌ taꞌn.
16 Ko at wiꞌnin eꞌ yi chin juntlen nin cyajtzaꞌkl, na jal wiꞌnin il cꞌol. Poro yi eꞌ yi jicyuch teꞌj cyajtzaꞌkl, squileꞌ yil chiben yi eꞌaꞌtz tul il.
17 Nqueꞌn wok il tan makleꞌn chiwutz yi eꞌ initxaꞌ, qui tzun sotz icꞌuꞌltz scyeꞌj, nin yil xon tiemp, scyakꞌeꞌ tzatzin paz tzitetz.
18 Ko qui na xom jun tnum te tajbil Ryos, quiꞌc balajil yi jun tnumaꞌtz sbneꞌ. Ma yi tnum yi na ban taneꞌn yi tajbil Ryos, na jal tzatzin paz ẍchixoꞌl.
19 Jun esclaw yi qui na ban taneꞌn yi caꞌwl yi tajcawil, quil tocsaj ko yol tuꞌ bajij tetz. Na tbit, poro qui na ban taneꞌn.
20 At rmeril tan kaxcyeweꞌn tan xtxꞌixpeꞌn tajtzaꞌkl jun yi chin tzeꞌtzuj nin te xtxumuꞌn, swutz jun yi qui na xtxum bajx yi mbi na tzan tan yolcheꞌn.b
21 Alchok scyetz yi chin okꞌleꞌn nin wutz yi esclaw iꞌ taꞌn, te yi juyil tzaj, tzantzaj tlen tzꞌelpon xtxum tetz yi ploj mban.
22 Yi eꞌ yi jalcunin na chicyakax, nin yi tu na chipit tuꞌ quib tulak eꞌchk oyintziꞌ, na jal mas oyintziꞌ cyaꞌn, nin wiꞌnin chipaltil at.
23 Na el chikꞌej yi eꞌ yi na cyocsaj quib nim, poro yi eꞌ yi na cyocsaj quib juy, na jal cyetz chikꞌejaꞌtz.c
24 Alchok scyetz yi na oc tan ẍchꞌeyeꞌn jun alkꞌom, ẍchuc teꞌn na poꞌtzaj tib, na quil takꞌ tib tan talcheꞌn yi mero xtxolbil yi mbajij, mpe nink choꞌc tan xoꞌwseꞌn.
25 Yi ko na kaxob scyetz wunak, iꞌtz jun tramp tetz ketz. Poro ko nter nin kꞌuklij kacꞌuꞌl te Kajcaw, tzꞌocpon tzun iꞌ-tz tan kacolcheꞌn.
26 Wiꞌnin wunak na choꞌc il tan joyleꞌn puntil tan jaleꞌn chibalajil swutz yi bajxom tetz yi tnum, poro yi mero bintzi iꞌtz, ntin Kajcaw na akꞌon kabanl.
27 Yi eꞌ balaj wunak, qui na chitxꞌaj yi eꞌchk takleꞌn yi na chiban yi eꞌ mal nak. Nchaꞌtz yi eꞌ mal nakaꞌtz qui na chitxꞌaj yi cyajtzaꞌkl yi eꞌ balaj. Na yi cob jilwutz wunakaꞌtz qui na chicyꞌaj quib squibil quib.